Sivarai Namona Taunimanima Ibounai Totona!
“ANERU ma ta lau itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia.” (Apokalupo 14:6) Unai hereva amo buruka tauna aposetolo Ioane ese ia abia matahanai ia herevalaia, bona ia abia matahanai be iseda nega lalonai ia guguru noho. Sivarai namona ia noho dainai ita moale, badina hari inai nega lalonai raskol karadia, tanobada ia miro, dagedage karadia, tuari, bona bisinesi idia moru karadia idia bada idia lao! To dahaka dainai aneru ta ese unai sivarai namona ia harorolaia? Bese ibounai, iduhu ibounai, gado ibounai bona kopina idauidau taudia dekenai edena moale sivarai namona ia harorolaia?
Unai henanadai haerelaia totona, namona be idau negai sivaraina ta ita laloa, aneru ta ese ia harorolaia sivarai namona unai. Lagani 100 B.C.E. ena dokonai, unai be Ioane ese matahanai ia do abia lasi lagani 100 vairanai, unai sivarai ia vara. Mamoe naria taudia be Betelehem kahirakahira tanona dekenai edia mamoe idia naridia neganai, aneru ta be idia dekenai ia hedinarai, Iesu ia vara sivaraina ia gwauraia hedinarai totona, ia gwau: “Hereva namona lau mailaia vadaeni, taunimanima ibounai idia moale totona. Badina be hari inai dina, Davida ena hanua dekenai, umui emui Hamauria Tauna ia vara vadaeni, Keriso Lohiabada unai.”—Luka 2:10, 11.
Iesu ia vara be “taunimanima ibounai idia moale” sivarai namona. Ia tubu bada neganai ia be gwauhamata ia herevalaia Keriso bona Hamauria Tauna ai ia lao, ia ese ena mauri goevadaena ia henia ia idia abidadama henia kudou-maoro taudia do idia mauri totona. To unai sibona lasi, ia be Dirava ena Basileia dekenai pavapava tauna ai ia lao, ia be “Maino Lohiana” bona iena lohia dalana amo hahemaoro maoromaoro bona maino be tanobada dekenai do ia havaraia. (Isaia 9:6; Luka 1:33) Momokani, unai ia vara be mai anina bada sivarai namona ta, bona aneru ta ese ia gwauraia hedinarai be maoro!
Iesu be Ia Pavapava
Keristen ginigunadia edia nega lalonai, Iesu be Dirava ena ura momo ia hagugurua, to unai nega lalonai ia be Dirava ena Basileia ena terona dekenai ia do helai lasi. Gima Kohorona magasin dekena amo nega momo ai hahedinaraia lagani 1914 ai Iesu ese ena terona dekenai ia helai vadaeni. Peroveta hereva ia guguru sivaraina amo ia hedinarai goevagoeva unai lagani dekenai Dirava ena Basileia be guba dekenai ia haginia. (Apokalupo 12:10, 12) Ena be lagani 1914 ai sivarai dikana momo idia vara—hegeregere Tanobada Ibounai Tuari Ginigunana ia vara unai—to Dirava ena Basileia ia vara ena sivarai be sivarai namona momokani. Unai dainai Iesu ese iseda nega ia perovetalaia inai bamona: “Basileia ena Sivarai Namona be tanobada ibounai dekenai do idia harorolaia.”—Mataio 24:14.
Iesu ia perovetalaia herevana ia guguru, a? Haere be oibe! Bona Ioane ia abia matahanai ia guguru danu. Momokani, matahanai dekenai Ioane ese ia itaia aneruna ita itaia diba lasi. To Iehova ena Witness taudia ita itaia diba, idia ese unai aneru ia gwauraia sivarai namona idia harorolaia “bese ibounai, iduhu ibounai, gado ibounai bona kopina idauidau ibounai taudia” dekenai. Tano bona motumotu idauidau 212 lalodiai, edia hereva idia kamonai. Bona taunimanima hutuma herea ese edia hereva idia abia dae. Unai taudia haida edia ekspiriens ese idia hahedinaraia Dirava ena Basileia be sivarai namona momokani.