“Tau Dika Rohorohona” ena Dika Idia Hahedinaraia

“Lauegu orea taudia e, ia dekena amo do umui raka siri, ia danu do umui kara dika hebou garina, bona ia danu panisi do umui abia hebou garina!”​—APOKALUPO 18:4.

1, 2. (a) Tau Dika Rohorohona be dahaka edena bamona ita diba? (b) Idia gwau idia be Dirava ena hesiai taudia, to rara dekenai be idia kerere neganai Dirava ese unai kara edena bamona ia laloa? (Mataio 7:​21-23)

DIRAVA ena Hereva ena peroveta herevana ia gwau “Tau Dika Rohorohona” ta do ia vara. Danu unai peroveta herevana ia gwau Dirava ena Hahemaoro Davana Karana Tauna guba dekenai ese unai “Tau Dikana do ia alaia mase.” (2 Tesalonika 2:​3-8) Inai magasin ena hereva ma haida ese idia hahedinaraia vadaeni Tau Dika Rohorohona be Kerisendom ena dubu gunalaia taudia. Idau negai Dirava ena Hereva ena hereva momokanidia idia rakatania, bona tomadiho koikoi hahediba herevadia idia abia dae, hegeregere Toi Tamona herevana, hel ena lahi herevana, bona taunimanima be mai edia mase diba lasi laumana herevana. Danu, Dirava ena taravatu utua karadia idia karaia. Paulo ese Tito ia hamaoroa ia naria namonamo taunimanima haida dainai. Unai taudia “idia gwau Dirava idia diba, to edia kara dekena amo idia ese Dirava idia negea. Idia be dika bada, Dirava idia kamonai henia lasi, bona kara namona ta idia karaia diba lasi.”​—Tito 1:16.

² Iesu ia gwau: “Umui naria namonamo, peroveta koikoi taudia garina. Idia mai noho, edia toana be mamoe bamona, to edia lalona be uda sisia dagedage bamona. Edia kara toana dekena amo do umui diba.” Peroveta koikoi taudia do idia havaraia “huahua be ia dika.” (Mataio 7:​15-17) Pris bona pasto taudia edia huahua dikana ta be inai: Rara dekenai edia kerere be bada herea. Lagani handred handred lalonai idia ese Crusade tuaridia, inquisition karadia, bona tuari idia durua, unai tuari lalonai taunimanima milion milion edia rara idia bubua. Edia tomadiho idia badinaia taudia be tuari lalonai idia ala-ala heheni neganai, unai pris bona pasto taudia ese idia tuari heheni oreadia rua do idia kwalimu totona idia guriguri bona idia hanamoa. To, aposetolo Paulo ena kara ia idau bona ia gwau diba: “Lau be taunimanima iboudiai edia rara amo lau goeva.” (Kara 20:​26, NW ) Dubu gunalaia taudia be unai bamona lasi. Idia bamona taudia dekenai Dirava ia gwau: “Ena be guriguri momo do umui gwauraia, to do lau kamonai lasi, emui imana be rara amo idia honu.”​—Isaia 1:15.

3. Kahirakahira, dahaka gaudia, mai edia anina bada tanobada ibounai dekenai gaudia, be do idia vara?

³ Kahirakahira, Dirava ese Tau Dika Rohorohona do ia hahemaoro henia. Iesu ia peroveta hegeregerena, kahirakahira, “hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.” (Mataio 24:21) Babulono Badana, tanobada tomadiho basileiana, ia lalonai Kerisendom tomadihodia idia noho, idia hamasea neganai, unai hekwakwanai momo negana idauna ta do ia matamaia. Politikol oreadia ese “do idia hadikaia momokani, iena dabua do idia kokia, kopina kavakava do idia rakatania. Vadaeni iena tauanina do idia ania, bona lahi dekenai do idia gabua.” (Apokalupo 17:16) Aramagedono dekenai, “Siahu Ibounai Diravana ena Dina Badana neganai,” Satana ena tanobada kahana oreadia do idia hadikaia ore. Unai neganai, hisihisi bada herea negana do ia doko.​—Apokalupo 16:​14, 16; 19:​11-21.

Ma Haida Lalokau Henia ena Maduna

⁴ Kahirakahira, inai tanobada do idia hadikaia gaudia do idia vara, unai dainai “mai lauma bona mai momokani danu [Tamana] do idia tomadiho henia” taudia ese dahaka maduna idia abia? (Ioane 4:23) Edia maduna ta be inai: Idia laloatao Iesu ia gwau: “Bema umui ese lauegu taravatu do umui badinaia, vadaeni egu lalokau dekenai do umui noho, lau hegeregerena, egu Tamana ena taravatu lau badinaia, vadaeni iena lalokau dekenai lau noho. . . . Lauegu taravatu be inai, umui ta ta umui lalokau henia, lau ese umui lau lalokau henia hegeregerena. Lalokau namo herea momokani be inai, tau ta ena mauri do ia atoa diho, ena turana totona. Lauegu taravatu do umui badinaia, unai dekena amo lauegu turana do umui lao.”​—Ioane 15:​10-14; 1 Ioane 5:3.

5, 6. (a) Iesu ese iena hahediba taudia dekenai dahaka oda ia henidia, unai idia badinaia neganai do ia hedinarai idia be iena hahediba taudia? (b) Badina be dahaka unai taravatu be taravatu matamatana?

⁵ Unai dainai Keristen taudia momokanidia edia maduna be ma taunimanima haida idia lalokau henidia, edia Keristen tadikaka bona taihudia tano iboudiai dekenai idia lalokau henidia be gau badana. (Kara 10:34; Galatia 6:10; 1 Ioane 4:​20, 21) Momokani, Keristen taudia ‘ta ta idia lalokau henia mai edia lalona ibounai.’ (1 Petero 4:8) Tanobada ibounai lalonai unai bamona idia lalokau heheni dainai, ia hedinarai idia be tomadiho momokani taudia. Iesu ia gwau: “Taravatu matamatana lau henia umui dekenai inai bamona, umui ta ta dekenai umui lalokau henia. Lau ese umui dekenai lau lalokau henia hegeregerena, umui danu ta ta dekenai umui lalokau henia. Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”​—Ioane 13:​34, 35.

⁶ Badina be dahaka unai taravatu be taravatu matamatana? Mose ena Taravatu Iuda taudia dekenai be: “Oiemu dekena tauna oi lalokau henia, oi sibona oi lalokau henia hegeregerena,” ani? (Levitiko 19:18) Oibe, to Iesu ese inai hereva ia gwauraia neganai ia hahedinaraia ma gau ta danu ia laloa, ia gwau: “Lau ese umui dekenai lau lalokau henia hegeregerena.” Iena lalokau dainai ia ese sibona ena mauri ia atoa diho ma taunimanima haida ia durua totona, bona namona be iena hahediba taudia edia lalona do ia hegeregere unai bamona do idia karaia danu. (Ioane 15:13) Unai lalokau be lalokau badana, badina taunimanima ta be unai bamona sibona ena ura ia dadaraia be Mose ena Taravatu ena hahegani ta lasi.

7. Hari inai negai edena tomadiho ese lalokau ena taravatu idia badinaia?

⁷ Hari iseda negai, edena tomadiho ese unai lalokau taravatuna ia badinaia? Kerisendom tomadihodia be unai bamona idia karaia lasi. Tanobada ibounai tuaridia rua lalonai bona ma tuari haida lalonai danu idia milion milion idia ala-ala heheni. Tanobada ibounai lalonai lalokau ena taravatu idia badinaia taudia be Iehova ena Witness taudia. Tanobada bese badadia edia tuari lalonai idia vareai lasi, badina Iesu ia gwau iena murinai idia raka taudia be “tanobada ena lasi.” (Ioane 17:16) Unai dainai, Paulo bamona, idia gwau diba, “Lau be taunimanima iboudiai edia rara amo lau goeva.” Haheitalai ta be Iehova ena hesiai taudia edia gwaubou herevana ta. Unai hereva be hebouhebou ta, Washington, D.C. dekenai, November 27 1921 ai, idia karaia:

“Ita be Keristen taudia bona dala ita tahua goevagoeva iseda Lohiabada Keriso Iesu bona iena Aposetolo taudia edia hahediba herevadia ita badinaia totona. Iseda lalohadai be inai: Tuari be dagedage taudia edia kara amo ia vara, taunimanima edia kara namo ia hadibaia, bona Keristen besedia edia ladana ia hadikaia; bona Lohiabada Iesu Keriso ena hahediba herevadia dainai Keristen taudia be tuari lalonai idia vareai diba lasi, rara idia bubua diba lasi bona dagedage karadia iboudiai idia karaia diba lasi.”

8. Tanobada Ibounai Tuarina Iharuana lalonai Iehova ena Witness taudia edia sivarai be dahaka?

⁸ Tanobada Ibounai Tuarina Iharuana lalonai unai lalohadai edena bamona idia badinaia? Unai tuari ese taunimanima edia tuari gunadia iboudiai edia dika ia hanaia. Unai tuari lalonai, taunimanima 50 milion bamona idia mase. Iehova ena Witness taudia ese unai taudia ta ena mase idia havaraia lasi! Haheitalai ta be inai, Germany ena pris bona pasto taudia kahirakahira iboudiai ese Nazi taudia idia durua dala badana amo eiava dala maragina amo. To Iehova ena Witness taudia edia kara be idau. Nazi taudia idia lohia neganai tuari lalonai idia vareai lasi, lasi momokani; idia ura lasi Hitler idia hanamoa, bona idia ura lasi iena tuari oreana lalonai do idia vareai. Unai dainai edia orea taudia ma tano haida lalonai idia alaia mase lasi, bona ma tau ta danu idia alaia mase lasi. Bona Iehova ena Witness taudia ma tano iboudiai dekenai danu be tuari lalonai idia vareai lasi.

9. Germany bona Austria dekenai Nazi taudia idia lohia neganai, Iehova ena Witness taudia dekenai dahaka ia vara?

⁹ Iehova ena Witness taudia momo ese sibodia edia mauri idia atoa diho edia turadia dainai, bona unai dala amo lalokau ena taravatu idia badinaia. Friedrich Zipfel ese buka ta Kirchenkampf in Deutschland (Germany edia Dubu edia Tuari) ia torea. Unai buka ia gwauraia tauna ese Iehova ena Witness taudia be inai bamona ia herevalaia: “Iehova ena Witness taudia 100 100 amo, National Socialistic [Nazi] taudia ese 97 97 idia dagedage henidia. Idia toi toi amo, ta ta be inai bamona idia mase: Hamasea karana ta amo, dagedage karadia ma haida amo, hitolo amo, gorere amo, eiava hesiai gaukara dikana amo. Unai dagedage ia dika herea, ma dagedage karadia iboudiai edia dika ia hanaia. Unai bamona idia dagedage henidia badina idia ese edia abidadama dekenai idia gini goada, bona edia abidadama ese National Socialistic taudia edia lalohadai ia dadaraia.” Austria dekenai Iehova ena Witness taudia 100 100 amo 25 25 idia hamasea, idia dadabaia mase, eiava gorere dainai eiava tauanina ena goada ia ore dainai Nazi dibura kamepadia lalonai idia mase.

10. Lalokau ena taravatu idia badinaia dainai idia mase taudia edia helaro be dahaka?

¹⁰ Lalokau ena taravatu idia badinaia dainai idia alaia mase taudia idia abidadama “Dirava ena kara be gagevagageva lasi, ia be maoromaoro momokani. Unai dainai ia ese [edia] kara namodia do ia laloaboio lasi. [Idia] ese [idia] lalokau henia.” (Heberu 6:10) Idia diba “tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.” (1 Ioane 2:17) Edia helaro aukana be do idia toreisi lou bona mauri hanaihanai do idia abia diba.​—Ioane 5:​28, 29; Kara 24:15.

11. Iehova ena hesiai taudia be edena bamona idia idau, bona idia dekenai dahaka peroveta herevana ia guguru?

¹¹ Petro bona aposetolo taudia haida ese taravatu ta idia gwauraia kota badana taudia dekenai, idia gwau: “Dirava ai kamonai henia be namo, taunimanima ai kamonai henia be dika.” Iehova ena hesiai taudia sibodia ese unai taravatu idia badinaia. (Kara 5:29) Badina Iehova ena Witness taudia be unai bamona idia karaia dainai, “Lauma Helaga” ena heduru idia abia, “inai Lauma be Dirava ese ia henia iena kamonai taudia dekenai.” (Kara 5:32) Unai be siahu ta, bona unai siahu dainai Isaia 2:​2-4 ena peroveta herevana idia hagugurua diba. Unai peroveta herevana ia gwau iseda nega lalonai tomadiho momokanina do idia haginia lou bona bese bona tomadiho idauidau do idia aru lao henia. Unai dainai, “idia ese edia tuari kaia do idia hodoa, tano geia auridia ai do idia halaoa, bona edia io do idia hodoa, au rigidia utua pakosidia ai do idia halaoa. Bese ta ese tuari kaia do ia abia isi lasi, bese ta hadikaia totona, bona tuari dalana do idia hadibaia lou lasi.” Iehova ena hesiai taudia idia hegaegae ia maino tanobadana lalonai do idia noho totona, unai dainai tuari do idia hadibaia lou lasi. Lalokau ena taravatu idia hadibaia.​—Ioane 13:​34, 35.

12. Lalokau ena taravatu idia badinaia taudia ese dahaka idia karaia be gau badana, ma taunimanima haida do idia durua totona?

¹² Keristen lalokau ena anina ta be “oiemu badibadinai tauna dekenai oi lalokau henia, oi sibona oi lalokau henia bamona.” Unai dainai Dirava ena hesiai taudia ese edia diba be ma taunimanima haida dekenai idia gwauraia hedinarai, ma haida edia namo idia laloa dainai. (Mataio 22:39) Ma taunimanima momo idia ura Dirava ena hesiai gaukara do idia karaia bona iena tanobada matamatana lalonai do idia mauri. Nega ia do noho neganai, namona be idia danu ese lalokau ena taravatu dekenai bona Atai Herea Lohiabadana, Iehova Dirava, dekenai diba idia abia. Gau badana be haida ese idia hadibadia Iehova sibona ita tomadiho henia be maoro, bona unai tomadiho ita henia dalana idia dibaia danu. (Mataio 4:10; Apokalupo 4:11) Unai gaudia idia diba vadaeni taudia be mai edia maduna ma taunimanima haida idia hadibaia Iehova ese idia danu do ia lalo-namo henidia totona.​—Esekiel 33:​7-9, 14-16.

Tau Dika Rohorohona ena Dika Hahedinaraia

¹³ Iesu ia gwau “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” (Mataio 24:14) Dirava ena hesiai taudia be tanobada ibounai lalonai unai haroro gaukara idia karaia negana lalonai, maduna idia huaia Dirava ena hahemaoro tomadiho koikoi dekenai, Kerisendom ena dubu gunalaia taudia dekenai danu, do idia gwauraia hedinarai. Dirava ena matana ai, idia edia kerere be bada herea badina idia gwau idia be Keristen taudia. Gau badana be edia dika idia hahedinaraia goevagoeva, idia ura Dirava do idia hesiai henia taudia be edia siahu amo do idia siri totona bena dala maorona ai kara do idia karaia do idia roho mauri totona. Iesu ia hereva hegeregerena: “Hereva momokani ese umui do ia ruhaia.”​—Ioane 8:32.

14. Tomadiho koikoi edia kara be edena bamona idia harorolaia goevagoeva be namo?

¹⁴ Vadaeni, namona be Iehova ena Witness taudia ese unai hereva Dirava ena lauma amo ia vara herevana, idia gwauraia hedinarai, ia ese tomadiho koikoi ia herevalaia: “Lauegu orea taudia e, ia dekena amo do umui raka siri, ia danu do umui kara dika hebou garina, bona ia danu panisi do umui abia hebou garina! Badina be iena kara dikadia be momo herea momokani, ororo bamona idia daekau lao ela bona guba dekenai, bona Dirava ese iena kara dikadia do ia laloaboio lasi. . . . Dina tamona lalonai hisihisi idauidau ia dekenai do idia ginidae, gorere, lalohisihisi, bona hitolo bada. Lahi ese do ia araia ore, badina be Lohiabada Dirava, unai lebulebu hahine ia kota henia Diravana be mai ena siahu bada.”​—Apokalupo 18:​4-8.

¹⁵ Bible ena peroveta herevadia ese idia hahedinaraia inai nega dikana ena “nega dokonai” be lagani 1914 ai idia matamaia. (2 Timoteo 3:​1-5, 13; Mataio 24:​3-13) Unai lagani ena nega amo ita be “dokona negana” ai ita noho. (Daniel 12:4) Iehova ese ia gwauraia hidi negana ai, Tanobada Ibounai Tuarina Ginigunana ia ore murinai, iena hesiai taudia ese Basileia idia harorolaia goadagoada, Mataio 24:14 ena peroveta herevana hegeregerena. Danu, tomadiho koikoi ena dika idia hahedinaraia goevagoeva, bona Kerisendom ena taravatu utua pris bona pasto oreana ena dika idia hahedinaraia danu.

16. Idia hanai lagani 70 bona ma haida lalonai Tau Dika Rohorohona ena dika hahedinaraia gaukarana be edena bamona idia habadaia?

¹⁶ Idia hanaia laganidia 70 bona ma haida lalonai, Dirava ena hesiai taudia ese taravatu utua tauna ena koikoi karadia be taunimanima dekenai idia hadibaia, bona unai kara idia habadaia. Tanobada Ibounai Tuarina Ginigunana murinai, Witness taudia tausen haida sibodia ese unai gaukara idia karaia. To hari idia be “bese badana mai goadana” ai idia lao vadaeni. Unai bese lalonai hesiai taudia milion toi mai kahana idia gaukara noho tanobada ibounai lalonai kongregesen 60,000 bona ma haida lalonai. (Isaia 60:22) Dirava ena hesiai taudia ese Dirava ena Basileia idia harorolaia goadagoada bona unai kara idia habadaia. Idia gwau Dirava ena Basileia sibona ese taunimanima ia durua diba, bona pris bona pasto taudia edia kara korikori idia hahedinaraia danu​—ia be koikoi tauna, Tau Dika Rohorohona.

Dahaka Dainai Edia Siahu be Bada?

¹⁷ Dahaka dainai lagani momo lalonai Iehova ena hesiai taudia ese Tau Dika Rohorohona ena dika idia hahedinaraia, mai edia goada ida? Badina be Iehova ena mamoe taudia milion milion be hahemauri dalana dekenai idia raka noho, bona gau badana be unai taudia idia naria, Satana ena tanobada bona iena tomadiho koikoi ese idia ia hadikaia garina. (Ioane 10:16; Apokalupo 7:​9-14) Danu, bema pris bona pasto taudia edia dika idia hahedinaraia lasi, kudou-maoro taudia, Dirava ena mamoe serina lalonai idia do vareai lasi taudia, ese dala kererena amo idia gini siri dalana do idia diba lasi. Unai dainai namona be unai taudia idia hadibaia, Iesu ese taunimanima ia hadibaia hegeregerena. Iena nega lalonai idia noho tomadiho gunalaia koikoi taudia be inai bamona ia herevalaia, ia gwau: “Idia be matakepulu taudia, bona matakepulu taudia idia hakaua lao noho. Bema matakepulu tauna ese matakepulu tauna do ia hakaua, idia ruaosi guri dekenai do idia moru.”​—Mataio 15:14; 2 Korinto 4:4; 11:​13-15 itaia danu.

18. Hereva momokani idia tahua taudia be dahaka idia diba be namo?

¹⁸ Dubu gunalaia taudia be Satana ena tanobada lalonai idia noho. (Ioane 8:44) To kahirakahira Dirava ese unai tanobada do ia hadikaia ore vaitani. (2 Petero 3:​11-13; 1 Ioane 2:​15-17) Unai dainai Dirava ena Hereva ia gwau: “Umui diba lasi, a, bema umui ura tanobada danu umui turana karaia neganai Dirava umui tuari henia noho?” (Iakobo 4:4) Dubu gunalaia taudia ese unai sisiba idia laloa lasi, bona idia be politikol karadia lalonai idia vareai noho. Edia murinai idia raka taudia idia hadibaia, politikol taudia edia gaukara dainai tanobada do ia namo ia lao. To unai be helaro momokanina lasi, badina inai tanobada, Satana henunai, do ia ore. Unai dainai haida ese inai tanobada amo helaro namona idia tahua taudia idia koia vadaeni. Namona be haida ese hereva momokani be idia dekenai do idia hadibaia bena do idia diba nega vairai inai tanobada ese dahaka do ia davaria bona tanobada ai dahaka gau matamatana do ia gini.​—Hereva Lada-isidia 14:12; 19:21; Mataio 6:​9, 10; Apokalupo 21:​4, 5.

19. Hari inai negai, pris bona pasto taudia haida edia dika be edena bamona idia hahedinaraia televisen, reidio, bona niuspepa dekenai?

¹⁹ Hari inai negai, dubu gunalaia taudia haida edia kara dika be televisen, reidio bona niuspepa dekenai idia gwauraia hedinarai, hegeregere televisen dekenai idia haroro taudia haida idia lebulebu bona idia be mai edia kohu momo herea. Ane torea tauna ta ese ane ta ia torea; iena ladana be “Iesu ese [10,000 dola] Rolex [dina gauna] be Iena Televisen Show Dekenai Do Ia Karaia, A?” Unai ane lalonai ia gwau: “Bema Iesu be tanobada dekenai ia giroa mai, ia ese politikol karadia do ia karaia, a? [Taga gabuna] Palm Springs dekenai iena ruma iharuana do ia abia, a? Bona iena moni bona kohu momo do ia hunia toho, a?” Danu, pris bona pasto taudia momo ese tatau be tatau ida idia mahuta hebou karana idia gwauatao eiava idia karaia. Harihari, Katolik Dubu, United States dekenai, idia fainia dainai ia ese dola milion milion ia henia, iena pris taudia be natu maragidia idia kara bodaga henidia karana ena davana idia karaia totona.​—Roma 1:​24-27; 1 Korinto 6:​9, 10.

20. Badina be dahaka Dirava ena hesiai taudia ese Tau Dika Rohorohona ena dika idia hahedinaraia hanaihanai be gau badana?

²⁰ Dirava ena hesiai taudia ese unai bamona kara dika idia laloaboio diba lasi, to idia hahedinaraia ma taunimanima haida do idia durua totona. Gau badana be mamoe idaudia hutuma bada herea idia naria, haida ese do idia veridia Dirava ena taravatu do idia utua garina. Bona gau badana be “kara dika rohorohodia iboudiai . . . idia taitailaia bona idia ganaganalaia taudia” idia tahua bena Mamoe Naria Tauna Badana, Iehova Dirava, bona “naria tauna namona,” Iesu Keriso, edia henari bona hahekau dalana dekenai idia hakaudia lao.​—Esekiel 9:4; Ioane 10:11; Hereva Lada-isidia 18:10.

21. Iehova ena Witness taudia ese dahaka do idia harorolaia noho?

²¹ Unai dainai Dirava ena hesiai taudia ese Dirava ena hahemaoro Satana ena tanobada ibounai dekenai, bona iena Tau Dika Rohorohona, Kerisendom ena dubu gunalaia taudia, dekenai do idia harorolaia, gari lasi. Aneru ena hereva Apokalupo 14:7 dekenai do idia harorolaia mai edia goada ida, ia gwau: “Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni.” Bona unai haroro lalonai Apokalupo 18:4 ena hereva badana, tomadiho koikoi ia gwauraia herevana, idia harorolaia danu: “Lauegu orea taudia e, ia dekena amo do umui raka siri, ia danu do umui kara dika hebou garina, bona ia danu panisi do umui abia hebou garina!”

Henanadai Haida:

◻ Tau Dika Rohorohona dekenai dahaka do ia vara, bona dahaka dainai?

◻ Iehova ena hesiai taudia edia maduna ma taunimanima haida dekenai be dahaka?

◻ Iehova ena orea taudia be taunimanima iboudiai edia rara amo edena bamona idia goeva noho?

◻ Babulono Badana dainai, dahaka ita karaia be namo?

◻ Dahaka dainai iseda haroro gaukara, Tau Dika Rohorohona ita harorolaia gaukarana badana, do ita karaia noho?

4. “Mai lauma bona mai momokani danu do idia tomadiho henia” taudia ese dahaka idia laloatao be gau badana?

13. Tanobada ibounai lalonai ita haroro neganai, dahaka ita gwauraia hedinarai be gau badana, bona dahaka dainai?

15. Iehova ia gwauraia hidi negadia lalonai lagani 1914 be edena bamona ia be mai anina bada, bona Tanobada Ibounai Tuarina Ginigunana ia ore murinai dahaka ia vara?

17. Dahaka dainai Iehova ena hesiai taudia ese Tau Dika Rohorohona ena dika idia hahedinaraia, mai edia goada ida?

[Picture on page 25]

Aposetolo taudia be kota badana taudia idia hereva henidia idia gwau: “Dirava ai kamonai henia be namo, taunimanima ai kamonai henia be dika.”

[Picture on page 26]

Namona be kudou-maoro taudia idia diba nega vairai inai tanobada bona iena tomadiho dekenai dahaka do ia vara