Hahine ena Dagi Namona

“HAHINE be tau hegeregerena ai ia lao ena namo be dahaka?” Unai henanadai be buka ta, ladana Psychology Today, ena hereva ta ena sinado. Taunimanima edia lalona tahua hahinena, Carol Gilligan, be unai buka lalonai ia gwau: “Hahine ia gaukara, tau ia ubua, ia naria, bona ia durua totona, to unai gaukara amo heduru ia abia danu. Hahine ese tatau idia durudia, to tatau ese . . . edia heduru idia laloa maragi.”

Hari inai negai hahine momo idia laloa tatau idia maumauraidia be maoro, badina be hahine idia lalodia maragi, bona idia kara maoromaoro henidia lasi dainai. Momokani, tanobada hegegemadai sibodia edia namo idia tahua tataudia ese hahine idia lalodia maragi bona edia namo idia tahua lasi. Gabu haida lalodiai unai bamona lalohadai bona kara idia bada. Haida idia gwau, edia kastom hegeregerena tau be itaiai, hahine be henuai. Ma haida idia gwau unai be Bible ena hereva hegeregerena; Taravatu Gunana bona Taravatu Matamatana (Heberu Revarevadia bona Greek Revarevadia) idia torea taudia ese hahine idia laloa bada lasi. Unai be momokani a?

Dirava ena Ura Hahine Dekenai

Bible ia gwau: “Dirava ese taunimanima ia karaia, ia sibona ena laulau bamona, . . . Tau bona hahine ia karaia.” Dahaka dainai tau bona hahine ia karaia? Unai amo idia ese Dirava ena hahegani ginigunana idia badinaia diba; ia gwau: “Dirava ese ia hanamodia, idia dekenai ia gwau, Emui bese umui havaraia, do umui hutuma. Tanobada ena gabu ibounai dekenai umui noho, bona umui biaguna. . . . bona mauri gaudia tanobada dekenai idia marere gaudia umui biaguna.”—Genese 1:27, 28.

Oi itaia, unai hahegani be “idia,” tau bona hahine, dekediai ia henia. Idia ruaosi edia gaukara be, Dirava ena ura hegeregerena, edia natudia amo tanobada do idia hahonua, tanobada do idia biagua bona animal do idia biagudia. Unai idia karaia totona, namona be idia ruaosi be diba idia abia bona lauma gaudia idia laloa bada, bona idia ruaosi be mai edia dala unai do idia karaia.

Momokani, Dirava ese gaukara bona maduna idauidau tau bona hahine ia henidia. Adam ese animal idauidau edia kara ia tahua bona edia ladadia ia hatoa neganai, ia be tau goevadaena bona gau ta dekenai ia dabu lasi, ia hegeregere momokani unai gaukara do ia karaia. (Genese 2:19, 20) To ia sibona be hegeregere lasi, tanobada be ena bese amo do ia hahonua, unai dainai namona be hahine ta ia abia. Vadaeni, “Iehova Dirava ma ia gwau, Unai tau sibona ia noho be ia namo lasi, lau ese durua tauna ia bamona do lau karaia.”—Genese 2:18.

Bible ia gwau Dirava ese unai hahine ia karaia “durua tauna” bamona. Dirava ena ura be hahine ese tau do ia durua bona do idia gaukara hebou ‘tanobada idia hahonua bona idia biagua’ totona.

Dirava ena Ura Idia Mogea

Bible ia gwau, “Dirava ese Adam ia karaia guna, Heva be gabeai.” (1 Timoteo 2:13) Ia gwau “hahine ena tauanina be goada herea lasi,” bona tau be mai kwarana (Keriso), unai hegeregerena “hahine edia kwarana be edia tau.”—1 Petro 3:7; 1 Korinto 11:3.

Matamana neganai Dirava ese hahine tamona tau ia henia. Ia ura headava be unai bamona. (Genese 2:24) Dirava ese tau ia karaia guna bona ia ura tau ese tomadiho karana bona Dirava ena ura tanobada hahonua bona biagua totona do ia gunalaia. Anina be tau ese ruma bese do ia biagua, to unai do ia karaia neganai, ia ese ena adavana do ia durua. Hahine ese ena natudia do ia hadibadia bona do ia sisiba henidia neganai, ena tau ese do ia durua diba.—Efeso 6:1-4.

Taunimanima idia goevadae lasi to idia be mai edia kara dika dainai, unai ese tau bona hahine edia noho hebou karana ia hadikaia. (Roma 7:14-20) Sibodia edia namo idia tahua tataudia ese edia kwara dagina idia gaukaralaia namonamo lasi dainai, idau nega amo ema bona hari, hahine ese momo ese hisihisi bada idia ania. Iehova ia diba kara dika ese unai bamona kara do ia havaraia, unai dainai, Eva ia gwau-edeede murinai, ia gwau: “Oiemu adavana do ese oi do ia biagua.” (Genese 3:16) Dala maorona ai do ia biagua lasi, to do ia karaia auka henia. Unai ese ia hahedinaraia tau bona hahine danu be mai edia kara dika, badina nega haida tau ena kara be auka badina hahine ese ena tau ena kwara dagina ia abia toho.

Hahine edia Noho Mose ena Taravatu Henunai

Iehova ese Israel taudia ia henidia Taravatuna ese rami-hebou kekenidia ia naridia. (Esodo 22:16) Dirava ia ura tatau ese edia adavadia do idia “lalokau” henidia, do idia “rakatanidia” lasi. (Deuteronomi 13:6; Malaki 2:14, 15) Hahine be hua gorerena ia abia neganai namona be ena tau ese ia matauraia bona ia ida idia mahuta hebou lasi. (Levitiko 18:19) Hahine eiava kekeni idia hadikadia be taravatu.—Levitiko 18:8-17.

Buka ta, ladana Religion and Sexism lalonai, Phyllis Bird ia gwau: “Israel taudia edia taravatu be auka headava karana bona matabodaga karadia dekenai, to ma bese taudia idaudia edia taravatu be auka lasi unai kara dekenai . . . Israel taudia edia lalohadai headava karana dekenai bona unai kara ena taravatu idia hadikaia taudia idia panisidia auka karana be idau, idia kahirakahira idia noho besedia (Kanana taudia danu) edia kara hegeregeredia lasi . . . Israel dekenai matabodaga karadia be tomadiho hadikaia karadia. Kerere tauna sibona lasi, to hanua taudia iboudiai ese unai dika idia laloa.” Unai taravatu aukadia ese hahine edia noho ia naria.

Israel dekenai, taravatu be tamona tau bona hahine dekenai. Bema idia heudahanai, o varavarana ta ida headava karana idia karaia, o animal ta ida headava karana idia karaia, eiava ma kara dika ta idia karaia, edia davana be tamona. (Levitiko18:6, 23; 20:10-12) Sabati taravatuna badinaia karana amo idia vara hahenamo, aria, Nasiri gwauhamatana, bona ma taravatu momo edia anina be tamona tatau bona hahine dekediai.—Esodo 20:10; Numera 6:2; Deuteronomi 12:18; 16:11-14.

Bible bukana Hereva Lada-isidia ese “hahine namona,” “mai darana hahinena,” bona “aonega hahinena” ia hanamoa. (Hereva Lada-isidia 12:4; 19:14; 14:1) Hereva Lada-isidia karoa 31 ese “hahine namona” ia gwauraia, ia gwau ena adavana ese ia abidadama henia momokani, bona gwaumaoro ia henia gaukara idauidau ruma bese totona ia karaia totona. Momokani, Israel taudia ese Taravatu idia badinaia neganai, hahine edia noho be namo.

Hahine edia Dagi Keristen Kongregesen Lalonai

Abraham ena negai bona Mose ena Taravatu henunai, tatau ese hahine momo idia adavadia diba; to taravatu haida idia noho edia adavadia korikori bona edia hahine ma haida idia naridia totona. (Genese 16:3; 29:23-29; Esodo 21:7, 8; Deuteronomi 21:14-17) To, Keriso ia gwau namona be Keristen tauna be mai ena adavana tamona, Adam hegeregerena. Dirava be matamana neganai ia gwauraia haheganina ia haginia lou. (Mataio 19:4-6) Danu, ia gwau adavana hadihoa karana ena badina maorona tamona be heudahanai sibona.—Mataio 19:7-9.

Momokani, Keriso ese headava ena taravatu ia gwauraia dainai, Keristen kongregesen l alonai idia noho tataudia bona hahinedia ia durudia. To unai taravatu ese hahine idia durudia bada, tatau idia durudia maragi.

Dirava ena taravatu Keristen tataudia dekenai be, edia adavadia do idia lalokau henidia. (Efeso 5:28, 29, 33) Danu, namona be kongregesen tataudia ese ‘kekeni taudia hereva henidia, edia taihuna idia hereva henia bamona, mai edia laloa goevagoeva danu.’ (1 Timoteo 5:1, 2) Keristen hahine ese lauma helaga idia abia bona idia “peroveta,” eiava mai edia boga-auka ida “Dirava ena hoa gaudia idia herevalaia.” (Kara 2:11-18) Keristen hahinedia badadia ese matamatadia na “kara namo do idia hadibaia.” (Tito 2:3, 4) Hahine badadia bona hahine matamatadia, iboudiai, edia gaukara be ‘bese ibounai be diba tahua taudia do idia halaoa.’—Mataio 28:19, 20.

Dirava ena ura headava dekenai, matamana neganai ia lalohadailaia, be Keristen kongregesen ena negai ia havaraia lou. Dirava ese tau ia atoa hahine ena kwarana, bona namona be unai kwara dagina idia matauraia. (1 Korinto 11:3) Namona be Keristen hahine ese edia adavadia idia kamonai henidia. (Efeso 5:22-24) Danu, namona be idia ese kongregesen ena elda taudia idia matauraidia, herevana idia be headava lasi taudia eiava idia be ‘hahine tamodia edia adavadia.’ (1 Timoteo 3:2) “Ekalesia gunalaia taudia” ese kongregesen lalonai idia hadibaia, to namona be Keristen hahine ese unai hadibaia gaukara idia tahua lasi, bona unai hadibaia taudia edia hereva idia utua lasi be namo. (Tito 1:5-9; 1 Timoteo 2:11-15; 1 Korinto 14:34, 35) Bema unai bamona idia karaia, kongregesen lalonai maino do ia noho. (1 Korinto 14:33, 40) Bema hahine ta ese kongregesen lalonai ena siahu na dala kererena ai ia gaukaralaia, Keriso ese do ia panisia.—Apokalupo 2:20-23.

Iehova ese Hahine ia Lalodia.

Bible ese hahine ia hadikadia a? Lasi. Bible ia hahedinaraia Iehova ese hahine ia lalodia bada, edia namo bona edia moale ia tahua, badina ia be edia havaraia tauna dainai ia diba, “hahine ena tauanina be goada herea lasi.” (1 Petro 3:7) Ia diba dahaka gaukara be namo tau dekenai bona dahaka gaukara be namo hahine dekenai, unai amo idia ruaosi ese namo do idia davaria. Kwara dagina be tatau dekenai ia henia, to ena hesiai hahinedia ese gaukara namodia idia karaia diba, hegeregere iena witness taudia ai idia lao diba. “Iehova sibona ia hereva; sivarai namona idia gwauraia hahinedia be tuari oreana badana ta.”—Salamo 68:11.

Inai hereva ena matamanai Carol Gilligan ena henanadai ai torea; ia gwau: “Hahine be tau hegeregerena ai ia lao ena namo be dahaka?” Bible ia haere, ia gwau: namo ta be lasi Bema hahine ese Dirava ia henia dagina ia gaukaralaia, ia sibona do ia moale bona ma haida do ia hamoaledia danu.