Kara Maoromaoro be Sene Herevadia amo Ia Mai Lasi

“Umui emui kara maoromaoro ese taravatu hadibaia taudia bona Farisea taudia edia kara bema ia hanaia lasi, umui be Guba Basileia lalonai do umui raka vareai diba lasi, lasi bona lasi momokani.”​—MATAIO 5:20.

1, 2. Iesu be ororo dekenai ia do haroro lasi neganai, dahaka ia vara?

UNAI hanuaboi lalonai Iesu be ororo dekenai ia noho. Guba dekenai hisiu momo danu idia noho. Hanuaboi lalonai idia loaloa mauri gaudia be au maragidia dekenai idia regerege. East kahanai Galilea Gohuna ena hurehure be kone dekenai idia aru mai. To reana Iesu ese unai maino bona hairai gaudia ia laloa lasi. Hanuaboi ai, ia ese ena guba Tamana, Iehova, ia guriguri henia. Iena Tamana ena hahekau ia abia be gau badana. Kerukeru be dina badana.

² East kahanai dina ia daekau. Manu idia roho matamaia bona idia boiboi. Lai maragina ia toa dainai, palaoapalaoa idia heudeheude sisina. Dina ia daekau lalonai, Iesu ese iena hahediba taudia ia boiridia bona idia amo tatau 12 ia abia hidi iena aposetolo taudia ai idia lao totona. Bena, mai ena hahediba taudia iboudiai danu, Iesu be ororo amo ia raka diho matamaia. Taunimanima hutuma be Galilea, Turo bona Sidono, Iudea bona Ierusalem amo idia raka mai vadaeni. Iesu ese edia gorere do ia hanamoa totona idia mai. Taunimanima ese Iesu idia daua toho bona edia gorere idia namo lou neganai, Iehova ia henia siahuna be sisina sisina lesu ena amo ia lao noho. Danu, Iesu ena hereva idia kamonaia totona idia mai. Edia lalona idia metau, bona Iesu ena hereva ese edia lalona ia hanamoa, muramura namona bamona.​—Mataio 4:25; Luka 6:​12-19.

3. Dahaka dainai Iesu ena hahediba taudia bona taunimanima hutuma ese Iesu ena hereva idia naria noho?

³ Vaia edia kara, rabbi taudia (tomadiho gunalaia taudia) ese taunimanima idia hadibaia neganai, idia helai diho, bona unai daba dekenai, lagani 31 C.E. ai, keru sisina negana lalonai, Iesu ia helai danu. Ororo ena atai gabuna dekenai ia helai. Iena hahediba taudia bona taunimanima hutuma ese unai kara idia itaia neganai, idia lalo-parara gau idauna ta do ia vara, unai dainai Iesu kahirakahira dekenai idia mai, bona idia naria. Iesu ia hereva matamaia neganai, ena hereva idia naria noho; gabeai iena hereva ia hadokoa neganai, idia hoa dikadika idia kamonaia gaudia dainai. Mani ita itaia dahaka dainai idia hoa.​—Mataio 7:28.

Kara Maoromaoro Daladia Rua

⁴ Iesu be ororo dekenai ia haroro neganai, orea rua ia hahegeregerea: taravatu hadibaia taudia bona Farisea taudia, bona hanua taudia, metau idia henidia ladana maragi taudia unai. Iesu ena hereva be Mataio 5:​1–7:29 dekenai bona Luka 6:​17-49 dekenai idia torea. Iesu ese kara maoromaoro daladia rua ia herevalaia, Farisea taudia edia kara maoromaoro koikoina bona Dirava ena kara maoromaoro momokanina. (Mataio 5:​6, 20) Farisea taudia idia gwau idia kara maoromaoro, badina sene taudia edia hereva idia badinaia dainai. Lagani 100 B.C.E. ia do mai lasi neganai, taunimanima haida ese unai sene herevadia be “Taravatu ia koua maguna bamona” idia havaraia, Greek taudia edia lalohadai bona kara ese Taravatu idia hadikaia garina. Taunimanima idia laloa unai sene herevadia be Taravatu lalonai idia noho. Momokani, taravatu hadibaia taudia idia gwau unai sene herevadia ese Taravatu idia hanaia. Mishnah bukana ia gwau: “Taravatu hadibaia taudia edia hereva [edia sene herevadia] ita badinaia be gau badana, to Taravatu ena hereva ita badinaia be gau badana lasi.” Unai dainai, edia sene herevadia be “Taravatu ia koua maguna bamona” lasi, to Taravatu idia hamanokaia bona ena siahu idia haorea, Iesu ia hereva hegeregerena, ia gwau: “Momokani umui Dirava ena taravatu umui negea, emui sene taravatu umui dogoatao totona.”​—Mareko 7:​5-9; Mataio 15:​1-9.

5. (a) Iena hereva idia kamonaia totona Iesu dekenai idia mai hanua taudia edia mauri ena noho dalana be edena bamona, bona taravatu hadibaia taudia bona Farisea taudia ese unai taudia edena bamona idia laloa? (b) Dahaka dainai moni gaukara idia karaia taudia dekenai sene herevadia be metau gaudia?

⁵ Iena hereva idia kamonaia totona Iesu dekenai idia mai hanua taudia be lauma dalanai idia ogogami bona “edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” (Mataio 9:36) Taravatu hadibaia taudia bona Farisea taudia be mai edia hekokoroku ida unai taudia idia dadaraia, bona idia gwau idia be ʽam-ha·ʼaʹrets taudia (tano taudia), bona idia ese unai taudia idia matauraia lasi to idia gwau idia be diba lasi, kara dika taudia, bona do idia toreisi lou lasi badina sene herevadia idia badinaia lasi dainai. Iesu ena nega ai, unai sene herevadia be momo herea bona anina lasi gaudia idia taravatulaia kava. Unai sene karadia edia tomadiho karadia idia badinaia totona taunimanima ese nega bada idia halusia. Unai dainai moni gaukara idia karaia taudia ese unai sene herevadia idia badinaia diba lasi. Vadaeni, Iesu ese unai sene herevadia ia gwauraia dika, ia gwau idia be “huaia gaudia mai metau danu” bona “taunimanima latanai idia atoa.”​—Mataio 23:4; Ioane 7:​45-49.

6. Dahaka dainai taunimanima idia hoa Iesu ena hamatamaia herevadia dainai, bona unai hereva idia hahedinaraia iena hahediba taudia edia noho bona taravatu hadibaia taudia bona Farisea taudia edia noho be edena bamona do idia idau?

⁶ Unai dainai Iesu be ororo dekenai ia helai neganai, ia dekenai idia mai taudia be iena hahediba taudia bona lauma dalanai idia hitolo taudia hutuma. Iena hamatamaia herevadia dainai idia hoa. Ia gwau, ‘Ogogami taudia idia namo, hitolo taudia idia namo, idia taitai taudia idia namo bona idia ura henia lasi taudia idia namo.’ To, daika ia namo diba ia ogogami, o ia hitolo, o ia taitai o ia idia ura henia lasi neganai? Bona Iesu ia gwau kohu momo taudia, boga kunu taudia, idia kiri taudia bona taunimanima iboudiai ese idia hanamodia taudia be dika do idia davaria! (Luka 6:​20-26) Iena hereva haida sibona amo, Iesu ese taunimanima momo edia lalohadai bona taravatu ia hakoikoia. Iesu ese taunimanima edia gini ia haidaua unai, gabeai ia hereva hegeregerena, ia gwau: “Sibona ia hekokoroku tauna be henunai do ia noho, to sibona ia manau tauna be do idia hanamoa.”​—Luka 18:​9-14.

7. Iena hereva ginigunadia dainai, Iesu idia kamonai henia taudia hutuma, lauma dalanai idia hitolo taudia unai, edia mamina be edena bamona?

⁷ Unai dabai, Iesu dekenai idia mai taudia be taravatu hadibaia hekokoroku taudia bona Farisea taudia amo idia idau, idia diba lauma dalanai edia noho ia dika. Iesu ena hereva ginigunadia dainai helaro namona idia abia diba, ia gwau: “Idia diba lauma gaudia idia tahua be namo taudia idia moale, badina idia diba Guba Basileia be idia edia.” (Mataio 5:​3, NW) Bona idia moale dikadika Iesu ese inai hereva danu ia gwauraia neganai: “Dirava ena kara maoromaoro idia ura dikadika idia karaia taudia be idia namo, badina be Dirava ese boga kunu do ia henidia”! (Mataio 5:​6; Ioane 6:35; Apokalupo 7:​16, 17) Oibe, kara maoromaoro amo do idia honu, to unai be Farisea taudia edia kara maoromaoro lasi.

Kara Maoromaoro “Taunimanima Edia Vairana Dekenai” Ia Hegeregere Lasi

⁸ Iesu ia gwau: “Umui emui kara maoromaoro ese taravatu hadibaia taudia bona Farisea taudia edia kara bema ia hanaia lasi, umui be Guba Basileia lalonai do umui raka vareai diba lasi, lasi bona lasi momokani.” (Mataio 5:​17-20; Mareko 2:​23-28; 3:​1-6; 7:​1-13 itaia danu.) Reana sibodia edia lalona dekenai haida idia henanadai, idia gwau: ‘Farisea taudia edia kara maoromaoro ita hanaia, a? Idia anivaga, idia guriguri, edia kohu be kahana 10 dekenai idia hapararaia bona kahana tamona idia henia Dirava dekenai bona moni be ogogami taudia idia henidia bona edia nega ibounai idia halusia Taravatu idia stadilaia totona. Iseda kara maoromaoro be edena bamona edia kara maoromaoro ia hanaia diba?’ To edia kara maoromaoro ese Farisea taudia edia kara maoromaoro ia hanaia be gau badana. Reana taunimanima ese Farisea taudia idia laloa bada, to Dirava ese idia ia laloa bada lasi. Ma nega ta ai, Iesu be Farisea taudia ia hereva henidia, ia gwau: “Umui be taunimanima edia vairana dekenai umui sibona dekenai umui hanamoa, to Dirava be emui lalona ia diba. Badina be taunimanima ese idia hanamoa gaudia be Dirava ese ia ura henia lasi.”​—Luka 16:15.

9-11. (a) Farisea taudia idia laloa Dirava vairanai kara maoromaoro idia abia dalana ta be dahaka? (b) Idia laloa kara maoromaoro abia dalana iharuana be dahaka? (c) Kara maoromaoro idia tahua dalana ihatoina be dahaka, bona aposetolo Paulo be dahaka ia gwau dainai ia hahedinaraia unai dala ihatoina amo do idia kwalimu diba lasi?

⁹ Rabbi taudia be sibona edia lalohadai hegeregerena, kara maoromaoro abia daladia haida idia gwauraia hidi. Unai dala ta be inai: Abraham amo idia vara: “Iseda tamana, Abraham, ena hahediba taudia ese hari ia noho tanobadana idia moalelaia, bona gabeai do ia mai tanobadana do idia abia.” (Mishnah) Reana unai sene herevana ia hakoikoia totona, Ioane Bapatiso ese ia dekenai idia mai Farisea taudia ia hamaorodia, ia gwau: “Emui lalona umui giroa, vadaeni lalona giroa ena anina umui hedinaraia! Bona emui lalona dekenai umui hereva lasi, ‘Aiemai tamana be Aberahamo [idia laloa unai dainai idia hegeregere].’ ”​—Mataio 3:​7-9; Ioane 8:​33, 39 itaia danu.

¹⁰ Idia gwau kara maoromaoro abia totona, dala iharuana be kohu o moni be ogogami taudia idia henidia. Apocrypha buka rua lalonai, Iuda tomadihona idia badinaia momokani taudia ese idia torea gaudia lalonai, unai lalohadai ia hedinarai. Tobit bukana lalonai ia gwau: “Taunimanima ta ese moni bona kohu be ogogami taudia ia henidia neganai, mase do ia davaria lasi bona ena kara dika iboudiai idia gwauatao.” (12:​9, The New American Bible) Book of Sirach (Ecclesiasticus) ena hereva danu be tamona, ia gwau: “Ranu ese lahi badana ia habodoa, bona moni o kohu henia karana amo taunimanima edia kara dika idia gwauatao.”​—3:29, NAB.

¹¹ Kara maoromaoro idia tahua dalana ihatoina be Taravatu karadia amo. Edia sene herevadia idia gwau bema tau ta ena kara momo idia namo, do ia roho mauri. Taunimanima idia hahemaoro henia neganai idia laloa edia “kara momo idia namo o idia dika” be mai anina, bona unai hegeregerena hahemaoro idia henia. (Mishnah) Hahemaoro namona do idia abia totona, idia ura “kara namodia momo do idia karaia, bona edia kara namodia momo be edia kara dikadia edia momo idia hanaia.” Bema tau ta ena kara namodia edia namba ese iena kara dikadia edia namba idia hanaia, kara namona tamona amo, do ia roho mauri​—hegeregere Dirava ena hahemaoro karana be ia ese edia kara maragidia iboudiai ia duahia bamona! (Mataio 23:​23, 24) Paulo ese lalohadai maorona ia gwauraia hedinarai, ia gwau: “Dirava vairanai tau ta lasi be maoromaoro Taravatu ia badinaia dekena amo.” (Roma 3:20) Momokani, Keristen taudia edia kara maoromaoro ese taravatu hadibaia taudia bona Farisea taudia edia kara maoromaoro ia hanaia be gau badana!

“Umui Kamonai Vadaeni, Guna Idia Gwau”

¹² Guna, Iesu be Heberu Revarevadia edia hereva ia gwauraia lou neganai, ia gwau: “Buka Helaga lalonai ia torea vadaeni.” (Mataio 4:​4, 7, 10) To ororo dekenai ia haroro neganai, Iesu ese hereva haida ia herevalaia gwauraia neganai, nega 6 ia gwau: “Sene taudia dekenai idia hamaoroa, idia gwau.” Toana be unai hereva be Heberu Revarevadia edia hereva to lasi. (Mataio 5:​21, 27, 31, 33, 38, 43) Dahaka dainai Iesu be unai bamona ia karaia? Badina be inai: Farisea taudia ese Buka Helagadia idia gwauraia neganai, edia sene herevadia hegeregerena siri edia anina idia gwauraia bona unai sene herevadia ese Dirava ena hahegani idia utua. Iesu ese Buka Helagadia be Farisea taudia idia gwauraia dalana hegeregerena ia gwauraia. (Deuteronomi 4:2; Mataio 15:3) Unai siri lalonai, Iesu ena hereva dokona, ena hereva namba 6 unai, ese unai ia hahedinaraia, ia gwau: “Umui kamonai vadaeni, guna idia gwau, ‘Emui turadia dekenai umui lalokau henia, to badu henia taudia dekenai do umui badu henia.’ ” To, “badu henia taudia dekenai do umui badu henia” be Mose ena Taravatu herevana lasi. Ia be taravatu hadibaia taudia bona Farisea taudia edia hereva. Taravatu hadibaia taudia bona Farisea taudia idia gwau, oiemu dekena tauna oi lalokau henia Taravatuna ena anina be Iuda taudia ese Iuda dekena taudia sibodia do idia lalokau henia be namo, to ma taunimanima haida do idia lalokau henia lasi.

13. Edena bamona Iesu ese sisiba ia henia, taunimanima be ala-ala karana idia havaraia diba karadia amo do idia gini siri totona?

¹³ Hereva 6 amo hereva ginigunana ita laloa hari. Iesu ia gwau: “Umui kamonai vadaeni, sene taudia dekenai idia hamaoroa, idia gwau, ‘Umui alaia lasi, bona alaia tauna be kota naria tauna ese do ia kota henia.’ To lau ese lau hamaoroa umui, ena tadikakana do ia badu henia tauna be dohore kota naria tauna ese do ia kota henia, bona ena tadikakana do ia hereva dika henia tauna be Kaunsolo taudia edia vairana dekenai do ia lao.” (Mataio 5:​21, 22) Bema tau ta ena kudouna lalonai badu ia noho, unai tau ese ia badu henia tauna ia hereva dika henia diba bena gabeai ia hahemaoro dika henia diba, bona reana dokonai do ia alaia mase. Badu be nega daudau lalonai kudou dekenai ia noho neganai, ia ese mase ia havaraia diba. Bible ia gwau: “Iena tadikakana ia badu henia noho tauna be ala-ala tauna.”​—1 Ioane 3:15.

14. Iesu be edena bamona ita ia sisiba henia, heudahanai karana ia lao henia dalana dekenai do ita raka matamaia lasi totona?

¹⁴ Bena, Iesu ia gwau: “Umui kamonai vadaeni, sene taudia dekenai idia hamaoroa, idia gwau, ‘Umui heudahanai lasi.’ To lau ese umui lau hamaoroa, tau ta ese hahine ta do ia itaia matana dekenai ela bona iena lalona dekenai do ia ura dikadika, iena kudouna dekenai be ia heudahanai vadaeni.” (Mataio 5:​27, 28) Do oi heudahanai lasi, a? Vadaeni, unai dala dekenai do oi raka matamaia lasi totona, heudahanai oi lalohadailaia lasi. Emu kudouna oi naria, badina kudouna lalonai unai bamona kara idia hamatamaia. (Hereva Lada-isidia 4:23; Mataio 15:​18, 19) Iakobo 1:​14, 15 lalonai ia gwau: “Hedibagani ena badina korikori be, tau ta sibona ena ura dainai kara dika ta ese ia veria noho, bona ia koia noho. Vadaeni iena ura dikadia be idia rogorogo bamona, unai murinai kara dika ia havaraia. Bona kara dika ia tubu bona ia bada neganai, mase ia havaraia.” Nega haida taunimanima idia gwau: ‘Bema kara ta oi karaia ore diba lasi, namona be oi karaia matamaia lasi.’ To, namona be ita gwau: ‘Bema kara ta oi hadokoa diba lasi, namona be oi hamatamaia lasi.’ Guna, ena be Keristen taudia haida be laini dekenai idia gini hegaegae taunimanima ese idia pididia mase totona, to unai Keristen taudia idia gini goada. To, madi, gabeai idia haida be heudahanai ena tarapu lalonai idia moru.

15. Iesu ese adavana negea karana ia herevalaia neganai, iena hereva bona Iuda taudia edia sene herevadia be edena bamona idia idau momokani?

¹⁵ Iesu ena hereva ihatoina be inai: “Bona sene taudia ma idia gwau, ‘Ena adavana do ia negea tauna ese hadokoa pepana do ia henia ia rakatania totona.’ To lau hereva umui dekenai, tau ta ena adavana ia heudahanai lasi to tau ese ia negea, iena negea kara dainai hahine be ia headava lou neganai be do ia heudahanai, bona unai hahine [tau be Bible ena hereva hegeregerena lasi ia negea hahinena unai] do ia adavaia lou tauna be ia danu ia heudahanai.” (Mataio 5:​31, 32) Iuda taudia haida ese edia adavana idia kara dika henidia bona gau maragidia dainai edia adavana idia negea. (Malaki 2:​13-16; Mataio 19:​3-9) Sene taudia edia hereva idia gwau “bema hahine ese iena aniani ia nadua namonamo lasi” eiava “bema ma hahine ta ena hairai ese ena adavana ena hairai ia hanaia,” tau ese iena adavana ia negea diba.​—Mishnah.

16. Iuda taudia ese dahaka idia karaia dainai, edia gwauhamata be anina lasi, bona Iesu ena hereva ena anina be dahaka?

¹⁶ Sisina unai bamona, Iesu be ma ia gwau: “Umui kamonai vadaeni, sene taudia dekenai idia hamaoroa, idia gwau, ‘Umui gwauhamata koikoi lasi’ . . . To lau ese umui lau hamaoroa, umui gwauhamata neganai, hereva auka do umui gwauraia lasi.” Unai negai, Iuda taudia idia gwauhamata koikoi bona gau maragidia dainai gwauhamata idia karaia to edia gwauhamata idia hagugurua lasi. To Iesu ia gwau: “Umui gwauhamata neganai, hereva auka do umui gwauraia lasi . . . Unai dainai inai bamona oiemu hereva do oi gwauraia, ‘Oibe’ sibona, eiava ‘Lasi’ sibona. Hereva haida ma oi gwauraia be Satani dekena amo ia mai.” Iena hereva ena anina be inai sibona: Nega ibounai oi hereva momokani; bema unai bamona oi karaia, emu hereva be gwauhamata amo oi hamomokania be gau badana lasi. Namona be gau badadia sibona dainai gwauhamata oi karaia.​—Mataio 5:​33-37; 23:​16-22 itaia danu.

17. Iesu ia gwau dahaka kara ese “matana ena davana be matana, isena ena davana be isena” dalana ia hereaia?

¹⁷ Iesu be ma ia gwau: “Umui kamonai vadaeni, idia hamaoroa, idia gwau, ‘Matana ena davana be matana, isena ena davana be isena.’ To lau ese umui lau hamaoroa, umui dekenai dika ia karaia tauna ena dika davana umui karaia lasi. Bema oiemu vairana idiba kahana be tau ta ese ia botaia neganai, oiemu vairana lauri kahana danu oi henia ia botaia be ia namo.” (Mataio 5:​38-42) Unai siri lalonai Iesu ese ia gwauraia botaia karana be tauanina haberoa karana lasi, to ia be lalona hahisia karana ta. Bema tau ta ese oi ia hereva dika henia, haere dikana oi henia lasi, bena oiemu kara namona do oi hadikaia lasi. Oi idia kara dika henia neganai, oi kara dika henidia lasi. To idau, oi kara namo henidia, bena unai dala amo emu “kara namo dekena amo dika dekenai do [oi] kwalimu.”​—Roma 12:​17-21.

18. (a) Iuda taudia ese dekena tauna lalokau henia taravatuna edena bamona idia haidaua, to Iesu ese edia hereva edena bamona ia hakoikoia? (b) Loia tauna ta ia ura ia gwau “dekena tauna” ena anina be taunimanima haida sibona, taunimanima iboudiai lasi; Iesu be edena bamona ia haere henia?

¹⁸ Iesu be ena haheitalai ginigabena, iena haheitalai namba 6 unai, lalonai ia hahedinaraia goevagoeva rabbi taudia edia sene karadia ese Mose Taravatuna ena siahu ia hamanokaia. Ia gwau: “Umui kamonai vadaeni, guna idia gwau, ‘Emui turadia dekenai umui lalokau henia, to badu henia taudia dekenai do umui badu henia.’ To lau ese umui lau hamaoroa, umui dekenai idia badu henia taudia do umui lalokau henia, bona umui dekenai idia dagedage henia taudia dainai umui guriguri.” (Mataio 5:​43, 44) Mose ena Taravatu ia gwau namona be lalokau be taunimanima iboudiai dekenai idia hahedinaraia, ia gwau: “Oiemu dekena tauna oi lalokau henia, oi sibona oi lalokau henia hegeregerena.” (Levitiko 19:18) Farisea taudia ese unai taravatu idia dadaraia, bona ia henunai do idia noho lasi totona idia gwau “dekena tauna” ena anina be sene karadia ia badinaia taudia sibona. Unai hegeregerena, gabeai, Iesu ese ‘oiemu dekena tauna oi lalokau henia, oi sibona oi lalokau henia hegeregerena’ taravatuna be loia tauna ta dekenai ia gwauraia lou neganai, unai loia tauna ia henanadai, ia gwau: “Lauegu badibadinai tauna be daika?” Iesu ia haere neganai, Samaria tauna namona ena parabole ia gwauraia. Ena hereva ena anina be emu heduru do ia abia be namo tauna dekenai oi sibona be ena dekena tauna ai oi halaoa.​—Luka 10:​25-37.

19. Iesu ia gwau namona be dahaka dala ena kara ita tohotohoa, Iehova ese kara dika taudia ia kara henidia dalana unai?

¹⁹ Iesu ia haroro noho lalonai, ia gwau ‘Dirava ese lalokau ia hahedinaraia kara dika taudia dekenai. Ia ese dina ena diari bona medu idia latanai ia siaia. Umui idia lalokau henia taudia bema umui lalokau henidia, unai be hoa gauna lasi. Kara dika taudia danu be unai bamona idia karaia. Unai bamona umui karaia neganai, davana namona umui abia be anina lasi. Namona be umui hahedinaraia umui be Dirava ena natudia. Ia umui tohotohoa. Namona be taunimanima iboudiai edia dekena taudia ai sibona umui halaoa bona emui dekena tauna umui lalokau henia. Unai dala amo “umui be do umui maoromaoro momokani, umui emui Tamana guba dekenai ia noho ia maoromaoro momokani bamona.” ’ (Mataio 5:​45-48) Unai dala ita badinaia be auka herea momokani! Bona ia hahedinaraia taravatu hadibaia taudia bona Farisea taudia edia kara maoromaoro be maoromaoro lasi momokani!

20. Iesu ese Mose ena taravatu ia negea lasi, to edena bamona ena siahu ia habadaia bona taravatu hereadaena ai ia halaoa?

²⁰ Unai dainai Iesu ese Taravatu ena hereva haida ia gwauraia bena ma ia gwau, “To lau ese umui lau hamaoroa” neganai, ia ese Mose Taravatuna ia negea lasi bona ma gau ta be ena gabu ai ia atoa lasi. Lasi, to ia ese Mose taravatuna ena anina ia hahedinaraia dainai, ena siahu ia habadaia. Tadikaka bamona ita noho taravatuna hereadaena hegeregerena, bema tau ta ese ma tau ta ia lalo-dika henia noho, unai be ala-ala karana. Kara goeva taravatu hereadaena hegeregerena, mahuta hebou karana ia laloa momo noho tauna ia heudahanai vadaeni. Headava taravatuna hereadaena hegeregerena, bema tau ta ese ena adavana ia negea kava, ia headava lou neganai, ia heudahanai. Hereva momokani taravatu hereadaena ia hahedinaraia gwauhamata karaia loulou karana be anina lasi. Manau taravatu hereadaena ese dika davana henia lou karana ia dadaraia. Lalokau taravatu hereadaena ena anina be Dirava ena lalokau be taunimanima iboudiai dekenai ita hahedinaraia.

21. Iesu ena sisiba herevadia ese idia hahedinaraia rabbi taudia edia kara maoromaoro be edena bamona, bona taunimanima hutuma be ma dahaka gaudia do idia diba?

²¹ Unai sisiba herevadia be idau momokani, bona nega ginigunana idia kamonaidia taudia idia hoa dikadika! Haida idia kara koikoi, idia gwau rabbi taudia edia sene karadia idia badinaia dainai idia be kara maoromaoro taudia, to edia kara maoromaoro be anina lasi momokani! To Iesu be ororo dekenai ia do haroro noho neganai, kara maoromaoro totona idia hitolo bona idia ranu mase taudia hutuma idia kamonai edena dala amo kara maoromaoro do idia abia diba. Hereva gabena ese unai do ia hahedinaraia.

Henanadai Haida

◻ Dahaka dainai Iuda taudia ese sibona edia sene herevadia idia havaraia?

◻ Iesu ese taravatu hadibaia taudia bona Farisea taudia edia noho bona hanua taudia edia noho edena bamona ia haidaua momokani?

◻ Taravatu hadibaia taudia bona Farisea taudia idia laloa dahaka dala amo Dirava vairanai do idia kara maoromaoro diba?

◻ Iesu ia hahedinaraia sihari kava bona heudahanai amo gini siri dalana be dahaka?

◻ Iesu ese Mose ena Taravatu ena anina ia hahedinaraia dainai, dahaka taravatu hereadaedia ia haginia?

4. (a) Dahaka kara maoromaoro daladia rua idia noho? (b) Sene herevadia idia havaraia dahaka idia karaia totona, bona unai kara idia karaia guguru, a?

8. Dahaka dainai edia lalona ai haida idia henanadai, edia kara maoromaoro ese taravatu hadibaia taudia bona Farisea taudia edia kara maoromaoro edena bamona ia hanaia diba? To dahaka dainai unai bamona ia karaia be gau badana?

12. (a) Iesu be ororo dekenai ia haroro neganai, Heberu Revarevadia ia herevalaia dalana be edena bamona ia haidaua, bona dahaka dainai? (b) Nega namba 6 ai Iesu ia gwau “Guna idia gwau” neganai, dahaka ita diba?