Duahia Taudia Idia Henanadai

◼ Kongregesen lalonai, Keristen tataudia be hesiai tauna ena dagi idia abia totona, dahaka lagani idia abia guna be maoro?

Bible ese lagani ia gwauraia lasi.

Gunaguna Israel dekenai, Dirava be dagi haida totona, lagani ena taravatu ia atoa. Tuari totona idia lao memero be lagani 20 idia abia guna; mero maragidia idia siaidia lao lasi tuari totona, hari inai negai idia karaia hegeregerena. Levi taudia edia lagani ena taravatu ta ia noho danu. Kalaga helagana dekenai idia gaukara Kohat taudia edia lagani be 30 bona 50 ihuanai. Badina be dahaka? Unai lagani idia gwauraia badina idia herevalaia gauna be “kalaga rumana ena gaukara metauna bona metau gaudia idia huaia gaukarana.” (Numera 4:​3, 47) Levi taudia be metau lasi gaukaradia idia karaia diba edia lagani be 25 neganai, to metau gaukaradia bona mai maduna bada herea gaukaradia, hegeregere kalaga rumana haginia, huaia, bona haboua gaukaradia idia karaia diba edia lagani be 30 neganai. (Numera 8:​24-26) Gabeai, dubu dekenai, unai bamona metau gaukaradia be lasi, unai dainai Levi taudia be unai gaukara idia karaia diba edia lagani be 20 idia abia neganai.​—1 Sisiga 23:24.

To Iehova ese Israel besena ia negedia bona lauma Israel taudia ia gaukaralaidia neganai, ia ese hesiai taudia (diakono) Keristen kongregesen dekenai, edia lagani ia taravatua, a?

Gabeai idia vara gaudia dainai, reana ta ia laloa unai bamona taravatu ia noho. Roma Katolik Dubu dekenai, diakono be “dagi idia henia hesiai tauna, iena dagi be kohena tauna ena dagi henunai, Dirava ese Dubu ena gavamani dalana ia gwauraia hegeregerena.” Bingham ena buka Antiquities of the Christian Church ia gwau: “Bisop bona presbyter [elda taudia] . . . be lagani 30 idia do abia lasi neganai unai dagi idia abia diba lasi; to diakono taudia be unai dagi idia abia lagani 25 idia abia neganai, bema unai lagani idia abia lasi dagi idia abia diba lasi. Gavamani bona dubu ese unai lagani ena taravatu idia atoa . . . Dubu ena sivarai ibounai dekenai, ta ita davaria diba lasi unai dagi ia abia lagani 25 ia do abia lasi neganai.”

To, Bible ese dahaka taravatu ia atoa unai edia lagani dekenai? Idia noho taravatudia be 1 Timoteo 3:​8-10, 12, 13 dekenai sibona: “Diakono taudia danu be do idia kara maoromaoro taudia, bona tau namodia momokani. Idia be inuinu momo taudia lasi, bona moni do idia mataganigani henia lasi. Iesu Keriso abidadama henia ena sivarai momokani do idia badinaia, mai edia laloa maoromaoro danu. Diakono dagi do idia abia kava lasi, to edia kara do umui tahua guna be namo. Bema ta ese edia kerere ia gwauraia diba lasi, vadaeni dagi idia abia diba. Diakono tauna be hahine tamona ena adavana, bona iena natuna bona ruma taudia do ia biagua namonamo. Badina be diakono gaukara idia karaia namonamo taudia be taunimanima ese do idia matauraia. Vadaeni edia ladana be namo dainai edia abidadama Iesu Keriso dekenai do idia herevalaia goadagoada diba.”

Vadaeni, ita itaia, hesiai taudia be dagi idia abia laganina ena taravatu idia gwauraia lasi. Unai dainai elda taudia idia hebou neganai, kongregesen tataudia edia dagi henidia totona, namona be idia diba Bible ese taravatu ia atoa lasi Keristen tataudia be lagani 20, 25, eiava 30 ia abia guna bena ia be hesiai dagina ia abia diba. Bible ia gwau unai dagi idia abia taudia be “diakono gaukara idia karaia tataudia,” (NW) unai dainai do ita laloa lasi idia be mero badadia. Unai hereva hamomokania totona, Bible ia gwau hesiai taudia be reana idia headava vadaeni bona sedira idia be mai edia natudia.

Unai sibona lasi, to hesiai tauna ena dagi idia abia totona, edia ‘kara do idia tahua guna,’ bona unai ese ia hamomokania idia be maduna idia huaia diba. Ita gwau lasi idia be nega sisina lalonai dagi idia abia, idia tohodia totona. Lasi, to namona be nega ia lao sisina murinai (bapatiso idia abia lagani tamona murinai), bona Keristen lo karadia idia hahedinaraia be namo, bona idia hahedinaraia idia be hegeregere bona idia ura edia gaukara idia naridia totona. Bema gaukara badadia ia laloa momo tau matamatana ta ese inai bamona karadia ia hahedinaraidia, bona ia manau, bona dagi ena taravatu iboudiai ia karaia vadaeni, ena be reana iena lagani be 20 lasi, to unai dagi ia abia diba. Reana ma tatau haida edia lagani be bada idia be “diakono gaukara idia karaia namonamo . . . [bona] taunimanima ese do idia matauraia. Vadaeni edia ladana be namo dainai edia abidadama Iesu Keriso dekenai do idia herevalaia goadagoada diba.”