Tanobada Mainona be Nihi Kavakavana ta, A?

TAUNIMANIMA momo idia laloa tanobada mainona do ia vara diba. The Toronto Star ena magasin lalonai, Carol Goar ia torea: “Afghanistan ia lao Angola dekenai, maino karaia herevadia idia karaia momo. Hua haida gunanai, ita laloa bese haida edia tuari idia ore diba lasi momokani, to hari edia toana be hegeregere idia ore diba. Bona ita moale badina United Nations be ia gaukara lou bamona.” Goar ia gwau, unai dainai “tanobada ibounai dekenai taunimanima be mai edia helaro.” USA Today ena magasin be unai bamona ia hereva danu, ia gwau: “Tanobada ibounai dekenai maino ia vara.”

UN Chronicle ena magasin ia gwau ita laloa bada gauna be vanegai ema bona hari “Soviet Union bona United States be turana karana idia karaia noho.” Edia tuari oreadia idia siaia lou sibodia edia gabu dekenai, Eastern Europe dekenai idia vara karadia dekenai taunimanima idia hoa, tuari oreadia bona tuari kohu hamaragia ena hereva idia karaia​—unai bamona gaudia idia vara dainai, taunimanima idia laloa reana siahu bada besedia be tuari kohu haboua karana do idia rakatania sisina. Tanobada dekenai, lagani ta ta iboudiai 850 tausen milion dola idia negea tuari kohu bona tuari orea idia habadaia totona. Unai dainai, bema unai kara idia rakatania do ita moale bada.

Ena be taunimanima be tanobada mainona idia ura bada, to do ia vara diba, a? Unai bamona lalohadai idia laloa momo taudia danu idia gwau tuari kohu hamaragia be gau ta, to tuari kohu negea momokani be ma gau ta danu. Edia niuklia kohu idia negea momokani totona, namona be idia heabidadama heheni momokani. To, madi, siahu bada besedia be nega daudau lalonai idia heabidadama heheni lasi. Bible ese ia perovetalaia hegeregerena, hari inai negai taunimanima be “do idia ura lasi maino karaia herevana ta idia karaia.”​—2 Timoteo 3:​3, NW.

Ma danu, taunimanima iboudiai lasi idia laloa niuklia kohudia negea karana ese maino do ia havaraia. Ena be tanobada besedia ese edia niuklia kohu idia negea, to tuari kohu ma haida idia noho bona taunimanima momo idia alaia diba. Tanobada Ibounai Tuarina Ginigunana bona Iharuana ese unai ia hamomokania vadaeni. Ma danu, taunimanima be do mai edia diba unai niuklia kohudia idia karaia lou totona​—do idia hegaegae noho diba unai bamona idia karaia lou totona politikol hepapahuahu idia vara neganai. Haida be politikol saiens tauna Richard Ned Lebow bamona idia hereva, idia gwau: “Reana niuklia kohu haida idia noho dainai taunimanima be edia kara idia naria namonamo.”

To niuklia kohu idia do noho lalonai, niuklia tuari karana ta ese taunimanima hutuma momo ia aladia diba dainai, taunimanima ese maino idia abia herevana be anina lasi bamona; bona ena be tuari be lasi, to dina iboudiai taunimanima milion momo be edia mauri lalonai maino idia do davaria diba lasi. UN ena seketere badana, Javier Pérez de Cuéllar, ia gwau “taunimanima milion momo be mai edia ruma lasi eiava edia mahuta gabudia be hegeregere lasi momokani. Unai hekwakwanai ia bada ia lao noho.” UN Chronicle magasin ia gwau edia bese edia moni be hegeregere lasi dainai “taunimanima edia kahana toi amo, kahana rua be ogogami momokani dekenai idia noho, hegeregere idia be tuari dainai hisihisi idia mamia noho.” Bona tanobada ibounai dekenai edia tanobada amo idia heau mauri taudia 12 milion bamona be edena bamona? Tuari kohu idia hamaragia eiava tuari kohu idia negea karana be edia mauri dekenai maino do ia mailaia, a?

Momokani, taunimanima edia tanobada mainona ena nihi be mata-hanai kererena​—hegeregere idia be matana dika bamona. Maino dalana ta ia noho, a? Ta ia noho. Magasin gunana ta dekenai, ita itaia Bible ese maino ena helaro ia gwauraia. Nega kahirakahira, Iesu Keriso, Dirava ena Basileia ena Pavapava ese taunimanima idia lalohadailaia diba lasi mainona ta do ia havaraia. To taunimanima dekenai unai maino ena anina be dahaka? Sivarai gabena ese unai do ia herevalaia.