Iehova Ena Witnes Taudia Goadadia Idia Raka Lao!

APOSETOLO edia nega lalonai, Iehova ena witness taudia be gari lasi bona gaukara goadagoada taudia. Mai ura bada danu Iesu ena hahegani idia badinaia: “Umui lao, bese ibounai be diba tahua taudia do umui halaoa.”​—Mataio 28:​19, 20.

To edena dala ai ita diba Keriso murinai idia raka taudia gunadia be unai hahegani idia badinaia namonamo? Bible bukana, Aposetolo edia Kara ese ia hamomokania idia be Iehova ena witness taudia goadadia, bona idia raka lao momokani!

ITA IDIA DURUA HEREVADIA BONA MA GAU HAIDA

Evanelia buka ihatoina bona Kara bukana ena hereva bona torea dalana be tamona dainai ia hahedinaraia torea tauna be tamona​—unai be Luka, ‘lalokau doketa tauna.’ (Kolose 4:14) Kara bukana be idau badina unai buka sibona be herevahereva haida bona guriguri haida idia torea, ma buka ta lalonai idia torea lasi. Unai buka ena kahana 100 amo kahana 20 be taunimanima edia pablik haroro herevadia, Petro bona Paulo ese unai hereva momo idia henia abidadama momokani idia habadaia totona.

Kara bukana be lagani 61 C.E. bamona Luka ia torea Roma dekenai. Unai badina dainai ia ese Paulo ena kota Kaisara vairanai eiava Nero ena dagedage Keristen taudia dekenai, lagani 64 C.E. ai, ia herevalaia lasi.​—2 Timoteo 4:11.

Luka ena Evanelia bamona, Kara be Teofilo dekenai ia torea. Ia torea abidadama hagoadaia totona bona Keristen tomadiho ia bada ia lao karana ia herevalaia totona. (Luka 1:​1-4; Kara 1:​1, 2) Unai buka ia hamomokania Iehova ena imana be iena abidadama hesiai taudia dekenai. Iena lauma ena goada ia hedinarai bona unai ese iseda abidadama Dirava ena peroveta hereva dekenai ia hagoadaia. Kara bukana ese ita ia durua dagedage ita haheaukalaia totona. Ita ia durua iseda ura ita dadaraia Iehova ena Witness taudia ai ita lao totona, bona iseda abidadama Basileia ena helaro dekenai ia hagoadaia.

ENA SIVARAI BE MOMOKANI

Paulo ia bamoa neganai, Luka ese edia loaloa sivaraina ia torea. Bona idia vara gaudia idia itaia taudia momo danu ia hereva henidia. Unai dainai, bona iena torea hereva ia tahua namonamo dainai, tanobada ena sivarai dekenai iena toretore be anina bada gauna momokani.

Unai dainai, diba tauna William Ramsay ia hereva diba: “Luka be tanobada ena sivarai ia torea tauna namo hereana ta. Ia be sivarai momokani ia torea sibona lasi, to ia diba dahaka hereva be mai anina bada . . . Namona be unai toretore tauna ita gwauraia namo tanobada sivarai torea taudia ita gwauraia namo hegeregerena.”

PETRO​—ABIDADAMA WITNESS TAUNA TA

Dirava ese sivarai namona harorolaia gaukarana ia henia bona Iehova ena lauma helaga ena siahu sibona dekenai taunimanima idia harorolaia diba. Unai dainai, Iesu murinai idia raka taudia be lauma helaga idia abia neganai, idia be iena witness taudia ai do idia lao Ierusalem, Iudea, Samaria bona “tanobada ena kahana ibounai.” Pentekoste 33 C.E. ai, lauma helaga amo idia honu. Ia be 9 o’clock dabai sibona dainai, idia inuinu kekero lasi, haida idia laloa bamona. Petro ese haroro goadana ta ia henia, bona taunimanima 3,000 be bapatiso idia abia. Tomadiho taudia idia ura Basileia harorolaia taudia idia koua, to iena witness taudia edia guriguri dainai, Dirava ese siahu ia henia, iena hereva be gari lasi dekenai idia harorolaia totona. Ma idia hagaridia toho neganai, edia haere be inai: “Dirava ai kamonai henia be namo, taunimanima ai kamonai henia be dika.” Unai gaukara idia karaia noho idia be ruma ta ruma ta amo idia haroro noho neganai.​—1:​1–5:42.

Iehova ena lauma dekenai idia tabekau dainai, iena witness taudia be dagedage idia haheaukalaia diba. Unai dainai, abidadama witness tauna, Stefano be nadi amo idia hamasea murinai, Iesu murinai idia raka taudia be gabu momo dekenai idia luludia, to unai amo hereva be ia bada ia lao sibona. Haroro tauna Filipo be Samaria dekenai hereva ia abia lao matamaia. Hoa gauna be dagedage dikadika tauna Saulo, Taso amo, ese iena kara ia haidaua momokani. Ia be aposetolo Paulo neganai, Damasko taudia edia dagedage ena siahu ia mamia, bona ena be Iuda taudia idia ura idia hamasea to ia heau mauri. Nega sisina lalonai, Paulo ese aposetolo taudia Ierusalem dekenai ia bamodia bena murinai ia lao iena hesiai gaukara ia karaia totona.​—6:​1–9:31.

Kara bukana ia hahedinaraia Iehova ena imana be iena witness taudia dekenai. Petro ese Doreka (Tabita) be mase amo ia hamauria lou. Boiboi ia kamonai neganai, Kaisarea dekenai ia lao sivarai namona be Korenelio, iena ruma bese, bona iena turadia ia hadibaia totona. Idia be Idau Bese Taudia ginigunadia idia bapatiso Iesu ena hahediba taudia ai idia lao totona. Unai dainai “pura 70” idia doko, lagani 36 C.E. ai. (Daniel 9:24) Nega sisina murinai, Heroda Agripa 1 ese aposetolo Iakobo ia hamasea bona Petro ia dogoatao. To aposetolo tauna be aneru edia heduru dainai dibura amo ia raka oho, bona ‘Iehova ena hereva ia bada ia lao bona gabu ibounai dekenai ia lao noho.’​—9:​32–12:25.

PAULO ENA MISINARI LOALOA TOI

Paulo ese ia karaia bamona, Dirava ena gaukara dekenai sibodia edia goada idia henia taudia be hahenamo momo idia abia. Iena misinari loaloa ginigunana be Antioka, Suria dekenai ia hamatamaia. Kupro motumotu dekenai, lohia tauna, Seregio Paulo bona ma taunimanima haida be abidadama taudia ai idia lao. Perega, Pamfulia dekenai, Ioane Mareko ese ia rakatanidia bona ia lao Ierusalem dekenai, to Paulo bona Banaba idia lao Antioka, Pisidia dekenai. Lustera dekenai, Iuda taudia idia dagedage bada. Ena be nadi amo idia hodoa bona kahirakahira ia mase, to Paulo ia goada lou bona iena hesiai gaukara ia karaia noho. Gabeai, ia bona Banaba idia giroa Antioka, Suria dekenai, bona ena loaloa ginigunana ia doko.​—13:​1–14:28.

Aposetolo taudia edia negai idia karaia hegeregerena, hari inai nega ena Hakaua Oreana be lauma helaga amo daradara hereva idia hamaoromaoroa. Kopina utua karana be “taravatu mai badina gaudia” ta lasi, to “kaivakuku vairana dekenai idia atoa aniani . . . , rara . . . , [bona] aiona idia gigia gaudia edia hidio [idia] ania lasi, bona heudahanai kara [idia] karaia lasi” be ‘mai badina gaudia.’ (15:​28, 29) Paulo ese ena misinari loaloa iharuana ia hamatamaia neganai, Sila ese ia bamoa, bona gabeai Timoteo be idia danu ia lao. Idia boiridia Makedonia dekenai idia lao bona idia lao haraga. Filipi dekenai, idia haroro dainai taunimanima idia helogohelogo bada, bona dibura rumana dekenai idia atoa. To tano-mareremarere dainai Paulo bona Sila be idia raka siri diba bona dibura naria tauna bona iena ruma bese idia haroro henidia. Idia be bapatiso abidadama taudia ai idia lao.​—15:​1–16:40.

Iehova ena hesiai taudia be iena Hereva idia stadilaia namonamo be gau badana, Paulo bona Bible idia tahua Berea taudia ese idia karaia hegeregerena. Areo Ororo, Atena dekenai, Iehova ese gau iboudiai ia havaraia ena haroro ta ia henia, bona haida be abidadama taudia ai idia lao. Korinto dekenai, taunimanima momo idia ura idia kamonai dainai, hua 18 lalonai, unai hanua dekenai ia noho. Unuseniai ia noho lalonai, Tesalonika Ginigunana bona Iharuana ia torea. Sila bona Timoteo ia rakatania, bona aposetolo be bouti ia guia bena ia lao Efeso dekenai. Unuseni amo ia lao Kaisarea dekenai, bena ia lao Ierusalem dekenai. Suria Antioka dekenai ia giroa neganai, iena misinari loaloa iharuana ia doko.​—17:​1–18:22.

Paulo ese ia hahedinaraia hegeregerena, ruma ta ruma ta haroro gaukara be Keristen ena hesiai gaukara badana. Aposetolo ena loaloa ihatoina dekenai (52-56 C.E.) ia lao henia gabudia be iena loaloa iharuana bamona. Paulo ena hesiai gaukara be Efeso dekenai dagedage bada ia havaraia; unuseniai Korinto Ginigunana ia torea. Korinto Iharuana be Makedonia dekenai ia torea, bona Korinto dekenai ia noho lalonai, Roma taudia ia tore henidia. Mileto dekenai, Paulo be Efeso ena elda taudia danu ia hebou bona ia hamaorodia pablik haroro amo bona ruma ta ruma ta gaukara amo ia hadibadia. Iena loaloa ihatoina ia ore Ierusalem dekenai ia ginidae neganai.​—18:​23–21:14.

DAGEDAGE ESE IA KOUDIA LASI

Dagedage ese Iehova ena abidadama witness taudia edia uduna ia koua lasi. Unai dainai, Ierusalem ena dubu dekenai, Paulo idia dagedage henia bada neganai, gari lasi dekenai badu taudia ia haroro henidia. Tatau haida ese idia alaia toho, to Gavana Feliki be tuari orea gadi taudia amo ia siaia lao Kaisarea dekenai bona idia alaia diba lasi. Lagani rua lalonai, Feliki ese ia koua dibura rumana lalonai, badina ia ura Paulo ese moni ia henia to Paulo be moni ia henia lasi. Iena dagi ia abia tauna, Festo ese Paulo ena noinoi ia lao Kaisara dekenai ia kamonai henia. To Roma dekenai ia do lao lasi neganai, aposetolo be Pavapava Agripa vairanai, haroro goadana ia henia guna.​—21:​15–26:32.

Hetoho ese idia ia hagaridia lasi, bona Iehova ena hesiai taudia idia haroro noho. Paulo dekenai unai be momokani. Kaisara dekenai ia noinoi dainai, aposetolo be Luka danu, lagani 58 C.E. lalonai Roma dekenai idia lao. Mura, Lukia dekenai, ma bouti ta dekenai idia guia. Ena be Melita motumotu dekenai, edia bouti ia mutu, to ma bouti ta ese ia abidia lao Italy dekenai. Ena be Roma dekenai, tuari gadi taudia ese idia dogoatao, to Paulo ese taunimanima ia boiridia iena ruma dekenai bona sivarai namona ia haroro henidia. Ia dibura negana lalonai, ia be Efeso taudia, Filipi taudia, Kolose taudia, Filemona, bona Heberu taudia ia tore henidia.​—27:​1–28:31.

IDIA RAKA LAO NOHO

Kara bukana ese ia hahedinaraia Dirava ena Natuna ese ia hamatamaia gaukarana be aposetolo edia nega dekena amo, mai edia abidadama Iehova ena witness taudia idia karaia. Oibe, Dirava ena lauma helaga ena siahu amo, idia haroro goadagoada.

Iesu murinai idia raka taudia gunadia be guriguri amo Dirava idia tabekau henia dainai, Iena imana be idia dekenai ia noho. Unai dainai, taunimanima tausen momo be abidadama taudia ai idia lao bona ‘sivarai namona be tanobada ibounai dekenai idia harorolaia.’ (Kolose 1:23) Momokani, unai neganai, bona hari inai negai danu, Keristen korikori taudia be witness goadagoada taudia bona Iehova totona idia raka lao noho!

[Box/Picture on page 23]

KORENELIO, TUARI KAPITAN: Korenelio be tuari tau badana ta, eiava kapitan. (10:1) Lagani tamona lalonai, kapitan ena gaukara moni davana ese aena dekenai ia tuari tauna ena davana ia hanaia nega 5 amo, eiava unai be denarius 1,200 bamona. Nega haida unai davana bamona idia hanaia. Gaukara amo ia doko neganai, ia be gavamani amo moni eiava tano ia abia. Iena tuari dabua be mai ena hairai, kwarana gauna be siliva, bona ena dabua be rami bamona. Pagana dekenai wool dabua ta ia karaia, bona ia be mai ena hairai gaudia danu. Kapitan ena tuari orea dekenai tuari taudia be 100 idia noho, to nega haida 80 eiava ma haida sibona idia noho. “Tuari orea ladana Italia” dekenai idia vareai taudia be Roma ena taudia bona Italy ena hesiai taudia gunadia danu.

[Box/Picture on page 23]

RUMA ENA GUHI DEKENAI GURIGURI TA: Petro be ia sibona guhi ta dekenai ia guriguri neganai, unai kara ia heagilaia lasi. (10:9) Reana guhi ia gegea habana be taunimanima edia matana amo ia hunia. (Deuteronomi 22:8) Danu, guhi dekenai taunimanima idia laga-ani diba bona hanuaboi neganai, dala ena rege idia kamonai momo lasi.

[Box on page 23]

IDIA LALOA IDIA BE DIRAVA TAUDIA TAUNIMANIMA EDIA TAUANINA DEKENAI: Paulo be Lustera dekenai aena dika tauna ta ia hanamoa dainai, taunimanima idia laloa dirava taudia idia hedinarai taunimanima edia tauanina dekenai. (14:​8-18) Unai hanua dekenai, Dio, Greek dirava badana, ena dubu ia noho, bona ia natuna Hereme, dirava taudia edia hereva ia abia lao tauna, be hereva namo tauna. Paulo be hereva ia karaia momo dainai, taunimanima idia laloa ia be Hereme, bona idia laloa Banaba be Dio. Edia kastom be tomadiho koikoi ena kaivakuku be palaoapalaoa amo idia hahairaidia, eiava cypress eiava pine ena raurau amo idia hahairaidia, to Paulo bona Banaba be unai kaivakuku tomadiho henia karana idia dadaraia.

[Box/Picture on page 23]

DIBURA RUMA NARIA TAUNA ESE HEREVA IA ABIA DAE: Tano-mareremarere ta ese dibura ena iduara ia kehoa bona dibura taudia edia kwatua gaudia ia hamakohia neganai, Filipi ena dibura ruma naria tauna be sibona ia alaia mase gwauraia. (16:​25-27) Badina be dahaka? Badina Roma ena taravatu be bema dibura amo ta ia heau oho neganai, dibura ruma naria tauna ese heau oho tauna ena panisi do ia abia. Reana dibura taudia haida be hisihisi dekenai idia hamasedia, bona dibura ruma naria tauna ia ura lasi unai bamona ia mase, unai dainai sibona ia hamasea toho. To, ia ese sivarai namona ia abia dae, bona ‘ia bona ena ruma bese taudia idia bapatiso haraga.’​—16:​28-34.

[Box/Picture on page 24]

KAISARA DEKENAI IA NOINOI: Ia vara neganai, ia be Roma tauna dainai, Paulo be mai ena maoro Kaisara dekenai ia noinoi Roma dekenai kota ia abia totona. (25:​10-12) Roma ta idia kwatua diba lasi, idia botaia diba lasi, eiava idia hahisia diba lasi bema kota ia abia guna lasi.​—16:​35-40; 22:​22-29; 26:32.

[Credit Line]

Musei Capitolini, Roma

[Box/Picture on page 24]

DIANA ENA DUBU IDIA NARIA TAUDIA: Paulo ena haroro dekenai ia badu dainai, siliva gaudia ia karaia tauna Demetrio ese helogohelogo ia havaraia. To hanua ena hereva torea tauna ese badu taudia ia siaidia lao edia ruma dekenai. (19:​23-41) Gaukara taudia be dubu ena helaga gabuna hereana ena ruma helaga maragidia be siliva amo idia karaia. Dubu ena helaga herea gabuna dekenai mai ena rata momo dirava hahinena, Diana ia noho. Ia be natudia havaraia momo ena dirava. Hanua idauidau idia tahua edena be mai ena maoro iena ne·o·koʹros eiava “dubu naria taudia” ai idia lao totona.

[Box/Picture on page 24]

DAVARA DEKENAI IDIA HEKWARAHI: Lai dikana ta, ladana Totodae, ese Paulo ia abia lao boutina ia botaia neganai, ‘idia hegeregere lasi murina kahana dekenai dingi idia hamaoromaoroa totona.’ (27:​15, 16) Unai dingi be bouti badana ese ia veria gauna. Bouti badadia dekenai kwanau idia noho bona unai kwanau amo bouti ena huana idia kwatua diba, bona unai amo lai bada ia toa neganai ia goada noho diba bona au tubua do ia dika lasi. (27:17) Bouti idia taria taudia be bouti ena dogo hani idia negea bona bouti taria ena bara idia kwatua ena kwanau idia ruhaia sisina. (27:​29, 40) Alesandria ena bouti ena vairana dekenai, “Dio ena Natudia”​—Castor bona Pollux idia noho, idia laloa unai diravadia ese bouti taria taudia idia naridia.​—28:11.