Kara Namo Taudia Iboudiai be Guba Dekenai Idia Lao A?

NATUNA ia mase neganai ena tamana bona sinana idia lalohisihisi bada herea, ma gau ta ese unai lalohisihisi mamina ia hanaia lasi. Idia laloa daradara, idia gwau, ‘Hari, aiemai natuna be edeseniai? Ia be guba dekenai eiava ma gabu ta dekenai?’ Tomadiho orea momo edia hahediba lalonai idia gwau beibi idia mase neganai idia daekau guba dekenai. Johannesburg, South Africa dekenai, mase guri ta ena nadi dekenai idia torea herevana be inai: “Dirava be palaoapalaoa matamatana ta ia ura, unai dainai ena aneru ta ese aiemai natuna ia abia.” To reana oi daradara, oi laloa: ‘Dahaka dainai Dirava be “palaoapalaoa matamatana” ma ta ia ura, badina taunimanima momo idia gwau idia momo herea ia abidia vadaeni?’ Taunimanima momo idia daradaralaia gauna be inai . . .

‘Guba be Edena Bamona?’

Taunimanima momo be guba idia laloa neganai idia daradara. Haida idia hevaseha, idia gwau guba lao henia “be hamomokania diba lasi gorina ta bamona” To Bible lalonai dahaka ia gwau? Ena siri ginigunana lalonai, ia gwau: “Matamaia neganai Dirava ese guba bona tanobada ia karaia.” (Genese 1:⁠1) Unai anina be ita raraia gaudia, dina, hua bona hisiu ia karadia gaudia. (Deuteronomi 4⁠:19) To lauma dalanai ma guba ta danu ia noho. Unai dainai, Bible be Iehova ena “noho gabuna helagana bona hereadaena” ia gwauraia.​—⁠Isaia 63⁠:⁠15.

Iseda guba Tamana ena “noho gabuna” dekenai ia daekau tauna ginigunana be daika? Dirava ena lalokau Natuna, Iesu Keriso. Ia gwau: “Tau ta lasi guba dekenai ia daekau vadaeni, guba dekena amo ia diho Tauna sibona, Taunimanima ena Natuna unai.” (Ioane 3⁠:13) Inai siri ese ia hahedinaraia Iesu vairanai taunimanima ta be guba dekenai ia daekau lasi. To Iesu ia gwauhamata taunimanima haida be guba dekenai do idia lao. Guba dekenai ia daekau gwauraia neganai, ena kamonai hahediba taudia dekenai ia gwau: “Lau be do lau lao, gabu ta do lau karaia hegaegae umui emui. . . . lau dekenai do lau abia dae umui, vadaeni lau noho gabuna dekenai be umui danu unuseni do umui noho.”​—⁠Ioane 14⁠:​2, 3.

Vadaeni, unai siri ese ia hahedinaraia kara namo taudia haida be guba dekenai do idia lao diba. To ita gwau diba kara namo taudia iboudiai be guba dekenai do idia lao, a? Taunimanima idia noholaia tanobadana be edena bamona? Niuklia tuari lalonai do idia araia ore, a? Lasi momokani. Bible lalonai ia gwau: “Uru ta ia ore gwauraia, bona ma uru ta ia vara noho, to tanobada ia noho hanaihanai.” (Kohelete 1⁠:⁠4) Ena be taunimanima dikadia ese inai tanobada ena kahana haida idia hamiroa, to Dirava ese inai tanobada mai hairaina do ia haorea ena badina be lasi, ani? Bible lalonai inai gwauhamata hereva ia noho: “Kara maoromaoro taudia ese tanobada do idia abia, bona ia latanai do idia noho ela bona hanaihanai.”​—⁠Salamo 37⁠:⁠29.

Vadaeni, ia hedinarai goevagoeva, dina vairai gau namodia do idia vara inai tanobada dekenai. Ororo dekenai Iesu ia haroro neganai, ia gwau: “Dagedage lasi taudia be idia namo, badina tanobada do idia abia.” (Mataio 5⁠:⁠5) Danu, Bible ena buka ginigabena, Apokalupo lalonai, ia hedinarai inai tanobada be paradaiso gabunai do idia halaoa. Mai edia abidadama taudia dekenai ia gwau: “Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.”​—⁠Apokalupo 21⁠:​3, 4.

Inai sivarai amo ia hedinarai goevagoeva kara namo taudia haida be guba dekenai idia lao, to ma haida be tanobada maurina idia moalelaia. Inai anina be mauri abia totona taunimanima oreadia be rua.