Mase Murinai Maurina—Idia Haerelaia Lasi Henanadaidia

“BEMA TAU ta ia mase, do ia mauri lou diba, a?” (Iobu 14⁠:14) Idau negai ia noho tauna Iobu ese unai henanadai ia gwauraia, bona unai nega ia mai hari taunimanima momo gabu idauidau amo ese unai hereva idia tahua, bona idia haerelaia totona edia lalohadai idauidau momo idia gwauraia.

Idau negai Greek taudia idia gwau mase taudia edia laulau idia mauri noho. Idia gwau, vanagi amo unai laulau be Styx sinavai idia hanaia bona idia aru lao ela bona tanobada henunai ia noho gabuna ta dekenai idia vareai. Unuseniai diadi taudia ese unai laulau idia hahemaoro henidia, haida be mai ena magu badana dibura rumana dekenai idia atoa bona haida idia siaia uma namona (Elysian fields) dekenai, mai moale danu unuseniai idia noho totona. Idau negai idia noho taudia ma haida idia laloa mase taudia edia laulau be hisiu eiava komet ai idia halaoa. Ma haida idia laloa unai laulau be idia diaridiari bona hua ese ia veridia daekau; bona idia gwau hua ta ta iboudiai hua ia kuborukuboru neganai, dina dekenai idia hanai.

Hari inai negai danu, mase murinai taunimanima edia laulau idia mauri noho ena hereva idauidau momo idia kikilaia, to unai be taunimanima edia lalohadai sibona. Hindu bona Buddha tomadiho taudia idia laloa mase murinai taunimanima ena laulau be tauanina matamata ta dekenai ia vareai diba. Muslim taudia edia hahediba be tau ta ia mase neganai, ena laulau be ia mauri noho bona hahemaoro dokona ia abia neganai, ia be paradaiso eiava hel dekenai do ia lao. Kahirakahira Protestant taudia iboudiai idia hadibaia mase murinai taunimanima edia laulau be idia mauri noho bona guba dekenai idia moale eiava hel ena lahi dekenai hisihisi idia ania. To Katolik taudia ese unai hereva idia habadaia, idia gwau mase taudia haida be Limbo bona purgatory dekenai danu idia lao diba.

Tanobada kahana haida dekenai, mase taudia edia laulau idia mauri noho ena hahediba herevana idia abia dae, bona unai hahediba herevana be sene karana bona sibodia idia gwauraia Keristen taudia edia hereva idia buloa. Haheitalai be inai: West Africa dekenai tau ta ia mase neganai, Katolik bona Protestant taudia be gau ta amo hevarivari iboudiai idia koua, ta ese hevarivari ia raraia bona mase tauna ena laulau ia itaia garina. Edia lalokau tauna ia mase ena dina 40 murinai, iena ruma bese taudia bona iena turadia be aria idia karaia mase tauna ena laulau be guba dekenai ia daekau idia moalelaia totona. Murinai, reana Kirisimasi eiava Lagani Matamata Dinana dekenai, varavara taudia be guri gabuna dekenai idia lao bona mase tauna ena guri gabuna dekenai kekero muramurana idia bubua. Danu, unai mase tauna idia hereva henia toho, iena heduru idia tahua bona ia dekenai ruma bese ena sivarai idia kikilaia.

Ia hedinarai goevagoeva, mase murinai dahaka ia vara herevana dekenai tanobada ena tomadiho badadia idia lalo-tamona lasi. To, tanobada ibounai dekenai inai hereva ta dekenai idia lalo-tamona: idia laloa mase diba lasi laulau be taunimanima ta ta ibounai dekenai ia noho. Mase murinai maurina ena hahediba idia abia dae taudia kahirakahira iboudiai be unai bamona idia laloa.

To, henanadai mai daradara gaudia haida be inai: Mase diba lasi laulau ena hereva be edena bamona ia vara? Ia be Bible ena hahediba herevana ta, a? Bema oibe, dahaka dainai unai be Keristen lasi taudia edia hahediba ta danu, a? Unai henanadai edia haere ita tahua be namo. Ena be iseda tomadiho orea be idauidau, to mase be ita ibounai dekenai ia vara diba. Unai dainai unai hereva be mai anina oi dekenai danu. Unai dainai oi ai noia inai hereva oi dadaraia kava lasi, to mai lalo-parara danu ena anina oi tahua namonamo.