Hakaua Oreana Bona Koporeisen Idia Idau Dalana
JANUARY, 1885 amo, Watch Tower Bible and Tract Society of Pennsylvania ena lagani ta ta edia hebou idia karaia. Lagani 1900 ia kahirakahira bona horoa Keristani taudia gogoa gaukarana ia vara noho neganai, unai koporeisen ena dairekta bona ofesa taudia ibounai be guba helarona idia abia taudia. Kahirakahira nega ibounai unai be momokani.
Nega tamona sibona be idau. Lagani 1940 ai, Hayden C. Covington—unai negai Society ena loea tauna bona “mamoe idaudia” ta, mai ena tanobada helarona—be vouti amo Society ena dairekta ta ai idia halaoa. (Ioane 10:16) Lagani 1942 ia lao 1945 lalonai ia be Society ena vais presiden. Lagani 1945 ai, Tadikaka Covington ese dairekta dagina ia rakatania, unai neganai idia laloa unai be Iehova ena ura ia badinaia dalana—anina be Pennsylvania koporeisen ena dairekta bona ofesa taudia ibounai be horoa Keristani taudia. Lyman A. Swingle ese dairekta taudia huanai Hayden C. Covington ena gabu ia abia, bona Frederick W. Franz be vouti amo vais presiden ai idia halaoa.
Dahaka dainai Iehova ena hesiai taudia idia laloa namona be Watch Tower Bible and Tract Society of Pennsylvania ena dairekta bona ofesa taudia ibounai be horoa Keristani taudia? Badina unai negai idia laloa Pennsylvania koporeisen ena dairekta bona ofesa taudia bona Iehova ena Witnes taudia edia Hakaua Oreana taudia be idia idau lasi, nega ibounai unai orea taudia be Dirava ese ena lauma amo ia horoa taudia.
Lagani Ena Hebou Badana Ta
October 2, 1944 ai, Pittsburgh dekenai idia karaia lagani ena hebou lalonai, Pennsylvania koporeisen ena memba taudia ese hereva 6 idia abia dae edia taravatu pepana hamaoromaoroa totona. Guna unai taravatu pepana ia hahedinaraia, Society ena gaukara dekenai kontribusen idia henia taudia ese vouti totona gwaumaoro idia abia, to unai hereva ihatoina ese unai ia haidaua. Unai lagani ena hebou ena ripoti ia gwau: “Society ena memba taudia edia namba be 500 do ia hanaia lasi . . . Society ena ful-taim hesiai taudia eiava Iehova ena Witnes taudia edia kampani [kongregesen] ena pat-taim hesiai taudia, Lohiabada ese ia hahedinaraia lalohadai idia hahedinaraia taudia, sibona do idia abia hidi.”
Unai nega murinai, vouti amo Society ena dairekta taudia idia abia hidi taudia be Iehova idia badinaia momokani taudia, Basileia gaukara dekenai idia henia kontribusen ena bada be herevana. Ia hedinarai unai be Isaia 60:17 ese ia hahedinaraia hamaoromaoroa karana hegeregerena, ia gwau: “Lau ese auri laboralabora do lau mailaia lasi, to golo be oi dekenai do lau mailaia. Lau ese auri bona au do lau mailaia lasi, to siliva bona auri laboralabora, be oi dekenai do lau mailaia. Nadi do lau mailaia lasi, to auri. Oiemu biaguna taudia ese, oi do idia hisihisi henia lou lasi. Lau ese idia do lau hanamoa, vadaeni mai maoromaoro bona maino danu oi do idia biagua noho.” Unai peroveta herevana ese “biaguna taudia” ia gwauraia neganai, Iehova ena taunimanima huanai orea ia heau dalana idia hamaoromaoroa karana ia perovetalaia.
Orea be tiokratik dalanai do ia heau namonamo totona idia karaia kara badana be Daniela 8:14 ese ia gwauraia “dina 2,300 ia ore” neganai ia vara. Unai nega ai, “Dubu Helaga” be “idia hagoevaia lou.”
To, unai lagani 1944 ena hebou badana murinai, henanadai badana ta ia noho. Hakaua Oreana taudia bona Pennsylvania koporeisen ena dairekta taudia 7 amo idia idau lasi dainai, anina be Hakaua Oreana lalonai be horoa Keristani taudia 7 sibona do idia gaukara diba, a? Bona, koporeisen ena memba taudia ese vouti amo dairekta taudia idia abia hidi dainai, unai koporeisen ena memba taudia ese lagani ta ta edia hebou iboudiai dekenai vouti amo Hakaua Oreana taudia idia abia hidi danu, a? Oibe, Watch Tower Bible and Tract Society of Pennsylvania ena dairekta bona ofesa taudia bona Hakaua Oreana taudia be idia idau lasi, eiava idia idau?
Lagani Ena Hebou Badana ma Ta
October 1, 1971 ai idia karaia unai lagani ena hebou lalonai, unai henanadai idia haerelaia. Unai hebou lalonai, hereva henia tauna ta ia gwau “hesiai tauna mai ena kamonai, bona mai ena kara maoromaoro” ena hakaua oreana be idaunegai ia vara, bona lagani handred momo murinai Watch Tower Bible and Tract Society of Pennsylvania idia haginia. (Mataio 24:45-47) Hakaua oreana be Pentekoste 33 C.E. ai idia haginia, bena lagani 1800 ma haida murinai Pennsylvania koporeisen idia haginia. Matamanai, hakaua oreana taudia be tatau 7 lasi, to idia be aposetolo taudia 12. Ia hedinarai ena namba be gabeai idia habadaia, badina ‘Ierusalema dekenai aposetolo bona kwarana taudia’ ese gaukara idia gunalaia.—Kara 15:2.
Lagani 1971 ai, unai hereva henia tauna tamona ese ia hahedinaraia Watch Tower Society ena memba taudia ese vouti amo horoa Hakaua Oreana taudia idia abia hidi diba lasi. Dahaka dainai? Ia gwau: “Badina ‘hesiai tauna’ oreana ena hakaua oreana be tau ta ese ia abia hidi lasi. Unai orea be . . . Iesu Keriso, Keristani kongregesen momokanina bona ‘hesiai tauna mai ena kamonai, bona mai ena kara maoromaoro’ oreana ena Lohiabada bona Biaguna, ese ia abia hidi.” Vadaeni, ia hedinarai goevagoeva, koporeisen ta ena memba taudia ese vouti amo Hakaua Oreana taudia idia abia hidi diba lasi.
Unai hereva henia tauna be inai mai anina bada herevana ma ia gwauraia: “Hakaua oreana be mai ena ofesa taudia lasi Society ena Dairekta Oreana ena presiden, vais presiden, seketere-akaun tauna bona seketere-akaun tauna ia durua tauna bamona. Ia be mai ena seamani sibona.” Lagani momo lalonai, Pennsylvania koporeisen ena presiden be Hakaua Oreana ena memba badana danu. Unai negai unai idia haidaua. Ena be Hakaua Oreana taudia edia diba be idauidau, to edia maduna be hegeregere. Hereva henia tauna be ma ia gwau: “Hakaua oreana taudia ibounai be seamani gaukarana idia karaia diba ena be unai neganai idia be Society . . . ena presiden lasi . . . Unai ibounai be hakaua oreana lalonai seamani gaukarana ia karaia tauna idia haidaua loulou dalana hegeregerena.”
Lagani 1971 ena hebou badana lalonai, idia hahedinaraia goevagoeva Dirava ese ena lauma amo ia horoa Hakaua Oreana taudia bona Pennsylvania koporeisen ena dairekta taudia be idia idau. To, Hakaua Oreana taudia ese Society ena dairekta bona ofesa gaukara idia do karaia noho. Vadaeni, hari be inai henanadai ia vara: Baibel ese ia hahedinaraia badina dainai Hakaua Oreana taudia sibona be Watch Tower Bible and Tract Society of Pennsylvania ena dairekta taudia ai idia lao diba, a?
Lasi. Pennsylvania koporeisen be Iehova ena Witnes taudia ese idia gaukaralaia gaukara oreana tamona sibona lasi. Ma haida idia noho. Idia ta be Watchtower Bible and Tract Society of New York, Incorporated. Ia ese United States dekenai iseda gaukara ia durua. Ia hedinarai goevagoeva Iehova ese unai koporeisen ia hanamoa, ena be ena dairekta bona ofesa taudia momo herea be “mamoe idaudia” taudia. Britain dekenai be International Bible Students Association idia gaukaralaia. Tano ma haida ai gaukara oreadia ma haida idia gaukaralaia Basileia ena gaukara durua totona. Idia ibounai ese mai lalo-tamona ida heduru idia henia bona idia be mai anina bada, tanobada hegegemadai sivarai namona ita harorolaia totona. Herevana unai gaukara oreadia be edeseniai idia noho bona edia dairekta bona ofesa taudia be daidia, to Hakaua Oreana ese tiokratik dalanai idia ia hakaua bona gaukaralaia. Unai dainai, unai bamona gaukara oreadia be mai edia maduna idauidau, Basileia ena gaukara idia durua totona.
Gaukara oreadia dainai namo ita davaria. Unai dala ai, ita be gabu bona tano idauidau edia taravatu ita badinaia, Dirava ena Hereva ese ita ia sisiba henia hegeregerena. (Ieremia 32:11; Roma 13:1) Gaukara oreadia ese Baibel, buka, magasin, buklet, bona ma gau idauidau idia printaia, unai amo Basileia ena sivarai ita harorolaia gaukarana idia durua. Danu, unai bamona gaukara oreadia be mai anina, taravatu hegeregerena kohu biagua gaukarana, dika idia davaria taudia durua gaukarana, hebouhebou gabudia edia kontraka pepadia sainia gaukarana, bona unai bamona gaukara ma haida idia karaia totona. Unai bamona gaukara oreadia ese idia karaia gaukara dainai ita tanikiu henidia.
Iehova Ena Ladana Idia Abia Isi
Lagani 1944 ai, Watch Tower Bible and Tract Society of Pennsylvania ena gaukara taravatu pepana ena Hereva Iharuana idia hamaoromaoroa unai koporeisen ese ia ura karaia gaudia ia hahedinaraia goevagoeva totona. Unai taravatu pepana hegeregerena, Society ia ura karaia gaudia amo badana be inai: “Bese iboudiai dekenai Dirava ena basileia, Keriso Iesu ese ia lohiaia, ena sivarai namona ia harorolaia, Siahu Ibounai Diravana IEHOVA ena ladana, hereva bona ena siahu hereadaena hamomokania totona.”
Lagani 1926 amo ‘kamonai hesiai tauna’ ese Iehova ena ladana ia abia isi. Lagani 1931 be lagani badana, badina unai lagani ai Bible Student taudia ese ladana Iehova ena Witnes taudia idia abia dae. (Isaia 43:10-12, NW ) Society ese ia halasia bukadia, Dirava ena ladana idia hahedinaraia goevagoeva bukadia, haida be Jehovah (1934), “Let Your Name Be Sanctified” (1961), bona “The Nations Shall Know That I Am Jehovah”—How? (1971).
New World Translation of the Holy Scriptures Baibel ibounai be lagani 1960 lalonai English gado ai idia halasia, ita herevalaia danu be namo. Ia lalonai, Heberu Revarevadia ese Tetragramaton idia hahedinaraia gabudia ibounai dekenai Iehova ena ladana ia hahedinaraia. Unai Baibel ese Keristani Greek Revarevadia lalonai Dirava ena ladana be nega 237 ia hahedinaraia, idia tahua namonamo amo idia davaria unai gabudia dekenai idia atoa be maoro. Ita moale bada, badina Iehova ese, dala idauidau ai, “hesiai” oreana bona ena Hakaua Oreana dekenai dala ia kehoa printa gaudia bona gaukara oreadia idia gaukaralaia, Iena ladana be tanobada hegegemadai idia halasia totona!
Dirava Ena Hereva Hariharilaia Gaukarana Idia Durua
Iehova ena taunimanima ese Baibel idia herevalaia buka bona magasin bona Baibel milioni momo idia hariharilaia, unai dala ai hanaihanai iena ladana idia hahedinaraia bona iena Hereva idia abia isi. Lagani 1900 bena sisina murinai, Watch Tower Society ese gwaumaoro pepana ia abia, The Emphatic Diaglott Baibel, Benjamin Wilson ese ia karaia Keristani Greek Revarevadia edia Greek-English interlinear Baibel, ia biagua totona. Society ese Bible Student taudia idia karaia King James Version Baibel ia halasia, ia lalonai be ma rau 500 idia noho, diba habadaia totona. Lagani 1942 ai, ia ese King James Version Baibel ia halasia, ena rau dekenai hahegeregerea siridia idia noho danu. Bena lagani 1944 ai, Society ese lagani 1901 ena American Standard Version Baibel ia printaia matamaia, ia ese Dirava ena ladana ia gaukaralaia. Unai ladana Iehova be Stephen T. Byington ese ia karaia Baibel, The Bible in Living English, lalonai ia hedinarai danu, bona Society ese lagani 1972 ai ia halasia.
Iehova ena Witnes taudia ese idia gaukaralaia gaukara oreadia ese unai Baibel idauidau printaia bona hariharilaia gaukarana idia durua. To, ita gwau diba Iehova ena horoa Witnes taudia New World Bible Translation Committee lalonai bona Watch Tower Society idia gaukara hebou dalana be unai ia hahedinaraia namo herea. Ita moale bada, badina hari unai Baibel ibounai eiava ena kahana haida edia kopi 106,400,000 be gado 38 dekenai idia printaia vadaeni. Momokani ita gwau diba Watch Tower Bible and Tract Society of Pennsylvania be Baibel sosaiti!
‘Kamonai hesiai tauna’ ese ‘ena biaguna ena kohu ibounai naria’ gaukarana ia abia. Unai kohu haida be New York State, U.S.A. dekenai, ia noho hedikwota bona hari tanobada hegegemadai idia gaukara brens 110 edia ruma idauidau. Hesiai oreana taudia idia diba idia naria gaudia idia gaukaralaia dalana be edia biaguna vairanai do idia hahedinaraia. (Mataio 25:14-30) To, ‘hesiai tauna’ ese dala ia kehoa noho, “mamoe idaudia” huanai idia noho naria taudia namodia ese gavamani ena taravatu laloa gaukara bona gaukara ma idauidau idia karaia totona. Unai be Hakaua Oreana taudia ese ‘guriguri bona haroro gaukara’ dekenai do idia gaukaralaia negana ia habadaia.—Kara 6:4.
Hari inai tanobada dekenai dala ia kehoa noho lalonai, Hakaua Oreana, “hesiai tauna mai ena kamonai, bona mai ena kara maoromaoro” ladana ai gaukara ia karaia oreana, ese gaukara oreadia idauidau do ia gaukaralaia noho. Idia be mai anina bada, to idia sibona dainai iseda gaukara ia heau lasi. Bema gavamani ese gaukara oreana ta do ia taravatua, haroro gaukara be do ita karaia noho. Hari danu, taravatu idauidau idia noho bona gaukara oreadia idia gaukaralaia diba lasi tanodia ai, Basileia ena sivarai idia harorolaia noho, ma haida be hahediba taudia ai idia halaoa noho, bona tiokratik dalana ia bada ia lao noho. Unai ia vara, badina Iehova ena Witnes taudia ese uhe idia hadoa bona idia dairia, bona ‘Dirava ese hadoa gauna ia hatubua noho.’—1 Korinto 3:6, 7.
Vaira negana ita laloa neganai, ita diba momokani Iehova ese lauma dalanai bona tauanina dalanai iena taunimanima do ia naria. Ia bona ena Natuna, Iesu Keriso, be guba amo ita idia hakaua bona durua, Basileia harorolaia gaukarana ita hagugurua diba totona. To momokani, ita Dirava ena hesiai taudia ese ita karaia gaudia ibounai be ‘goada dekena amo lasi, bona siahu dekena amo lasi, to Iehova ena lauma dekena amo’ ia vara. (Sekaraia 4:6) Unai dainai ita ese Dirava ena heduru totona ita noinoi, badina ita diba momokani Iehova ese ia henia goadana amo, inai dokona negana lalonai ita ia henia gaukarana do ita hagugurua diba!