Iesu ena Mauri bona Gaukara

Birthday Pati dekenai Tau ta Idia Alaia

IENA aposetolo taudia dekenai hadibaia hereva ia henia murinai, Iesu be teritori dekenai rua rua amo ia siaidia lao. Reana Petro bona Andrea, tadikaka rua, idia gaukara hebou, bona Iakobo bona Ioane, Filipo bona Batolomeo, Toma bona Mataio, Iakobo bona Tadeo, bona Simona bona Iuda Iskariote. Unai haroro taudia 12, rua rua amo idia gaukara, be Basileia ena sivarai namona idia harorolaia bona idia lao gabudia iboudiai hoa karadia idia karaia.

Unai neganai, Ioane Bapatiso be dibura dekenai ia do noho. Ia be lagani rua bamona unuseniai ia noho vadaeni. Ioane be taunimanima vairadiai Herod Antipas ia gwauhenia badina ia ese Herodia, iena kakana Filipo ena hahine, ia abia bona iena hahine ai ia halaoa. Heroda Antipas ia gwau ia ese Mose ena Taravatu ia badinaia, unai dainai Ioane be mai ena maoro ia gwau unai bamona headava be heudahanai karana. Unai dainai, bona reana Herodia ese ia noia dainai, Heroda ese Ioane be dibura namona dekenai ia negea.

Heroda Antipas ia diba Ioane be kara maoromaoro tauna bona ia kamonai henia mai moale danu. Unai dainai ia diba lasi dahaka do ia karaia ia dekenai. To, Herodia ese Ioane ia inai henia bona dala ia tahua ia hamasea totona. Vadaeni, dala ta ia kehoa.

Lagani 32 C.E. ena Paseka ia kahirakahira neganai, Heroda ese iena birthday ariana ia hegaegaelaia. Unai pati dekenai idia mai taudia be Heroda henunai idia noho dagi taudia badadia bona ami ena tau badadia, bona Galilea ena dagi bada taudia iboudiai. Unai hanuaboi ai, Salome, Herodia bona ena tau ginigunana Filipo edia natuna kekeni, be pati taudia vairadiai ia mavaru. Tatau be reana idia moale bada herea, badina iena mavaru dalana ese ia gahusidia bamona.

Heroda be Salome dekenai ia moale bada herea. Ia gwau: “Oiemu ura oi gwauraia, dohore lau henia oi dekenai.” Ma danu ia gwauhamata: “Dahaka gau oi noinoi lau dekenai dohore lau henia oi dekenai. Bema lauegu basileia kahana oi noia danu do lau henia oi dekenai.”

Ia do haere lasi neganai, Salome be iena sinana dekenai ia henanadai: “Dahaka lau noinoi?”

Vadaeni, dala ia kehoa unai! Herodia be haraga ia gwau: “Ioane Bapatiso ena kwarana.”

Salome ia giroa haraga Heroda dekenai, bona ia noia: “Lauegu ura be harihari Ioane Bapatiso ena kwarana oi henia lau dekenai mereki latanai.”

Heroda ia lalohisihisi bada. To iena vadivadi taudia vairadiai ia gwauhamata dainai, ena be Ioane be kerere tauna lasi, to ia hemarai bema kwarana ia henia lasi. Maoromaoro hamasea tauna ia siaia dibura dekenai unai kara ia karaia totona. Nega sisina murinai, mereki ta dekenai, Ioane ena kwarana ia siaia giroa, bona Salome dekenai ia henia. Ia ese ia abia lao iena sinana dekenai. Ioane ena hahediba taudia idia kamonai neganai, idia mai iena tauanina idia abia idia guria totona, bena Iesu dekenai unai sivarai idia hadibaia.

Gabeai, Heroda ia kamonai Iesu ese taunimanima edia gorere ia hanamodia bona demoni ia luludia, unai dainai ia gari badina ia laloa Iesu be Ioane, mase amo ia giroa lou. Unai dainai, ia ura bada Iesu ia itaia. Ia ura lasi iena haroro ia kamonai, to ia ura ia diba unai be Ioane eiava lasi bona iena gari gaudia be mai ena badina eiava lasi. Mataio 10⁠:​1-5; 11⁠:1; 14⁠:​1-12; Mareko 6⁠:​14-29; Luka 9⁠:​7-9.

◆ Badina be dahaka Ioane be dibura dekenai ia noho bona badina be dahaka Heroda ia ura lasi ia hamasea?

◆ Edena dala ai Herodia ese Ioane ia hamasea diba?

◆ Ioane ia mase murinai, badina be dahaka Heroda ia ura Iesu ia itaia?

[Full-page picture on page 9]