Iesu be Mesia ai Ia Lao

Ioane ia haroro ia gwau: ‘Lau ia hereaia tauna ia mai noho.’ Iesu ena mauri lagani be 30 bamona neganai, Galilea amo ia mai Ioridane Sinavai dekenai, unai gabu ai Ioane be taunimanima ia bapatisoa. Iesu ia ura Ioane ese ia do ia bapatisoa, to Ioane ia gwau: ‘Oi lau bapatisoa be namo lasi. To oi ese lau oi bapatisoa be namo.’ Iesu ese Ioane ia hamaoroa: ‘Iehova ia ura oi ese lau oi bapatisoa.’ Unai dainai Ioridane Sinavai ai, Ioane ese ranu lalonai Iesu ia bapatisoa.

Iesu ia bapatiso murinai, ia guriguri. Unai nega ai, guba ia kehoa bona Dirava ena lauma helaga be pune manu bamona ia diho. Bena Iehova be guba amo ia hereva: “Oi be egu Natuna, egu lalokau; Oi lau lalonamo henia.”

Iehova ena lauma helaga be Iesu latanai ia diho neganai, ia be Keriso, eiava Mesia ai ia lao. Hari Iesu be tanobada ai Iehova ese ia dekenai ia henia gaukarana do ia matamaia.

Iesu ia bapatiso murinai, maoromaoro ia lao taunimanima lasi gabuna dekenai dina 40 ia noho. Ia giroa lou neganai, Ioane itaia totona ia lao. Iesu be Ioane dekenai ia raka mai neganai, Ioane ia gwau: ‘Dirava ena Mamoe Natuna inai, ia ese tanobada ena kara dika do ia kokia.’ Unai hereva amo Ioane ese taunimanima ia hadibaia Iesu be Mesia. Iesu be taunimanima lasi gabuna ai ia noho neganai, oi diba dahaka ia vara? Mani unai ita itaia.