Basileia Haroro Ripoti

Taunimanima be Edia Gaukara Gabudiai Ita Davaria

EDENA dala ai Mataio, Petero, Andrea, Iamesi bona Ioane idia hegeregere? Idia ibounai be Iesu ese edia gaukara gabudia amo ia boiria. Petero, Andrea, Iamesi bona Ioane be edia haoda gaukarana dekenai idia bisi bada neganai, Iesu ese idia ia boiria, ia gwau: “Lauegu murinai umui raka.” Mataio be takisi ruma dekenai ia helai noho neganai, Iesu ese ia boiria ena hahediba tauna ai ia lao totona.​​—⁠Mataio 4:​18-​21; 9:⁠9.

Taunimanima edia gaukara gabudia ai ita haroro neganai anina namona do ita havaraia diba. Iehova ena Witnes taudia Japan dekenai be unai idia diba neganai, idia hekwarahi unai haroro dalana idia badinaia totona. Dahaka anina namona idia havaraia? Hua haida lalonai, lou henia tausen momo idia karaia bona Baibel stadi 250 idia hamatamaia. Inai ekspiriens haida mani oi laloa.

Tokyo dekenai ful-taim hesiai gaukara ia karaia tadikakana ta be aniani gabuna ta ena biaguna ia davaria bona unai tauna be lagani 30 gunanai ia sikuli neganai Witnes tauna ta ida sikuli dekenai idia herevahereva. Ena be unai aniani gabuna ena biaguna be guna idia herevalaia gaudia ia lalo-pararalaia lasi, to Baibel ena hereva ia ura henia matamaia. Ena ura ia goada lou dainai, Diba ese Mauri Dekenai Ita Ia Hakaua Lao bukana amo Baibel stadi ia abia.a Ma danu, sibona ena Baibel duahiduahi program ta ia hamatamaia bona hanuaboi ibounai ia do mahuta lasi neganai, Baibel ia duahia.

Spesel painia hesiai gaukarana ia karaia taihu ta be opesi ta ia vadivadi henia, gaukara ena biaguna ia itaia totona. Ena be unai gaukara biaguna ia noho lasi, to kekeni matamatana ta ese ena telefon ia abia isi bona ia henanadai: “Oi ura lau danu oi herevahereva, a?” Telefon dekenai idia herevahereva sisina murinai, unai kekeni matamatana ia raka-lasi bona ia gwau ia ura Baibel ia duahia. Unai spesel painia taihuna be Baibel ta ia abia lao bona unai kekeni danu daba momokani ai gaukara ia do matamaia lasi neganai, laga-ani gabuna ta dekenai Baibel stadi idia hamatamaia.

Ma opesi ta dekenai, tau ta be ena gaukara hahine ta ia itaia Gima Kohorona bona Awake! magasin ia abia dae, to Witnes tauna ese ia rakatania murinai unai hahine ese karaharaga unai magasin ia negea. Unai tauna be ena ruma dekenai ia ginidae neganai, ena Witnes hahinena dekenai ia vara gauna ia gwauraia bona ia gwau bema unai magasin be ia dekenai idia henia, do ia abia. Iena natuna kekeni be iena hereva ia kamonai murinai, unai bisinesi teritori dekenai ia haroro tadikakana ta dekenai unai hereva ia gwauraia. Unai tadikaka be karaharaga unai tauna ena opesi dekenai ia vadivadi henia bona ia danu Baibel stadi ta ia hamatamaia. Daudau lasi murinai unai tauna be Sunday heboudia dekenai ia lao hanaihanai.

Taunimanima edia gaukara gabudia dekenai haroro karana be hahenamo haida ia mailaia. Japan dekenai pablisa momo be hoihoi gabudia, faktori bona opesi dekenai lou henia karaia daladia idia diba momo. Ma danu, unai bamona haroro gaukaradia amo, idia haroro lasi pablisa idia davaria bona idia ida Baibel stadi idia hamatamaia. Unai ese anina namona ia havaraia. Tokyo dekenai kongregesen ta be Baibel stadi 108 idia karaia, bona unai namba ese lagani gunana ena namba be nega rua ia hanaia.

[Footnote]