Iehova bona Keriso—Diba Henia Taudia Hereadaedia

“Lohiabada Hereadaena Iehova be gau ta do ia karaia lasi ela bona iena hehuni herevadia be iena peroveta hesiai taudia dekenai ia gwauraia hedinarai.”​—AMOS 3:7.

1. Hari inai negai, taunimanima dekenai diba henia totona dahaka gaudia idia gaukaralaia?

HARI inai negai, taunimanima dekenai diba henia daladia be moni milion momo ena bisinesi badana. Idia halasia buka iboudiai, hanaihanai idia printaia niuspepa bona magasin iboudiai, reidio dekenai idia gwauraia gaudia iboudiai bona televisen dekenai idia hahedinaraia gaudia iboudiai, muvini piksa bona drama dekenai idia hahedinaraia gaudia iboudiai danu idia karaia taunimanima dekenai diba idia henia totona. Idia torea bona siaia revareva iboudiai bona hereva ibounai telefon dekena amo be taunimanima dekenai diba henia daladia haida danu.

2. Taunimanima idia herevahereva heheni totona saiens idia havaraia gaudia haida be dahaka?

² Taunimanima dekenai diba henia dalana ai saiens ena aonega be bada herea momokani. Hegeregere, hari, fiber-optic varo idia gaukaralaia, bona unai be copper varo ena namo ia hanaia; telefon amo taunimanima tausen momo idia hereva neganai, unai varo be nega tamona edia hereva ibounai ia siaia diba. Danu, tanobada ataiai, satellite masini ese tanobada idia heaua hegege, bona idia be telefon, telegraf, reidio, bona televisen amo hereva idia siaia bona piksa idia abia bona ma idia siaia diho. Unai satellite masini tamona be nega tamona lalonai telefon ena hereva idauidau 30,000 ia siaia diba!

3. Taunimanima idia herevahereva heheni namonamo lasi neganai dahaka ia vara?

³ Ena be unai gaudia momo dekena amo taunimanima dekenai diba idia henia, to tanobada dekenai lalohisihisi bada ia do noho badina taunimanima be idia herevahereva heheni namonamo lasi. Unai dainai, ita kamonai “taunimanima idia herevahereva heheni namonamo lasi dainai, lohia taudia bona idia lohiaia taudia huanai padana ia bada ia lao.” Bona unai herevahereva heheni namonamo lasi karana ia vara badina tama sina bona natudia idia herevahereva heheni namonamo lasi dainai, ani? Headava taudia dekenai, sisiba idia henia taudia idia gwau headava lalonai hekwakwanai badana ia noho badina be tau bona hahine idia herevahereva heheni namonamo lasi dainai. Herevahereva heheni namonamo lasi karana ese mase ia havaraia diba danu. Lagani 1990 ia matamaia neganai, taunimanima 73 idia mase idia guia peleini ia moru neganai; unai bamona ia vara ena badina ta be peleini taria tauna bona tano dekenai peleini idia hereva henia taudia idia herevahereva heheni namonamo lasi dainai. Niuspepa ta ena hereva kwarana ia gwau: “Herevahereva Heheni Namonamo Lasi Karana Dainai Dika Ia Vara.”

4. (a) “Herevahereva heheni” ena anina be dahaka? (b) Dahaka dainai Keristen taudia idia ura idia herevahereva heheni namonamo, bona idia ura haida idia hereva henidia namonamo?

⁴ Keristen taudia dekenai herevahereva heheni namonamo karana ena anina be dahaka? Diksinari buka ta dekenai ia gwau, “herevahereva heheni namonamo karana” ena anina be “sivarai, lalohadai, eiava hemami oi hahedinaraia taunimanima idia abia dae eiava idia lalo-pararalaia totona.” Diksinari ma ta ia gwau ia be “kara ta lalohadai idauidau hahedinaraia namonamo totona.” Unai hereva “lalohadai idauidau hahedinaraia namonamo” oi laloatao. Keristen taudia ese taunimanima idia hereva henidia namonamo be gau badana, badina idia ura Dirava ena Hereva amo taunimanima idia hadibaia bena hereva momokanina be edia kudouna dekenai do ia diho, bona reana unai idia diba gaudia dainai kara ta do idia karaia. Unai bamona taunimanima idia hereva henidia badina idia ura unai taunimanima idia durua, bona unai amo edia lalokau idia hahedinaraia.

Iehova be Diba Henia Diravana

5. Dirava ese taunimanima diba ia henia daladia ginigunadia ta be dahaka?

⁵ Iehova Dirava be Diba Henia Tauna Hereadaena. Iena toana bona laulau hegeregerena ita ia havaraia dainai, diba ita abia totona ita ia hereva henia diba, bona ita be ma taunimanima haida dekenai iena sivarai ita herevalaia diba. Taunimanima ia havaraia ena nega amo ia mai hari, Iehova ese ena tanobada taudia dekenai sibona ena kara ia hahedinaraia. Unai bamona ia karaia dalana ta be tanobada dekenai ita itaia gaudia amo. Unai dainai, salamo tauna ese ita ia hamaoroa: “Guba ese Dirava ena hairai ia gwauraia hedinarai; bona guba gaudia ese iena imana gaukaradia idia hahedinaraia. Dina ta ese ma dina ta ia hereva henia, bona hanuaboi ta bona ma hanuaboi ta ese aonega idia hahedinaraia.” (Salamo 19:​1, 2) Bona Roma 1:20 ese ita ia hadibaia Dirava ese “tanobada ia karaia negana ia mai bona harihari, taunimanima . . . edia matana dekenai Dirava ese ia karaia gaudia ibounai idia itaia vadaeni.” Oibe​—idia itaia vadaeni, bona unai anina be Dirava ese diba idia dekenai ia henia namonamo!

6. Ena tanobada taudia be Eden umana dekenai idia noho neganai, Iehova ese idia dekenai dahaka ia hadibaia?

⁶ Dirava bona ena kara ia hahedinaraia dalana dekenai idia abidadama henia lasi taudia idia gwau taunimanima be sibodia edia aonega karana amo edia noho ena badina do idia tahua, bona idia ura unai lalohadai ita abia dae. To, Dirava ena Hereva ese ia hahedinaraia goevagoeva taunimanima idia vara negana amo ia mai hari, diba idia abia totona Dirava ese idia ia hereva henidia. Unai dainai, tau bona hahine ginigunadia dekenai natudia havaraia taravatuna ia henia, ia gwau: “Emui bese umui havaraia, do umui hutuma. Tanobada ena gabu ibounai dekenai umui noho, bona umui biagua . . . mauri gaudia [ibounai] tanobada dekenai idia marere gaudia umui biagua.” Danu Dirava ese idia ia hamaoroa uma ena au huahua idia ania ela bona idia boga kunu​—au tamona sibona ena huahua amo do idia aniani lasi. Bena, Adam bona Eva idia gwau-edeede neganai, gabeai idia vara taudia be helaro do idia abia totona, Iehova ese Mesia gwauhamata herevana ia gwauraia hedinarai, ia gwau: “Lau ese badu oi [gaigai] bona hahine huanai do lau atoa, bona oiemu garana bona iena garana huanai. Ia ese emu kwarana do ia haberoa bona oi ese iena aena geduna do oi haberoa.”​—Genese 1:28; 2:​16, 17; 3:​15, NW.

7. Genese buka lalonai Iehova ese ena hesiai taudia dekenai diba ia henia totona dahaka diba ia henidia?

⁷ Adam natuna Kain ena kudouna be mama bona ala-ala karana amo ia honu neganai, Iehova Dirava ese ia hereva henia, hegeregere ia gwau: ‘Naria namonamo! Dika do oi davaria inai!’ To Kain ese unai sisiba herevana ia dadaraia bona ena tadina ia alaia mase. (Genese 4:​6-8) Gabeai, tanobada be dagedage bona kara dika karadia amo ia honu neganai, Iehova ese kara maoromaoro tauna Noa ia hereva henia, ia hadibaia tanobada do ia hagoevaia totona Ia ese dika gaudia ibounai do ia kokia. (Genese 6:​13–7:5) Abata murinai, Noa bona ena ruma bese taudia be lagatoi badana idia rakatania neganai, Iehova ese idia dekenai mauri bona rara idia helaga ena badina ia gwauraia, bona kevau dekena amo ia hahedinaraia abata badana ta amo, tanobada ibounai do ia hadikaia lou lasi ela bona hanaihanai. Lagani handred haida murinai, Iehova ese Abraham ia hadibaia, Abraham Garana amo Iena ura be taunimanima ibounai be hahenamo do idia abia. (Genese 9:​1-17; 12:​1-3; 22:​11, 12, 16-18) Bona Dirava ese Sodom bona Gomora mai edia kara bodaga taudia ia haoredia gwauraia neganai, mai ena lalokau danu ia ese Abraham ia hadibaia guna, ia gwau: “Dohore lau karaia kara lau hunia diba lasi Aberahamo dekenai.”​—Genese 18:17.

8. Iehova ese tanobada dekenai iena hesiai taudia dekenai diba ia henia totona edena dala 4 ia gaukaralaia?

⁸ Israel taudia ia hereva henia totona Iehova ese nega daudau lalonai peroveta taudia ia gaukaralaidia; edia tau ginigunana be Mose. (Heberu 1:1) Nega haida ia hereva bona tau ta ese ena hereva ia torea, hegeregere Mose dekenai ia hereva neganai, ia gwau: “Inai hereva oi toredia oiemu.” (Esodo 34:27) To nega momo Iehova ese matahanai dekena amo hereva gwauraia tauna ia hereva henia, guna Abraham dekenai ia karaia bamona.a Danu Iehova ese nihi amo taunimanima ia hereva henidia, bona iena hesiai taudia sibona lasi, to iena hesiai taudia idia bamoa taudia danu be nihi amo ia hereva henidia. Hegeregere, Iehova ese Iosef danu idia dibura taudia rua dekenai nihi ia henidia bamona, bona Iosef ese unai nihi edia anina ia gwauraia hedinarai. Danu Iehova ese Farao bona Nebukadnesara dekenai nihi ia henidia, bona iena hesiai taudia Iosef bona Daniel ese unai nihi edia anina idia gwauraia hedinarai. (Genese 40:​8–41:32; Daniel, karoa 2 bona 4) Ma danu, nega momo iena hesiai taudia ia hereva henidia totona Iehova ese aneru ia gaukaralaidia.​—Esodo 3:2; Hahemaoro Taudia 6:11; Mataio 1:20; Luka 1:26.

9. Dahaka ese Iehova ena lalona ia veria iena bese Israel taudia ia hereva henidia totona, bona dahaka hereva ia gwauraia unai ia hamomokania totona?

⁹ Iena peroveta taudia dekena amo ia hereva neganai, Iehova ese ena lalokau iena bese Israel taudia dekenai ia hahedinaraia. Hegeregere, iena peroveta tauna Esekiel dekena amo ia gwau: “Lau be kara dika tauna ena mase lau moalelaia lasi, to bema kara dika tauna be ena kara amo ia helalo-kerehai bona ia mauri noho, lau moale. Umui giroa, emui kara dikadia amo umui giroa. Israel besena e, do umui mase ena namo be dahaka?” (Esekiel 33:11) Sisiga Iharuana 36:​15, 16 dekenai ia hahedinaraia Diba Henia Tauna, Iehova, be mai haheauka bada danu iena idau negai gwau-edeede besena ia kara henia, unai siri ia gwau: “Iehova, edia tamadia edia Dirava ese hereva be hesiai taudia edia ududia amo ia siaia loulou, badina be ia ese ena taunimanima bona ena noho gabuna ia hebogahisi henia. To nega iboudiai idia ese . . . iena hereva idia dadaraia bona ena peroveta taudia idia kirikirilaidia, . . . ema bona hanamodia lou dalana be lasi.”

10. Hari inai negai, Iehova ese edena dala amo iena taunimanima dekenai diba ia henia, bona edena bada bamona diba ia henia?

¹⁰ Hari inai nega lalonai, Bible Helagana ita abia, Dirava ena lauma ia havaraia Hereva unai, bona unai dekena amo Iehova ese ita ia hereva henia, hegeregere iena sivarai, iena kara, bona iena ura ita dekenai ia gwauraia hedinarai ita diba totona. (2 Timoteo 3:​16, 17) Momokani, Iehova be Diba Henia Dirava Hereadaena dainai, ia gwau: “Lohiabada Hereadaena Iehova be gau ta do ia karaia lasi ela bona iena hehuni herevadia be iena peroveta hesiai taudia dekenai ia gwauraia hedinarai.” (Amos 3:7) Iena hesiai taudia idia diba totona ia hamaorodia dahaka do ia karaia.

Dirava Ena Natuna be Diba Henia Tauna

11. Iehova ese dala idauidau amo taunimanima ia hereva henidia, to daika be ena dala hereadaena, bona dahaka dainai ena ladana idia gwauraia “Hereva” be maoro?

¹¹ Iehova ese dala idauidau ia gaukaralaia Iena ura ia hahedinaraia totona, to Hereva, Logo, gabeai idia gwauraia Iesu Keriso be ena dala hereadaena. Dahaka dainai idia gwau ia be Hereva, eiava Logo? Unai ese ia hahedinaraia ia be Iehova ena Hereva Gwauraia Tauna Badana. Bona Hereva Gwauraia Tauna ena gaukara be dahaka? Ia ese ma tau ta ena hereva ia gwauraia hedinarai. Unai dainai, Logo be tanobada ai Dirava ese ia havaraia mai edia aonega taudia dekenai Iehova ena hereva ia gwauraia hedinarai. Unai gaukara be mai anina bada dainai, ena ladana idia gwauraia Hereva.​—Ioane 1:​1, 2, 14.

12. (a) Iesu be tanobada dekenai ia mai ena badina be dahaka? (b) Edena bamona ita diba ia be mai abidadama danu unai gaukara ia hagugurua?

¹² Iesu ese Pontio Pilato ia hamaoroa tanobada dekenai ia mai ena badina badana be ia ura hereva momokani taunimanima dekenai ia gwauraia, ia gwau: “Hereva momokani gwauraia hedinarai totona lau vara bona lau mai inai tanobada dekenai.” (Ioane 18:37) Bona Evanelia buka ena sivarai ese idia hahedinaraia unai gaukara ia karaia namo herea. Taunimanima idia gwau ororo dekenai ia haroro be namo herea momokani bona ma taunimanima ta be unai bamona ia haroro diba lasi. Unai haroro herevana amo taunimanima dekenai diba ia henidia totona, ia hereva henidia namo herea! “Taunimanima ese iena hadibaia hereva dekenai idia hoa bada.” (Mataio 7:28) Ma nega ta dekenai, sivarai ia gwau: “Hutuma bada Iesu ena hereva idia kamonai mai moale danu.” (Mareko 12:37) Iesu idia dogoatao totona, hesiai taudia idia siaia neganai, ima kavakava idia giroa lou. Dahaka dainai? Farisea taudia ese idia nanadaia neganai, idia gwau: “Hamatamaia nega dekena amo ia mai bona hari tau ta ia hereva lasi inai tau ia hereva bamona.”​—Ioane 7:46.

Keriso ese Ena Hahediba Taudia be Diba Henia Taudia Ai Ia Halaodia

13. Edena bamona ita diba Iesu ia ura lasi ia mo sibona be diba henia tauna ai ia lao?

¹³ Iesu ia ura lasi ia mo sibona be diba henia tauna, ia ese aposetolo taudia 12 ia abia hidi guna bona gabeai hahediba taudia 70 ia abia hidi, bena ia hamaorodia taunimanima dekenai idia lao Basileia ena sivarai namona idia hadibaia totona. (Luka 9:1; 10:1) Bona kahirakahira guba dekenai ia lao neganai, ia ese ena hahediba taudia ia hamaorodia gaukara ta idia karaia totona. Unai gaukara be dahaka? Mataio 28:​19, 20 ena hereva ia gwau idia ia hadibaia, diba henia taudia ai idia lao totona; bona danu, idia be ma haida idia hadibaia, diba henia taudia ai do idia lao totona.

14. Edena bamona ita diba Keristen taudia ginigunadia be diba henia taudia namodia?

¹⁴ Hahediba taudia be diba henia taudia namodia ai idia lao, a? Oibe! Pentekoste 33 C.E. dekenai, edia haroro gaukara dainai taunimanima 3,000 be Keristen kongregesen matamatana dekenai idia vareai. Daudau lasi murinai unai namba ia daekau bona tatau ibounai 5,000 idia vareai. (Kara 2:41; 4:4) Unai dainai dagedage Iuda taudia idia gwau edia hahediba hereva be Ierusalem ibounai dekenai idia hahonua vadaeni, bona gabeai idia maumau, idia gwau unai hahediba hereva idia harorolaia dainai gabu ibounai dekenai taunimanima idia hakereredia!​—Kara 5:28; 17:6.

15. Hari inai nega lalonai, Iehova be edena dala amo taunimanima ia hereva henidia?

¹⁵ Hari inai nega lalonai be edena bamona? Mataio 24:​3, 45-47 ena peroveta hereva hegeregerena, Biaguna, Iesu Keriso, ese “hesiai tauna mai ena kamonai bona mai ena kara maoromaoro” oreana ia abia hidi, bona iena giroa mai negana lalonai, unai be hari, unai orea ena horoa Keristen taudia ese iena kohu ibounai tanobada dekenai idia naria. Hari inai negai, unai hesiai tauna mai ena kamonai bona mai ena kara maoromaoro oreana ena naria taudia be Iehova ena Witness taudia edia Hakaua Oreana, bona Watch Tower Bible and Tract Society ese edia gaukara be taunimanima ibounai vairanai ia hahedinaraia. Danu, unai hesiai tauna mai ena kamonai bona mai ena kara maoromaoro oreana idia gwauraia Dirava ena dala taunimanima dekenai diba ia henidia totona be maoro. Danu, unai orea ese ita ia hagoadaia taunimanima danu herevahereva heheni namonamo taudia ai ita lao totona. Oibe, Zion’s Watch Tower and Herald of Christ’s Presence ena magasin ginigunana idia duahia taudia dekenai inai sisiba ia henia, ia gwau: “Bema mai emu dekena tauna eiava turana ta bona oi laloa ia ura inai magasin do ia duahia eiava magasin ena sisiba herevana do ia durua diba, namona be ia dekenai oi hahedinaraia; unai dala amo taunimanima ibounai dekenai Hereva oi harorolaia bona namo oi hahedinaraia diba.”

16. Dahaka ese ia hahedinaraia Dirava ese ena hesiai taudia tanobada dekenai ia hereva henidia totona idia be Bible idia duahia sibona be hegeregere lasi?

¹⁶ To, Dirava ena Hereva oi abia bona oi duahia sibona be hegeregere lasi diba korikori oi abia totona bona mauri ia lao henia dalana dekenai do oi raka totona. Namona be dagi bada Etiopia tauna oi laloa, ia be Isaia ena peroveta hereva ia duahia, to ia duahia hereva ena anina dekenai ia lalo-parara lasi. Haroro tauna, Filipo, ese ia dekenai unai peroveta hereva ena anina ia gwauraia hedinarai, bena murinai ia hegeregere ia bapatiso totona bona Keriso ena hahediba tauna ai ia lao totona. (Kara 8:​27-38) Efeso 4:​11-13 dekenai ia hedinarai ma gau ta ita karaia be namo, ita sibona Bible ita duahia be hegeregere lasi, unuseniai, Paulo ia hahedinaraia Keriso ese aposetolo bona peroveta taudia sibona ia abia hidi lasi, to ma “haida be evanelia gaukara taudia, haida be haroro taudia, haida be hadibaia taudia. Inai bamona harihari gaudia ia henia, be Dirava ena taudia ibounai do ia durua totona. Dirava ena hesiai gaukara do idia karaia namonamo, bona Keriso ena tauanina do ia gini goada totona. Unai dekena amo ita ibounai iseda abidadama do ia tamona, bona iseda diba Dirava ena Natuna dekenai danu be tamona. Bona ita be tau badadia do ita halaoa, oibe, Keriso ena bada hegeregerena danu do ita abia gwauraia.”

17. Hari inai nega lalonai, Iehova ese orea ta ia gaukaralaia iena ura taunimanima dekenai ia hadibaia totona; edena bamona unai orea ita diba?

¹⁷ Iehova Dirava bona Iesu Keriso ese taunimanima idia abia hidi ma taunimanima haida idia durudia Keristen taudia goadadia ai idia lao totona; to edena bamona unai abia hidi taudia ita diba? Iesu ia gwau toa ta be idia ta ta dekenai do idia lalokau heheni Iesu ese ena hahediba taudia ia lalokau henidia hegeregerena. (Ioane 13:​34, 35) Ma toa ta be inai: Idia be tanobada ena lasi, Iesu be tanobada ena lasi hegeregerena. (Ioane 15:19; 17:16) Ma toa ta be idia diba Dirava ena Hereva be momokani, Iesu hegeregerena, hanaihanai ena hereva idia abia dae. (Mataio 22:29; Ioane 17:17) Ma toa ta be Dirava ena ladana idia hadibaia, Iesu ia karaia hegeregerena. (Mataio 6:9; Ioane 17:6) Bona ma toa ta be Iesu ena kara idia tohotohoa; Dirava ena Basileia idia harorolaia. (Mataio 4:17; 24:14) Orea tamona sibona ese unai kara ibounai idia karaia, unai be Iehova ena Witness taudia, badina idia be tanobada ibounai dekenai idia haroro taunimanima iboudiai dekenai.

18. Murina stadi edia sivarai rua dekenai diba henia totona herevahereva heheni gabudia toi be dahaka dahaka?

¹⁸ To, diba henia karana ena anina be ita be mai iseda maduna taunimanima ma haida dekenai. Keristen taudia edia maduna be daika daika dekenai diba idia henia? Keristen taudia be taunimanima dekenai diba idia henia totona, idia herevahereva heheni gabudia toi idia kehoa noho be gau badana: ruma bese lalonai, Keristen kongregesen lalonai, bona Keristen ena haroro gaukara dekenai. Murina stadi edia sivarai ese unai hereva do idia kikilaia.

[Footnotes]

Edena Bamona Do Oi Haere?

◻ Diba abia gwauraia neganai bema taunimanima idia herevahereva heheni lasi, dahaka dika ia vara diba?

◻ Diba Henia Taudia Hereadaedia be daidia?

◻ Dirava ese edena dala idauidau amo taunimanima dekenai diba ia henidia?

◻ Iesu be dahaka ia karaia unai dainai ia hedinarai ia be diba henia tauna namona?

◻ Keristen taudia ginigunadia be taunimanima danu idia herevahereva heheni bona diba idia henidia gaukarana amo dahaka ia vara?

[Picture on page 18]

Ena guba Tamana hegeregerena, Iesu be mai hebogahisi danu diba ia henia taunimanima dekenai