Sivarai Namona Tanobada Ibounai Dekenai Harorolaia

DIRAVA ena Basileia ia lohia vadaeni! Unai be sivarai namona momokani. Ia be sivarai namona dainai lagani 1989 ai, tanobada ibounai dekenai Iehova ena Witness taudia 3,700,000 bona ma haida be mai moale danu Iesu ese ia perovetalaia “Sivarai Namona,” bona Ioane ena matahanai lalonai aneru ta ese ia gwauraia “Sivarai Namona,” idia harorolaia. (Mataio 24:14; Apokalupo 14:6) Aposetolo Paulo ia gwau: “Edia gadona ena sivarai be tanobada ibounai dekenai idia gwauraia loaloa, bona edia hereva be tanobada ena dokona momokani dekenai idia lao.” (Roma 10:18) Bona taunimanima be bese ibounai, iduhu ibounai bona gado idauidau ibounai amo ese edia hereva “Dirava do umui gari henia, ia do umui hanamoa bada” idia kamonai henia mai moale danu.​—Apokalupo 14:7.

Life Insurance Do Ia Ore

England dekenai ia kamonai tauna ta ena gaukara be Life Insurance ia hoia loaloa. (Unai be idia mase garina moni idia atoa hegaegae adavana eiava natuna naria totona.) Unai tau ena ladana be Ken, bona Iehova ena Witness rumana ta dekenai ia lao neganai, inai henanadai idia henia, idia gwau: “Taunimanima do idia mauri hanaihanai dainai Life Insurance be anina lasi tanobadana dekenai do oi ura oi noho, a?” Edia hereva ena anina be dahaka? Bible lalonai ia gwau, Dirava ena Basileia henunai, mauri idia hadikaia gaudia, hegeregere gorere bona mase do idia ore.

Unai do ia vara diba, a? Oibe, Dirava ia gwauhamata unai do ia vara. Haheitalai ta be inai, Bible ia gwau: “Dirava be idia [taunimanima] danu do ia noho, . . . Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” (Apokalupo 21:​3, 4) Dahaka gau ese inai kara do ia havaraia? Dirava ena Basileia ese do ia havaraia. Dirava ena Hereva lalonai ia gwau kahirakahira unai Basileia be “basileia iboudiai [hari inai nega politikol gavamani] do ia hamakohia maragimaragi bona idia do ia haorea, bena ia sibona do ia gini ela bona hanaihanai.”​—Daniel 2:44.

Tanobada ibounai dekenai Iehova ena Witness taudia ese edia haroro gaukara amo, inai Bible sirina be taunimanima milion momo dekenai idia hadibaia. Idia momo, Ken hegeregerena, idia lalo-parara bena idia diba unai Basileia do ia vara momokani. Idia vara gaudia amo ia hedinarai goevagoeva do ia vara momokani. Dirava ena gwauhamata dekenai ita abidadama henia diba, bona daudau lasi ena gwauhamata do ia hagugurua.

Edia Mauri Dalana Idia Haidaua

Iehova ena Witness taudia ese aneru ia gwauraia moale sivaraina idia harorolaia neganai, bema taunimanima idia kamonai, do idia lalo-parara Dirava do idia gari henia bona do idia hanamoa ena anina be Bible ena gwauhamata hereva idia abia dae sibona lasi, to anina be ma kara ta do idia karaia. Unai idia diba neganai edia lalohadai mauri dalana dekenai idia haidaua bona mauri ena hekwakwanai momo idia kokia.

Rafael bona ena hahine be unai idia hamomokania. Idia be Argentina dekenai idia noho, bona lagani 40 gunanai idia headava neganai, edia ura gauna badana be do idia gaukara goadagoada bona moni do idia haboua dina vairana dekenai do idia noho namo totona. To lagani 21 idia headava murinai, ena be idia gaukara goadagoada to edia ruma be do maragi, bona hanaihanai unai ruma ena dika gabudia idia hanamoa. Idia headava matamaia negana amo idia hekwarahi bada mauri namona idia abia totona, to idia do davaria lasi.

Bena murinai Iehova ena Witness taudia dekena amo sivarai namona idia kamonai, bona kohu hereadaena bona noho namo hereadaena abia dalana idia diba. Iesu be ororo dekenai ia haroro neganai, ia gwau: “Inai tanobada dekenai kohu do umui haboua lasi, iniseniai manumanu ese dabua idia ania ore, bona raraka ese auri ia hadikaia, iniseniai danu henaoa taudia ese ruma idia makohia bona gau idia henaoa. To umui emui kohu be guba dekenai do umui haboua, unuseniai manumanu bona raraka ese gau idia hadikaia lasi, unuseni danu henaoa taudia ese ruma idia makohia diba lasi, bona gau idia henaoa diba lasi.”​—Mataio 6:​19, 20.

Ena be Bible ia gwau lasi kohu ita abia be ia dika, to ita ia hagoadaia unai kohu do ita laloa bada lasi totona. (Kohelete 7:12) To, namona be Bible stadilaia goadagoada karana amo lauma kohuna do ita tahua, Dirava ena ura do ita diba, bona iena ura be iseda mauri lalonai do ita karaia guna. (Mataio 6:33) Rafael bona ena hahine be lauma kohuna idia haboua hamatamaia, bona hari idia taga momokani, moni bada dainai idia taga lasi, to Dirava idia bamoa dainai idia taga. (Apokalupo 3:​17, 18) Idia dekenai Dirava ena Basileia be sivarai namona momokani.

Headava Ia Hanamoa

Unai sivarai namona ena siahu be bada namo ia havaraia totona. Haheitalai ta be John, ia be England dekenai ia noho, ia ura lasi Bible ena sivarai ia kamonai, to ena hahine bona natudia idia ura unai sivarai idia kamonai. Vadaeni idia be Iehova ena Witness taudia edia hebou dekenai idia lao, to John be ena turana ia bamodia bona idia lao inuinu totona. Unai dainai ia inuinu bada, kuku ia ania, bona gabeai ia heudahanai danu. Murinai ena hahine ia rakatania bona ma hahine ta danu idia noho.

Edia headava hadokoa totona dala idia kehoa. To John ia hoa badina ena adavana korikori be​—sivarai namona ia stadilaia bona Keristen ena kara ia badinaia dainai—​ia dekenai ia badu lasi. John ia diba lasi dahaka dainai unai bamona ia karaia. Edia headava hadokoa gaukarana ia do ore lasi pura toi vairanai, John ena Keristen hahine ena kara namo dainai, namo ia vara. Unai tau be ia helalo-kerehai bona ena kara dika dainai ia sori bada herea dainai, edia headava hadokoa karana idia koua. Bena John be sivarai namona Iehova ena Witness taudia danu ia stadilaia. Hari ia danu be Keristen tauna ta, bona ena hahine ia bamoa Basileia ena sivarai namona be taunimanima haida dekenai idia harorolaia totona.

Hari inai nega lalonai ruma bese edia hekwakwanai be momo, bona heduru idia abia totona namona be Bible ena sivarai namona idia diba. Peru dekenai Iehova ena Witness tauna ta be peleini dekenai ia gui bona ami tauna badana (colonel) badinai ia helai. Idia kiki noho lalonai unai ami tauna ese ena ruma bese ena hekwakwanai ia gwauraia hedinarai. Ena hekwakwanai ta be ena hahine be drag ia ania bona ia gwau hari ami tauna do ia rakatania gwauraia bona matamata tauna ta do ia adavaia. Witness tauna be dala namona amo Bible lalonai ia noho sisibana ruma bese taudia durudia totona ia gwauraia hedinarai, bona danu ia hamaoroa Bible ena sisiba amo sibona ena ruma bese ena hekwakwanai ia hanamoa vadaeni.​—Efeso 5:21–6:4.

Unai ami tauna be Witness tauna ia tanikiu henia ena heduru hereva dainai bona ena gado ai Gima Kohorona bona Noga! magasin edia sabskripsen ia abia, badina ia ura ena diba sivarai namona dekenai do ia habadaia. Vadaeni, unai Witness tauna be peleini amo ia diho neganai, headava matamata tau mai adavana idia heau henia, idia gwau idia ura hereva henia. Idia gwau: “Ai be oi vairanai ai helai, bona oi badinai oi helai tauna umui kiki hebou neganai ai kamonai. Ai ura unai magasin ena sabskripsen ai abia danu.” Idia danu idia ura edia mauri ia hanamoa diba sivarai namona ta do idia kamonai.

Mauri Ia Haidaua

Ma danu, Bible ia gwauraia sivarai namona be taunimanima edia mauri ia haidaua diba. Aposetolo Paulo ia gwau: “Dirava ena hereva be ia mauri noho, bona ia be mai ena siahu.” (Heberu 4:12) Tauhau ta Macedonia, Greece dekenai ese unai ia hamomokania. Bible dekena amo Dirava ena ladana be Iehova ia diba neganai, ia hoa. Unai dainai ena turana ia nanadaia edena bamona Iehova ena Witness taudia do ia davaria haraga diba. Idia ia davaria murinai, nega rua idia gwauraia Witness taudia danu do idia kiki hebou totona, unai nega rua lalonai hora 4 bamona idia kiki hebou. Murinai unai tauhau be Bible ia stadilaia hanaihanai, nega ginigunana idia stadi neganai stadi ia lao ela bona 2 okoloka daba kahanai!

Ia stadi hamatamaia negana amo, unai tauhau ese ena mauri dala ia haidaua haraga Bible ia gwauraia taravatudia ia badinaia totona. Tomadiho totona ia be Iehova ena Witness taudia danu ia hebou bona gabeai gau ibounai Havaraia Diravana ia lalokau henia bada. Unai dainai Iehova ese ia hanamoa. Bible stadi ia hamatamaia purana dekenai ena hui lata ia pakosia. Pura namba 2 dekenai, aniani bona disko gabudia dekenai ia lao lasi moale havaraia taudia ia tahudia totona. Pura namba 3 dekenai, ena kuku ania karana ia hadokoa. Hua rua ia stadi murinai, Witness taudia ia bamodia bona Basileia ena sivarai namona be ma taunimanima haida dekenai ia harorolaia hamatamaia. Oibe, ia moale badina ia noho gabuna dekenai Iehova ena Witness taudia ese sivarai namona idia mailaia dainai.

Sivarai Namona Dibura Rumana Dekenai

Dibura rumana ia gegea aurina be sivarai namona ia koua diba lasi. Spain dekenai, tauhau ta ladana José be mai ipidi danu ruma ia hamakohia bona raskol karadia ma haida ia karaia dainai, dibura rumana dekenai idia atoa. To, Iehova ena Witness taudia ese sivarai namona idia harorolaia ia dekenai, bona Bible ena sivarai ia kamonai neganai ena lalohadai ia haidaua bada. Iehova ese “ia hasiahua” unai ia karaia totona.​—Filipi 4:13.

José ia gwau, guna ia kara dika dainai reana dibura rumana dekenai do ia noho ela bona inai tanobada dikana do ia ore neganai. To bapatiso ia abia vadaeni, bona hari ia be Keristen tauna. Ena adavana be ena kara ia abia dae, bona ia goada noho edia natuna merona be Keristen ena dala dekenai ia hadibaia totona. Hari, José be ia danu idia dibura taudia dekenai sivarai namona ia harorolaia. Dibura ena magu murimurinai idia noho taudia be unai dibura taudia idia haroro henidia be ia auka. Hari, iena dibura daiutuna lalonai ia noho tauna danu be bapatiso Keristen tauna ta.

Unai sivarai haida amo ia hedinarai tanobada ibounai lalonai Iehova ena Witness taudia edia haroro gaukara amo huahua idia davaria. Momokani, sivarai namona ia harorolaia aneruna ita itaia lasi, to Iehova ena Witness taudia ese unai aneru idia tohotohoa, bona “Sivarai Namona . . . bese ibounai, iduhu ibounai, gado ibounai bona kopina idauidau ibounai taudia” dekenai idia harorolaia.

Ia be sivarai namo herea momokani, bona inai sivarai sibona ese taunimanima ia durua diba. Ai ura oi ese unai sivarai oi kamonai henia. England dekenai, Ken bona John hegeregeredia, Argentina dekenai, Rafael bona ena hahine hegeregeredia, Spain dekenai, José hegeregerena, bona taunimanima milion momo bamona, ai be unai aneru danu ai boiboi, ai gwau “Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni. Guba bona tanobada bona davara bona ranu guridia ibounai ia karaia Diravana do umui tomadiho henia.”​—Apokalupo 14:7.