Gima Kohorona INTANET LAIBRI
Gima Kohorona
INTANET LAIBRI
Hiri Motu
  • BAIBEL
  • PABLIKEISEN
  • HEBOUDIA
  • w94 8/1 rau 6-7
  • Niuklia Ena Dika Ia Ore Momokani!

Oi abia hidi kahana ena vidio ia noho lasi.

Sori, hekwakwanai ia vara vidio ia loud totona.

  • Niuklia Ena Dika Ia Ore Momokani!
  • 1994 Gima Kohorona Iehova Ena Basileia Ia Harorolaia
  • Sinado maragidia
  • Inai Bamona Atikol
  • “Maino Bona Noho Namona”—Koikoi Gauna
  • Maino Bona Noho Namona—Momokani Gauna
  • Niuklia Tuarina Dekenai Baibel Ena Hereva be Dahaka?
    Topik Ma Haida
  • Maino Dirava ena Amo Edena Negai?
    1987 Gima Kohorona Iehova Ena Basileia Ia Harorolaia
  • Niuklia Ena Dika Ia Ore Vadaeni, A?
    1994 Gima Kohorona Iehova Ena Basileia Ia Harorolaia
  • Baibel Ena Hereva Maino bona Noho Namo Dekenai
    1991 Gima Kohorona Iehova Ena Basileia Ia Harorolaia
Ma Haida Itaia
1994 Gima Kohorona Iehova Ena Basileia Ia Harorolaia
w94 8/1 rau 6-7

Niuklia Ena Dika Ia Ore Momokani!

DIRAVA ia ura lasi taunimanima be idia mase garina idia gari. Ia be “moale Diravana” dainai, ia ura maino idia moalelaia bona idia noho namo, anina be ia ura idia moale. (1 Timoteo 1:​11, NW) Hari inai tanobada lalonai niuklia dikadia momo idia vara diba dainai, maino dekenai idia noho diba lasi.

“Maino Bona Noho Namona”—Koikoi Gauna

Ia hedinarai namonamo niuklia ena dika be ia do ore lasi. Ena be politkol dalanai, moni gaukaralaia dalanai, bona taunimanima edia noho dalanai, hekwakwanai be momo, to tanobada besedia be vaira dinadia totona idia lalo-goada. Lagani 1986 be UN International Year of Peace, bona unai negana amo, ia hedinarai idia gaukara bada unai dika idia hamaragia totona.

Unai bamona idia lalo-goada dainai, The Bulletin of the Atomic Scientists magasin be idia hanaia lagani 10 lalodiai ena doomsday dina gauna idia giroa, guna miniti toi ia noho 12 okaloka abia totona, to hari ia be miniti 10 ia noho​—unai dina gauna ese ia hahedinaraia miniti hida idia noho bena niuklia tuarina ia matamaia. Lagani 1989 lalonai, Stockholm International Peace Institute oreana ia gwau “Tanobada Ibounai Tuarina Iharuana negana amo bona murinai laganidia dekenai maino be auka, hari lagani lalonai, hepapahuahu hanamoa dalana helarona ena badina ia goada momokani.”

Vanegai laganidia lalodiai, United Nations ena dala idia hagoadaia intenesenel tuari idia vara gwauraia gabudia ai hekwakwanai idia hanaia totona. Ena be United Nations be idia kwalimu momokani lasi, to nega haida hekwakwanai idia hanamodia toho dainai taunimanima idia laloa vaira negana dekenai namo do ia vara. Gabeai, sedira ma hekwakwanai haida do idia hanaidia danu. Sedira “maino bona noho namona” idia boiboilaia ena rege do idia habadaia bona idia karaia dalana do idia hagoadaia. Reana taunimanima ese edia hereva idia abia dae karana do ia bada ia lao.

To naria namonamo! Baibel ena sisiba be inai: “Inai bamona hereva, ‘Maino bona [noho namona] ita noho inai,’ taunimanima idia gwauraia noho neganai, karaharaga hisihisi dika momokani bona mase do ia ginidae! Rogorogo hahine ese mara ena hisihisi ia davaria haraga bamona unai hisihisi do ia ginidae. Bona unai taunimanima do idia roho mauri diba lasi.” Unai dainai “maino bona [noho namona]” idia boiboilaia neganai, unai be Dirava ena nega “tanobada idia hadikaia vadaeni taudia do [ia] alaia ore.”​—1 Tesalonika 5:​3, 4; Apokalupo 11:18.

Namona be oi itaia, Baibel ia gwau lasi tanobada besedia be “maino bona [noho namona]” do idia havaraia. To, do idia herevalaia, guna idia laloa do ia vara lasi, to gabeai do idia lalo-goada bona idia laloa do ia vara momokani. Toana be maino bona noho namona be kahirakahira idia abia. Ena be niuklia ena dika ia do noho, to tanobada besedia be noho namona koikoina idia abia.

To Keristen momokanidia do idia koidia lasi. Taunimanima ese do idia havaraia maino bona noho namona ia hereaia gauna do idia naria mai edia ura bada ida!

Maino Bona Noho Namona—Momokani Gauna

Salamo 4:8 ena hereva hegeregerena, maino momokani bona noho namona be Iehova Dirava ena dala ai sibona idia davaria: “Maino ai do lau hekure bona do lau mahuta, Iehova e, badina be oi mo sibona ese lau oi gimaia dainai gari lasi dekenai lau noho.” Bema Iehova ena Basileia dalana idia laloa lasi to ma dala ta ai “maino bona [noho namo]” dalana idia boiboilaia, unai be koikoi gauna sibona. Do ia havaraia gauna be do ia noho daudau lasi.

Keriso henunai, Dirava ena Basileia amo heduru gaudia haida mo sibona do ia karaia lasi. Dirava ena Basileia ese niuklia kohudia edia namba do ia hamaragia sibona lasi, to unai gau iboudiai bona tuari kohu iboudiai do ia hadikadia ore. Salamo 46:9 ena gwauhamata be inai: “Tuari ia hadokodia ela bona tanobada dokona. Peva ia hamakohia bona io ia utua maragimaragi; kariota be lahi ai ia gabudia.”

Unai hegeregerena, niuklia siahu ia karaia masini be idia gaukara kerere dainai eiava idia negea poisini muramuradia dainai idia vara diba niuklia dikadia be do idia ore vaitani. Bema lasi, inai hereva be koikoi: “Ta ta ena vine auna ena vine auna bona ena fig auna ena fig auna henudiai do idia helai, bona tau ta ese do ia hagaridia lasi; badina be guba oreadia edia Iehova be ena uduna amo ia hereva vadaeni.” Dirava ia koikoi diba lasi. Ita diba ena hereva do idia guguru.​—Mika 4:4; Tito 1:2.

Niuklia dikana ia ore momokani tanobadana lalonai do oi noho diba neganai, oi moale, a? Oi noho diba, badina Dirava ena Hereva be vareai totona taravatu ia henia. Unai taravatu dekenai diba ita abia neganai, bona unai hegeregerena ita mauri neganai, sedira dina ta mai moale danu do oi gwau diba: “Niuklia ena dika​—ia ore momokani!”

[Picture on page 7]

Dirava ena tanobada matamatana dekenai maino do ia noho bona niuklia ena dika be do ia noho lasi

[Picture Credit Line on page 6]

U.S. National Archives photo

[Picture Credit Line on page 7]

M. Thonig/H. Armstrong Roberts

    Hiri Motu Pablikeisen (1987-2025)
    Log aut
    Login
    • Hiri Motu
    • Ta dekenai siaia
    • Preferens
    • Copyright © 2025 Watch Tower Bible and Tract Society of Pennsylvania
    • Gaukaralaia Taravatudia
    • Privacy Policy
    • Privacy Settings
    • JW.ORG
    • Login
    Ta dekenai siaia