Iehova Dekenai Idia Gwauhamata

Israela taudia be Aigupito idia rakatania bona hua rua bamona murinai, Sinai Ororona dekenai idia ginidae bona edia kamepa idia haginia. Mose be ororo dekenai ia daekau bona Iehova ese ia hamaoroa: ‘Lau ese Israela taudia lau hamauria. Bema lau idia kamonai henia bona egu taravatu idia badinaia, idia be egu dava bada kohuna bamona do lau halaoa.’ Mose be ororo amo ia diho bona Iehova ena hereva be Israela taudia dekenai ia gwauraia. Edia haere be dahaka? Idia gwau: ‘Iehova ena hereva ibounai do ai badinaia.’

Mose be ororo dekenai ia daekau lou. Unuseniai, Iehova ia gwau: ‘Dina toi lalonai, oi do lau hereva henia. Taunimanima oi hadibaia Sinai Ororona dekenai do idia daekau lasi.’ Mose ia diho bona Israela taudia ia hamaoroa, Iehova ena hereva kamonai totona do idia hegaegae.

Dina toi murinai, Israela taudia ese ororo ai kevaru bona ori koremana idia itaia. Guba ena boiboi bona kibi ena regena danu idia kamonai. Bena ororo ai Iehova be lahi lalonai ia diho. Israela taudia be idia gari dikadika dainai idia heudeheude. Ororo be ia marere badabada bona kwalahu ese ia koua. Kibi regena be ia bada ia lao. Bena Dirava ia gwau: ‘Lau be Iehova. Namo lasi dirava ma haida umui tomadiho henia.’

Mose be ororo dekenai ia daekau lou, bona Iehova ese ia dekenai taravatu ia henia, unai amo taunimanima ese Dirava tomadiho henia dalana, bona kara maorona badinaia dalana do idia diba. Mose be taravatu ia torea diho bona Israela taudia dekenai ia duahia. Bona idia gwauhamata: ‘Iehova ese ia gwauraia hereva ibounai do ai badinaia.’ Idia be Dirava dekenai gwauhamata idia karaia. To do idia badinaia, a?