‘Mamoe Natuna ida Ia Kwalimu’ Karana Ia Moalelaia
LAGANI 1971 ai Carey W. Barber be revareva ta ia torea, bona ia ese lagani 1921 ia lao 1971 lalonai Dirava ia hesiai henia ena sivarai ia herevalaia, ia gwau: “Lagani 50 lalodiai, lau ese Iehova ena hesiai gaukara lau moalelaia. Iehova ena taunimanima lau bamoa; Ia ese Satani ena taunimanima dikadia huanai lau ia gimaia; lau ura Mamoe Natuna, Iesu Keriso, ida lau kwalimu; bona gau momo amo lau hamomokania Iehova be lalokau Diravana dainai, lau moale bona noho namonamo sibona lasi, to egu kudouna ia gimaia bona lau naria ela bona Mamoe Natuna ida lau kwalimu.”
Lagani 1977 ai, Tadikaka Barber be Iehova ena Witnes taudia edia Hakaua Oreana tauna ta ai ia lao. Lagani 30 lalonai, unai horoa tadikakana be Hakaua Oreana ida ia gaukara hebou, bona ‘Mamoe Natuna ida ia kwalimu’ negana ia naria noho. Unai hereva ia hagugurua badina ia be Iehova ia hesiai henia ela bona Sunday, April 8, 2007 ai ia mase, ena mauri lagani be 101.—1 Korinto 15:57.
Lagani 1905 ai, Carey Barber be England dekenai ia vara, bona lagani 1921 ai, Winnipeg, Canada dekenai ia bapatiso. Lagani rua murinai, ia bona ena kakana, Norman be Brooklyn, New York dekenai idia lao gaukara matamatana ta idia durua totona. Unai nega ai, Iehova ena Witnes taudia be edia buka idia karaia matamaia, unai amo Basileia ena sivarai namona be “tanobada ibounai dekenai do idia harorolaia.” (Mataio 24:14) Matamanai, Tadikaka Barber ena gaukara be pepapepa printaia masini ia gaukaralaia. Unai masini amo kota dekenai idia gaukaralaia diba pepadia idia printaia danu, United States ena Suprim Kota dekenai idia abia lao totona. Gabeai, Tadikaka Barber be Haroro Naria Dipatmen dekenai ia gaukara, bona unai dipatmen be kongrigeisen bona tano ma haida dekenai idia karaia haroro gaukarana ia naria.
Tadikaka Barber be unai gaukara ia diba namonamo dainai, lagani 1948 ai, loaloa naria gaukara ia karaia—United States ena west kahanai idia noho kongrigeisen bona hebouhebou idauidau ia vadivadi henia. Tadikaka Barber ia gwau, haroro gaukara be ia moalelaia bada. Unai dainai, tadikaka taihu momo be ia idia diba. Ia be laloparara haraga tauna bona haroro goadagoada tauna dainai, gabeai Gilead Sikuli ena klas namba 26 ia lao neganai, unai gaudia ese ia idia durua. Unai sikuli lalonai, tadikaka be Canada taihu ta ladana, Sydney Lee Brewer ida ia hebamo. Gilead gradueisen murinai, ia bona unai taihu idia headava, bena idia lao Chicago, Illinois dekenai kongrigeisen haida idia durua totona. Lagani 20 lalonai, taihu Barber be ena adavana ida loaloa naria gaukara idia karaia, bona nega ibounai ena tau ia durua namo herea.
Tadikaka Barber be lagani momo lalonai distrik bona sekit gaukara ia karaia, bona lagani 30 lalonai Hakaua Oreana ena gaukara ia karaia bona loaloa gaukara ia karaia neganai, ia be tok bona hagoadaia hereva namodia momo ia henia—ia idia hedavari henia bona dibaia taudia momo be unai do idia laloaboio lasi. Momokani, ita gwau diba Tadikaka Barber ese ‘Mamoe Natuna ida ia kwalimu’ karana ia moalelaia be maoro.