Haroro Gaukara Bisinesi Gabudiai—Japan Taudia Idia Karaia Bamona

IESU KERISO ena hahegani be haroro gaukara do idia karaia “tanobada ena kahana ibounai” dekenai, bona unai anina be bisinesi gabudia dekenai ita haroro danu. (Kara 1:8) Japan lalonai, bisinesi bona kampani edia opesi badadia dekenai idia gaukara taudia dekenai Basileia idia harorolaia be gaukara aukana ta. Kongregesen ta ena Basileia pablisa taudia ese gwaumaoro idia abia opesi momo rumana ta dekenai, dina tubua ena aniani negana lalonai magasin gaukara idia karaia totona. Pablisa taudia idia guriguri Iehova dekenai idia gari lasi totona bona edia dabua toana bona kara idia laloa bada, bona danu lapel kadi dekenai edia ladana idia torea taunimanima idia diba idia be Iehova ena Witness taudia totona.

Witness taudia ese gaukara taudia dekenai idia lao bona idia ta idia gwau: “Eksius, lau dekenai gwaumaoro idia henia taunimanima lau hereva henidia totona. Oi ura oi aniani noho lalonai lauegu hereva oi kamonai henia, a?” Unai Witness taudia be mai laloa namonamo bona “mai gado namo” amo idia hereva. (Kolose 4:6) Nega ginigunana idia lao neganai, idia be magasin 39 idia hariharilaidia, to unai stori 8 rumana dekenai idia gaukara taudia 1,500 idia haroro henidia totona, nega 4 idia giroa lou. Idia hariharilaidia magasin iboudiai be 100 ia hanaia, bona taunimanima haida idia ura magasin idia abia hanaihanai bona lou-henia haida idia karaia diba.

Pablisa ta ese gaukara biaguna ta ia lou henia. Bona pablisa ese The New World Translation Bible dekena amo siri ta ia duahia neganai, unai biaguna ia gwau: “Inai Bible ena hereva be auka lasi. Guna lau duahia Bible ena hereva be Japan ena gado gunana dekenai idia torea dainai ena hereva momo lau diba lasi.” Murina pura dekenai The New World Translation Bible ia dekenai idia laohaia.

Oiemu teritori dekenai sivarai namo “taunimanima ibounai” dekenai, bisinesi gabudia dekenai danu harorolaia gaukara oi habadaia diba, a?​—1 Timoteo 2:4.