Keriso ese Taravatu Utua Kara Ia Inai Henia—Oi Danu, A?
“Oi ese kara maoromaoro oi ura henia. To kara dika be oi badu henia. Unai dainai lau Dirava, oiemu Dirava, ese oi lau abia hidi, oiemu kwarana dekenai dehoro lau bubua, vadaeni oiemu hanamoa be bada, oiemu bamona taudia edia hanamoa be maragi.”—HEBERU 1:9.
1. Iehova Dirava ena hesiai taudia momokanidia ese kara maoromaoro idia ura henia sibona lasi, to ma dahaka danu do idia karaia be namo?
IEHOVA ena hesiai taudia momokanidia ese mai edia kudouna, souli, lalona, bona goada ibounai ida ia idia lalokau henia. (Mareko 12:30) Edia abidadama karana amo idia ura Iehova ena kudouna idia hamoalea. (Hereva Lada-isidia 27:11) Unai idia karaia totona, gau badana be kara maoromaoro idia ura henia sibona lasi, to kara dika idia inai henia danu. Idia Tohotohoa Tauna, Iesu Keriso, be unai bamona ia karaia. Iena kara idia gwauraia inai bamona: “Oi ese kara maoromaoro oi ura henia. To kara dika be oi badu henia.”—Heberu 1:9.
2. Taravatu utua karadia haida be dahaka?
2 Taravatu utua kara be dahaka? Ia be kara dika, ena toretore dekenai aposetolo Ioane ese unai ia hahedinaraia, ia gwau: “Kara dika tauna ese Dirava ena taravatu ia utua noho, badina kara dika be taravatu utua gauna.” (1 Ioane 3:4) Taravatu utua tauna be “taravatu ese ia koua lasi.” (Webster’s Ninth New Collegiate Dictionary) Dika karadia, heudahanai, kara bodaga, bona kara koikoi iboudiai be taravatu utua karadia. Ita itaia tanobada dekenai taravatu utua kara be idia vara bada herea, guna unai bada bamona ia vara lasi. Aposetolo Paulo be 2 Timoteo 3:1-5 dekenai “metau dikadia” ena nega ia perovetalaia bona ita diba momokani ita be unai nega lalonai ita noho. Taravatu utua kara idia vara momo dainai, hahegani ita abia dika karadia iboudiai ita inai henia totona be namo! Hegeregere, ita idia hadibaia: “Iehova umui lalokau henia taudia e, dika umui inai henia.” (Salamo 97:10) Danu, ita duahia: “Dika oi inai henia, namo oi ura henia.”—Amos 5:15.
Inai Henia Karadia Edia Toana be Toi
3-5. Dirava ena Hereva lalonai, unai hereva ‘inai henia’ be edena dala toi amo ia gaukaralaia?
3 Gau ta inai henia karana ena anina be dahaka? Dirava ena Hereva lalonai, ‘inai henia’ karana be dala idauidau toi dekenai idia gaukaralaia. Inai henia karana ta be dagedage dainai oi ura tau ta oi kara dika henia. Keristen taudia be unai dala dekenai inai henia karana idia dadaraia be gau badana. Unai kara ese Kain ia doria ena kara maoromaoro tadina Abel ia hamasea totona. (1 Ioane 3:12) Tomadiho gunalaia taudia ese unai dala amo Iesu Keriso idia inai henia.—Mataio 26:3, 4.
4 Danu, Buka Helaga lalonai unai hereva ‘inai henia’ idia gaukaralaia neganai, ena anina ta be lalokau ita hamaragia. Hegeregere, Iesu ia gwau: “Bema ta lau dekenai do ia mai, to ena tamana, ena sinana, ena adavana, ena natuna, ena tadikakana, bona ena mauri danu, bema ia laloaboio [inai henia] lasi, ia be hegeregere lasi lauegu diba tahua tauna ia lao.” (Luka 14:26) Ia hedinarai goevagoeva, Iesu ena hereva ena anina be idia ita lalokau henia maragi, to ia ita lalokau henia bada. Iakobo ese ‘Lea ia inai henia,’ unai anina be Lea ia ura henia maragi, to Rahela ia ura henia bada.—Genese 29:30, 31.
5 To, iniseniai ita ura ‘inai henia’ karana ena anina ma ta ita diba. Ena anina be gau ta eiava taunimanima ta ita ura henia lasi momokani, ita dagedage henia momokani, bona unai gau eiava taunimanima ta ita dadaraia momokani. Salamo 139 lalonai, ia gwau “inai henidia mai . . . laloa ibounai danu.” Unuseniai David ia gwau: “Iehova e, oi idia inai henia taudia be lau inai henidia, ani? Oi idia gwau-edeede henia taudia lau inai henidia momokani, ani? Lau inai henidia mai egu laloa ibounai danu. Lau gwau idia be lauegu inai taudia korikoridia.”—Salamo 139:21, 22.
Taravatu Utua Kara Ita Inai Henia Ena Badina
6, 7. (a) Dahaka dainai taravatu utua kara ita inai henia be namo? (b) Taravatu utua kara dadaraia ena badina badana iharuana be dahaka?
6 Taravatu utua kara ita inai henia ena badina be dahaka? Badina tamona be ita ura sibona ita matauraia bona iseda lalona ena mamina namona ita dogoatao noho. Unai dala amo sibona iseda kara maoromaoro, lalokau guba Tamana, Iehova, ita turana henia momokani diba. Salamo 26 ita duahia neganai, ita diba David be haheitalai namona unai dala dekenai. Hegeregere, ia gwau: “Kara dika taudia edia hebou lau inai henia, bona kara dika taudia ida lau helai hebou lasi.” (Salamo 26:5) Dirava ita lalokau henia bona kara maoromaoro ita ura henia neganai, namona be unai ese ita ia doria kara maoromaoro dalanai ita badu. Anina be Iehova ia ura henia lasi karadia iboudiai, Iehova dekenai idia gwau-edeede henia bona idia inai henia taudia edia kara dikadia danu, ita inai henia. Ma danu, namona be taravatu utua kara ita inai henia badina unai kara ese Dirava ena ladana ia hadikaia.
7 Iehova ena taunimanima be taravatu utua kara idia inai henia ena badina ma ta be unai kara be mai garina badina dika ia havaraia diba. Tauanina dalanai hadohado karana, taravatu utua karana unai, ena amo dahaka do ia vara? Paulo ena hadibaia sisibana be inai: “Umui laloa kerere lasi, Dirava ita koia diba lasi. Bema tau ta aniani uhena ia hadoa, vadaeni unai bamona aniani sibona be do ia abia. Bema tauanina ena ura ia hadoa neganai ia be mase do ia abia. Bema Lauma ena gau ia hadoa neganai ia be mauri hanaihanai do ia abia.” (Galatia 6:7, 8) Unai dainai, taravatu utua kara iboudiai ita dadaraia be gau badana. Momokani, ita noho namo bona ita lalo-maino totona gau badana be taravatu utua karadia iboudiai ita inai henia.
Taravatu Utua Kara Idia Inai Henia Taudia
8. Taravatu utua kara inai henia karana dekenai daika be haheitalai namona; edena Bible siri ese unai ia hamomokania?
8 Taravatu utua kara inai henia karana dekenai, Dirava be haheitalai namona aonega taudia iboudiai idia tohotohoa totona. Kara maoromaoro dalanai ia ese taravatu utua kara ia badu henia, bona iena Hereva ia gwau: “Iehova ese gau 6 ia inai henidia; io, gau 7 ia ese ia badulaidia momokani: hekokoroku matadia, koikoi malana, kerere lasi tauna ena rara bubua imadia; lalohadai dikadia ia laloa lalona, kara dika ia heau henia aedia; koikoi herevadia mo ia gwauraia, samani koikoi tauna, bona heiriheiri be tadikaka bogaragidiai ia havaraia tauna.” Danu ita duahia: “Iehova ita gari henia ena anina be dika ita inai henia. Tau ta be sibona ia abia isi, bona hekokoroku, bona dala dikana, bona uduna gagevagagevana lau inai henia.” (Hereva Lada-isidia 6:16-19; 8:13) Unai sibona lasi, inai ita idia hadibaia danu: “Lau, Iehova, ese hahemaoro goevagoeva lau ura henia, bona henaohenao karadia bona kara dikadia lau inai henidia.”—Isaia 61:8.
9, 10. Iesu be edena bamona ia hahedinaraia ia be taravatu utua kara ia inai henia?
9 Iesu Keriso ese ena Tamana ia tohotohoa, ia hegeregerena ia ese taravatu utua kara ia inai henia. Unai dainai, ita duahia: “Oi ese kara maoromaoro oi ura henia. To kara dika be oi badu henia. Unai dainai lau Dirava, oiemu Dirava, ese oi lau abia hidi, oiemu kwarana dekenai dehoro lau bubua, vadaeni oiemu hanamoa be bada, oiemu bamona taudia edia hanamoa be maragi.” (Heberu 1:9) Inai henia karana dekenai Iesu be haheitalai namona ita tohotohoa totona. Tomadiho koikoi gunalaia taudia be mai edia ura danu taravatu utua karadia idia karaia neganai, Iesu ese edia kara ia gwauraia dika, unai dala amo ia hahedinaraia ia ese taravatu utua karadia ia inai henia. Nega momo ia gwau dika henidia, ia gwau idia be koikoi taudia. (Mataio, karoa 23) Ma nega ta dekenai Iesu be idia dekenai ia gwau: “Umui be emui tamana Satani dekena amo umui mai, bona umui ura emui tamana ena ura dikadia do umui karaia.” (Ioane 8:44) Nega rua Iesu ese tomadiho koikoi taudia be dubu amo ia luludia dubu ia hagoevaia totona, unai neganai ia hahedinaraia ia ese taravatu utua kara ia inai henia.—Mataio 21:12, 13; Ioane 2:13-17.
10 Danu, Iesu ese taravatu utua bona kara dika karadia ia dadaraia dainai, ia hahedinaraia unai karadia ia inai henia. Unai dainai, ia idia inai henia taudia dekenai ia gwau diba: “Umui daika kara dika lau dekenai ia davaria vadaeni?” (Ioane 8:46) Iesu be ‘helaga, kara dika lasi, kerere ta lasi, ia be kara dika taudia bamona lasi, ia be goeva momokani.’ (Heberu 7:26) Petro ese unai ia hamomokania, ia torea, Iesu be “kara dika ta ia karaia lasi. Bona iena uduna dekena amo hereva koikoi ta ia gwauraia lasi.”—1 Petero 2:22.
11. Bible lalonai, taravatu utua kara idia inai henia goevadae lasi taudia be daidia?
11 To, Iesu be tau goevadaena. Bible lalonai, taravatu utua kara idia inai henia momokani goevadae lasi taudia edia sivarai idia noho, a? Oibe, idia noho! Haheitalai ta be Mose bona ia bamoa Levi taudia, Iehova ena hahegani dainai idia ese kaivakuku idia tomadiho henia taudia 3,000 idia alaia mase neganai, idia hahedinaraia idia be kaivakuku tomadiho henia kara idia inai henia. (Esodo 32:27, 28) Fineha ese io amo heudahanai taudia rua ia gwadaia mase neganai ia hahedinaraia taravatu utua kara ia inai henia.—Numera 25:7, 8.
Taravatu Utua Kara Inai Henia Karana
12. (a) Dahaka ita karaia diba taravatu utua kara ita inai henia karana ita hahedinaraia totona? (b) Taravatu utua lalohadai ita abia garina dahaka do ita karaia diba?
12 Hari inai nega lalonai, edena bamona ita hahedinaraia diba ita be taravatu utua kara ita inai henia? Iseda lalohadai, hereva, bona kara ita biagua karana amo. Gaukara ta ita karaia lasi neganai, namona be hanaihanai ita idia hagoadaia gaudia ita lalodia. Bema hanuaboi dekenai ita mahuta diba lasi, reana hagoadaia lasi gaudia ita lalohadailaia, hegeregere lalohisihisi gaudia eiava sihari kava karana ita lalohadailaia. Unai kara ita dadaraia momokani, bona ita idia hagoadaia gaudia sibona ita laloa. Hegeregere, oi goada karaia Bible siri haida, moale gaudia 9, bona lauma huahuadia 9 oi lalodia tao totona. (Mataio 5:3-12; Galatia 5:22, 23) Aposetolo taudia 12 edia ladadia oi gwauraia diba, a? Taravatu Ten oi gwauraia diba, a? Apokalupo lalonai kongregesen 7 edia ladadia be dahaka? Basileia ane edia hereva be iseda kwarana dekenai ita lalodia tao be heduru namona momokani ita ese momokani gaudia, taunimanima edia mauri lalonai anina bada gaudia, kara maoromaoro, kara goevagoeva, lalokau, taunimanima edia ladana hanamoa kara, hebogahisi henia kara, bona mai mataurai karadia ita lalodia tao totona.—Filipi 4:8.
13. Taravatu utua kara ita inai henia neganai, edena bamona hereva do ita inai henia?
13 Ma danu, ita be hereva dikadia iboudiai ita dadaraia neganai taravatu utua kara inai henia karana ita hahedinaraia. Tanobada taudia momo ese hereva miro idia gwauraia bona idia kamonai henia karana idia moalelaia, to Keristen taudia be unai bamona hereva mirodia idia kamonai henidia be namo lasi. Taunimanima ese hereva miro idia gwauraia neganai namona be idia danu ita kikilaia lasi to idia dekena amo ita raka oho. To bema ita raka oho ena dala be lasi, namona be iseda vaira auka amo do ita hahedinaraia ita ura lasi unai bamona hereva ita kamonai henia. Namona be inai sisiba namona ita badinaia, ia gwau: “Hereva mirodia do umui gwauraia lasi, hereva namodia sibona. Vadaeni emui hereva idia kamonai taudia ese durua bona namo do idia davaria, bona emui hereva dekena amo manoka taudia do umui hagoadaia.” (Efeso 4:29) Hereva miro gwauraia eiava kamonai henia karana amo sibona ita hamiroa be namo lasi.
14. Bisinesi dekenai bona moni gaukara dekenai dahaka ese ita ia durua taravatu utua kara ita inai henia totona?
14 Danu, taravatu utua kara ita inai henia ena anina be kara dika iboudiai ita dadaraia. Taravatu utua kara ita inai henia neganai, unai ese ita ia durua bena dala maorona badinaia lasi karana do ita dadaraia. Keristen momokani taudia ese kara dika idia karaia noho lasi. (1 Ioane 5:18 itaia.) Hegeregere, bisinesi dekenai koikoi kara iboudiai ita inai henia be gau badana. Hari inai negai, Iehova ena Witness taudia momo edia gaukara biagudia ese idia doridia toho kara koikoi idia karaia totona, to edia hereva idia badinaia lasi. Ena be Keristen taudia be edia moni gaukara idia haboioa diba, to Bible ese idia ia hadibaia dainai edia lalona ena mamina be ia hegeregere lasi unai kara koikoi idia karaia totona. Ma danu, taravatu utua kara ita inai henia karana ena anina be dala ena saini ita badinaia, takisi ita henia, bona gavamani ese ia gwauraia kohu ena duty davana maorona ita henia.—Kara 23:1; Heberu 13:18.
Matabodaga Kara Ita Inai Henia
15. Taunimanima ia havaraia neganai Dirava ese idia dekenai mahuta hebou urana bada ia henidia, unai ena badina rua namodia be dahaka?
15 Ita be Keristen taudia dainai, matabodaga kara iboudiai ita inai henia be gau badana. Dirava ese taunimanima ia havaraia neganai, idia dekenai mahuta hebou urana mai goadana ia henidia, unai ia karaia ena badina namodia be rua. Ia ese dala ia karaia taunimanima iboudiai do idia ore lasi totona, bona lalokau dalana ia karaia idia moale totona. Ena be taunimanima idia ogogami, idia duahiduahi diba lasi, eiava ma gau ta amo idia dabu, to idia iboudiai be headava bona mahuta hebou karana amo moale idia abia diba. To, Iehova ese taravatu ia atoa headava taudia sibodia ese unai kara idia moalelaia totona. Dirava ese ia atoa taravatuna ita matauraia be gau badana.—Genese 2:24; Heberu 13:4.
16. Namona be iseda lalohadai matabodaga kara bona moalelaia karadia ibounai dekenai be dahaka?
16 Bema taravatu utua kara ita inai henia, ita be matabodaga kara bona matabodaga moalelaia karadia iboudiai ita dadaraia. Unai dainai, bema buka, magasin, bona niuspepa ese matabodaga sivarai idia gwauraia do ita dadaraia. Danu, bema taravatu utua kara ita inai henia, ita be televisen, muvini piksa, bona drama dekenai idia halasia miro gaudia do ita raraia lasi. Bema ita itaia gauna be matabodaga karana ta ia halasia, haraga herea televisen ita koua eiava gari lasi dekenai muvini piksa rumana ita rakatania. Unai hegeregerena, taravatu utua kara ita inai henia neganai ita ese miusik ena hereva eiava ena rege idia dika bona mahuta hebou urana idia havaraia neganai ita dadaraia. Ita be matabodaga karadia edia diba ita tahua lasi, to ‘kara dika totona natuna maragi bamona do ita laloa karaia, to laloa dobu gaudia totona, tau badadia bamona unai gaudia do ita laloa.’—1 Korinto 14:20.
17. Kolose 3:5 ena sisiba be edena bamona ita ia durua diba mauri ena kara goeva ita badinaia noho totona?
17 Mai maoromaoro danu ita abia sisibana be inai: “Tauanina ena ura kara umui lalonai idia gaukara noho, do umui hamasea. Gaudia be inai: heudahanai, lebulebu, matadika, matabodaga.” (Kolose 3:5) Mauri ena kara goeva ita badinaia noho totona gau badana be iseda lalona ita hadaia momokani. The Expositor’s Bible Commentary buka ese Kolose 3:5 dekenai unai hereva “hamasea” ena anina Greek gado ai ia herevalaia inai bamona: “Ena anina be kara dikadia bona lalohadai dikadia koua eiava biagua sibona lasi. Ena anina be ita dadaraidia momokani, unai mauri dalana ena kara gunana do ita kokia momokani. Ena anina be ita ‘hamasea momokani.’ . . . Unai hereva ena anina be mai iseda goada ibounai danu, ita hekwarahi iseda lalona ita hadaia momokani totona.” Unai dainai, namona be matabodaga kara iboudiai amo ita gini siri, ita be mase ia havaraia hanaia gorere dikana amo ita gini siri hegeregerena, badina tauanina dalanai bona lauma dalanai unai kara ese ita ia hamasea momokani diba. Keriso be unai bamona lalohadai ia herevalaia, ia gwau bema imana, aena, eiava matana ese ita ia hahekwakwanaia, namona be ita kokia oho.—Mareko 9:43-48.
Tomadiho Koikoi Kara bona Hereva Momokani Dadaraia Kara Inai Henidia
18. Tomadiho dalanai taravatu utua kara inai henia karana be edena bamona ita hahedinaraia diba?
18 Danu, Iesu ese tomadiho taudia koikoidia edia kara dika ia hahedinaraia neganai ia ese taravatu utua kara inai henia karana ia karaia, unai hegeregerena, hari inai negai, Iehova ena Witness taudia ese tomadiho orea edia taravatu utua karadia idia hahedinaraia neganai idia be taravatu utua kara idia inai henia. Edena bamona? Idia ese Bible ia gwauraia buka bona magasin idia hariharilaidia, bona edia sivarai ese tomadiho dalanai ariara hahine, Babulono Badana, ena kara idia hahedinaraia. Bema tomadiho orea edia taravatu utua kara ena koikoi ita inai henia momokani, ita be mai goada danu Babulono Badana, tanobada ena tomadiho koikoi ibounai oreana, ena dika do ita gwauraia hedinarai. Lauma dalanai ia ese kudou-maoro taudia edia matana ia hakepuludia bona ia guidia dainai, ita ura durudia. Bema Babulono Badana ena taravatu utua kara ita inai henia bada, ita ese mai goada danu Basileia ena gaukara kahana ibounai do ita karaia bada.—Mataio 15:1-3, 7-9; Tito 2:13, 14; Apokalupo 18:1-5.
19. Namona be hereva momokani idia dadaraia taudia dekenai iseda lalohadai be dahaka, bona badina be dahaka?
19 Danu, taravatu utua kara inai henia ena anina be hereva momokani idia dadaraia taudia edia kara ita inai henia. Namona be hereva momokani idia dadaraia taudia dekenai iseda kara be David ena hegeregerena, ia gwau: “Iehova e, oi idia inai henia taudia be lau inai henidia, ani? Oi idia gwau-edeede henia taudia lau inai henidia momokani, ani? Lau inai henidia mai egu laloa ibounai danu. Lau gwau idia be lauegu inai taudia korikoridia.” (Salamo 139:21, 22) Hari inai negai, hereva momokani idia dadaraia taudia be “Tau Dika Rohorohona,” Kerisendom orea edia gunalaia taudia, edia kahana dekenai idia gini. (2 Tesalonika 2:3) Ita be Iehova ena abidadama Witness taudia dainai, ita be idia dekena amo ita siri momokani. Ita be goevadae lasi taudia dainai, iseda kudouna ese ita idia veria diba iseda tadikaka ita maumauraia totona. “Hesiai tauna mai ena kamonai bona mai ena kara maoromaoro” oreana taudia be idia goevadae lasi danu. (Mataio 24:45-47) To unai oreana be mai ena kamonai bona mai ena kara maoromaoro. To hereva momokani idia dadaraia taudia ese sibodia edia gaukara idia habadaia totona, idia ese iseda gaukara idia gunalaia tadikaka edia kerere idia gwauraia bada. Edia koikoi herevadia ese ita idia hadikaia garina namona be edia hereva ita dadaraia momokani, ita ese poisini ita dadaraia hegeregerena, badina ia be poisini dikana.—Roma 16:17, 18.
20, 21. Taravatu utua kara ita inai henia ena badina haida be dahaka?
20 Ita itaia vadaeni tanobada be taravatu utua kara amo ia honu momokani, kara dika amo ia honu unai. Kara maoromaoro ita ura henia sibona be hegeregere lasi; taravatu utua kara ita inai henia danu be gau badana. Keristen kongregesen murimurinai idia atoa taudia haida be reana guna idia laloa kara maoromaoro idia ura henia, to idia be taravatu utua kara idia inai henia bada lasi dainai dika idia davaria. Taravatu utua kara ita inai henia ena badina ita diba vadaeni. Bema ita inai henia lasi, iseda lalona ena mamina ia namo lasi bona sibona dekenai hemataurai do ita abia lasi. Ma danu, taravatu utua kara ena anina be Iehova Dirava ita abidadama henia lasi. Bona taravatu utua kara ese ita dekenai huahua dikana ia havaraia—unai be moale lasi, kara dika bona mase.
21 Taravatu utua kara ita inai henia karana hahedinaraia dalana ita diba vadaeni. Ita ese koikoi, matabodaga, bona tomadiho momokani dadaraia karadia amo ita gini siri momokani. Ita ura Iehova ena ladana ita hahelagaia bona ita hamoalea, unai dainai kara maoromaoro ita ura henia sibona lasi, to iena hesiai gaukara dekenai ita goada karaia bona taravatu utua kara ita inai henia, iseda Hakaua bona Gunalaia Tauna, Iesu Keriso, ia karaia hegeregerena.
Edena Bamona Do Oi Haere?
◻ Bible lalonai unai hereva ‘inai henia’ be edena bamona ia gaukaralaia?
◻ Taravatu utua kara ita inai henia ena badina namodia haida be dahaka?
◻ Taravatu utua kara idia inai henia taudia edia haheitalai be namo; idia be daidia?
◻ Taravatu utua kara ita inai henia karana be edena bamona ita hahedinaraia?
[Picture on page 8]
Iesu ese taravatu utua kara ia inai henia dainai dubu ia hagoevaia
[Picture on page 10]
Bema taravatu utua kara ita inai henia, ita be matabodaga moalelaia karadia do ita dadaraia