Hesiai Taudia be Mai Anina Bada Hesiai Gaukarana Idia Karaia
1 “Ia hedinarai idia gwauhamata momokani vadaeni bona edia abidadama dainai Basileia ena hesiai gaukara idia karaia mai goada danu, bona abidadama dalana lalonai ma haida idia durudia idia goada noho totona.” Hesiai Gaukara Karaia Totona Ita Hegaegae bukana, rau 57, dekenai hesiai taudia be unai bamona ia gwauraidia. Momokani, iseda hesiai taudia ese lauma dalanai idia hahedinaraia haheitalai be ita ese ita tohotohoa diba. Idia bona elda taudia ida ita gaukara hebou neganai, “unai dala dekenai tauanina be lalokau dekena amo ia tubu daekau noho.”—Ef. 4:16.
2 Kongregesen lalonai hesiai taudia be mai anina bada gaukarana idia karaia. Edia gaukara namodia ibounai mani oi laloa! Idia ese akaun, buka, magasin, sabskripsen, bona teritori mapu idia naridia; atendan gaukara idia karaia, saun idia naria, bona Kingdom Hall idia naria. Haroro Sikuli bona Hesiai Hebou dekenai hereva idia henia. Idia haida be pablik tok idia henia eiava kongregesen ena hebou haida idia naria. Tauanina korikori ena kahana idauidau hegeregerena, hesiai taudia ese ita idia durua gaukaradia idia karaia.—1 Kor. 12:12-26.
3 Haida idia itaia, hesiai taudia be hesiai oreana tamona lalonai mai hemataurai bona lalo-parara danu elda taudia ida idia gaukara hebou neganai, idia ia hagoadaia unai bamona idia karaia totona. (Kol. 2:19) Wiki ta ta lalonai mai abidadama danu edia maduna idia huaia bona ma haida laloa bada karana idia hahedinaraia dainai, idia ese kongregesen idia durua lauma dalanai ia goada ia lao noho totona.
4 Edena bamona ita hahedinaraia diba idia gaukara goadagoada hesiai taudia edia gaukara ita moalelaia? Edia gaukara idauidau do ita diba be namo bona bema idia ura idia ita durua neganai, karaharaga ita durudia be namo. Iseda hereva bona kara amo, ita hadibadia diba ita ese edia gaukara ita moalelaia. (Aon. 15:23) Ita dainai idia gaukara goada taudia edia gaukara ita laloa bada be namo.—1 Tes. 5:12, 13.
5 Dirava ena Hereva ese hesiai taudia edia maduna bona edia kara ia gwauraia. (1 Tim. 3:8-10, 12, 13) Kongregesen ia heau namonamo totona, hesiai taudia edia gaukara be mai anina bada. Unai bamona taudia ibounai be ‘Lohiabada ena gaukara idia karaia goadagoada,’ bona idia ita hagoadaia noho be namo.—1 Kor. 15:58.