Ioane Bapatiso Ia Noho Momokani, A?

Evanelia bukadia ese tau ta ladana Ioane Bapatiso ia herevalaia, ia be Iudea dekenai Dirava ena Basileia ia harorolaia. Histori ese Baibel ia herevalaia tauna ia hamomokania, a? Inai gaudia laloa:

• Baibel ia gwau: “Ioane Bapatiso be Iudea ena taunimanima momo lasi gabuna ai ia haroro, ia gwau: ‘Umui helalo-kerehai, badina guba Basileia be ia kahirakahira vadaeni.’” (Mataio 3:1, 2) Sivarai ma haida ese unai hereva ia hamomokania diba, a? Oibe.

  Aposetolo edia negai histori torea tauna Flavius Josephus ese tau ta ia herevalaia, iena ladana be “Ioane Bapatiso,” ia ese “Iuda taudia ia hagoadaia kara maoromaoro do idia karaia,” “Dirava do idia tomadiho henia” bona “bapatiso idia abia totona.”​—Jewish Antiquities, Book XVIII.

• Baibel ia hahedinaraia Ioane ese Heroda Antipa, Galilea bona Perea ia lohiaia tauna ia sisiba auka henia. Heroda be sibona ia gwauraia, ia be Iuda tauna bona Mose ena Taravatu ia badinaia. Ioane ese Heroda ia hamaoroa ena kakana ena adavana ia abia be maoro lasi. (Mareko 6:18) Unai histori be buka ma haida ese ia hamomokania danu.

  Histori torea tauna Josephus ia gwau Antipa be “Herodia ia lalokau henia” bona “mai gari lasi ida ia gwau Herodia do ia adavaia.” Herodia be unai hereva ia abia dae bona iena tau ia rakatania, bena Antipa ia adavaia.

• Baibel ia gwau “Ierusalema, Iudea bona Ioridane ena gabu ibounai dekenai idia noho taudia be [Ioane] dekenai idia lao, bona Ioridane Sinavai ai idia ia bapatisoa.”​—Mataio 3:5, 6.

  Josephus ia gwauraia gauna ese unai hereva ia durua danu, ia gwau taunimanima “hutuma” be idia mai Ioane itaia totona bona “iena hahediba herevadia ese hutuma edia lalona ia hamarerea bada.”

Unai ese ia hahedinaraia aposetolo edia negai histori torea tauna Josephus ia abia dae Ioane Bapatiso be momokani ia noho. Bona ita danu be unai ita abia dae diba.