Basileia Haroro Ripoti
Bible ena Hereva Momokani ese Sene Karadia Ia Halusidia
TOMADIHO ena sene karadia be nega daudau idia noho goada diba. Taunimanima milion momo idia laloa tomadiho haidaua karana be kerere. Saulo, gabeai aposetolo Paulo ai ia lao, be guna unai bamona ia laloa danu, badina ia gwau: “Lauegu bese Iuda taudia edia huanai, lauegu mauri lagani hegeregere taudia edia huanai lau be hereadae guriguri karadia dekenai. Bona aiemai sene karadia danu lau goadalaia dikadika, haida bamona lasi.” To hereva momokani idia hadibaia murinai, ia ese Iuda tomadiho ia rakatania bona Keristen tauna ai ia lao. (Galatia 1:13-16) Hari inai negai, taunimanima momo idia diba Bible ena hereva momokani be sene karadia ia hereaia badina badana ta amo ia mai. Italy dekenai, Bible ena hereva momokani ia kwalimu dalana, mani oi laloa.
Hahine ta ia gwau: “Aiemai ruma bese be Katolik taudia bona lauegu taihu bona lau be unai dubu ena sene karadia dekenai ai goada, bona ai be Katolik tomadiho goada taudia. Nega ia lao murinai, lau headava. Bena lauegu tau ia mase, bona lagani momo lalodiai, lauegu natudia danu sibona lau noho vabu ta bamona. Lauegu taihuna ena natuna kekeni ese dubu ena hahegani ia hadibaia, bona ia ese pris dekenai Bible henanadai momo ia henia, to haere namodia ia abia lasi.
“Lauegu hanua lau vadivadi henia neganai, lau be nega ginigunana ai Iehova ena Witness taudia lau davaria bona Bible stadi lau abia. Lauegu Katolik turadia ibounai be lau idia hevaseha henia badina Bible lau stadilaia dainai. To, lau idia koua lasi. Nega ginigunana ai, Bible lau abia lauegu, bona ta ese ia kokia diba lasi. Lauegu tadina danu be Iehova ena kahana dekenai ia gini, bona lagani rua idia do hanai lasi lalonai, ai ruaosi ai bapatiso.
“Lau be dubu lau rakatania neganai, lau tai badina lagani 76 lalonai, dubu ena sene karadia lau negea totona lau gari. To hari lau moale Iehova ena dala dekenai lau raka bona ma haida lau durudia lauma dalana dekenai ena dibura idia rakatania totona!”—1 Petero 2:9 danu hahegeregerea.
Huina Pakosia Tauna ese Lalohadai Kerere Ia Hamaoromaoroa
Japan dekenai, huina pakosia tauna ta be taunimanima edia huina ia pakosia neganai ia ura bada demoni bona UFO edia sivarai ia kikilaia. To, Bible ia stadilaia murinai, ia diba unai bamona herevahereva be dika ia havaraia diba. Unai dainai, edia huina ia pakosia taudia ia nanadaia bema idia ura iena Bible stadi dekenai idia helai. Ia be matamata taudia momo dekenai gau ibounai havaraia karana ia harorolaia. Wiki iboudiai, ia ese ia dekenai ia stadi henia Witness tauna amo, Bible bona Mauri Hanaihanai Paradaiso Lalonai buka momo ia oda karaia, ia be edia huina ia pakosia taudia ia henidia totona.
Ena be ia be Witness tauna lasi, ia be lagani ginigunana ia stadi neganai, Bible bona Mauri Hanaihanai bukadia 30 mai kahana ia henia. Ia be unai dala idauna ai ia haroro dainai, taunimanima 25 bona ma haida be Bible idia stadi hamatamaia. Nega haida taunimanima 10 be iena gurupu ena Bible stadi dekenai idia helai. Edia huina ia pakosia bona ia haroro henidia taudia 7 be edia lalohadai kerere ia hamaoromaorodia bona hari idia be Iehova ena bapatiso Witness taudia!