Mose Idia Hamauria Dalana

LAULAU dekenai ia tai noho bona inai hahine ena ima kwakikwakina ia dogoatao noho mero maragina mani oi itaia. Inai be Mose. Inai hahine hairaina oi diba, a? Ia be Aigupito ena lohia hahinena ta, Farao ena natuna.

Mose ena sinana ese ena natuna ia hunia ela bona hua toi ia abia, badina ia ura lasi Aigupito taudia ese idia hamasea. To ia diba, ta ese Mose do ia davaria, unai dainai Mose ia hamauria totona inai bamona ia karaia.

Bosea ta ia abia bona ena matu ia koua namonamo, unai amo ranu do ia vareai lasi. Bena bosea lalonai Mose ia udaia bona Naila Sinavaina badinai idia noho ava latadia lalonai ia atoa. Mose ena taihuna, Miriama, ia hamaoroa sisina daudau dekenai ia gini bona do ia vara gauna ia itaia.

Nega sisina murinai Farao ena natuna kekeni be Naila Sinavaina dekenai ia diho ia digu totona. Maoromaoro ava latadia huanai bosea ia itaia. Ena hesiai kekeni ta ia hamaoroa: ‘Oi lao, bona lau dekenai unai bosea oi abia mai.’ Lohia hahinena ese bosea ia kehoa neganai, mero maragi hairaina ia itaia! Mose be ia tai noho bona lohia hahine ese ia hebogahisi henia. Ia ura lasi idia hamasea.

Bena Miriama ia mai. Laulau dekenai oi itaia diba. Miriama ese Farao ena natuna ia nanadaia: ‘Edena bamona, oi ura lau lao Israela hahine ta lau abia bona oi totona inai beibi ia ubua, a?’

Lohia hahine ia gwau: ‘Oibe, mani oi lao.’

Unai dainai Miriama ia heau haraga ena sinana ia hadibaia totona. Mose ena sinana ia mai neganai, lohia hahine ia gwau: ‘Inai mero oi abia lao bona lau totona oi ubua, bona emu davana do lau henia.’

Vadaeni Mose ena sinana ese sibona ena natuna ia naria. Gabeai, Mose ia bada neganai, Farao ena natuna dekenai ia abia lao, bona ia ese ia naria ia sibona ena natuna bamona. Unai dala amo Mose be Farao ena ruma dekenai ia tubu daekau.