Iehova Oi Diba Dainai Oi Moale
“Dirava ena hereva idia kamonaia bona idia badinaia taudia be idia moale bada.”—LUKA 11:28.
1. Iehova be edena negai taunimanima dekenai diba ia henia matamaia?
IEHOVA be taunimanima ia lalokau henia bona edia namo ia laloa bada. Unai dainai, idia dekenai diba ia henia karana ita hoalaia lasi. Unai diba henia karana be Eden umana dekenai ia matamaia. Genese 3:8 ena hereva hegeregerena, nega ta “adorahi kahanai” Adamu bona Heva be “Lohiabada Dirava [ena gadona] idia kamonai.” Haida idia gwau unai be Iehova ena kara, dina ibounai unai bamona negana ai Adamu ia hereva henia. Unai be herevana, to Baibel ese ia hahedinaraia goevagoeva Dirava ese nega ia atoa tau ginigunana dekenai hakaua herevadia ia henia totona sibona lasi, to danu, ia diba be namo gaudia ia hadibaia totona, unai amo ena maduna idauidau ia huaia diba.—Genese 1:28-30.
2. Edena dala ai tau bona hahine ginigunadia be Iehova ena hakaua dalana amo sibodia idia hapararaia, bona dahaka ia vara?
2 Iehova be Adamu bona Heva dekenai mauri ia henia, bona siahu ia henidia tanobada ibounai bona animal idia biagua totona. Taravatu tamona sibona ia henia—kara namo bona kara dika hadibaia auna ena huahua do idia ania lasi. Satani ena lalo-ani karana dainai, Adamu bona Heva ese Dirava ena taravatu idia utua. (Genese 2:16, 17; 3:1-6) Idia ura sibodia edia ura hegeregerena idia kara, idia sibodia idia abia hidi dahaka be maoro bona dahaka be kerere. Unai bamona idia karaia neganai, mai kavakava ida edia lalokau Havaraia Tauna ena hakaua dalana amo sibodia idia hapararaia. Unai kara dainai idia bona gabeai do idia vara natudia ese dika idia abia. Adamu bona Heva idia buruka bona gabeai idia mase, bona do idia toreisi lou lasi. Edia tubudia dekenai kara dika idia henia hanai bona ena davana be mase.—Roma 5:12.
3. Dahaka dainai Iehova be Kaino ia hereva henia, bona Kaino be edena bamona ia kara?
3 Ena be Eden lalonai gwau-edeede ia vara, to Iehova be taunimanima dekenai diba ia do henia noho. Adamu bona Heva edia natuna ginigunana, Kaino, be kara dika ese ia veria gwauraia. Iehova ese Kaino ia hadibaia dika do ia davaria diba, bona ia sisiba henia ‘kara namo do ia karaia.’ Kaino ese unai lalokau sisibana ia dadaraia bona ena tadina ia alaia mase. (Genese 4:3-8) Unai dala ai, tanobada dekenai idia noho taudia ginigunadia toi ese idia dekenai mauri ia henia tauna, ena taunimanima edia namo totona hadibaia hereva ia henia Diravana, ena hakaua dalana idia dadaraia. (Isaia 48:17) Unai ese Iehova ena lalona ia hahisia bada!
Iehova ese Ena Ura Ia Gwauraia Idaunegai Abidadama Taudia Dekenai
4. Iehova ia diba momokani Adamu ena natudia haida be dahaka do idia karaia, bona unai dainai edena helaro sivaraina ia gwauraia?
4 Iehova be mai ena maoro taunimanima dekenai diba ia henia karana ia hadokoa, to unai bamona ia karaia lasi. Ia diba momokani Adamu ena natudia haida be mai aonega ida Iena hakaua dalana do idia badinaia. Hegeregere, Iehova ese Adamu bona Heva ia hahemaoro henidia neganai, ia ese “garana” ta ia perovetalaia, unai garana ese Gaigai, Satani Diabolo unai, do ia inai henia. Gabeai, Satani ena kwarana do ia haberoa momokani. (Genese 3:15, NW ) Unai peroveta herevana be moale ia henia helaro sivaraina “Dirava ena hereva idia kamonaia bona idia badinaia taudia” dekenai.—Luka 11:28.
5, 6. Aposetolo taudia edia nega ia do ginidae lasi neganai, Iehova be edena dala ai ena taunimanima ia hereva henia, bona unai ese edena bamona idia ia durua?
5 Iehova ese idaunegai abidadama bese kwarana taudia, hegeregere Noa, Aberahamo, Isako, Iakobo, bona Iobu, dekenai ena ura ia gwauraia. (Genese 6:13; Esodo 33:1; Iobu 38:1-3) Gabeai, Mose amo Israela besena totona taravatu momo ia henia. Mose ena Taravatu amo dala idauidau momo ai namo idia davaria. Israela taudia be unai taravatu idia badinaia dainai, bese ibounai amo idia idau, idia be Dirava ena abia hidi besena. Dirava ese Israela taudia ia hadibaia bema unai Taravatu idia kamonai henia, idia do ia hanamoa, tauanina dalanai sibona lasi to lauma dalanai danu, ia ese hahelaga taudia edia basileia bona bese helagana ai do ia halaoa. Mose ena Taravatu ese aniani bona tauanina naria taravatudia danu ia henia, bona idia ese gorere idia koua. To, Iehova ia gwau danu, bema idia kamonai henia lasi, dika bada do idia davaria.—Esodo 19:5, 6; Deuteronomi 28:1-68.
6 Gabeai, Dirava ena lauma amo idia vara buka ma haida be Baibel bukadia ai idia lao. Idaunegai sivaraidia be Iehova ese tanobada besedia bona taunimanima ia kara henia karadia idia hahedinaraia. Ane bamona idia torea bukadia ese dala hairaina ai Iehova ena kara idauidau idia herevalaia. Peroveta bukadia ese vaira negana ai Iehova ena ura do ia guguru daladia idia hahedinaraia. Idaunegai abidadama taudia ese Dirava ena lauma amo idia vara toretoredia idia stadilaia namonamo bona idia badinaia. Idia ta ia gwau: “Oiemu hereva be lamepa bamona, lau ia hakaua noho, vadaeni lau raka maoromaoro diba. Oiemu hereva be diari, ia ese egu dala ia hadiaria noho.” (Salamo 119:105) Idia ura kamonai taudia be Iehova ese ia hadibadia bona edia lalona ia hadiaria.
Diari Ia Bada Ia Lao
7. Ena be Iesu ese hoa karadia ia karaia, to edena bamona momo ese ia idia gwauraia, bona dahaka dainai?
7 Aposetolo taudia edia nega ia matamaia neganai, Iuda tomadiho oreadia ese taunimanima edia sene herevadia be Taravatu dekenai idia atoa kau. Taravatu idia gaukaralaia kerere, bona diari ia henia lasi, to sene herevadia dainai ia be hametaua gauna ai ia lao. (Mataio 23:2-4) To, lagani 29 C.E. ai, Iesu be Mesia tauna ai ia lao. Ena gaukara be taunimanima totona ena mauri do ia atoa diho sibona lasi, to “hereva momokani” ia gwauraia hedinarai danu. Ena be hoa karadia ia karaia, to momo ese idia gwauraia “Hadibaia Tauna.” Iena hadibaia herevadia be diari ta bamona, lauma dalanai taunimanima edia lalona dekenai ia noho diburana ia hadiaria. Iesu ia gwau: “Lau be tanobada ena diari.”—Ioane 8:12; 11:28; 18:37.
8. Edena bukadia, Dirava ena lauma amo idia vara, be aposetolo taudia edia negai idia torea, bona edena dala ai Keristani taudia ginigunadia idia durua?
8 Gabeai Evanelia Bukadia, Iesu ena mauri idia sivarailaia toretoredia hani, bona Kara bukana, Iesu ena mase murinai Keristani tomadihona be gabu momo dekenai ia lao sivaraina ia gwauraia bukana, idia atoa kau. Iesu ena hahediba taudia ese Dirava ena lauma helaga ena hakaua henunai idia torea revarevadia bona peroveta bukana idia noho, Apokalupo bukana danu. Unai toretoredia, bona Heberu Revarevadia, be Baibel ena buka korikoridia. Dirava ena lauma amo ia vara laiberi ena heduru amo, Keristani taudia be hereva momokani ena ‘lababa, bona ena lata, bona ena ataiai, bona ena dobu, idia diba momokani.’ (Efeso 3:14-18) “Keriso ena laloa” idia abia diba. (1 Korinto 2:16) To, unai Keristani taudia ginigunadia be Iehova ena ura ibounai idia lalo-pararalaia goevagoeva lasi. Aposetolo Paulo ese abidadama tamona taudia ia tore henidia, ia gwau: “Harihari ita be Dirava ena gaudia kahana sibona ita diba, bona ita itaia goeva lasi, hevarivari gunana lalonai gau ita itaia goeva lasi bamona.” (1 Korinto 13:12) Unai bamona hevarivari be kahana sibona ia hahedinaraia to gau ibounai ia hahedinaraia lasi. Dirava ena Hereva ibounai lalo-pararalaia goevagoeva karana be do gabeai.
9. Edena diari be “nega ena dokona” lalonai ia vara?
9 Hari, ita be “nega ena dokona” lalonai ita noho, inai nega lalonai “metau dikadia momo do idia vara.” (2 Timoteo 3:1) Peroveta tauna Daniela ia gwau inai nega lalonai “aonega do ia bada herea.” (Daniela 12:4) Unai dainai, Iehova, Diba ia Henia Tauna Badana, ese kudou-maoro taudia ia durua ena Hereva ena anina idia lalo-pararalaia totona. Taunimanima momo herea be hari idia lalo-parara lagani 1914 ai, Iesu Keriso be guba dekenai terona latanai ia helai. Bona idia diba danu, kahirakahira kara dika ibounai do ia haorea bona tanobada ibounai be paradaiso ai do ia halaoa. Unai be Basileia sivarai namona ena kahana badana bona hari tanobada ibounai dekenai idia harorolaia noho.—Mataio 24:14.
10. Lagani handred momo lalonai, taunimanima ese Iehova ena sisiba dainai dahaka idia karaia?
10 Oibe, taunimanima edia histori ibounai lalonai, Iehova ese ena ura be tanobada taudia dekenai ia gwauraia. Baibel ena sivarai ese ia hahedinaraia momo idia kamonai, Dirava ena aonega idia badinaia, bona unai dainai hahenamo idia abia. Dirava ena lalokau sisibana idia dadaraia bona Adamu bona Heva edia dala dikana idia badinaia taudia edia sivarai ia gwauraia danu. Iesu be laulau dalanai dala rua ia herevalaia neganai, unai ia hahedinaraia. Dala ta be mase ia lao henia. Ia be dala badana bona Dirava ena Hereva idia dadaraia taudia momo ese idia badinaia. Ma dala ta be mauri hanaihanai ia lao henia. Ena be unai dala ia maragi, to haida ese idia badinaia. Unai taudia idia abia dae Baibel be Dirava ena Hereva bona edia mauri lalonai idia badinaia.—Mataio 7:13, 14.
Ita Dekenai Idia Noho Gaudia Dainai Ita Moale
11. Baibel ena hereva ita diba bona ita abia dae ese dahaka ia hamomokania?
11 Oi be mauri ia lao henia dalana idia abia hidi taudia huanai oi noho, a? Bema oibe, ai diba momokani oi ura unai dala dekenai do oi noho. Edena bamona unai oi karaia diba? Baibel ena hereva momokani oi diba dainai oi abia hahenamodia oi laloa hanaihanai mai moale ida. Sivarai namona oi abia dae ese ia hamomokania Dirava ena hahenamo oi abia. Iesu ese unai ia hahedinaraia ena tamana ia guriguri henia neganai, ia gwau: “Egu Tamana e, guba bona tanobada ena Lohia, lau hanamoa oi, badina be inai gaudia aonega taudia bona diba momo taudia dekena amo oi hunia vadaeni, to natudia matamata dekenai oi hedinaraia vadaeni.” (Mataio 11:25) Haoda taudia bona takisi gogoa taudia ese Iesu ena hadibaia herevadia ena anina idia lalo-pararalaia, to diba bada tomadiho gunalaia taudia idia lalo-pararalaia lasi. Iesu be ma ia gwau: “Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba.” (Ioane 6:44) Bema Baibel oi diba bona ena hahediba herevadia oi abidadama henia bona oi badinaia, unai ese ia hamomokania Iehova ese oi ia veria mai. Unai be badina ta oi moale totona.
12. Edena daladia ai Baibel ese diari ia henia?
12 Dirava ena Hereva lalonai, ita idia ruhaia hereva momokanidia idia noho bona ia ese diari ia henia. Baibel ena diba hegeregerena idia noho taudia be taunimanima milioni momo idia biagua babalau karadia, hahediba herevadia koikoidia, bona diba lasi karana amo ia ruhaia. Hegeregere, souli ena hereva momokani ita dibaia neganai, mase taudia ese ita do idia hadikaia eiava iseda lalokau mase taudia idia hisihisi noho garina ita gari lasi. (Esekiela 18:4, NW ) Hereva momokani aneru dikadia idia karaia karadia dekenai ita diba dainai, unai ese ita ia durua meamea karadia ita dadaraia totona. Toreisi lou herevana ese edia lalokau taudia be mase dekenai idia haboioa taudia ia hagoadaia. (Ioane 11:25) Baibel ena peroveta herevadia dainai ita noho negana ena anina ita diba bona idia dainai Dirava ena gwauhamata vaira negana totona ita abidadama henidia. Mauri hanaihanai helarona idia hagoadaia danu.
13. Dirava ena Hereva badinaia karana amo, tauanina dalanai dahaka namo ita davaria diba?
13 Dirava ena hakaua herevadia Baibel lalonai ese ita idia hadibaia, tauanina dalanai namo ia havaraia dalana be iseda mauri lalonai ita badinaia. Hegeregere, iseda tauanina hamiroa karadia, hegeregere kuku bona drag ma haida gaukaralaia kerere karadia, ita dadaraia. Kekero muramura gaukaralaia kerere karana ita rakatania. (2 Korinto 7:1) Dirava ena kara maoromaoro taravatudia ita badinaia dainai lebulebu karadia ese idia havaraia goreredia amo sibona ita gimaia. (1 Korinto 6:18) Dirava ena sisiba ita badinaia bona moni ura henia karana ita dadaraia neganai, kohu tahua karana dekenai iseda lalo-maino ita hadikaia lasi, momo ese idia hadikaia bamona. (1 Timoteo 6:10) Emu mauri lalonai Dirava ena Hereva oi badinaia dainai, tauanina dalanai dahaka namo oi davaria?
14. Edena dala ai lauma helaga be mai ena siahu iseda mauri lalonai?
14 Bema Dirava ena Hereva hegeregerena ita noho, Iehova ena lauma helaga do ita abia. Keriso ena kara bamona do ita kara, hegeregere hebogahisi karana do ita hahedinaraia. (Efeso 4:24, 32) Dirava ena lauma ese ita lalonai ena huahua do ia havaraia—lalokau, moale, maino, haheauka, bogahisihisi, kara maoromaoro, abidadama momokani kara, manau, bona tauanina ena ura koua karana. (Galatia 5:22, 23) Unai karadia ese mai moale bona mai anina bada hetura karadia ma haida ida bona iseda ruma bese taudia ida ia habadaia. Lalo-goada ita abia bona ia ese ita ia durua mai eda boga-auka ida metau negadia ita haheaukalaia totona. Dirava ena lauma helaga ese emu mauri ia hanamoa be oi itaia diba, a?
15. Dirava ena ura hegeregerena ita noho totona iseda mauri ita haidaua neganai, dahaka namo ita davaria?
15 Dirava ena ura hegeregerena ita noho totona iseda mauri ita haidaua neganai, iseda hetura karana Iehova ida ita hagoadaia. Ita diba momokani ia ese ita ia lalo-pararalaia bona lalokau henia. Ita dekenai idia vara gaudia dainai ita diba nega aukadia lalonai ita ia durua. (Salamo 18:18) Ita lalo-parara iseda guriguri ia kamonai momokani. (Salamo 65:2) Iena hakaua herevadia ita tabekau henia, bona ita diba momokani unai amo namo do ita abia. Bona iseda helaro namo hereana be, Dirava ena nega korikori ai iena abidadama taudia dekenai mauri goevadaena bona iena harihari gauna, mauri hanaihanai, do ia henia. (Roma 6:23) Hahediba tauna Iamesi ia gwau: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.” (Iamesi 4:8) Iehova kahirakahira oi lao neganai, oi mamia emu hetura karana ia ida ia goada ia lao, a?
Dava Bada Gaudia Ibounai Ia Hereaia
16. Keristani taudia ginigunadia haida ese dahaka kara idia haidaua?
16 Dirava ena lauma amo ia horoa Keristani taudia ginigunadia dekenai Paulo ia gwau, guna idia haida be sihari kava taudia, heudahanai taudia, tatau danu matabodaga idia karaia taudia, henaohenao taudia, mataganigani taudia, inuinu kekero taudia, edia hereva dekenai haida idia hadikaia taudia, bona haida edia gau idia dadia taudia. (1 Korinto 6:9-11) Baibel ena hereva momokani dainai edia kara idia haidaua; sibodia idia “huria goeva.” Mani oi laloa, bema Baibel amo ita idia ruhaia diba hereva momokanidia oi diba lasi, emu mauri be edena bamona. Oibe, hereva momokani be dava bada gaudia ibounai ia hereaia. Ita moale bada badina Iehova be ita dekenai diba ia henia!
17. Keristani heboudia ai, Iehova ena Witnes taudia be edena bamona lauma dalanai idia ubua?
17 Danu, bese idauidau tadikaka oreana lalonai ita noho ena hahenamo mani oi laloa! “Hesiai tauna mai ena kamonai, bona mai ena kara maoromaoro” ese nega korikori ai lauma aniani idia henia, unai gaudia haida be gado momo ai idia halasia Baibel, magasin, bona buka ma haida. (Mataio 24:45-47) Lagani 2000 ai, Iehova ena Witnes taudia tano momo dekenai ese kongregesen heboudia lalonai, Heberu Revarevadia edia buka badadia 8 edia hereva badadia idia riviulaia. Insight on the Scriptures bukana ese ia herevalaia Baibel ia gwauraia taudia 40 edia mauri idia lalohadailaia. Tau Hereadaena bukana ena kahana 25 pesen bamona idia stadilaia bona kahirakahira Pay Attention to Daniel’s Prophecy! bukana ibounai idia haorea. Gima Kohorona magasin amo stadi herevadia 52 bona hereva ma haida 36 idia herevalaia. Ma danu, Iehova ena taunimanima be Iseda Basileia Gaukara pepadia 12 idia abia bona pura ta ta ai idia kamonai pablik tok ese Baibel ena hereva idauidau idia hahedinaraia. Lauma dalanai diba bada herea idia abia!
18. Keristani kongregesen lalonai, edena dala idauidau ai ita idia durua?
18 Tanobada ibounai lalonai, kongregesen 91,000 bona ma haida ese hebou bona hebamo karadia amo heduru bona hagoadaia herevadia idia henia. Bona lauma dalanai idia ura ita idia durua lo Keristani taudia edia heduru ita moalelaia danu. (Efeso 4:11-13) Oibe, hereva momokani ena diba ita abia dainai, namo bada ita davaria. Iehova ita diba bona ia ita hesiai henia be moale gauna. Salamo torea tauna ena hereva be momokani, ia gwau: “Edia Dirava be Lohiabada, ena bese taudia be idia moale noho.”—Salamo 144:15.
Oi Laloatao, A?
• Keristani taudia edia nega ia do ginidae lasi neganai, Iehova be daidia dekenai ena hereva ia gwauraia?
• Edena dala ai lauma diarina ia bada ia lao aposetolo taudia edia negai? hari inai negai?
• Iehova ena diba hegeregerena ita noho neganai, dahaka namo ita davaria?
• Dirava ita diba dainai, dahaka gaudia ita moalelaia?
[Pictures on page 8, 9]
Iehova ese Noa, Aberahamo, bona Mose dekenai ena ura ia gwauraia
[Picture on page 9]
Iseda nega lalonai, Iehova ese ena Hereva dekenai diari ia hahedinaraia
[Pictures on page 10]
Bese idauidau tadikaka oreana lalonai ita noho ena hahenamo mani oi laloa!