“Mauri Namona Idia Ura Henia Taudia” Distrik Hebouhebou Dekenai Oi Lao!
DINA TOI lalonai Bible ena diba do oi kamonai henia. Namona be hebouhebou be 10:20 Friday dabai ia matamaia bona miusik idia karaia neganai oi mai bona oi helai. Hereva ginigunana, “Dahaka Dainai Kara Dika Ena Siahu amo Ita Ia Ruhaia Taravatu Namona bona Goevadaena Ita Itaia Namonamo?” bona daba ena hereva dokona, hebouhebou ena hereva kwarana: “Dirava ese Ita Ia Henia Mauri Namona Ena Badina bona Ita Gaukaralaia Dalana,” edia hereva do oi moalelaia.
Friday adorahi, Keristen taudia be sisiba do idia abia edia hesiai gaukara Dirava dekenai idia hagugurua totona. “Oi Bisi Mase Karadia Dekenai Eiava Oi Bisi Iehova Ena Hesiai Gaukara Dekenai?” bona “Mauri Namona Besena to Mai Edia Maduna” be hereva badadia rua. Dabua idauna dekenai drama do idia karaia bona unai ese ita do ia hagoadaia iseda mauri namona ita gaukaralaia Iehova ita hesiai henia totona. Unai drama ese Esera bona iena turadia, 468 B.C.E. ai, Babulono amo Ierusalem idia giroa lao, Dirava ena dubu idia hahairaia totona ena sivarai do ia hahedinaraia.
Saturday dabai, hereva toi dekenai “Mauri Namona Abia Taudia Edia Maduna Ruma Bese Lalonai” do idia herevalaia. Keristen gwauhamata bona bapatiso ia gwauraia herevana, “Iehova Hesiai Henia Totona Oiemu Dala Oi Kehoa Noho” ese iseda lalona do ia tahua. Adorahi ai, momo do idia naria “Headava ese Ita Do Ia Hamoalea, A?” ena hereva idia kamonai totona. Adorahi kahana ena hereva dokona ese mauri namona idia ura henia taudia do ia moalelaia bada gauna ta do ia hahedinaraia.
Do oi ura Sunday dabai, hereva toi dekenai inai hereva, “Taunimanima Haoda Henia Gaukarana,” do oi kamonai. Unai ese Iesu ena parabole herevana, reke bona gwarume dekenai, bona iseda gaukara ita hagugurua totona, do ia herevalaia. Daba kahana ia hadokoa hereva badadia rua be “ ‘Nega Dokona Lalonai’ Oi Noga Noho” bona “Daika be ‘Hekwakwanai Negana’ amo Do Ia Roho Mauri?” Bena adorahi lalonai, do oi ura lasi reaia gauna be inai pablik tok, “Dirava Ia Havaraia Tanobada Matamatana Mai Ena Mauri Namona Ita Hanamoa!” Hereva dokona ena hagoadaia herevana idia do henia lasi neganai, unai wiki ena Gima Kohorona stadi herevana do idia herevalaia. Unai wiki gauna ena magasin oi mailaia be namo.
September, 1991 ia lao February, 1992 lalonai, Australia, New Zealand, bona Papua New Guinea dekenai, hebouhebou 47 do idia karaia, unai dainai oiemu kahirakahira ai ta do idia karaia. Oiemu gabu dekenai idia noho Iehova ena Witness taudia dekenai oi henanadai oiemu gabu dekenai idia karaia hebouhebou ena nega oi diba totona.