Keristen Hesiai Gaukara Ena Herevahereva Heheni Karana

“Do umui lao, bese ibounai be diba tahua taudia do umui halaoa.”​—MATAIO 28:19.

1. Keriso ese ita ia henia gaukarana lalonai dahaka dainai taunimanima danu ita herevahereva heheni be gau badana?

IESU ese ita ia henia gaukarana be atai siri dekenai ia hedinarai, bona ruma ta ruma ta dekenai ita lao haroro, lou-henia ita karaia, bona Basileia ena hesiai gaukara ibounai ita karaia neganai, ita ura taunimanima danu ita herevahereva heheni namonamo. Ita ia henia gaukara ena maduna ta be Iehova Dirava, Iesu Keriso, bona Mesia ena Basileia, hari Iesu ese ia lohiaia gauna unai, ena hereva momokani ita harorolaia.​—Mataio 25:​31-33.

2. Taunimanima danu ita herevahereva heheni namonamo totona, ita dekenai dahaka ia noho be namo?

² Ita herevahereva heheni namonamo diba dalana be dahaka? Gau ginigunana be ita herevalaia sivaraina ita abia dae momokani. Unai anina be ita abidadama Iehova sibona be Dirava momokanina, Bible be Dirava ena Hereva, bona Dirava ena Basileia sibona ese taunimanima ia hamauridia diba. Unai dala amo, taunimanima be iseda kudouna amo ita hadibaia diba, bona Paulo ena sisiba Timoteo dekenai do ita badinaia, ia gwau: “Do oi gaukara goada, vadaeni gaukara namona tauna do oi lao, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi.”​—2 Timoteo 2:15.

Hereva Lasi To Diba Henia Karana

3-5. (a) Ena be ita hereva lasi, to edena dala amo taunimanima dekenai gau ta ita hadibaia diba? (b) Edena sivarai ese unai idia hamomokania?

³ Nega momo taunimanima ta hadibaia totona ita hereva henia. To, taunimanima ita do hereva henidia lasi neganai, gau haida idia dekenai ita hadibaia vadaeni. Edena bamona? Iseda gini bona iseda dabua bona iseda iduari toana amo. Lagani momo gunanai, Watchtower Bible School of Gilead ena misinari tauna ta be bouti amo ia lao idau tanobada dekenai haroro gaukara ia karaia totona. Davara dekenai idia heau ena dina haida murinai, ia diba lasi tauna ia mai bona ia nanadaia dahaka dainai bouti dekenai idia noho taudia ibounai amo ia be idau. Unai misinari tauna ese gau namona ia hahedinaraia​—ia badinaia mauri taravatudia idia idau bona unai tau ena lalona ia veria ia hereva henia totona​—iena dabua bona kara toana ia namo dainai. Unai tau ena henanadai dainai misinari tauna ese ia dekenai haroro herevana ia henia diba.

⁴ Danu, taihu ta be dala dekenai ia gini bona taunimanima idia hanai neganai Bible durua bukadia ia hariharilaia, bona hahine ta be ia kahirakahira ia mai neganai mai moale danu ia kiri henia. Unai hahine be train gabuna dekenai ia lao. To ena lalona ia haidaua bona ia giroa lao taihu dekenai, bona ia gwau ia ura Bible stadi ia abia. Dahaka ese ena lalona ia veria? Ena be taihu be dala dekenai ia haroro neganai ia ese Bible durua bukana ta unai hahine ia henia toho lasi, to mai moale danu ia kiri henia sibona, unai ese ena lalona ia veria.

⁵ Haheitalai ihatoina be inai: Witness memero kekeni haida be aniani rumana dekenai idia aniani neganai, idia hoa badina idia diba lasi tauna ta ia mai bona edia aniani davana ia karaia. Dahaka dainai unai bamona ia karaia? Edia kara toana dainai ia moale. Unai Keristen memero kekeni be unai tau idia diba lasi bona idia hereva henia lasi, to edia kara dainai idia hahedinaraia idia be Dirava garina idia gari taudia. Momokani, ena be ita hereva lasi, to iseda kara, iseda toana, bona iseda moale toana amo taunimanima dekenai gau ta ita hadibaia.​—1 Petero 3:​1, 2 oi itaia.

Herevahereva Heheni Namonamo Totona Gau Haida Edia Anina Ita Tahua Hebou

6. Herevahereva heheni namonamo totona, dahaka dainai ita hereva henia tauna danu unai hereva ena anina ita tahua be gau badana oi hahedinaraia.

⁶ Hereva dekena amo sivarai namona taunimanima dekenai ita herevalaia totona, namo lasi ita hereva auka idia ese iseda hereva idia abia dae kava totona, to idia danu ita herevahereva heheni hereva ena anina idia lalo-pararalaia totona. Bible dekenai nega momo ia gwau Paulo ese sivarai namona ia harorolaia neganai, taunimanima danu ia herevahereva heheni anina ia hedinarai totona. (Kara 17:​2, 17; 18:19) Iena haheitalai namona be edena bamona ita tohotohoa diba? Tanobada dekenai kara dika ia bada ia lao dainai, reana taunimanima haida idia daradara, idia laloa siahu bada bona lalokau Diravana ia noho lasi bona taunimanima ia lalodia lasi. To, idia diba maoro totona, idia ita hadibaia Dirava be mai ena nega gau ibounai ia hamaoromaoroa totona. (Kohelete 3:​1-8) Unai dainai, Galatia 4:4 lalonai ia gwau nega korikori dekenai Dirava ese ena Natuna be tanobada dekenai ia siaia. Lagani tausen momo gunanai ia gwauhamata unai bamona do ia karaia. Unai hegeregerena, nega korikori dekenai ia ese hisihisi bona kara dika ibounai do ia haorea. Ma danu, Dirava ena Hereva lalonai, ia hahedinaraia Dirava ese kara dika ia haheaukalaia daudau be mai ena badina. (Esodo 9:16 oi itaia.) Taunimanima danu ita herevahereva heheni neganai, bona iseda hereva hamomokania totona Bible ena hereva bona haheitalai ita gwauraia hedinarai neganai, kudou-maoro taudia dekenai diba ita henia. Unai bamona ita karaia neganai do idia lalo-parara bona do idia gwau lasi kara dika ia bada ia lao badina Iehova ia noho lasi, bona danu do idia gwau lasi Iehova ia ura lasi taunimanima ia durudia.​—Roma 9:​14-18.

7, 8. Orthodox Iuda tauna ta danu ita herevahereva heheni neganai, edena bamona ena lalona ita veria diba iseda hereva ena anina ia laloa namonamo totona?

⁷ Ruma ta ruma ta gaukara oi karaia neganai, bema ruma tauna oi dekenai ia gwau: “Lau be Iuda tauna. Lau ura lasi oiemu hereva lau kamonai.” Dahaka do oi hereva diba? Tadikaka ta be ia kwalimu inai bamona ia hereva neganai, ia gwau: ‘Dirava ese ia gaukaralaia peroveta taudia iboudiai amo Mose be tau badana bona lau laloa oi ese unai hereva oi hamomokania, ani? Bona oi diba eiava lasi, Dirava be Deuteronomi 31:29 dekenai ia gwau: “Lau diba, do lau mase murinai umui dekenai . . . lau hagania daladia do umui rakatania; bona dina gabeai dika umui dekenai do ia vara”? Mose be peroveta momokani tauna, unai dainai iena hereva do ia guguru. Oi laloa iena hereva ia guguru Dirava ese Mesia Iuda taudia dekenai ia siaia neganai, bena Iuda taudia ese idia dadaraia, a? Reana unai bamona ia vara. Bema unai hereva ia momokani bona idia kerere, namo lasi oi bona lau be unai kerere ma ita karaia, ani?’

⁸ Danu, inai oi laloatao, lagani 1900 amo ia mai hari Iuda taudia be Kerisendom dekena amo hisihisi bada idia davaria. Unai dainai, namona be ruma tauna oi hadibaia Iehova ena Witness taudia be unai kara dekenai idia vareai lasi. Hegeregere oi gwau diba: ‘Hitler be siahu ia abia neganai, ia gwau taunimanima be Iuda taudia do idia dadaraia, to Iehova ena Witness taudia be iena hereva idia badinaia lasi; unai oi diba, a? Idia be “Hitler Hanamoa” karana idia karaia lasi bona iena ami lalonai idia vareai lasi.’a

9, 10. Hel ena lahi hahediba hereva ia abia dae tauna ita herevahereva heheni neganai, edena bamona ena lalona ita veria unai hereva ena anina momokani ia abia totona?

⁹ Hel ena lahi ena hahediba hereva ia abia dae tauna danu umui herevahereva neganai, diba maorona ia abia totona inai bamona oi gwau diba: bema taunimanima ta be hishisi mamina do ia abia ela bona hanaihanai, unai anina be mase diba lasi maurina ta ia abia. Hel ena lahi ena hahediba hereva ia abia dae tauna ese oiemu hereva do ia hamomokania. Unai neganai, namona be Adam bona Eva idia vara sivaraina do oi kikilaia bona mai emu manau danu do oi nanadaia unai sivarai lalonai ia gwau idia be mai edia mase diba lasi maurina ta eiava lasi. Oi hereva noho lalonai, namona be ena lalona oi veria Genese 2:7 ena hereva ia laloa totona, unuseniai Bible ia gwau Adam be mauri tauna ai ia lao. Bona inai oi laloatao, Adam ena kara dika dainai dahaka do ia vara ia gwauraia neganai, Dirava ia gwau: “Do oi varahu bona do oi gaukara auka tano ena anina abia totona. Ia lao bona tano dekenai do oi giroa lou, badina be tano dekena amo oi mai. Oi be tano dekenai karaia gauna, bona tano dekenai do oi giroa lou.” (Genese 3:19) Unai dainai, mauri tauna Adam be tano dekenai ia giroa lou.

¹⁰ Danu, ia diba totona oi hadibaia Genese ena sivarai lalonai, Dirava ese hel ena lahi dekenai hisihisi ania hanaihanai karana ia gwauraia lasi. Dirava ese Adam ia hagania taravatu auna dekena amo au huahua ia aniani lasi totona, ia gwau: “Inai huahua oi ania dina dekenai do oi mase momokani.” (Genese 2:17) Hel ena lahi ia gwauraia lasi! Bema Adam ia kara dika ena davana be mase lasi, bona ‘tano dekenai ia giroa lou’ lasi, to hisihisi ela bona hanaihanai ia ania, Dirava be hahemaoro maoromaoro Diravana dainai ia ese Adam dekenai unai bamona ia hahedinaraia goevagoeva, ani? Unai dainai, dala maoromaoro amo bona mai manau danu kudou-maoro tauna ita hadibaia anina ia abia totona, bena do ia lalo-parara iena tomadiho ena hereva be maoro lasi. Namona be ita laloaboio lasi, Dirava ena Hereva momokani taunimanima danu ita kikilaia neganai, edia lalona ita veria idia laloa namonamo totona be gau badana.​—2 Timoteo 2:​24-26; 1 Ioane 4:​8, 16 oi itaia.

Herevahereva Heheni Namonamo Totona Ita Karaia Karadia

11-13. Edena Keristen karadia ese ita idia durua diba taunimanima danu ita herevahereva heheni namonamo totona?

¹¹ Vadaeni, Basileia ena hereva momokani taunimanima dekenai ita hadibaia namonamo totona, dahaka kara do ita habadaia be gau badana? Iesu ena haheitalai namona amo dahaka ita diba? Mataio 11:​28-30 dekenai iena hereva ita duahia diba, ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina be lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu ia hekwarahi lasi.” Unuseniai, Iesu ese taunimanima ia hadibaia namonamo diba dalana ta ia hahedinaraia. Ia be manau bona ia be lalona namo tauna. Kudou-maoro taudia dekenai ia be laga-ani henia tauna. Aposetolo Paulo be haheitalai namona danu, ia ese Efeso ena elda taudia ia hamaorodia, idia dekenai ia ginidae dinanai, ia be “mai lalona namo bona mai tai danu” Lohiabada ena hesiai gaukara ia karaia.​—Kara 20:19.

¹² Bema hanaihanai manau bona hekokoroku lasi karadia ita hahedinaraia, taunimanima do idia diba ita be laga-ani henia taudia danu, bona unai neganai idia danu ita herevahereva heheni be do ia auka momokani lasi. Bema ma kara ta ita hahedinaraia ita bona taunimanima padanai magu ta do ita haginia bamona bena ita herevahereva heheni namonamo diba lasi. Momokani, “aonega be manau taudia dekenai.”​—Hereva Lada-isidia 11:2.

¹³ Taunimanima dekenai diba ita henia namonamo totona, ita haheauka bona idia ita habadua lasi be gau badana. Aposetolo Paulo be Mars Ororo dekenai aonega taudia vairanai ia haroro neganai, ena hereva ia naria namonamo idia ia habadua garina. Ia ese do idia lalo-pararalaia dalanai sivarai namona ia harorolaia. (Kara 17:​18, 22-31) Bema ita ura ita haroro henia taudia danu do ita herevahereva heheni namonamo, aposetolo Paulo be Kolose taudia dekenai ia henia sisibana do ita badinaia be gau badana, ia gwau: “Nega ibounai mai laloa namona bona mai gado namo do umui hereva. Bona taunimanima ta ta ibounai oi davaria neganai idia danu herevahereva namonamo dalana oi tahua.” (Kolose 4:6, The New English Bible) Namona be nega ibounai iseda hereva do idia namo. Unai bamona hereva ese ita idia hakala henia taudia edia lalona do ia kehoa, to badu havaraia herevana ese edia lalona do ia koua.

14. Haragaharaga lasi karana amo ita hereva neganai, edena bamona unai ese ita ia durua taunimanima danu ita herevahereva heheni namonamo totona?

¹⁴ Namona be nega ibounai haragaharaga lasi toana bona maino toana ita hahedinaraia. Unai ese ita idia hakala henia taudia edia gari mamina ia hamaragia. Ita haragaharaga lasi toana ena anina ta danu be taunimanima idia hereva neganai ita hakala bona ita ura lasi ita sibona be hereva ibounai ita karaia. Bema haragaharaga lasi toana amo bona moale toana amo henanadai ita henidia, dala ita kehoa diba ita idia hakala henia taudia edia lalohadai do idia gwauraia totona. Bema dala ia kehoa dainai taunimanima ta ita haroro henia diba, aonega dalana be unai tau ena lalona ita veria ena lalohadai do ia gwauraia totona. Haheitalai ta be inai: nega ta Witness tauna ta be peleini ia guia bona ia badinai ia helai tauna be Roman Katolik pris tauna ta. Hora tamona ia hanaia lalonai Witness tauna be unai pris dekenai henanadai namodia momo ia henia, bona idia herevahereva heheni neganai pris ena hereva be momo. Peleini amo idia diho bona idia parara gwauraia neganai, unai pris ese Bible durua bukadia haida ia abia. Unai haragaharaga lasi karana ese ita ia durua ma kara ta ita lalo-pararalaia totona, unai be taunimanima edia kara bona lalohadai dainai ita hebogahisi henidia karana.

15, 16. Taunimanima edia kara bona lalohadai dainai ita hebogahisi karana ese ita edena bamona ia durua idia danu ita herevahereva heheni namonamo totona?

¹⁵ Taunimanima edia kara bona lalohadai dainai ita hebogahisi henidia ena anina be unai taudia edia gabu ai ita gini bamona bona edia noho ena mamina ita abia. Aposetolo Paulo ia diba taunimanima edia kara bona lalohadai dainai ita hebogahisi henidia be gau badana, badina Korinto taudia ia tore henidia neganai, ia gwau: “Lau be ura kwalimu tauna, lau be hesiai mai guia danu tauna lasi. To taunimanima ibounai edia hesiai mai guia danu tauna lau lao noho, momo herea do lau veria mauri totona. Iuda taudia danu lau noho neganai Iuda edia kara bamona lau karaia, Iuda taudia do lau veria mauri totona. Mose ena Taravatu henunai lau noho lasi, to Taravatu henunai idia noho taudia danu lau noho neganai lau danu Taravatu henunai tauna lau lao, unai taudia do lau veria mauri totona. Unai bamona danu, Dirava ena Taravatu lau utua lasi, badina be Keriso ena Taravatu lau badinaia noho. To Iuda lasi taudia danu lau noho neganai, lau be Taravatu laloa lasi tauna bamona lau lao, unai Iuda lasi taudia do lau veria mauri totona. Abidadama manoka taudia danu lau noho neganai lau be abidadama manokamanoka tauna bamona lau lao, inai abidadama manoka taudia do lau veria mauri totona. Lau be taunimanima idauidau ibounai edia mauri dalana dekenai lau halaoa, dala idauidau ibounai dekena amo haida do lau veria mauri totona.”​—1 Korinto 9:​19-22.

¹⁶ Unai kara dekenai aposetolo Paulo ita tohotohoa totona, gau badana be taunimanima ita habadua lasi, edia hereva ena anina ita tahua, bona ita gima noho. Taunimanima edia kara bona lalohadai dainai ita hebogahisi neganai, unai ese ita ia durua bena hakala taudia edia lalohadai bona edia noho ena mamina hegeregerena hereva momokani idia dekenai ita harorolaia diba. Unai kara dekenai Reasoning From the Scriptures buka ese ita ia durua bada. Oi haroro negadia ibounai unai buka oi abia loaloa be namo.

Lalokau be Heduru Namona Herevahereva Heheni Karana Dekenai

17. Keristen ena kara iboudiai amo edena kara be heduru bada hereva momokani taunimanima dekenai ita hadibaia goevagoeva totona, bona hahedinaraia dalana be dahaka?

¹⁷ Ita manau, ita hekokoroku lasi, ita haheauka, bona taunimanima edia kara bona lalohadai dainai ita hebogahisi henia karana be gau badana taunimanima danu herevahereva heheni totona, bona idia dekenai diba ita henia totona. To, sibona ena ura ia tahua lasi lalokauna ese ita ia durua hereva momokani be taunimanima edia kudouna lalonai ita atoa totona. Iesu be taunimanima dekenai ia hebogahisi badina “edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” Ia be mai ena lalokau dainai, Iesu ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai.” (Mataio 9:36; 11:28) Ita danu, taunimanima ita lalokau henidia dainai, ita ura idia dekenai laga-ani ita henia bona ita ura durudia mauri ia lao henia dalana dekenai do idia raka totona. Ita be lalokau sivaraina ita harorolaia, unai dainai hanaihanai lalokau dalana amo ita kikilaia. Unai lalokau hahedinaraia dalana be mai moale danu ita kiri, ita kara namo, ita manau, bona ita moale.

18. Edena bamona Paulo ena kara ita tohotohoa ia ese ena Biaguna ia tohotohoa hegeregerena?

¹⁸ Unai kara dekenai, aposetolo Paulo ese iena Biaguna, Iesu Keriso, ena kara ia tohotohoa. Dahaka dainai kongregesen momo haginia gaukarana ia karaia namonamo diba? Ia be gaukara goadagoada tauna dainai, a? Oibe. To unai dainai sibona lasi, to ia ese lalokau bada ia hahedinaraia danu. Kongregesen matamatana Tesalonika dekenai idia haginia neganai, ena lalokau herevana oi laloa, ia gwau: “Umui huanai ai be manau, iena natuna ia ubua hahine bamona. Umui ai lalokau henia bada dainai ai ese Sivarai Namona umui dekenai ai henia. Bona inai sibona lasi, to ai be ai noho hegaegae, aiemai mauri umui dainai do ai atoa diho, badina be umui ai lalokau henia bada.” Paulo ena kara ita tohotohoa neganai, unai ese ita do ia durua taunimanima danu ita herevahereva namonamo totona.​—1 Tesalonika 2:​7, 8.

19. Iseda teritori dekenai kamonai taudia momo ita davaria lasi neganai, dahaka dainai ita lalohisihisi momo lasi be namo?

¹⁹ Bema ita goada karaia taunimanima danu ita herevahereva heheni totona, to idia hakala namonamo lasi, do ita lalohisihisi bada, a? Lasi momokani. Guna, Bible Student taudia (Iehova ena Witness taudia edia ladana gunana unai), idia gwau taunimanima ese hereva momokani do idia abia dae totona, unai taunimanima edia kara be toi. Namona be idia kara maoromaoro, idia manau, bona lauma dalanai idia hitolo. Namona be ita diba, kara maoromaoro idia ura lasi taudia bona koikoi taudia ese hereva momokani do idia ura lasi kamonai henia, danu, heagi eiava hekokoroku taudia be sivarai namona idia ura lasi kamonai henia. Ma danu, ena be tau ta reana ia kara maoromaoro bona ia manau, to bema lauma dalanai ia hitolo lasi, hereva momokani do ia ura lasi kamonai henia.

20. Dahaka dainai ita gwau diba lasi ita hekwarahi kava?

²⁰ Oi haroro neganai reana emu teritori dekenai taunimanima momo be unai kara toi amo ta idia reaia. Peroveta tauna Ieremia be unai bamona ia davaria danu. (Ieremia 1:​17-19; Mataio 5:3 itaia danu.) To, ita gwau lasi ita hekwarahi kava. Dahaka dainai? Badina ita be Iehova ena ladana bona ena Basileia ena sivarai ita harorolaia. Iseda haroro gaukara amo bona teritori dekenai ita lao vadivadi neganai ita idia itaia karana amo idia ita sisiba henia. (Esekiel 33:33) Bona laloaboio lasi, hereva momokani taunimanima dekenai ita hadibaia toho neganai ita ese namo ita davaria danu. (1 Timoteo 4:16) Iseda abidadama karana ia goada noho bona ita dekenai Basileia helarona ena diari ia bada. Danu, iseda abidadama ia goada noho dainai, Iehova ena ladana hanamoa gaukarana ita karaia, bona unai kara ese iena kudouna ia hamoalea.​—Hereva Lada-isidia 27:11.

21. Ita kikilaia vadaeni herevadia edia anina ta ta be dahaka?

²¹ Unai hereva ibounai ena anina be inai: Herevahereva heheni karana be diba henia karana. Herevahereva heheni karana be mai anina bada, bona ita herevahereva heheni lasi neganai dika momo idia vara diba. Ita diba vadaeni Iehova Dirava bona Iesu Keriso be herevahereva heheni dalana amo taunimanima dekenai diba idia henia bada, bona Iesu Keriso ese dala ia kehoa hari inai nega lalonai taunimanima dekenai diba do ia henia totona. Danu ita diba iseda dabua, iseda iduari, bona iseda kara amo taunimanima dekenai gau haida ita hadibaia diba. Ita diba taunimanima edia lalona ita veria idia lalohadai namonamo totona be gau badana, bona idia danu ita herevahereva heheni namonamo totona, gau badana be ita hekokoroku lasi, ita manau, taunimanima edia kara bona lalohadai dainai ita hebogahisi henidia, ita haheauka, bona, gau hereadaena be inai, namona be iseda kudouna be lalokau amo ia honu dainai ita gaukara. Bema iseda mauri lalonai unai kara iboudiai ita karaia bona Bible ese ia gwauraia haheitalai namo taudia edia kara ita tohotohoa, ita be Keristen ena herevahereva heheni namonamo dalana do ita diba.​—Roma 12:​8-11.

[Footnotes]

Edena Bamona Do Oi Haere?

◻ Ena be hereva ta oi gwauraia lasi, to taunimanima dekenai emu diba henia dalana ginigunana be dahaka?

◻ Taunimanima edia lalona veria idia laloa namonamo totona ena karaia dalana ena haheitalai haida be dahaka?

◻ Iesu Keriso bona Paulo dekenai dahaka kara ia noho dainai taunimanima danu idia herevahereva heheni namonamo diba?

◻ Haroro gaukara amo huahua momo ita abia lasi neganai, dahaka dainai ita lalohisihisi momo lasi be namo?