Mase Taudia Idia Mauri Noho A? Dirava ena Haere

SOUTHERN Africa dekenai, peleini maragina ta mai ena gui taudia rua–taria tauna mai ena natuna kekenina, ena mauri laganidia be 12–be siti ta amo ia roho daekau. Ia roho lao lalonai gau ta ia dika, unai dainai taria tauna ia ura peleini ia hadihoa, to unai bamona ia karaia toho neganai, peleini ia moru bena ruaosi idia mase.

Taria tauna ena adavana, Betty, ia gwau: “Iehova Dirava sibona ese lauegu lalohisihisi bona lalo-hekwarahi ia diba.” Edena bamona ia haheauka diba? Ia gwau: “Lau guriguri loulou bona lau guriguri goadagoada, Dirava ese haheauka bona goada lau do ia henia totona, unai amo ma haida do lau durudia diba, idia danu do idia haheauka totona.” Betty ena lalona hagoadaia gaudia badadia be, Dirava ena hereva mase taudia edia noho dekenai bona toreisi lou gwauhamatana.

Dirava ese mase taudia edena bamona ia gwauraidia? Bible ia gwau: “Mase taudia be gau ta idia diba lasi.” (Kohelete 9:5) Mase taudia be lalohadai lasi. Vadaeni, dahaka dainai taunimanima momo idia laloa mase taudia idia hereva diba? Badina be idau negai ia vara koikoi herevana badana ta ese ia koidia!

Koikoi Herevana

Inai koikoi herevana ia vara dalana be Bible buka Genese lalonai ia gwauraia hedinarai; ia gwau: “To kara namona bona kara dikana hadibaia au ena huahua oi ania lasi, badina be inai huahua oi ania dina dekenai do oi mase momokani.” (Genese 2:17) Iehova Dirava be unai bamona ia hereva tau ginigunana, Adam, dekenai. To Genese 3:1-4 ena hereva, mani oi itaia. Unuseniai Satana ese gaigai amo Eva ia henia, ena lalona ia ania Dirava ia gwau-edeede henia totona. Ia gwau: “Inai be momokani lasi, dohore umui mase lasi.” unai hereva amo Satana ese Dirava ena hereva ia utua. Ia ese koikoi herevana ginigunana ia gwauraia, unai amo “ia be oi koikoi ibounai edia tamana” ai ia lao. —Ioane 8:44; Apokalupo 12:9.

To Adam bona Eva idia mase vadaeni, bona ma taunimanima milion momo danu idia mase vadaeni. Edena hereva amo koikoi tauna Satana ese unai ia gwauraia hedinarai sibona ena hereva hamomokania totona? Gabeai lalohadai ta ia havaraia, ia gwau, ena be tauanina ia mase, to gau ta ia mauri noho. Idau negai tomadiho oredia ese unai lalohadai idia abia dae bona ia be edia hahediba herevadia ta ai ia lao bona Greek taudia ese unai lalohadai idia abia dae bona idia hadibaia danu. Unai dainai, tanobada hegegemadai taunimanima momo idia laloa idia be mai edia lauma tauanidia, mase diba lasi gaudia. Taunimanima momo idia laloa edia lalokau taudia, idia mase vadaeni taudia unai, be gabu ta ai idia do mauri noho, unai dainai unai hahediba herevana ese edia lalona ia hagoadaia. To, henanadai badana be inai: Unai hereva be momokani a?

Oi be mai emu Mase Diba Lasi Lauma Tauanina A?

Taravatu Matamatana lalonai nega haida aposetolo taudia ese mase diba lasi taudia idia herevalaidia. Hegeregere, 1 Timoteo 6:15, 16 (NW) ai, aposetolo Paulo ese Iesu Keriso ia herevalaia, ia gwau: “Ia be king iboudiai edia King, bona lohia iboudiai edia Lohia. Ia sibona ia mase diba lasi.” Edena dala amo Iesu be ma “king” bona bona ma “lohia” iboudiai amo ia idau? Ia mase diba lasi, to idia mase diba.

Momokani, Keriso ida guba lalonai do idia lohia hebou taudia ese mauri hanaihanai do idia abia. (1 Petro 1:3, 4) Unai dainai 1 Korinto 15:53, 54 ia gwau: “Bona do ia mase diba gauna ese mase diba lasi gauna do ia halaoa. . . . Bona ia vara neganai, Buka Helaga ena hereva ta be do ia momokani vadaeni, hereva ia gwau, ‘Dirava ese mase ia haorea.’” Oi itaia, unai siri ia gwau “mase diba lasi gauna do ia halaoa.” Unai davana namona be Dirava ese ia abia hidi kamonai Keristen taudia ia henidia. Taunimanima oredia ese unai ahuna idia abia Lasi.

Danu, Bible ia gwau lasi Dirava ese taunimanima ia havaraia neganai, lauma tauanina be ia lalonai ia atoa vareai. Lasi, to ia gwau: “Bona Iehova Dirava ese taunimanima tano ena kahu amo ia karaia, bona mauri ena laga ena udu baubau lalonai ia hiriria vareai, vadaeni taunimanima be mauri tauna ia karaia vadaeni.”—Genese 2:7; 1 Korinto 15:45 itaia.

Ita lalonai be mase diba lasi lauma tauanina idia noho lasi, unai dainai ita mase neganai, dahaka ia vara ita dekenai? Ita “mahuta” badina Keriso ena boubou gauna amo dala ia kehoa ita toreisi lou totona. (1 Korinto 15:22) Lasaro ia mase neganai, Iesu ia gwau: “Lau lao, do lau haoa.” Bena ena hereva ena anina ia gwauraia hedinarai, ia gwau: “Lasaro ia mase vadaeni.” (Ioane 11:11-14) Paulo danu ese “mase dekenai idia mahuta taudia” ia gwauraidia. (1 Tesalonika 4:13, 14; 1 Korinto 15:20) Vadaeni, bema mase taudia idia mahuta noho . . .

Do Idia Noga A?

Inai sivarai mani oi laloa: Taunimanima momo be ororo matuna ta vairanai idia hebou, Betania hanua dekenai, Ierusalem kahirakahira dekenai. Iesu be varani vanegai ia mase tauna Lasaro ena taihuna ruaosi Maria bona Mareta, ida idia gini hebou. Lasaro ena mase tauanina be unai kohua lalonai idia atoa vadaeni bona nadi badana amo ena iduara idia koua vadaeni. Iesu ia gwau: “Nadi umui kokia.” To Mareta ia gwau: “Lohiabada e, ia bodaga vadaeni, badina be dina 4 ia mase vadaeni.” Vadaeni Iesu ia guriguri, bena ia boiboi badabada, ia gwau: “Lasaro e, oi mai murimuri dekenai.” Vadaeni, Lasaro ia raka lasi! (Ioane 11:38-44) Hebou taudia, Maria bona Mareta danu, idia hoa maragi lasi bona idia moale bada herea.

Bema unai dina 4 lalodiai Lasaro be ia mauri noho, ia ese idia iboudiai dekenai unai ia gwauraia hedinarai, ani? To ia mase noho negana ia sivarailaia lasi, bona ma haida ese idia sivarailaia lasi; unai dainai ita diba Bible ena hereva be momokani; ia gwau: “Mase taudia be gau ta idia diba lasi.”—Kohelete 9:5.

Lasaro ena sivarai be ma tau ta ena sivarai hegeregerena. Hanua ta, ladana Nain dekenai Iesu ese taunimanima momo ia davaridia, idia ese mase tauna idia huaia lao guria totona. Iesu ia gwau: “Uhau tauna e, lau hereva henia oi dekenai, oi toreisi.” Bena dahaka ia vara? “Mase tauna ia helai, ia hereva.” (Luka 7:11-17) To, hari tauhau ese mase taudia idia lao henia gabuna ta ia herevalaia a? Lasi, badina ia mase momokani.

Iesu, Paulo, Petro, Elia, bona Elisaia ese mase taudia haida idia hatoredia isi lou. To idia toreisi lou taudia ta lasi ese mauri, mase murinai ia abia maurina, ia herevalaia lasi.

Unai hoa karadia ese idia hahedinaraia, idia mase vadaeni taudia edia mauri lou dalana tamona be toreisi lou dalana amo. Idia momo do idia toreisi lou bona Dirava ena Basileia henunai, tanobada dekenai do idia mauri lou. Iesu ia gwau: “Inai kara dekenai do umui hoa lasi. Badina be nega ta do ia mai, mase guria gabu dekenai idia noho taudia ibounai ese [lauegu] gadona do idia kamonai. Vadaeni guria gabu dekena amo do idia toreisi.” (Ioane 5:28, 29) Do idia toreisi lou taudia do idia moale dikadika, badina idia be mai edia dala, Keriso ena Basileia ena siahu henunai do idia mauri lou diba, Keriso be ena lagani 1,000 lalodiai do ia lohia neganai. (Apokalupo 20:4, 6) Toreisi lou gwauhamatana ese ia hamomokania mase taudia be idia mauri noho lasi. Taunimanima idia toreisi lou totona, namona be idia mase momokani guna.

Reana Haida Idia Henanadai . . .

To babalau taudia bona ma taunimanima haida idia gwau idia be mase taudia edia hereva haida idia kamonai vadaeni. Unai ese ia hamomokania mase taudia idia mauri noho, a? Lasi. Satana be mai ena tiriki karadia momo, nega momo “diari aneruna ena kopina ia atoa.” (2 Korinto 11:14) Ia bona ena demoni be mase taudia edia. laulau idia karaia diba, bona nega: momo edia lauma bamona idia hedinarai! Unai dainai Iehova ena taravatu Israel taudia dekenai be inai: “Lauma danu ia’. herevahereva tauna . . . eiava mase taudia nanadaidia tauna . . . idia dika rohoroho Iehova vairanai.” (Deuteronomi 18:10-12). Danu, Iehova ia gwau meamea bona babalau karadia idia karaia noho taudia ese “Dirava ena Basileia do idia abia lasi,” to do ia hamasedia ore.—Galatia 5:19-21; Apocalupo 21:8.

Taunimanima haida idia gwau, idia maserea neganai, hegeregere kahirakahira idia mase neganai, hoa gaudia haida be idia dekenai idia vara. Unai ese ia hamomokania idia mase neganai, edia lauma tauanina ese edia tauanina ia rakatania, a? Tau ta, ladana George Gallup, Jr., ese United States lalonai taunimanima edia lalohadai hari hereva dekenai ia tahua bona edia lalohadai be buka ta, ladana Adventures in Immortality dekenai ia torea. Doketa bona saiens taudia ia henanadai henidia neganai, idia gwau idia mase gwauraia taudia dekenai idia vara gaudia sivaraidia idia abia dae diba lasi. Tauanina ia gaukara dalana ia diba momo tauna ta, Maryland dekenai, ia gwau: “Idia dekenai idia vara gaudia be idia vara badina edia harana idia gaukara namonamo lasi dainai . . . Bema oiemu harana oi naria namonamo lasi, kara idauidau ia karaia diba–drag haida ese taunimanima edia harana ia hakavaia diba bena do idia nihi bona hoa gaudia idauidau do idia itaia.” Harana ia gaukara dalana ia diba momo tauna, Ohio dekenai, ia gwau: “Idia dekenai idia vara gaudia be idia vara momokani lasi gaudia, to idia be idia nihilaia gaudia sibodia.” Saiens tauna ta, Michigan dekenai, ia gwau: “Gau dikana ta ia vara dainai idia gari bena inai gaudia idia nihilaidia.”

Hari tau, Gallup, ese taunimanima edia lalohadai hari hereva dekenai ia tahua murinai, ia gwau kahirakahira idia mase neganai idia dekenai idia vara gaudia ese “idia hamomokania lasi taunimanima be mai edia mase diba lasi lauma tauanina eiava mase murinai idia mauri noho.” Ma ia gwau: “Reana idia be taunimanima edia harana sibona dekenai idia vara gaudia, idia lalohadailaia sibona, badina idia dekenai ia vara gauna dikana idia laloa momo dainai. Danu, ia laloa, tomadiho idia laloa namonamo taudia haida do idia gwau unai bamona gaudia be “demoni ese idia havaraia taunimanima koidia totona.” Iehova Dirava ena hereva idau negai be do momokani; ia gwau: “Mase taudia be gau ta idia diba lasi.”—Kohelete 9:5.

Edena Bamona Oi Karaia be Namo?

Satana ena hereva koikoina ginigunana be, “dohore umui mase lasi.” (Genese 3:1-5) Bema unai hereva be lalohadai ta eiava hahediba herevana ta ena badina, namona be oi naria namonamo. Dirava ena hereva oi abia dae; ia gwau, tau ta ia mase neganai “ena lalohadai idia ore.” (Salamo 146:4) Taunimanima momo be Dirava ena Basileia ena mai idia gurigurilaia. Unai Basileia do ia lohia neganai, mase dekenai idia mahuta taudia do idia mauri lou, badina Bible ia gwau: “Mase taudia dohore idia toreisi lou, kara maoromaoro taudia, bona kara maoromaoro lasi taudia danu.”—Kara 24:15; Mataio 6:9, 10.

Gorere hahinena, rau 3 dekenai ai herevalaia, ese Dirava ena hereva, mase taudia be edena bamona bona demoni edia koikoi karadia be dahaka herevadia, ia kamonai neganai ia moale dikadika. Ena gana bona ena babalau gaudia idauidau ia hadikadia bona ia negedia, bena dina haida murinai ena mamina be ia namo ia lao. Hari, unai hahine ese ma taunimanima haida ia durudia, idia danu be demoni tomadiho henidia karana amo idia siri totona.

Unai vabu, ena tau bona ena natuna be peleini ia moru neganai idia mase, ena lalona hagoadaia gauna be inai: Mase taudia be gau ta idia diba lasi dainai, nega be anina lasi idia dekenai. Unai dainai tanobada paradaisona lalonai Dirava ena Basileia henunai do idia noga neganai, edia mase negana bona edia toreisi negana be tamona! Ia moale badina ma taunimanima haida danu ia durudia, idia danu do idia diba kahirakahira “Iehova ese edia taitai ranu ibounai edia matana amo do ia dahua ore.” (Isaia 25:8) Mai ena moale ida vaira negana ia naria noho, badina unai neganai ena lalokau taudia be do idia toreisi lou bona do idia mauri lou.

[Footnotes]

Buklet ta, ladana LAUMA Ita Idia Durua? eiava Ita Idia Hadika?, Watchtower Bible and Tract Society of New York, Inc. ese ia printaia gauna, mani oi itaia danu.