Basileia bona Dirava Ena Kara Maoromaoro Umui Tahua Noho

“Iena Basileia bona iena kara maoromaoro do umui tahua guna, vadaeni unai gau ibounai danu umui dohore ia henia.”​—MATAIO 6:33.

1, 2. Taravatu hadibaia taudia bona Farisea taudia ese kara namodia idia karaia neganai edena bamona idia karaia, bona Iesu ese ia idia badinaia taudia dekenai dahaka sisiba ia henia?

TARAVATU hadibaia taudia bona Farisea taudia be sibodia edia lalohadai hegeregerena dala idia tahua idia kara maoromaoro totona, to edia dala be Dirava ena dala lasi. Unai sibona lasi, to kara namodia idia karaia neganai, mai edia koikoi ida idia karaia taunimanima ese do idia itaia totona. Dirava idia hesiai henia lasi, to sibodia edia hekokoroku idia hesiai henia. Iesu ese ena hahediba taudia ia sisiba henidia, unai kara koikoi do idia karaia lasi, ia gwau: “Umui naria namonamo, umui emui bogahisihisi karadia taunimanima edia vairanai umui karaia lasi, idia itaia totona. Bema unai bamona do umui karaia, emui Tamana guba dekenai ia noho dekena amo umui be davana lasi.”​—Mataio 6:1.

² Kohu bona moni be ogogami taudia idia henidia taudia edia kara ese Iehova ia hamoalea​—to Farisea taudia ese kohu bona moni idia henia dalana ia ura henia lasi. Iesu ese ena hahediba taudia ia sisiba henidia, Farisea taudia idia tohotohoa lasi, ia gwau: “Unai dainai, harihari gauna ogogami taudia dekenai umui henia neganai umui emui toana umui hedinaraia lasi mai hekokoroku danu, guriguri koikoi taudia ese dubu dekenai bona hanua ena huanai idia karaia bamona, taunimanima ese idia hanamodia totona. Umui lau hamaoroa momokani, edia davana ibounai idia abia vadaeni.”​—Mataio 6:2.

3. (a) Taravatu hadibaia taudia bona Farisea taudia be edena dala ai edia henia karana ena davana ibounai idia abia? (b) Iesu ese henia karana ia herevalaia neganai ena hereva be edena bamona ia idau?

³ Greek gado ai ‘ibounai idia abia vadaeni’ herevana be a·peʹkho. Nega momo unai hereva be bisinesi receipt pepadia dekenai idia torea. Iesu be ororo dekenai ia haroro neganai, unai hereva amo ia hahedinaraia idia ese “edia davana idia abia vadaeni,” anina be “edia bisinesi pepana idia sainia vadaeni, idia hamomokania edia davana ibounai idia abia vadaeni, bona edia davana idia abia ena badina be maoro, hegeregere bisinesi pepana idia henia vadaeni bamona.” (An Expository Dictionary of New Testament Words, W. E. Vine ese ia torea bukana) Dala dekenai taunimanima vairanai idia gwau ogogami taudia dekenai harihari gaudia do idia henia. Iuda dubudia dekenai idia lao bona harihari gaudia ogogami taudia idia henia taudia edia ladana idia gwauraia hedinarai. Moni momo idia henia taudia idia abia isi totona, tomadiho negana ai rabbi taudia badinai idia helai. Harihari gaudia idia henia taunimanima ese do idia itaia totona; taunimanima ese idia itaia bona idia hanamoa; unai dainai, harihari gaudia idia henia dainai edia davana idia abia, hegeregere edia receipt pepana dekenai “Davana Ibounai Ia Abia Vadaeni” herevana idia torea diba. Iesu ena hereva ia idau momokani! Harihari gauna oi henia neganai, “oi sibona mo oi karaia hunia dala bamona, vadaeni oiemu turana momokani ese danu oiemu henia gauna do ia diba lasi. Vadaeni oiemu Tamana ese oiemu hunia gaudia ia itaia dainai ena davana do ia henia oi.”​—Mataio 6:​3, 4; Hereva Lada-isidia 19:17.

Dirava Idia Hamoalea Guriguridia

4. Badina be dahaka Farisea taudia edia guriguri dainai Iesu ia gwau idia be koikoi taudia?

⁴ Iehova ese ia dekenai idia siaia guriguridia ia moale henidia, to Farisea taudia edia guriguri dalana ia ura henia lasi. Iesu be ena murinai idia raka taudia dekenai ia gwau: “Umui guriguri neganai, koikoi taudia bamona umui karaia lasi, badina be idia ura dubu dekenai bona dala edia huanai idia gini, vadaeni idia guriguri, taunimanima ese idia itaia totona. Umui lau hamaoroa momokani, edia davana ibounai idia abia vadaeni.” (Mataio 6:5) Farisea taudia edia guriguri be momo, dina iboudiai hora idauidau dekenai unai guriguri idia karaia, herevana edeseniai idia noho. Edia taravatu idia gwau, namona be idia be sibona idia noho neganai unai guriguri idia karaia; taunimanima vairanai idia karaia be namo lasi. To mai edia ura danu dala idia karaia edia guriguri negana ia ginidae neganai, idia be “dala edia huanai idia gini,” bona gabu iboudiai dekenai idia raka lao taudia ese idia itaia diba.

5. (a) Farisea taudia ese dahaka kara ma haida idia karaia dainai, Dirava ese edia guriguri ia kamonai henidia lasi? (b) Iesu ese guriguri ia haheitalaia totona guriguri ta ia gwauraia neganai, dahaka gaudia ia gwauraia guna, bona hari inai negai taunimanima ese unai hereva idia badinaia, a?

⁵ Mai edia koikoi ida helaga karana idia hahedinaraia neganai, “taunimanima koia totona guriguri lata herea idia gwauraia.” (Luka 20:47) Sene herevana ta ia gwau: “Helaga taudia gunadia hora tamona idia naria guna, bena murinai Tefillah [guriguri] idia gwauraia.” (Mishnah) Unai dainai, idia guriguri neganai taunimanima iboudiai ese edia helaga toana idia itaia bona idia hanamoa! Unai bamona guriguri be Dirava dekenai idia lao lasi. Iesu ia gwau namona be idia guriguri neganai idia sibona idia noho bona hereva tamona idia gwauraia loulou lasi, bena ia ese guriguri namona bona latana lasi idia dekenai ia gwauraia, guriguri dalana namona ia haheitalaia totona. (Mataio 6:​6-8; Ioane 14:​6, 14; 1 Petero 3:12) Unai guriguri lalonai Iesu ese gau badadia ia gwauraia guna, ia gwau: “Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna . . . do ai karaia.” (Mataio 6:​9-13) Taunimanima momo be Dirava ena ladana idia diba lasi, bona idia ura lasi idia hahelagaia. Unai dala amo Dirava be ladana lasi diravana ta ai idia halaoa. Dirava ena Basileia do ia mai herevana idia gurigurilaia, a? Taunimanima momo idia laloa ia mai vadaeni bona edia lalona ai ia noho. Reana idia guriguri iena ura do idia karaia, to idia momo ese sibodia edia ura idia karaia.​—Hereva Lada-isidia 14:12.

6. Dahaka dainai Iesu ia gwau Iuda taudia edia anivaga karadia be anina lasi?

⁶ Iehova ese anivaga karana ia gwauraia dika lasi​—to Farisea taudia ese anivaga idia karaia dalana ia ura henia lasi. Taravatu hadibaia taudia bona Farisea taudia ese kohu bona moni ogogami taudia idia henidia neganai hegeregerena bona idia guriguri hegeregerena, edia anivaga be anina lasi. Iesu ia gwau: “Aniani umui ania lasi neganai, umui emui vairana dekenai lalohisihisi toana umui hedinaraia lasi guriguri koikoi taudia bamona. Badina be edia vairana dekenai lalohisihisi toana idia atoa, idia hitolo bamona, taunimanima do idia itaia totona. Umui lau hamaoroa momokani, edia davana idia abia vadaeni.” (Mataio 6:16) Edia sene herevadia hegeregerena, Farisea taudia idia anivaga neganai, idia digudigu lasi bona dehoro be edia kopina ai idia atoa lasi, to lahi ena kahu be edia kwarana latanai idia atoa. Idia anivaga lasi neganai, Iuda taudia be nega momo idia digudigu bona edia kopina ai dehoro idia atoa.

7. (a) Idia anivaga neganai, Iesu murinai idia raka taudia ese dahaka idia karaia be namo? (b) Isaia ena nega ai, Iehova ia gwau ia ura anivaga taudia ese dahaka idia karaia?

⁷ Iesu ese anivaga ia herevalaia neganai, ena murinai idia raka taudia ia hamaorodia, ia gwau: “Oiemu kwarana dekenai dehoro do oi atoa, oiemu vairana danu do oi huria. Vadaeni taunimanima be do idia diba lasi oi be aniani oi ania lasi noho, to oiemu Tamana . . . be do ia diba.” (Mataio 6:​17, 18) Isaia ena nega ai, kara dika Iuda taudia ese anivaga, tauanina hahisia karana, kwarana hadihoa karana, bona dabua aukana bona lahi ena kahu dekenai helai karana idia moalelaia bada. To Iehova ena ura be idia ese noho dika taudia edia metau gaudia do idia kokia, hitolo taudia do idia ubua, ruma lasi taudia dekenai ruma do idia henia, bona dabua lasi taudia dekenai dabua do idia henia.​—Isaia 58:​3-7.

Kohu Namo Guba Dekenai Oi Haboua

8. Dahaka gau dainai taravatu hadibaia taudia bona Farisea taudia ese Dirava ena lalo-namo abia dalana idia laloaboio, bona dahaka hereva, gabeai Paulo ese ia gwauraia herevana, idia laloa lasi?

⁸ Farisea taudia ese kara maoromaoro idia tahua neganai, Dirava ena lalo-namo abia dalana idia laloaboio bona dala idia tahua goadagoada taunimanima ese do idia hanamodia totona. Taunimanima edia sene karadia idia laloa momo dainai, Dirava ena Hereva idia negea. Edia kudouna ai idia ura dikadika tanobada dekenai dagi badana idia abia, bona kohu namona guba dekenai idia laloa lasi. Tau ta ese ia torea hereva momokanina ta idia laloa lasi, guna unai tau be Farisea tauna, to gabeai ia be Keristen tauna ai ia lao, ia gwau: “Emui hesiai gaukara ibounai lalonai, mai emui kudouna ibounai do umui karaia. Do umui karaia, ia be tau ta ena gaukara lasi, to Lohiabada ena gaukara umui karaia bamona. Badina be umui diba umui ta ta emui kara dainai Lohiabada ese davana namona umui do ia henia.”​—Kolose 3:​23, 24.

9. Tanobada kohu namodia dekenai dahaka gau dikadia idia vara diba, to dahaka ese kohu namodia momokanidia do ia naridia namonamo?

⁹ Iehova ese oiemu moni banika dekenai ia laloa lasi, to oiemu tomadiho ia dekenai ia laloa. Ia diba oiemu kudouna ai oi laloa bada gauna be oiemu lalokau gauna momokanina. Raraka bona kaubebe ese oiemu lalokau gauna idia hadikaia diba, a? Henaohenao taudia ese kopukopu habadia idia makohia diba bena oiemu lalokau gauna idia henaoa diba, a? Eiava hari inai negai, moni ia goada lasi neganai, kohu edia davana idia bada daekau dainai, oiemu lalokau gauna amo gau momo oi hoia diba lasi, a? Eiava bisinesi oreadia idia moru haraga dainai, oiemu lalokau gauna ia ore momokani diba, a? Raskol karadia idia bada daekau dainai oiemu lalokau gauna do idia henaoa, a? Haere be: Lasi, bema oiemu lalokau gauna be guba dekenai oi atoa. Lasi, bema oiemu matana​—lamepa bamona oiemu tauanina ibounai ia hadiaria gauna​—ia namo, bona Dirava ena Basileia bona ena kara maoromaoro ia raraia noho. Kohu bona moni idia ore haraga diba. “Kohu abia totona oi hekwarahi lasi. Sibona emu lalo-parara dekenai oi tabekau lasi. Ena be kohu be anina lasi gauna, to ia dekenai emu matana oi negea, a? Badina oi itaia negana lalonai do ia boio, kara haraga guba dekenai ia roho daekau ugava bamona.” (Hereva Lada-isidia 23:​4, 5) Unai dainai taga dainai oi mahuta namonamo lasi be anina lasi, ani? “Taga tauna ena kohu momo dainai ia mahuta namonamo diba lasi.” (Kohelete 5:12) Iesu ena sisiba oi laloatao: “Dirava bona kohu momo danu edia hesiai gaukara do oi karaia diba lasi.”​—Mataio 6:​19-24.

Abidadama ese Lalo-Hekwarahi Ia Kokia

10. Dahaka dainai kohu oi abidadama henia lasi to Dirava oi abidadama henia be gau badana, bona Iesu ese dahaka sisiba ia henia?

¹⁰ Iehova ia ura oi ese ia oi abidadama henia bona kohu oi abidadama henia lasi. “Tau ta bema Dirava ia abidadama henia lasi neganai ia hegeregere lasi Dirava ena ura do ia badinaia. Badina be bema tau ta be Dirava kahirakahira ia ura lao neganai, ia ese Dirava ia mauri noho do ia abidadama henia guna. Bona unai tau ena abidadama be inai bamona, Dirava idia tahua taudia ibounai be davana namona Dirava ese do ia henidia.” (Heberu 11:6) Iesu ia gwau: “Taunimanima edia mauri badina be kohu momo dekenai lasi, lasi momokani.” (Luka 12:15) Bema tau ta ena baragi idia gorere eiava ena kudou ia manoka, kina milion momo banika akaun dekenai ese unai tau idia durua diba lasi iena baragi o kudouna do idia gaukara noho totona. Unai dainai, Iesu be ororo dekenai ia haroro neganai, ia hereva noho, ia gwau: “Unai dainai umui lau hamaoroa, mai gari danu umui laloa momo lasi emui noho mauri dekenai, dahaka do umui ania, o dahaka do umui inua, o tauanina ena dabua dekenai. Mauri be gau badana, to aniani be gau maragi, ani? Tauanina ese be dabua ia hanaia, ani?”​—Mataio 6:25.

11. Iesu be dahaka gaudia dekenai ena haheitalai momo ia davaria, bona ia be ororo dekenai ia haroro neganai, unai haheitalai be edena bamona idia hedinarai?

¹¹ Iesu ese parabole ia gaukaralaia nega momo. Gau iboudiai ia itaia neganai, parabole ia laloa. Hahine ta ia itaia, ia ese lamepa ia karaia bona ena gabuna ai ia atoa; vadaeni, Iesu ese ia itaia gauna be haheitalai bamona ia gwauraia. Ia itaia, mamoe naria tauna ta ese mamoe bona nanigosi ia hapararaia; Iesu ese ia itaia gauna be haheitalai bamona ia gwauraia. Natu maragidia ia itaia, idia be maketi gabunai idia gadara; ia itaia gauna be haheitalai bamona ia gwauraia. Bona Iesu be ororo dekenai ia haroro neganai, unai bamona ia karaia. Tauanina gaudia lalo-hekwarahilaia karana ia kikilaia neganai, manu idia rohoroho bona palaoapalaoa be ororo gabunai idia noho bona ia diba unai kara be haheitalai bamona ia gwauraia diba. Manu ese uhe idia hadoa bona ena anina idia utua, a? Lasi. Palaoapalaoa ese dabua idia turia, a? Lasi. Dirava ese unai gaudia ia karaia; ia ese ia naridia. To umui ese manu bona palaoapalaoa umui hanaia. (Mataio 6:​26, 28-30) Iena Natuna ia henia idia ia durua totona lasi, to umui ia durua totona.​—Ioane 3:16.

12. (a) Iesu ese manu bona palaoapalaoa be ena haheitalai lalonai ia gwauraia neganai, ia gwau iena hahediba taudia ese moni gaukara do idia karaia lasi, a? (b) Iesu ena hereva badana moni bona gaukara dekenai be dahaka?

¹² Unai hereva amo Iesu ia gwau lasi ia murinai idia raka taudia be aniani bona dabua idia abia totona moni gaukara do idia karaia lasi. (Kohelete 2:24; Efeso 4:28; 2 Tesalonika 3:​10-12 itaia danu.) Unai negai, siahu sisina negana ai, manu idia gaukara goadagoada, aniani idia tahua, adavana idia tahua, ruma idia haginia, gatoi latanai idia helai, bona edia natudia idia ubudia. Idia gaukara noho, to idia lalo-hekwarahi lasi. Palaoapalaoa danu ese edia ramuna be tano dekenai idia siaia diho, ranu bona muramura namona idia abia totona, bona edia rau idia siaia daekau dina ena diari idia tahua totona. Gau badana be idia tubu, edia palaoapalaoa idia havaraia bona idia do mase lasi neganai edia uhe idia negea. Idia gaukara noho, to idia lalo-hekwarahi lasi. Dirava ese manu bona palaoapalaoa edia mauri durua gaudia ia henidia. ‘Be, ia ese umui dekenai danu mauri durua gaudia do ia henia namonamo lasi, a? Umui abidadama maragimaragi taudia e!’​—Mataio 6:30.

13. (a) Dahaka dainai Iesu ese dala ena daudau ia herevalaia, mauri ena nega halataia dalana ia herevalaia neganai? (b) Oi ese oiemu mauri be edena bamona oi halataia diba kilomita milion momo bamona?

¹³ Unai dainai abidadama oi hahedinaraia. Oi lalo-hekwarahi lasi. Lalo-hekwarahi ese gau ta do ia haidaua lasi. Iesu ia henanadai, ia gwau: “Umui daika be ena laloa hekwarahi dekena amo iena mauri ena nega sisina do ia halataia diba, a?” (Mataio 6:27) To dahaka dainai Iesu ese mauri ena nega be dala ena daudau bamona ia gwauraia? Reana unai ena badina be nega momo Bible ia gwau taunimanima edia mauri be laolao ta bamona, hegeregere ia gwau: “kara kerere taudia edia dala,” “kara maoromaoro taudia edia dala,” “[mase gabuna] ia lao dalana,” bona “mauri gabuna ia lao dalana.” (Salamo 1:1; Hereva Lada-isidia 4:18; Mataio 7:​13, 14) Bema tau ta be dina iboudiai iena mauri idia durua gaudia dainai ia lalo-hekwarahi, unai ese ena mauri nega sisina amo ia halataia diba lasi. To dala ta ia noho dainai oi ese oiemu mauri oi halataia diba, hegeregere emu loaloa gabuna be kilomita milion momo amo oi halataia bamona. Bema oi lalo-hekwarahi bona oi gwau: “Dahaka do ai ania?” o “Dahaka do ai inua?” o “Dahaka dabua do ai atoa?” emu mauri do oi halataia diba lasi, to bema oi abidadama bona Iesu ena hahegani oi badinaia, emu mauri oi halataia diba, ia gwau: “Umui be iena Basileia bona iena kara maoromaoro do umui tahua guna, vadaeni unai gau ibounai danu umui dohore ia henia.”​—Mataio 6:​31-33.

Dirava Ena Basileia bona Iena Kara Maoromaoro Abia Dalana

14. (a) Iesu be ororo dekenai ia haroro neganai ena hereva badana be dahaka? (b) Taravatu hadibaia taudia bona Farisea taudia ese Basileia bona kara maoromaoro idia tahua neganai edena bamona idia kerere?

¹⁴ Iesu be ororo dekenai ia haroro neganai, ena hereva ginigunana ai ia gwau idia diba lauma gaudia idia tahua be namo taudia ese guba Basileiana do idia abia. Ena hereva namba 4 dekenai ia gwau kara maoromaoro idia ura dikadika taudia do idia boga kunu. Unai hereva amo Iesu ia hahedinaraia Basileia bona Iehova ena kara maoromaoro be gau badadia, ma gau iboudiai idia hanaia. Ororo dekenai ia haroro neganai, unai be ena hereva badana. Basileia bona Iehova ena kara maoromaoro dainai, taunimanima ese edia dabu gaudia iboudiai do idia abia. To edena dala amo Dirava ena Basileia bona Dirava ena kara maoromaoro ita davaria diba? Edena dala amo unai gau ita tahudia noho? Taravatu hadibaia taudia bona Farisea taudia be guna idia tahudia dalana amo lasi. Idia ese Basileia bona kara maoromaoro idia tahua Mose ena Taravatu amo, bona idia gwau edia sene herevadia be unai Taravatu lalonai idia noho, badina idia laloa Sinai Ororo dekenai Dirava ese Taravatu bona sene herevadia be Mose ia henia.

15. (a) Iuda taudia edia hereva hegeregerena, edia sene herevadia be edena negai idia hamatamaia, bona idia ese unai sene herevadia be Mose Taravatuna ataiai edena bamona idia abia isi? (b) Momokani, unai sene herevadia be edena negai idia hamatamaia, bona idia dainai Mose Taravatuna dekenai dahaka ia vara?

¹⁵ Unai sene herevadia lalonai ia gwau: “Mose ese Taravatu [henuna hereva, “Uduna amo Idia Gwauraia Taravatuna” unai] be Sinai Ororo dekenai ia abia, bona Iosua dekenai ia gwauraia, bona Iosua be elda taudia dekenai ia henia bona elda taudia be Peroveta taudia dekenai idia henia; bona Peroveta taudia ese Dubu Badana dekenai idia noho tataudia dekenai idia henia.” Nega daudau murinai, edia sene herevadia idia abia isi bona unai hereva idia laloa bada to Taravatu idia laloa maragi: “[Bema] Taravatu ena hereva ia utua, ia kerere lasi,” to bema “Taravatu hadibaia taudia edia hereva [sene herevadia] dekenai ma hereva haida ia atoa kau, ia kerere.” (Mishnah) Edia sene herevadia be Sinai Ororo dekenai idia hamatamaia lasi. Momokani, lagani 200 Iesu ia do vara lasi neganai, unai sene herevadia momo idia haboua. Mose ese ia torea taravatuna dekenai ma hereva haida idia atoa kau bona hereva haida idia kokia bona ena siahu idia haorea.​—Deuteronomi 4:2; 12:32 itaia danu.

16. Taunimanima ese Dirava ena kara maoromaoro edena bamona idia abia diba?

¹⁶ Dirava ena kara maoromaoro be Taravatu amo ia vara lasi: “Dirava vairanai tau ta lasi be maoromaoro Taravatu ia badinaia dekena amo. Lasi, to Taravatu ena gaukara korikori be inai, ia ese taunimanima dekenai ia hadibaia idia be dika vadaeni. Dirava vairanai taunimanima do idia maoromaoro dalana be harihari Dirava ese ia hedinaraia vadaeni. Inai kara maoromaoro dalana be Taravatu badinaia dekena amo lasi, to ia be Taravatu bona peroveta taudia ese idia gwauraia hedinarai gauna dekena amo. Taunimanima be maoromaoro Dirava ena vairanai bema Iesu Keriso idia abidadama henia neganai.” (Roma 3:​20-22) Vadaeni, Dirava ena kara maoromaoro be Iesu Keriso abidadama henia karana amo ia vara​—“Taravatu bona peroveta taudia ese idia gwauraia hedinarai” namonamo gauna be unai. Iesu ese Mesia peroveta herevadia ia hagugurudia. Danu, ia ese Taravatu ia hagugurua; Taravatu pepana be iena satauro dekenai idia kokoa dainai, Taravatu idia abia oho.​—Luka 24:​25-27, 44-46; Kolose 2:​13, 14; Heberu 10:1.

17. Paulo ena hereva hegeregerena, Iuda taudia be edena dala ai Dirava ena kara maoromaoro idia diba lasi?

¹⁷ Unai dainai aposetolo Paulo ia hahedinaraia Iuda taudia ese kara maoromaoro idia tahua to idia davaria lasi. Ia gwau: “Lau diba idia ese Dirava ena hesiai gaukara idia ura karaia namonamo, to karaia dalana be idia diba lasi. Dirava ese taunimanima ia gwauraidia maoromaoro ia vairanai dalana be idia badinaia lasi, to idia sibona ese unai maoromaoro dalana idia tahua. Unai dainai Dirava ena dala idia abia dae lasi. Badina be Keriso ia mai dainai, sibodia edia goada dekenai Taravatu badinaia karana dekena amo maoromaoro idia tahua dalana be ia doko. Unai Dirava vairanai maoromaorona be Iesu abidadama henia taudia sibona idia abia.” (Roma 10:​2-4) Danu, Paulo ese Keriso Iesu ia herevalaia, ia gwau: “Keriso be kara dika lasi momokani, to Dirava ese tau dikana ia halaoa ita dainai. Vadaeni bema Keriso lalonai ita noho neganai Dirava ena kara maoromaoro do ita abia.”​—2 Korinto 5:21.

18. Edia sene herevadia idia badinaia Iuda taudia, Greek aonega taudia bona “Dirava ena boiboi [idia] kamonai henia taudia” ese “Keriso idia hasatauroa” sivaraina edena bamona idia lalohadailaia?

¹⁸ Iuda taudia edia lalohadai be ia mase Mesia tauna ia manoka momokani. Greek aonega taudia ese unai bamona Mesia idia kirikirilaia, idia gwau ia be kavakava dalana ta. To, Paulo ena hereva be momokani, ia gwau: “Iuda taudia be idia ura bada toa karadia idia itaia, bona Helene taudia idia ura bada aonega idia davaria. To ai ese Keriso idia hasatauroa ai harorolaia noho. Inai hereva ese Iuda taudia ia habadua. Bona Helene taudia idia laloa inai hereva be kavakava. To ita, Dirava ena boiboi ita kamonai henia taudia, Iuda taudia bona Iuda lasi taudia danu, ita diba Keriso be Dirava ena siahu, bona Dirava ena aonega.” (1 Korinto 1:​22-25) Iesu Keriso amo Dirava ena siahu bona aonega idia hedinarai bona ia ena amo kamonai taudia ese kara maoromaoro bona mauri hanaihanai idia abia diba. “Hahemauri be ia sibona ese ia henia diba. Badina be tanobada ibounai lalonai ladana idauna ta Dirava ese ia henia lasi, ita do ia hamauria totona.”​—Kara 4:12.

19. Hereva gabena ese dahaka do ia hahedinaraia?

¹⁹ Hereva gabena do ia hahedinaraia, bema ita ura do ita mase hanaihanai lasi bona mauri hanaihanai do ita abia, gau badana be Dirava ena Basileia bona iena kara maoromaoro ita tahua noho. Unai do ita karaia totona, Iesu ena hereva ita kamonai henidia sibona lasi, to danu ita badinadia.

Henanadai Haida

◻ Iuda tomadiho taudia ese harihari gaudia be ogogami taudia idia henidia neganai, idia guriguri neganai, bona idia anivaga neganai, edena bamona idia karaia?

◻ Namona be oiemu kohu namodia edeseniai oi haboua dika do idia davaria lasi totona?

◻ Dahaka dainai aniani, inuinu bona dabua dainai ita lalo-hekwarahi momo be namo lasi?

◻ Iuda taudia ese dahaka hereva koikoi idia halasia edia sene herevadia edia hamatamaia dalana idia hamomokania toho neganai?

◻ Dirava ena Basileia bona iena kara maoromaoro be edena dala amo idia vara?

[Picture on page 18]

Farisea taudia idia ura dala edia huanai idia guriguri taunimanima ese idia idia itaia totona