LESENI 03
Baibel Ena Hereva Oi Abia Dae Diba, A?
Baibel ese gwauhamata namodia bona sisiba hereva momo ia henia. Reana oi ura Baibel ese ia hadibaia gaudia oi diba, to reana badina haida dainai unai bamona oi karaia lasi. Unai buka gunana ena gwauhamata bona sisiba herevadia oi abia dae diba, a? Baibel ia gwau hari bona vaira negana ai mauri oi moalelaia diba, unai oi abia dae, a? Taunimanima milioni momo be unai idia abia dae. Mani ita itaia, bema oi danu be unai do oi abia dae.
1. Baibel ai idia noho sivarai be momokani, a?
Baibel ai idia noho sivarai be “hereva momokani bona maorodia.” (Hadibaia Tauna 12:10) Idia vara gaudia bona taunimanima ia herevalaia. (Luka 1:3; 3:1, 2 duahia.) Histori idia stadilaia taudia bona akioleji taudia be Baibel ese ia herevalaia deit, taunimanima, gabu, bona idia vara gaudia idia hamomokania.
2. Dahaka dainai Baibel ita abidadama henia diba, ena be ia be buka gunana?
Dala momo ai, Baibel be vaira nega ai do idia vara gaudia ia herevalaia guna. Hegeregere, saiens gaudia ia herevalaia danu. Baibel idia torea neganai, ia herevalaia saiens gaudia be momo ese idia abia dae lasi. To hari, saiens taudia ese idia hamomokania Baibel ena hereva be momokani. Bona ena hereva “idia abidadama henia diba, hari ela bona hanaihanai.”—Salamo 111:8.
3. Dahaka dainai Baibel ese vaira nega ia herevalaia karana ita abidadama henia diba?
Baibel ese “idia do vara lasi gaudia” ia perovetalaia.a (Isaia 46:10) Idaunegai ia perovetalaia gaudia ibounai idia vara momokani. Danu, inai nega ai idia vara gaudia ia perovetalaia. Inai leseni ai, Baibel ese ia perovetalaia gaudia haida do ita herevalaia. Bona ia gwauraia gaudia be momokani!
DIBA MA HAIDA ABIA
Hari saiens ese Baibel ena hereva ia hamomokania dalana, bona ena peroveta herevadia idia vara momokani dalana oi tahua.
4. Saiens ese Baibel ena hereva ia hamomokania
Idaunegai, taunimanima momo idia abia dae tanobada be gau ta latanai ia noho. VIDIO itaia.
Lagani 3,500 gunanai Iobu bukana ese ia gwauraia gauna ita laloa. Iobu 26:7 duahia, bena inai henanadai herevalaia:
Dahaka dainai tanobada be “gau ta latanai ia noho lasi” be hoa gauna?
Lagani 200 bamona murinai, ranu ena heau dalana (water cycle) idia dibaia namonamo. To Baibel ese lagani 3,500 gunanai ia gwauraia gauna oi laloa. Iobu 36:27, 28 duahia, bena inai henanadai herevalaia:
Dahaka dainai Baibel ese auka lasi dalanai ranu ena heau dalana ia herevalaia karana be hoa gauna?
Oi duahia siridia ese oi idia hagoadaia Baibel oi abidadama henia totona, a?
5. Baibel ese do idia vara mai anina bada gaudia ia gwauraia
Isaia 44:27–45:2 duahia, bena inai henanadai herevalaia:
Lagani 200 gunanai Baibel ese dahaka ia perovetalaia guna, bena Babulonia ia moru?
Histori ese ia hamomokania lagani 540 bamona gunanai, Iesu ia do vara lasi neganai, Kurese, Parasa ena King bona ena tuari taudia ese Babulonia idia abia. Idia ese Babulonia ia gimaia sinavai ena aru dalana idia haidaua. Bena siti ena geiti be ia kehoa dainai idia vareai neganai, idia tuari lasi bona siti idia abia. Hari, lagani 2,500 mai kahana idia ore vadaeni, Babulonia be ia noho kava. Mani Baibel ese unai ia perovetalaia dalana oi itaia.
Isaia 13:19, 20 duahia, bena inai henanadai herevalaia:
Babulonia dekenai ia vara gauna ese edena dala ai inai peroveta herevana ia hagugurua?
Hari Iraq dekenai Babulonia ia noho kava
6. Baibel ese hari inai negai idia vara gaudia ia perovetalaia
Baibel ia gwau ita be “dina gabedia” ai ita noho. (2 Timoteo 3:1) Mani Baibel ese iseda nega ia perovetalaia dalana oi itaia.
Mataio 24:6, 7 duahia, bena inai henanadai herevalaia:
Baibel ia gwau dina gabedia ai dahaka gaudia do idia vara?
Timoteo Iharuana 3:1-5 duahia, bena inai henanadai herevalaia:
Baibel ia gwau dina gabedia ai taunimanima momo edia kara be edena bamona?
Hari inai negai edena kara haida oi itaia?
HAIDA IDIA GWAU: “Baibel be sene bona idaunegai sivaraidia ia gwauraia bukana.”
Dahaka dainai oi abia dae momokani, Baibel ita abidadama henia diba?
POINT BADANA
Histori, saiens, bona peroveta herevadia ese idia hahedinaraia Baibel ena hereva oi abia dae diba.
Riviu
Baibel ai idia noho sivarai be momokani, a?
Edena dala haida ai Baibel bona saiens edia hereva be hegeregere?
Oi laloa Baibel ese vaira nega ai do idia vara gaudia ia herevalaia, a? Dahaka dainai unai bamona oi haere?
REFERENS ITAIA
Saien dalanai Baibel ena hereva be maoro, a?
“Saiens ese Baibel Ena Hereva Ia Hamomokania, A?” (Websait atikol)
Dahaka gaudia ese idia hamomokania “dina gabedia ai” ita noho?
“Idia Guguru Noho Baibel Ena Peroveta Herevadia 6” (Gima Kohorona, May 1, 2011)
Baibel ese Grik Basileiana totona ia perovetalaia gaudia idia vara momokani dalana dibaia.
Baibel ena peroveta herevadia ese tau ta ia durua Baibel ia laloa dalana do oi itaia.
“Lau Abia Dae, Dirava Ia Noho Lasi” (Gima Kohorona No. 5 2017)
a Peroveta herevadia be Dirava amo ia mai herevadia, vaira nega ai do idia vara gaudia ia herevalaia.