Iesu be Hoa Karadia Momo Ia Karaia

Iesu be tanobada dekenai ia mai, Dirava ena Basileia ena sivarai namona ia harorolaia totona. Iehova ese Iesu dekenai lauma helaga ia henia, hoa karadia ia karaia totona, unai amo King ai ia lao neganai ia karaia gaudia ia hahedinaraia. Gorere idauidau ia hanamoa diba. Ia lao gabudia ibounai dekenai, gorere taudia idia mai bona edia gorere ia hanamoa. Matakepulu taudia idia itaia, taia kudima taudia idia kamonai, paralais taudia idia raka lou, bona demoni ese ia biagua taudia ia ruhaia. Ena be iena dabua ena rimuna sibona idia dogoatao, to edia gorere ia ore. Ia lao gabudia dekenai, taunimanima be ia idia badinaia. Ena be ia ura sibona do ia noho, to taunimanima idia mai neganai, ia dadaraia lasi.

Nega ta, taunimanima ese Iesu ia noho rumana dekenai paralais tauna ta idia abia mai. To ruma ia honu dainai idia vareai be auka. Unai dainai guhi ai matu ta idia karaia bona gorere tauna idia hadihoa. Bena Iesu ese gorere tauna ia hamaoroa: ‘Oi toreisi bona oi raka.’ Ia raka neganai, taunimanima be idia hoa.

Nega ma ta ai, Iesu be hanua ta lalonai ia vareai, bona tatau 10 be mai edia lepera gorere, idia be daudau amo idia gini bona idia boiboi: ‘Iesu e, mani ai oi durua!’ Unai negadia ai, lepera taudia be taunimanima kahirakahira do idia mai lasi. Iesu ese unai tatau ia hamaoroa dubu helaga dekenai do idia lao, Iehova ena Taravatu hegeregerena. Dala ai idia lao noho lalonai edia lepera gorere ia ore. Idia 10 amo tamona sibona ia giroa lou Iesu dekenai bona ia tanikiu henia, bona Dirava ia hanamoa.

Hahine ta be lagani 12 lalonai ia gorere bona ia ura dikadika do ia namo. Hutuma edia murinai amo ia mai bona Iesu ena dabua rimuna ia dogoatao. Maoromaoro, ena gorere ia ore. Iesu ia henanadai: “Daika ese egu dabua ia dogoatao?” Hahine be ia gari, to ia mai bona Iesu dekenai sibona ia gwauraia hedinarai. Iesu ese ia hagoadaia bona ia gwau: ‘Natugu e, mai maino ida oi lao.’

Ofesa tauna ladana Iairo be Iesu ia noia: ‘Egu ruma dekenai oi mai! Egu natuna kekeni ia gorere bada.’ To Iesu ia do ginidae lasi neganai, kekeni maragina be ia mase. Iesu ia ginidae neganai, ia itaia taunimanima momo be famili ida idia noho bona idia taitai. Iesu ia gwau: ‘Umui taitai lasi; kekeni be ia mahuta sibona.’ Bena kekeni ena imana ia dogoatao bona ia gwau: “Kekeni e, oi toreisi!” Maoromaoro ia toreisi, bona Iesu ese ena tama sina ia hamaoroa ia dekenai aniani do idia henia. Tama sina edia hemami mani oi laloa!