Uduna amo Idia Gwauraia Taravatuna—Dahaka Dainai Idia Torea?
BADINA be dahaka Iesu ena nega lalonai idia noho Iuda taudia momo idia abia dae lasi Iesu be Mesia? Ia vara gauna ia itaia tauna ta be inai bamona ia gwau: “Iesu be Dubu Helaga dekenai ma ia raka vareai, taunimanima ia hadibadia. Vadaeni dubu biagudia bona hanua tau badadia ia dekenai idia lao, idia nanadaia, idia gwau, ‘Edena siahu dekenai inai kara oi karaia, bona inai siahu be daika ia henia oi dekenai, a?’ ” (Mataio 21:23) Edia matana ai, Siahu Ibounai Diravana ese Iuda besena dekenai Torah (Taravatu) ia henia, bona ia amo tatau haida be Dirava ese ia henia siahuna idia abia. Iesu be unai bamona siahu ia abia, a?
Iesu ese Torah bona mai maoro ida siahu idia abia taudia ia matauraia bada. (Mataio 5:17-20; Luka 5:14; 17:14) To nega momo ia ese Dirava ena oda herevadia idia dadaraia taudia ia gwau henia. (Mataio 15:3-9; 23:2-28) Unai bamona taudia ese sene karadia idia badinaia bona unai sene karadia be uduna amo idia gwauraia taravatuna ai idia halaoa. Iesu be unai taravatu ena siahu ia dadaraia. Bona idia momo danu be idia abia dae lasi Iesu be Mesia, bona idia dadaraia. Idia laloa edia bese lalonai dagi bada taudia ese idia gwauraia sene karadia ia abia dae tauna sibona ese Dirava ena lalo-namo ia abia diba.
Unai uduna amo idia gwauraia taravatuna be edeseni amo ia mai? Dahaka dainai Iuda taudia edia lalohadai be unai taravatu be Baibel lalonai idia torea Taravatuna ida ia hegeregere? Bona bema ia be uduna amo idia gwauraia sene taravatudia bamona ia noho, dahaka dainai gabeai idia torea?
Sene Taravatudia be Edeseni amo Idia Mai?
Israela taudia be lagani 1513 B.C.E. ai Sinai Ororona dekenai Iehova ida gwauhamata idia karaia. Mose amo unai gwauhamata ena taravatu idia abia. (Esodo 24:3) Unai taravatu idia badinaia neganai ‘do idia helaga, edia Dirava Iehova ia helaga hegeregerena.’ (Levitiko 11:44) Taravatu gwauhamatana henunai, Dirava ese ia abia hidi helaga taudia ese boubou idia karaia Iehova tomadiho henia totona. Tomadiho gabuna badana do idia abia—Ierusalema dekenai do ia noho dubu helagana.—Deuteronomi 12:5-7; 2 Sivarai 6:4-6.
Mose ena Taravatu ese Israela besena dekenai Iehova tomadiho henia dalana ia gwauraia hedinarai. To, taravatu haida edia kahana maragimaragi ia gwauraia hedinarai lasi. Hegeregere, Taravatu ese Sabati dinana ai gaukara ia taravatua, to ia ese gaukara bona kara ma haida edia idau ia gwauraia hedinarai lasi.—Esodo 20:10.
Bema Iehova ia laloa unai ia karaia be maoro, ia ese taravatu ta ta edia kahana maragimaragi ibounai do ia gwauraia hedinarai. To taunimanima be mai edia lalona ena mamina ida ia havaraia, bona maoro ia henidia idia ese iena taravatu hegeregerena ai idia tomadiho henia neganai, gau haida do idia abia hidi diba. Taravatu ese hahelaga taudia, Levi taudia, bona hahemaoro taudia dekenai hahemaoro gaukarana ia henia. (Deuteronomi 17:8-11) Hahemaoro karadia idia momo idia lao neganai, taravatu haida idia karaia, bona ita daradara lasi, idia haida be uru ta uru ta dekenai idia hanaia lao. Iehova ena dubu dekenai hahelaga taudia edia gaukara ena dala idauidau be tama ese natuna mero dekenai ia hadibaia. Israela besena be nega daudau lalonai ia noho neganai, ena sene karadia danu idia momo herea idia lao.
To, Israela besena ena tomadiho karana ena kahana badana be Mose ese ia abia bona ia torea Taravatuna. Esodo 24:3, 4 ia gwau: “Mose ese Lohiabada ena hereva bona iena taravatu ibounai ia hadibaia taunimanima dekenai. Israela ena taunimanima ibounai be nega tamona idia haere, idia gwau, ‘Ai be Lohiabada ena hereva ibounai do ai karaia.’ Mose ese Lohiabada ena hereva ibounai ia torea.” Unai torea haheganidia amo Dirava ese Israela taudia ida ena gwauhamata ia karaia. (Esodo 34:27) Momokani, Baibel ena siri ta lasi be uduna amo idia gwauraia taravatuna ia gwauraia.
“Inai Siahu be Daika Ia Henia Oi Dekenai, A?”
Mose ena Taravatu ese tomadiho gunalaia bona hadibaia gaukarana be hahelaga taudia, Arona ena bese taudia, edia imana lalonai ia atoa. (Levitiko 10:8-11; Deuteronomi 24:8; 2 Sivarai 26:16-20; Malaki 2:7) To, lagani momo idia hanaia lalonai, hahelaga taudia haida idia gwau-edeede bona kara gageva taudia ai idia lao. (1 Samuela 2:12-17, 22-29; Ieremia 5:31; Malaki 2:8, 9) Greek taudia edia siahu henunai idia noho neganai, hahelaga taudia momo ese tomadiho karadia idia badinaia auka lasi. Lagani 200 B.C.E. murinai, Farisea taudia—Iuda tomadihona lalonai hahelaga taudia idia abidadama henia lasi orea matamatana ta—be sene taravatudia haida idia karaia bona taunimanima ese do idia badinaia neganai idia laloa idia be hahelaga taudia bamona idia helaga danu. Momo ese unai sene taravatudia idia ura henia, to idia be Taravatu ida idia hatamonaia be maoro lasi.—Deuteronomi 4:2; 12:32 (13:1 Iuda Baibel lalodiai).
Farisea taudia be Taravatu diba momo taudia matamatadia ai idia lao, bona idia laloa hahelaga taudia ese edia gaukara idia karaia lasi dainai, idia ese idia karaia. Mose ena Taravatu be idia dekenai siahu ia henia lasi dainai, idia ese Baibel ena anina idia hahedinaraia totona, hunia dala matamatadia idia gaukaralaia bona kara ma haida amo edia hahediba herevadia idia durua.a Idia be unai sene karadia idia naria taudia bona idia hadibaia taudia badadia dainai, idia ese Israela dekenai siahu taudia edia orea matamatana idia havaraia. Iesu ena nega lalonai, Farisea taudia be Iuda tomadihona lalonai siahu bada idia dogoatao vadaeni.
Farisea taudia be uduna amo idia gwauraia sene taravatudia idia gogoa bona Baibel idia tahua sibodia edia sene taravatu idia karaia totona lalonai, idia itaia edia gaukara hagoadaia totona ma gau ta idia karaia be namo. Unai sene herevadia idia vara dalana dekenai lalohadai matamatana idia havaraia. Rabi taudia ese inai idia hadibaia: “Mose ese Sinai dekenai Torah ia abia bona Iosua dekenai ia henia, Iosua amo elda taudia dekenai, bona elda taudia amo peroveta taudia dekenai. Bona peroveta taudia ese orea badana ena tatau dekenai idia henia.”—Avot 1:1, Mishnah.
Idia gwau, “Mose ese Sinai dekenai Torah ia abia” neganai, rabi taudia be torea taravatudia sibona idia gwauraia lasi to uduna amo idia gwauraia sene taravatudia idia gwauraia danu. Idia gwau unai sene taravatudia—taunimanima ese idia havaraia bona idia hadibaia gaudia—be Sinai Ororona dekenai Dirava ese Mose dekenai ia henia. Bona idia hadibaia Dirava ese taunimanima dekenai gwaumaoro ia henia lasi anina idia atoa totona, to ia ese idia torea Taravatuna lalonai idia noho lasi gaudia be uduna amo ia gwauraia hedinarai. Idia gwau, uduna amo idia gwauraia taravatudia be Mose ese hahelaga taudia dekenai ia henia lasi to gunalaia taudia ma haida dekenai ia henia. Farisea taudia idia gwau idia be unai taravatu idia abia taudia korikoridia.
Hekwakwanai Ia Vara Taravatu Dekenai—Hamaoromaoroa Dalana Matamatana
Iesu, ena siahu be Dirava amo ia abia be Iuda tomadiho gunalaia taudia ese idia henanadailaia tauna, be dubu do idia hadikaia ore ia perovetalaia. (Mataio 23:37–24:2) Lagani 70 C.E. ai, Roma ese dubu helaga ia hadikaia ore murinai, Mose ena Taravatu ese ia herevalaia boubou karadia bona hahelaga taudia edia gaukara idia karaia diba lasi. Iesu ena boubou gauna latanai Dirava ese gwauhamata matamatana ia karaia. (Luka 22:20) Mose ena Taravatu gwauhamatana be ia ore.—Heberu 8:7-13.
Idia vara gaudia ese idia hamomokania Iesu be Mesia, to Farisea taudia be unai idia lalo-pararalaia lasi bona dala ma ta idia tahua unai hekwakwanai hamaoromaoroa totona. Idia ese hahelaga taudia edia siahu ena kahana badana idia abia vadaeni. Dubu helaga ia dika ore vadaeni dainai, idia be kara ma ta idia karaia diba. Yavneh dekenai ia noho rabi taudia edia sikuli badana be Sanhedrin—Iuda taudia edia kota badana—ena gabu badana ai idia halaoa. Yohanan ben Zakkai bona Gamaliel Iharuana edia gunalaia henunai, Iuda tomadiho matamatana idia havaraia. Dubu helaga dekenai hahelaga taudia ese idia gunalaia tomadiho karana ena gabu dekenai, rabi taudia ese dubu dekenai hebou idia hakaua. Boubou karana ena gabu dekenai, guriguri idia gwauraia. Unai be Kara Dika Ena Davana Karaia Dinana ai ia hedinarai goevagoeva. Farisea taudia idia gwau uduna amo idia gwauraia taravatuna, Sinai Ororona dekenai Dirava ese Mose dekenai ia henia gauna, ese unai do ia vara ia herevalaia vadaeni bona dalana ia karaia.
Rabi taudia edia sikuli be idia bada idia lao. Edia hadibaia karana badana be uduna amo idia gwauraia taravatuna idia kikilaia hebou, idia laloatao totona idia gwauraia loulou, bona idia gaukaralaia dalana idia herevalaia. Guna, uduna amo idia gwauraia taravatuna ena badina be Baibel ena anina gwauraia hedinarai karana—Midrash—ida ia hegeregere. Gabeai, unai idia haidaua. Idia momo herea idia lao sene karadia be Baibel amo idia hapararaia, bona idia hadibaia bona idia haboua matamaia. Taravatu ena oda herevadia ta ta idia hakwadogia, idia laloatao diba herevadia ai idia torea, bona nega momo ane bamona idia gwauraia.
Dahaka Dainai Uduna amo Idia Gwauraia Taravatuna be Idia Torea
Rabi taudia edia sikuli badadia bona rabi taudia edia taravatu herevadia idia momo idia lao dainai, hekwakwanai matamatana ia vara. Diba momo rabi tauna, Adin Steinsaltz, ia gwau: “Hadibaia taudia ta ta be sibodia mai edia sitaelo bona sibodia edia dala ai uduna amo gwauraia taravatu idia hadibaia. . . . Stiuden tauna be ena hadibaia tauna sibona ena hahediba herevadia ia dibaia be hegeregere lasi, to ia ese diba momo hadibaia taudia ma haida edia hadibaia herevadia do idia dibaia danu . . . ‘Diba be bada herea’ dainai stiuden taudia idia doridia hereva momo herea idia laloatao totona.” Hadibaia herevadia be momo herea bona dala maorona ai idia hadibaia namonamo lasi dainai, stiuden tauna idia doria ela bona kahirakahira ia kavakava.
Lagani 100 C.E. murinai, Bar Kokhba ese Iuda taudia ia gunalaia bona Roma besena idia dagedage henia karana dainai, diba momo rabi taudia idia hahisia bada. Akiba—rabi tauna badana bona Bar Kokhba ia durua tauna—bona diba momo taudia badadia haida idia alaia mase. Rabi taudia idia laloa bema dagedage idia davaria lou, unai ese uduna amo idia gwauraia taravatuna do ia haorea diba. Idia laloa hadibaia tauna ese ena uduna amo sene herevadia be hahediba tauna dekenai ia henia be hadibaia dalana namona, to idia vara hekwakwanai dainai, idia hekwarahi bada aonega bada taudia edia hadibaia herevadia idia haboua namonamo, dika idia boio momokani garina.
Gabeai, Roma ida idia maino sisina negana ai, Judah Ha-Nasi, lagani 200 C.E. ia kahirakahira negana bona unai nega sisina murinai ia noho rabi tauna badana, be diba momo taudia hutuma ia haboudia bona uduna amo idia gwauraia taravatudia momo herea idia torea bona Kahana 6 dekenai idia haboua, kahana ta ta be mai edia kahana maragimaragidia—ibounai be 63. Idia torea gaudia be gabeai idia gwauraia, Mishnah. Ephraim Urbach, uduna amo idia gwauraia taravatuna ia diba momo tauna, ia gwau: “Mishnah . . . dekenai siahu bona hanamoa idia henia. Buka ma ta dekenai unai bamona idia karaia lasi, to Torah sibona dekenai idia karaia.” Mesia idia dadaraia, bona dubu helaga be idia hadikaia ore vaitani, to Mishnah lalonai uduna amo idia gwauraia taravatuna idia torea dainai, Iuda tomadiho dalana matamatana ia vara.
[Footnote]
a Unai dala ai Baibel ena anina idia hahedinaraia karana idia gwauraia midrash.
[Picture on page 26]
Dahaka dainai Iuda taudia momo be Iesu ena siahu idia dadaraia?