Sivarai Namona Gabu Iboudiai Dekenai Harorolaia

¹ Keristani ginigunadia ese sivarai namona be gabu iboudiai dekenai idia harorolaia. Idia haroro goadagoada dainai, Iesu Keriso ia toreisilou murinai lagani 30 idia do ore lasi neganai, Basileia ena sivarai be ‘tanobada ibounai dekenai idia harorolaia vadaeni.’​—Kol. 1:⁠23.

² Iehova ena haroro goadagoada hesiai taudia edia ura be unai hegeregerena​—taunimanima iboudiai dekenai Basileia ena sivarai namona do idia harorolaia. Dahaka ese ita ia durua unai do ita karaia totona? Taunimanima momo be ful-taim moni gaukara idia karaia bona ruma dekenai idia noho lasi ita vadivadi neganai. Idia gaukara lasi negadiai, reana idia laolao, idia lao sitoa dekenai, eiava moale karadia idia karaia. Edia huanai idia noho kara namo taudia dekenai, edena bamona Basileia ena sivarai ita harorolaia diba?​—Mat. 10:⁠11.

³ Haida be edia gaukara gabuna dekenai ita hereva henidia. Taoni maragidia danu be mai edia bisinesi kahana bona taunimanima momo be dina ta ta ai hora momo unuseniai idia noho. Taoni badadia ai, faktori momo edia gabu ai eiava opesi ruma badadia ai idia gaukara taudia bona mai edia sekuriti rumadia dekenai idia noho taudia be sivarai namona idia kamonai​—idia momo dekenai unai be edia nega ginigunana. Saturday bona Sunday lalodiai, loaloa uma gabudia, moale gabudia, palai ruma idia atoa gabudia, eiava laga-ani ruma maragidia idia moalelaia taudia eiava motuka atoa gabudia dekenai eiava sitoa momo edia ruma badadia dekenai idia naria taudia idia davaria neganai, mai edia ura ida sivarai namona idia kamonai.

⁴ Pablisa momo idia hekwarahi taunimanima idia davaria diba gabudia ai idia haroro totona. Guna, unai Witness taudia idia daradara bona idia gari sisina badina ruma-ta-ruma-ta haroro gaukarana sibona idia manadalaia. Hari, edia mamina be edena bamona?

⁵ Haroro gaukara ia diba momo tadikaka ta ia gwau: “Unai gaukara ese egu haroro gaukarana ia hagoadaia!” Tadikaka ma ta ia gwau: “Lauegu lalona ia veria noho.” Ia buruka sisina painia ia gwau: “Ia ese egu lalona bona tauanina ia hagoadaia bona lauma dalanai danu, . . . bona egu diba lau do habadaia noho.” Pablisa ta ia gwau guna Iehova ena Witness taudia idia hereva lasi taudia dekenai hari ia haroro diba. Matamata taudia danu ese unai gaukara idia moalelaia. Matamata pablisa ta ia gwau: “Unai gaukara lau moalelaia badina taunimanima momo dekenai lau hereva diba.” Ma ta ia gwau: “Lau be buka bona magasin momo lau hariharilaia, guna be unai bamona lasi!” Unai ibounai be idia karaia loulou teritori dekenai ia vara.

⁶ Loaloa Naria Taudia ese Gaukara Idia Gunalaia: Society ia lalo-parara “inai tanobada, hari ia noho toana bamona, be kahirakahira do ia ore” dainai, vanegai ia ese loaloa naria taudia ia hagoadaia edia haroro gaukara ena sediual be pura ta ta ai do idia haidaua taunimanima momo herea dekenai sivarai namona idia harorolaia diba totona. (1 Kor. 7:​31) Lagani momo lalodiai, sekit naria taudia ese pura lalonai daba kahanai ruma-ta-ruma-ta gaukarana idia karaia, bona adorahi kahanai be lou henia bona Baibel stadi idia karaia. Gabu haida dekenai reana unai sediual ia do hegeregere. Ma haida dekenai, pura lalonai dina haida daba kahanai ruma-ta-ruma-ta gaukarana idia karaia amo anina sisina sibona idia havaraia. Bema unai bamona, loaloa naria tauna ese daba kahanai sitoa-ta-sitoa-ta gaukarana eiava dala gaukarana idia karaia be namo. Eiava reana grup maragidia ia hegaegae opesi ruma badadia ai, sitoa momo edia gabu ai, motuka atoa gabuna ai, eiava taunimanima idia noho gabudia ma haida dekenai do idia haroro. Pablisa ese edia haroro gaukara negana idia gaukaralaia namonamo karana amo, taunimanima momo idia davaria diba.

⁷ Ripoti ese idia hahedinaraia loaloa naria taudia bona pablisa taudia ese mai edia moale ida unai gaukara idia abia dae. Elda edia orea momo ese sekit naria tauna idia noia ia ese edia gabu ai do idia karaia gaukarana totona pablisa haida ia hadibaia. Unai pablisa be loaloa naria tauna idia bamoa ia ese unai gaukara ta ia karaia neganai bona diba idia abia. Vadaeni, idia ese ma haida idia hadibaia diba. (2 Tim. 2:⁠2) Unai dainai, taunimanima momo dekenai sivarai namona idia harorolaia diba.

⁸ To, sekit naria tauna ena vadivadi umui naria lasi unai haroro dala idaudia umui tohoa totona. Emui teritori dekenai umui gaukaralaia diba lalohadai haida be inai:

⁹ Dala ai Haroro Gaukarana: ‘Taunimanima be edeseniai?’ nega haida unai bamona ita nanadaia, pura lalonai daba kahanai ita vadivadi to ruma lalodiai ta ia noho lasi neganai. Haida be gaukara dainai reana idia loaloa eiava sitoa dekenai idia lao. Dala ai haroro gaukarana amo unai taudia oi davaria toho, a? Bema dala maorona ai ita karaia, unai bamona haroro gaukarana ese anina namona ia havaraia diba. Gabu tamona ai emu magasin danu oi gini lasi, to namona be taunimanima dekenai oi lao bona lalona veria dalanai oi hereva matamaia. Idia raka hanai taudia iboudiai dekenai oi hereva toho lasi. Idia bisi lasi taudia dekenai oi hereva, hegeregere sitoa ena uindo dekenai idia noho gaudia idia raraia taudia, motuka lalonai idia helai taudia, eiava PMV idia naria taudia. Guna, mai moale ida hanamoa herevana oi gwauraia diba bona haere oi naria. Bema ia ura hereva, ena lalona ia veria diba gauna dekenai iena lalohadai oi nanadaia.

¹⁰ Loaloa naria tauna ta ese pablisa 6 ia boiria ia bona ena adavana do idia bamoa dala ai haroro gaukarana lalonai. Dahaka ia vara? Ia gwau: “Emai daba be namo herea! Taunimanima idia noho lasi hekwakwanai ai davaria lasi. Magasin ibounai 80 bona pepapepa momo ai hariharilaia. Taunimanima momo ida ai herevahereva namo herea. Nega ginigunana dala ai haroro gaukarana ia karaia pablisa ta ia gwau: ‘Lagani momo lau be hereva momokani lalonai lau noho bona lau diba lasi inai lau reaia!’ Pura ena dokona ai, kongregesen ena magasin momo, idia noho kava gaudia, be idia ore.”

¹¹ Kongregesen ma ta ia vadivadi neganai, unai loaloa naria tauna ia kamonai pablisa haida ese daba momokani ai dala ai haroro gaukarana idia karaia to anina sisina sibona idia havaraia. Idia haroro negana lalonai, taihu ta be taunimanima rua sibona ia hereva henia, badina taunimanima iboudiai be gaukara dekenai idia lao haraga. Unai loaloa naria tauna ia gwau unai dabai hora haida murinai unai dala tamona dekenai do idia giroa. Idia lao, bona idia noho ela bona dina tubua ai. Dabai momokani ai taunimanima rua sibona ia hereva henia taihuna be ia giroa lou neganai ia gaukara namo herea. Ia ese magasin 31 bona buklet 15 ia hariharilaia, taunimanima 7 edia ladana bona adres ia abia, bona Baibel stadi rua ia hamatamaia! Unai grup taudia ma haida dekenai be unai bamona hagoadaia gaudia idia vara danu.

¹² Kamonai tauna oi davaria neganai, ena ladana, adres, bona telefon namba do oi abia toho be namo. Maoromaoro oi henanadai lasi, to reana inai bamona oi gwau: “Iseda kiki lau moalelaia. Dala ta ia noho ma nega ta do ita kiki lou diba, a?” Eiava oi nanadaia: “Dala ta ia noho oiemu ruma dekenai oi do lau davaria diba, a?” Unai dala ai idia davaria taudia momo idia ura ta ese do ia lou henia. Oi hamomokania boiboi pepadia idia noho hebou dekenai idia ura mai taudia iboudiai do oi boiria totona.

¹³ Bema kamonai tauna ida oi kiki bona ia be kongregesen ma ta ena teritori dekenai ia noho, namona be ena ladana, adres, bona telefon namba be unai kongregesen dekenai oi henia tadikaka be do idia lou henia totona. Dala ai haroro gaukarana be sivarai namona harorolaia dalana namona emui gabu dekenai, a? Bema unai bamona, July 1994 ena Iseda Basileia Gaukarana ena hereva “Dala Dekenai Haroro Gaukara Namona amo Kamonai Taudia Tahudia” mani oi duahia lou. Bena umui hegaegae, taunimanima momo umui davaria diba negana ai, dala ai haroro gaukarana do umui karaia totona.

¹⁴ PMV Dekenai Haroro Gaukarana: Daba ta ai, painia taudia haida idia ura unai gabu ena koledi kahirakahira ai basi idia naria taudia dekenai do idia haroro. Taunimanima ida idia herevahereva namo herea, to hekwakwanai ta idia davaria. Idia herevahereva noho lalonai, basi ia mai, bona edia hereva ia ore haraga. Unai painia taudia ese hekwakwanai idia hanaia dalana be idia danu be basi lalonai idia vareai bona taoni idia hanaia neganai basi idia guia taudia dekenai idia haroro henia. Basi be ena dala dokona ia davaria neganai, painia taudia be basi ai idia giroa lou bona idia haroro noho. Nega sisina momo idia lao idia mai murinai, edia hekwarahi ena anina idia haboua: Magasin 200 ma haida idia hariharilaia bona Baibel stadi 6 idia hamatamaia. Basi dekenai idia heau taudia haida be mai moale ida edia adres bona telefon namba idia henia ta ese edia ruma do ia vadivadi henia totona. Pura gabena ai, unai painia taudia be basi stopu gabuna dekenai idia giroa lou bona guna bamona idia karaia. Idia be magasin 164 idia hariharilaia bona Baibel stadi ma ta idia hamatamaia. Gabu ta dekenai tau ta be basi dekenai ia guia bona helai gabuna tamona sibona ia noho dainai ia dekenai ia helai​—unai be painia ta badinai. Tadikaka ia itaia bona mai kiri ida ia gwau: “Lau diba, oi be mai emu Gima Kohorona ta lau totona.”

¹⁵ Pablisa taudia momo be basi, bouti, eiava peleini amo idia laolao neganai, haroro namona idia henia. Oi badinai ia helai tauna ida edena dala ai herevahereva oi hamatamaia diba? Lagani 12 pablisa ta ese basi dekenai Noga! ia duahia matamaia, ia ura unai amo ia badinai ia helai kekeni matamatana ena lalona do ia veria. Bona unai ia vara. Unai kekeni ese ia nanadaia dahaka ia duahia, bona mero matamatana ia haere ia ese matamata taudia idia davaria hekwakwanai hanaia dalana ena hereva ta ia duahia. Ma ia gwau unai hereva ese ia durua bada bona unai kekeni do ia durua diba danu. Mai moale ida unai magasin ia abidia. Matamata taudia ma rua ese edia herevahereva idia kamonai bona magasin idia ura abia. Unai ia vara neganai, basi taria tauna ese dala badinai ia stopu bona ia nanadaia dahaka dainai unai magasin idia ura bada. Idia hadibaia bona ia danu ia abidia. Momokani, unai ia vara diba lasi bema unai pablisa matamata ena magasin edia namba ia hegeregere lasi kamonai taudia iboudiai dekenai ia henia totona!

¹⁶ Loaloa Uma Gabu Bona Motuka Atoa Gabu ai Haroro Gaukarana: Loaloa uma gabu bona motuka atoa gabu ai haroro gaukarana be taunimanima davaria dalana namona ta. Sitoa momo edia gabu kahirakahira ia noho motuka atoa gabuna dekenai oi haroro toho vadaeni, a? Hanaihanai nega sisina lalonai oi itaia dahaka ia vara noho. Ia bisi lasi tauna eiava motuka lalonai ia naria tauna oi tahua bona turana bamona oi herevahereva matamaia. Bema nega sisina umui hereva noho, Basileia ena sivarai oi hereva matamaia. Namona be tamona tamona umui gaukara to pablisa ma ta be kahirakahira dekenai ia gaukara. Namo lasi baege badana oi huaia eiava dala ma ta amo taunimanima edia lalona oi veria oiemu gaukara do idia raraia momo. Oi aonega. Reana namona be motuka atoa gabuna ta dekenai nega sisina sibona umui gaukara bena ma ta dekenai umui lao. Bema ta ia ura lasi herevahereva, mai kara namona ida oi rakatania bona ma ta oi tahua. Unai dala idauidau ia gaukaralaia amo, tadikaka ta be hua tamona lalonai magasin 90 ia hariharilaia, motuka atoa gabu dekenai ia haroro negadiai.

¹⁷ Taunimanima haida be loaloa uma gabu dekenai idia lao idia laga-ani totona; ma haida be gadara totona eiava edia natudia ida idia noho totona idia lao. Idia karaia gaudia oi hadikaia lasi, to haroro dalana namona oi tahua. Tadikaka ta be loaloa uma gabu ia naria tauna ida ia hereva matamaia bona ia davaria ia ese drag ania kava karana bona ena natudia edia vaira negana ia laloa bada. Baibel stadi idia hamatamaia bona hanaihanai unai loaloa uma gabuna dekenai idia karaia.

¹⁸ Nega Bona Gabu Idauidau Haroro Gaukarana Sitoa Momo Edia Ruma Badadia Dekenai: Ena be taravatu idia atoa dainai mai sitoa momo ruma badadia dekenai sitoa-ta-sitoa-ta haroro gaukarana ita karaia diba lasi, pablisa haida ese dala idia hegaegae nega bona gabu idauidau ai unuseniai idia haroro totona. Idia be helai gauna ta latanai idia helai bona idia laga-ani taudia ma haida ida turana bamona idia herevahereva. Kamonai tauna idia davaria neganai, aonega dalanai pepapepa eiava magasin idia hariharilaia bona dala idia hegaegaelaia lou henia totona. Unai gabu ena kahana ta dekenai miniti haida idia haroro murinai, kahana ma ta dekenai idia lao bona taunimanima ma ta ida do idia herevahereva. Momokani, ita naria namonamo unai dala ai ita haroro neganai, taunimanima momo ese ita do idia raraia momo garina.

¹⁹ Taunimanima oi hanamoa neganai, oiemu hereva be lalona veria dalanai oi hamatamaia. Bema ia haere, henanadai oi henia, bena ia haere neganai, oi hakala henia namonamo. Ena hereva oi kamonai namonamo. Oi hahedinaraia ena lalohadai oi laloa bada. Hegeregere neganai, ia ida oi lalo-tamona.

²⁰ Taihu ta be sisina ia buruka hahinena ida ia herevahereva namo herea badina gau iboudiai edia davana ia bada daekau ia gwauraia dainai. Unai hahine be unai bamona ia laloa danu, bena idia hereva namo herea. Unai taihu ese unai hahine ena ladana bona adres ia abia diba, bona unai pura tamona lalonai ia lou henia.

²¹ Sitoa-Ta-Sitoa-Ta Haroro Gaukarana: Kongregesen haida edia haroro teritori lalonai, bisinesi gabudia idia noho. Teritori ia naria tadikaka ese mapu ia karaia diba unai bisinesi gabudia totona. Bema noho rumadia edia teritori mapu lalonai bisinesi gabudia idia noho, namona be unai mapu dekenai idia hadibaia namonamo bisinesi gabudia be unai teritori ena kahana ta bamona idia karaia lasi. Teritori ma haida lalonai, bisinesi rumadia be noho rumadia ma haida ida idia karaia hebou diba. Reana elda taudia ese idia manada pablisa taudia idia boiria unai bisinesi teritori idia karaia hanaihanai, sitoa-ta-sitoa-ta gaukarana idia reaia lasi totona.

²² Bema oi idia boiria unai gaukara do oi karaia totona bona oi do karaia lasi, oi “gari lasi” totona dala namona be sitoa maragidia oi karaia guna; bena, oiemu mamina ia hegeregere neganai, badadia oi karaia. (1 Tes. 2:⁠2) Sitoa ta sitoa ta dekenai oi gaukara neganai, namona be oiemu dabua be Kingdom Hall ena hebou dekenai oi atoa dabua bamona. Bema hegeregere, sitoa dekenai oi vareai hoia taudia idia noho lasi neganai. Namona be sitoa biaguna eiava naria tauna oi hereva henia totona oi noia. Mai moale ida, bona gau badana be nega kwadogina ai oi hereva. Oi laloa lasi unuseniai oi noho be kerere. Bisinesi gabudia momo dekenai, vareai taudia idia laloa bada bona idia diba nega momo edia gaukara idia hadokoa be mai badina.

²³ Sitoa ia naria tauna oi hanamoa murinai, reana inai bamona oi gwau: “Bisinesi taudia momo idia bisi bada herea dainai nega momo edia ruma dekenai ai davaria lasi, unai dainai oiemu bisinesi gabunai oi ai vadivadi henia badina ai ura lalona ia veria herevana ta oi ai henia do oi duahia totona.” Bena magasin dekenai lalohadai ta o rua oi gwauraia.

²⁴ Eiava sitoa biaguna oi hereva henia neganai, reana inai oi tohoa: “Ai diba bisinesi taudia idia ura gau momo dekenai diba idia abia. Inai Gima Kohorona matamatana (eiava Noga!) ena hereva ta be mai anina bada ita iboudiai dekenai.” Unai gauna oi hadibaia, bona dokonai oi gwau: “Ai diba mai moale ida inai do oi duahia.”

²⁵ Bema gaukara taudia idia noho, bona oi laloa ia hegeregere, reana ma oi gwau: “Ia hegeregere bema oiemu gaukara taudia dekenai danu unai bamona hereva kwadogina lau henia, a?” Bema gwaumaoro oi abia, laloaboio lasi oi gwauhamata hereva kwadogina do oi henia, bona sitoa biaguna ia ura unai bamona oi karaia danu. Bema gaukara taudia haida idia ura herevahereva daudau, namona be edia ruma dekenai do oi lou henia.

²⁶ Vanegai, pablisa haida be sekit naria tauna idia bamona sitoa-ta-sitoa-ta gaukarana dekenai. Unai pablisa haida idia gari sisina, badina guna unai gaukara idia karaia lasi dainai; to daudau lasi murinai edia gari ia boio bona idia moalelaia matamaia. Hora tamona lalonai, taunimanima 37 idia hereva henia bona magasin 24 bona buklet 4 idia hariharilaia. Tadikaka ta ia gwau nega momo hua ta lalonai ruma-ta-ruma-ta gaukarana idia karaia neganai idia davaria taunimanima edia momo be unai nega kwadogina lalonai sitoa-ta-sitoa-ta gaukarana dekenai idia davaria hegeregerena lasi.

²⁷ Haroro Daladia Havaraia: Iesu be haroro negadia sibona ai ia haroro lasi. Ia ese nega namona ibounai dekenai sivarai namona ia harorolaia. (Mat. 9:9; Luka 19:​1-​10; Ioa. 4:​6-​15) Mani oi itaia pablisa haida be edena bamona haroro daladia idia havaraia.

²⁸ Haida be sikuli ena geiti kahirakahira edia natudia idia naria tama sina dekenai idia haroro hanaihanai. Badina tama sina momo be miniti 20 bamona idia naria, nega ia hegeregere idia ida Baibel ena hereva ta oi kikilaia namonamo diba.

²⁹ Painia taudia momo ese iseda magasin lalonai idia herevalaia gauna ta reana idia laloa bada taudia idia tahua. Haheitalai ta be, taihu ta be kamonai taudia momo ia davaria ena kongregesen teritori dekenai idia noho sikuli 6 dekenai December 22, 1995 ena Awake! “Schools in Crisis” ia abia lao neganai. Ma danu ia ese famili edia hekwakwanai dekenai heduru idia henia taudia edia opesi ia vadivadi henidia bona ruma bese maurina bona natudia hadikaia karana idia herevalaia magasin ia abidia lao, bona idia boiria gabeai unai bamona gaudia idia herevalaia magasin do ia mailaia danu. Gaukara lasi taudia idia durua opesi dekenai gaukara lasi ia herevalaia magasin, March 8, 1996, Awake! idia abia dae dalana ia gwauraia “hoa gauna.”

³⁰ Distrik naria tauna ia gwau ia bona ena adavana be hanaihanai nega bona gabu idauidau ai idia haroro edia aniani idia hoia neganai. Sitoa dekenai taunimanima momo idia noho lasi bona hoia taudia be bisi lasi dalanai do idia hoia gaudia idia tahua negadiai aniani hoia totona idia lao. Idia gwau nega momo idia herevahereva namo herea.

³¹ Pablisa momo idia gwau taunimanima idia kamonai namo herea dabua huria gabudia dekenai idia haroro neganai. Ta ia noho lasi neganai magasin idia rakatanidia lasi. To idia ura bada taunimanima dekenai sivarai namona idia harorolaia, unai dainai unai gabu idia gaukaralaia taudia idia haroro henia toho.

³² Gabu haida dekenai, idia abia hidi pablisa haida ese gwaumaoro idia abia peleini gabuna dekenai idia haroro totona. Nega haida, Iehova ena taunimanima be momo lasi tanodia amo idia mai laolao taudia idia haroro henia dainai idia moale. Bema kamonai taudia idia davaria, pepapepa eiava magasin idia hariharilaia.

³³ Bema kongregesen teritori mai sekuriti ruma badadia dekenai idia noho taunimanima ta ta idia haroro henia be hegeregere lasi, haida be unai gau dekenai idia gaukara sekuriti taudia eiava opesi ai idia noho biaguna taudia idia haroro henia. Unai idia karaia danu sekuriti geiti idia noho neganai idia karaia danu. Sekit naria tauna ta bona pablisa haida be unai bamona ruma badadia 7 idia vadivadi henia. Nega ta ta ibounai biaguna tauna idia hadibaia ena be hanaihanai ita karaia dalana ai unai ruma taudia idia vadivadi diba lasi, to idia ura lasi ia ese magasin matamatadia edia diba namona ia reaia. Unai ruma 7 edia biaguna taudia iboudiai be magasin idia abia dae bona idia noia gabeai matamata gaudia do idia abia totona! Unai bamona ruma dekenai idia noho taunimanima be telefon amo idia haroro henia toho.

³⁴ Goada Karaia Gabu Iboudiai Haroro Totona: Basileia ena sivarai ita harorolaia goadagoada be iseda gwauhamata hagugurua dalana ta. Taunimanima be edia nega namona ai ita davaria totona, sibona eda ura ita atoa siri ‘haida do ita veria mauri totona.’ Iehova ena gwauhamata hesiai taudia iboudiai idia ura aposetolo Paulo hegeregerena do idia gwau: “Sivarai Namona dainai, inai kara ibounai lau karaia noho. Bona lau diba, bema inai gaukara lau karaia noho, lau danu ese Sivarai Namona ena mauri hanamoa gaudia do lau abia.”—1 Kor. 9:22, 23.

³⁵ Paulo be ma ia torea: “Unai dainai, lauegu manoka do lau heagilaia mai moale danu, vadaeni Keriso ena siahu lau dekenai do ia noho. . . . Badina be lau manoka neganai, unai be Dirava ena goada lau abia.” (2 Kor. 12:9, 10) Unai ena anina be, unai gaukara be ita sibona eda goada dekenai ita haorea diba lasi. Iehova ita guriguri henia iena lauma helaga goadana ita abia totona. Bema goada totona Dirava ita guriguri henia ita diba momokani iseda guriguri ia haere henia. Bena taunimanima ita lalokau henia dainai, herevana edeseniai idia noho, sivarai namona ita harorolaia totona dala idauidau do ita tahua. Vaira pura lalonai, reana oi ura inai pepa dekenai idia gwauraia gaudia ta do oi tohoa, ani?