Ioane be Dala Ia Hegaegaelaia

Sekaraia bona Elisabeta edia natuna Ioane ia bada neganai, peroveta tauna ai ia lao. Iehova ese Ioane ia gaukaralaia, unai amo taunimanima ia hadibaia Mesia be ia mai noho. Sinagoga eiava taoni ai ia haroro lasi, to taunimanima momo lasi gabunai ia haroro. Taunimanima be Ierusalema bona Iudea ena gabu ibounai amo idia mai Ioane amo diba idia abia totona. Ia ese idia ia hadibaia Dirava hamoalea totona, kara dikadia idia rakatania be namo. Ioane ena hereva idia kamonai taudia momo be edia kara dika amo idia helalo-kerehai, bona Ioridane Sinavaina ai Ioane ese idia ia bapatisoa.

Ioane be kohu momo lasi maurina ia noholaia. Ena dabua be kamelo ena huina amo idia karaia bona kwadi bona hani ia ania. Taunimanima idia ura diba Ioane be daika. Hekokoroku Farisea taudia bona Sadukea taudia danu idia mai ia itaia totona. Ioane ese idia ia hamaoroa: ‘Emui kara umui haidaua be namo bona umui helalo-kerehai. Namo lasi umui laloa umui be Aberahamo ena natudia dainai umui be spesel. Unai ese ia hahedinaraia lasi umui be Dirava ena natudia.’

Momo idia mai Ioane dekenai bona idia henanadai: ‘Dirava ai hamoalea totona dahaka ai karaia be namo?’ Ioane be idia dekenai ia gwau: ‘Bema mai emu kouti dabua rua, ta be kouti lasi tauna dekenai oi henia.’ Unai bamona ia hereva ena badina oi diba, a? Ia ura do idia diba, Dirava hamoalea totona, taunimanima idia lalokau henia be namo.

Ioane ese takisi gogoa taudia ia hamaoroa: ‘Umui kara momokani bona taunimanima umui koia lasi.’ Tuari taudia ia hamaoroa: ‘Lalo-ani moni abia dae lasi eiava hereva koikoi lasi.’

Hahelaga taudia bona Levi taudia idia mai bona Ioane idia nanadaia: ‘Oi be daika? Taunimanima ibounai idia ura diba.’ Ioane ia gwau: ‘Lau be taunimanima momo lasi gabuna ai ia boiboi noho gadona, Iehova dekenai taunimanima lau hakaua lao, Isaia ena peroveta hereva hegeregerena.’

Taunimanima be Ioane ena hadibaia hereva idia ura henia. Momo idia laloa Ioane be Mesia. To idia ia hamaoroa: ‘Lau ia hereaia tauna be ia mai noho. Lau be hegeregere lasi ena sandolo lau kokia totona. Lau be ranu amo umui lau bapatisoa, to ia ese lauma helaga amo umui do ia bapatisoa.’