Sivarai Gwauhamata Tanona Amo

Samaria​—Mirigini Kahana Hanua Badadia Edia Hanua Badana

BABULONO, Nineve, bona Roma. Bible torea negana lalonai idia be basileia ta ta edia hanua badadia. To, Bible ena sivarai lalonai, mai anina bada hanua badana be Ierusalem sibona lasi, Samaria danu be hanua badana. Lagani 200 bamona lalodiai, Samaria be Israel ena basileia 10 edia hanua badana, bona peroveta hereva momo be mai anina ia dekenai. To, Samaria ena sivarai oi diba, a? Bona dahaka dainai idia gwau ia be mirigini kahana hanua badadia edia hanua badana?

Mapu oi itaia, idau negai ia vara sivaraina mani oi laloa. Israel ena basileia 10 be Iehova ena pavapava bona ena dubu Ierusalem dekenai idia dadaraia murinai, Ieroboam, mirigini kahana basileia ia haginia tauna unai, be nega sisina lalonai Sekema dekena amo ia lohia, unai be ororo dekenai, mirigini kahana ia lao diho kahana ena dala dekenai. Gabeai, Ieroboam ese ena hanua badana ia karaia Tirisa dekenai, unai be Wadi Far‛ah dekenai. Ioridane Kourana amo dala ta ia lao Tirisa dekenai bena ma ia lao ela bona ororo ena dala dekenai ia ginidae. Nadab, Baasa, Elaha, Simiri, bona Omri danu edia lohia negana lalonai, Tirisa be basileia 10 edia hanua badana; unai oi diba, a?​—Genese 12:​5-9; 33:​17, 18; 1 Hanua Pavapavadia 12:​20, 25, 27; 14:17; 16:​6, 15, 22.

To, lagani 6 murinai, Omri ese hanua badana matamatana ta ia haginia. Edeseniai? Mapu dekenai oi itaia, lauri kahana ororona ia hoia, unai be Samaria. (1 Hanua Pavapavadia 16:​23-28) Hari, ororo toana ia idau sisina badina idia geia aniani idia tubu totona, to reana Omri ese unai ororo ia ura henia badina ororo dorinai tano ia palakapalaka bona unai amo tuari taudia idia koua be auka lasi. Iena natuna Ahaba be Samaria haginia gaukarana ma ia karaia, magu badadia ia haginidia hanua ia hagoadaia totona. Danu, ia ese dubu ta ia haginia Baal totona, bona pavapava ena ruma ia haginia ia bona ena Foenike adavana Iesebel totona. Nega daudau murinai, tano idia geia neganai Ahaba ena ruma idia davaria, rau kahana oi itaia. Sivarai amo ia hedinarai unai pavapava rumana dekenai davana bada gaudia idia noho bona kara dika karadia momo idia karaia. (1 Hanua Pavapavadia 16:​29-33) Namona be inai oi laloa: peroveta tauna, Elia, be unai ororo dekenai ia daekau bona dala badana dekenai ia raka lao pavapava ena ruma dekenai, bona unuseniai Ahaba ese ia haginia Baal tomadiho ena kara dikana dainai Elia ese hahemaoro herevana ia gwauraia.​—1 Hanua Pavapavadia 17:1.

Lagani 1910 lalonai tano idia geia taudia be uro mai edia toretore idia davaria, unai toretore dekenai uaina bona olive-oiela hida idia abia eiava idia henia takisi monina idia torea. To edia ladana momo lalonai baʹal idia torea. Danu, inai oi laloa, tano idia geia taudia be aivori momoruna idia davaria, laulau oi itaia. Inai oi laloatao, 1 Hanua Pavapavadia 22:39 dekenai ia gwau Ahaba be “aivori rumana” ia haginia. Reana ruma ena kohu dekenai aivori idia atoa kau, badina lagani 100 unai nega murinai, peroveta tauna Amos ese edia “aivori patadia” namodia ia herevalaia. (Amos 3:​12, 15; 6:​1, 4) Unai aivori dekenai Aigupito taudia edia kaivakuku mai edia apena bona ma gau haida idia koroa.

Ahaba bona Iesebel edia ladana ai torea dainai, reana oi ese edia mase dalana oi laloatao. Ahaba ese ena mauri ia haboioa Suria ia tuari henia neganai. Iena kariota idia huria “Samaria ena gohu badinai . . . bena sisia ese iena rara idia demaria,” Elia ese ia gwauraia peroveta herevana hegeregerena. (1 Hanua Pavapavadia 21:19; 22:​34-38) Pavapava Hahine Iesebel be ruma ena atai uindo dekena amo idia negea diho dainai ia mase. Unai be Samaria dekenai ia noho rumana, a? Lasi. Ahaba ena ruma badana ma ta ia noho Iesrele kourana dekenai. Ia ese Naboto ena vine umana ia mataganigani henia. Iena ruma lata hereana dekena amo gima taudia ese dina ia daekau kahana amo idia raraia neganai, Iehu be koura dekenai ia heau mai idia itaia diba. Bona unai ruma dekena amo guna Samaria ena pavapava hahinena idia negea diho bona ena rara be tano dekenai ia moru, ena mase be namo lasi to ia mase be maoro.​—1 Hanua Pavapavadia 21:​1-16; 2 Hanua Pavapavadia 9:​14-37.

Ena be Samaria be do hanua badana, to Dirava ia ura henia lasi bona ia hanamoa lasi. Samaria ese Dirava ena hanua badana diho kahana dekenai, Ierusalem, ia dagedage henia. Samaria ena lohia taudia bona hanua taudia be kaivakuku idia tomadiho henia, idia heudahanai, bona Dirava ena taravatu idia hamakohia dainai, Iehova ese peroveta taudia momo ia siaidia iena hahemaoro idia dekenai idia gwauraia totona, to idia kamonai lasi. (Isaia 9:9; 10:11; Esekiel 23:​4-10; Hosea 7:1; 10:5; Amos 3:9; 8:14; Mika 1:​1, 6) Unai dainai lagani 740 B.C.E. ai, Samaria ese davana dikana ia abia, Asuria taudia ese idia hadikaia ore. Ena taunimanima momo be igui hesiai dekenai idia laohaia, bona idau bese taudia be edia gabu dekenai idia atoa.​—2 Hanua Pavapavadia 17:​1-6, 22-24.

Gabeai, Heroda Badana ena nega lalonai, Greek bona Roma taudia be Samaria idia durua hanua badana ai ma ia lao totona. Unai dainai Iesu bona aposetolo taudia danu be unai mirigini kahana hanua badadia edia hanua badana idia diba.​—Luka 17:11; Ioane 4:4.

[Map on page 10]

(For fully formatted text, see publication)

Jezreel

Tirzah

Samaria

Shechem

Jerusalem

Jordan River

[Credit Line]

Based on a map copyrighted by Pictorial Archive (Near Eastern History) Est. and Survey of Israel.

[Picture Credit Line on page 10]

Pictorial Archive (Near Eastern History) Est.

[Picture Credit Lines on page 11]

Pictorial Archive (Near Eastern History) Est.

Garo Nalbandian

Inset: Israel Department of Antiquities and Museums; photograph from Israel Museum, Jerusalem