Dirava Do Ia Naria ela bona Edena Negai?

LAGANI 3,000 bamona gunanai, aonega tauna ta ia toretore, ia gwau: “Taunimanima ese taunimanima idia biagudia bona idia hahisidia.” (Kohelete 8:9) Ia ese unai hereva ia gwauraia negana amo ema bona hari taunimanima edia kara idia namo idia lao lasi. Taunimanima idia noho negana ibounai lalonai, taunimanima haida o orea haida ese siahu idia abia bona idia iboudiai be edia nega lalonai taunimanima ma haida idia biagudia bona idia kara dika henidia. Iehova Dirava be mai ena boga-auka bada ida unai dika ia haheaukalaia.

Gavamani ese taunimanima milion milion tuari dekenai idia siaia bena idia mase, bona taunimanima idia laloa lasi dainai, kerere bada herea idia vara moni dekenai. Unai dika idia vara negana lalonai, Iehova be mai ena haheauka ida ia naria noho. Hari inai negai, taunimanima ese ozone hodahoda idia hadikaia bona hodahoda bona davara idia hamiroa negana lalonai, Iehova ia do naria noho. Ia itaia, taunimanima ese tanobada ena uma gabudia namo hereadia idia hadikaia bona uda bona gunika gabudia bona animal danu idia hadikaia. Unai dainai, iena lalona ia hisihisi bada!

Dahaka Dainai Dirava Ia Haheauka?

Unai henanadai ena haere do ita davaria totona, haheitalai maragina ta ese ita ia durua diba. Hegeregere, bisinesi ta ena gaukara tauna ta be nega momo ia mai leiti. Unai tau ena kara amo idia vara gaudia mani oi laloa. Unai bisinesi ena biaguna ese dahaka do ia karaia be namo? Reana, hahemaoro maoromaoro hegeregerena, unai tau be gaukara amo ia hadokoa be namo. To reana Bible ena sisiba herevana ta ia laloa lou, ia gwau: “Ia badu haraga lasi tauna be lalo-parara tauna korikorina, to ia haheauka diba lasi tauna be kavakava bada herea.” (Hereva Lada-isidia 14:29) Ia aonega dainai, reana do ia naria guna, bona gau ta do ia karaia haraga lasi. Reana nega do ia atoa ma tau ta be gaukara dekenai do ia hadibaia totona, bena unai dala amo iena bisinesi lalonai kerere do ia habadaia lasi.

Danu, reana ia hebogahisi dainai do ia naria. Reana ia kara kerere gaukara tauna do ia sisiba henia, iena kara do ia hanamoa totona, ani? Reana unai gaukara tauna do ia hereva henia, bona ia leiti momo ena badina do ia tahua. Iena kara ena badina be hekwakwanai ta ia vara dainai, a? To unai hekwakwanai idia hanaia diba, a? Eiava ia leiti ena badina be gaukara tauna ia gwau-edeede dainai? Ena be bisinesi ena biaguna be reana do ia naria mai ena haheauka ida, to do ia naria ela bona hanaihanai lasi. Gaukara tauna ese iena kara do ia hamaoromaoroa eiava gaukara amo ena biaguna ese do ia hadokoa. Unai dala amo bisinesi bona bisinesi ena taravatu idia badinaia gaukara taudia do ia kara maoromaoro henidia.

Unai hegeregerena, taunimanima idia kara dika neganai, Iehova Dirava be mai ena haheauka ida ia naria, bona unai dala amo nega ia henia bena dala maoromaorona do ia karaia, hekwakwanai haida hanaia totona. Danu, iena haheauka dainai kara dika taudia be mai edia dala edia kara do idia hamaoromaoroa totona bena hahenamo do idia abia ela bona hanaihanai. Unai dainai, Bible ese ita ia hagoadaia, Dirava ena haheauka ita lalohisihisilaia lasi. Ia gwau: “Do umui laloaboio lasi, Lohiabada ese umui ia naria noho, mai haheauka danu. Ia ese nega namona umui dekenai ia henia noho inai, iena hahemauri do umui davaria totona.”​—2 Petero 3:15.

Dirava Ena Haheauka Ia Haheitalaia Gauna Ta

Noa ena negai ia vara Abata badana ia do mai lasi neganai, Iehova Dirava ia naria mai haheauka danu. Unai negai, tanobada be dagedage karana amo ia honu bona ia dika bada herea. Bible ia gwau: “Iehova ese taunimanima ia itaia, edia kara dika be bada herea gabu ibounai dekenai . . . Vadaeni ia gwau, Lau karaia gaudia, taunimanima ibounai do lau hamasea haorea tanobada gabu ibounai dekena amo.” (Genese 6:​5, 7) Oibe, Iehova Dirava ese dala ia lalohadailaia unai nega ena kara dika do ia haorea totona: kara dika taudia do ia kokia. To unai ia karaia haraga lasi. Badina be dahaka?

Badina be taunimanima iboudiai idia kara dika lasi. Dirava ena vairanai Noa bona ena ruma bese taudia idia kara maoromaoro. Unai dainai, namo do idia davaria totona, Iehova be mai haheauka ida ia naria ela bona unai kara maoromaoro taudia momo lasi ese edia hahemauri dalana idia hegaegaelaia diba. Danu, Dirava be nega daudau lalonai ia naria dainai, Noa be “kara maoromaoro ia harorolaia tauna” ai ia lao diba, bona unai kara dika taudia dekenai dala ia henidia edia kara do idia hamaoromaoroa totona. Bible ia gwau: “Mai haheauka danu [Dirava ese] idia ia naria noho, Noa ese lagatoi ia karaia neganai. Lagatoi lalonai idia noho taudia, ibounai 8 sibona be ranu dekena amo idia mauri.”​—2 Petero 2:5; 1 Petero 3:20.

Hari Inai Negai Dirava Ia Naria Noho Ena Badina

Hari inai nega be unai nega bamona. Tanobada be dagedage amo ia honu lou. Noa ena nega lalonai ia vara hegeregerena, Dirava ese inai tanobada ia hahemaoro henia vadaeni, bona Bible ia gwau inai tanobada ia “noho hegaegae ela bona Kota Badana Dinanai. Unai neganai lahi badana ese tanobada bona guba do ia araia ore, bona Dirava idia negea taudia be do idia boio.” (2 Petero 3:7) Unai ia vara neganai, tanobada do idia hamiroa lou lasi, manoka taudia do idia dagedage henidia lasi bona taunimanima be mai mataganigani ida siahu do idia gaukaralaia kerere lasi.

Vadaeni, badina be dahaka Dirava be ia idia negea taudia ia hadikaia ore lasi? Badina be henanadai badadia haida idia vara bona edia haere idia hedinarai be namo, bona gau badadia haida ia hegaegaelaia be gau badana dainai. Momokani, Iehova ese kara dika ena hekwakwanai badana do ia haorea ela bona hanaihanai, bona unai do ia karaia totona, gau momo ia hegaegaelaia danu; unai gaudia ta be kudou-maoro tanobada taudia be gorere bona mase amo do ia hamauridia.

Unai gau ia laloa dainai, Iehova ia ura Hahemauri Tauna ta do ia siaia, bona boubou gauna ta do ia henia iseda kara dika edia davana do ia karaia totona. Bible ese unai Hahemauri Tauna inai bamona ia herevalaia: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Lagani tausen tausen lalonai, Dirava ese dala ia hegaegaelaia, Iesu do ia mai bona taunimanima dainai iena mauri do ia bouboulaia totona. Unai lagani ibounai lalonai, Dirava be mai lalokau ida ia haheauka bona ia naria. To Dirava ese ia henia gauna ita naria be namo, ani?

Kahirakahira lagani 2,000 gunanai, Iesu ese boubou gauna ia henia taunimanima durua totona. Unai dainai, dahaka dainai Dirava be mai haheauka ida ia naria noho? Badina ta be inai: Iesu ia mase murinai, edukeisini dala badana ia matamaia. Gau badana be taunimanima idia diba unai gau hereadaena ia vara, bona dala idia abia unai harihari gauna do idia abia dae eiava do idia dadaraia totona be namo. Taunimanima be unai bamona do idia karaia totona, nega daudau do idia abia be namo, to unai nega lalonai gau namodia do idia vara. Bible ia gwau Iehova “ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.”​—2 Petero 3:9.

Henanadai Badana Gavamani Dainai

Ma gau badana ta do ia vara totona nega bada do ia heau. Gau badana be taunimanima lohiaia dala namona, gavamani namona unai, do idia davaria. Nega matamanai, taunimanima be Dirava ena gavamani henunai idia noho. To Eden lalonai, iseda tamana bona sinana ginigunadia ese unai gavamani idia rakatania. Idia ura lasi Dirava ese idia do ia biagua, to idia ura idia sibona idia lohiaia. (Genese 3:​1-5) To, momokani, Dirava ese taunimanima ia havaraia lasi idia ese sibona do idia lohiaia totona. Peroveta tauna Ieremia ia toretore, ia gwau: “Iehova e, lau diba taunimanima ena dala be sibona dekenai ia noho lasi, ena raka dalana ia abia hidi diba lasi, bona taunimanima edia raka be idia sibona idia gwauraia hidi diba lasi.”​—Ieremia 10:23; Hereva Lada-isidia 20:24.

To, gavamani dainai henanadai badana ia vara dainai, Iehova be mai ena haheauka ida ia naria, bona nega ia henia unai henanadai ena haere do ia hedinarai goevagoeva totona. Momokani, lagani tausen tausen ia henia vadaeni, taunimanima ese gavamani dala idauidau iboudiai do idia haginia diba totona. Unai amo dahaka ia vara? Ia hedinarai goevagoeva, taunimanima edia gavamani iboudiai amo, ta lasi ese hahisia karana, hahemaoro kara kereredia bona lalohisihisi havaraia gaudia idaudia ia kokia diba.

Dirava ia gwau tanobada gavamanidia iboudiai do ia kokia bona edia gabu ai ia sibona ena gavamani do ia haginia. Taunimanima edia sivarai dainai, tau ta be mai ena momokani ida ia gwau diba Dirava ia kara maoromaoro lasi, a? Lasi momokani! Inai Bible peroveta herevana ena hagugurua negana ita moalelaia bada: “Unai pavapava edia negai, guba Diravana ese basileia ta do ia haginia, nega ta ai do idia hadikaia ore diba lasi gauna. Bena ena lohia siahuna do ia hanai lasi, bese idauna ta dekenai. Unai basileia iboudiai do ia hamakohidia maragimaragi bona idia do ia haoredia, bena ia sibona do ia gini ela bona hanaihanai.”​—Daniel 2:44.

Unai Basileia ena guba Pavapava be toreisi lou tauna Iesu. Nega daudau lalonai Dirava ese Iesu ia hegaegaelaia unai dagi do ia abia totona bona taunimanima haida ia abia hidi Iesu danu do idia lohia hebou totona. Unai nega ibounai lalonai, Dirava ia naria bona haheauka ia hahedinaraia.

Hari Inai Negai, Dirava Ena Haheauka amo Namo Oi Davaria

Hari inai negai, Dirava ia haheauka dainai, tano 212 bona reana ma tano haida lalonai, taunimanima milion milion ese namo idia davaria. Idia ura Dirava idia kamonai henia bona iena guba gavamani ena hesiai gaukara idia karaia; unai dainai idia lalo-tamona. Edia Kingdom Hall lalodiai idia hebou neganai, idia davaria Bible ena taravatu be edia mauri lalonai idia badinaia be namo herea. Inai tanobada ena politikol kara ese taunimanima ia hapararaia, bona unai kara lalonai idia vareai lasi. To mai ena haheauka ida Dirava ese taunimanima edia gavamani edia gaukara ia koua lasi negana lalonai, idia be sibodia idia atoa unai gavamani edia siahu henunai.​—Mataio 22:21; Roma 13:​1-5.

Taunimanima momo be unai bamona idia gaukara hebou namonamo neganai, ia hedinarai Iehova ese hetura kara iena taunimanima edia huanai ia havaraia diba. Unai taudia ese sibona edia dala idia abia hidi diba bona Iehova lalokau henia dalana idia manadalaia bona idia ura Iehova idia hesiai henia. Iesu ese ia hamatamaia gaukarana, Dirava ena Basileia ena sivarai namona harorolaia gaukarana unai, idia do karaia noho, bona reana unai nega lalonai unai taudia oi davaria. Iesu ese unai gaukara ena dokona ia perovetalaia, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.”​—Mataio 24:14.

Nega Daudau Do Ita Naria Lasi!

Dirava ese dala ia hegaegaelaia iena kara maoromaoro gavamani ese nega ibounai tanobada do ia lohiaia totona. Ita itaia diba gaudia idia hamomokania, kahirakahira unai hegaegaelaia gaukarana ibounai ia haorea vadaeni. Iesu ese taunimanima edia gavamani edia kerere dainai idia vara gau dikadia ia sivarailaia murinai, ia gwau: “Inai gaudia do idia vara do umui itaia, vadaeni do umui diba Dirava ena Basileia ia kahirakahira vadaeni.”​—Luka 21:​10, 11, 31.

Kahirakahira, Dirava ese kara dika taudia be tanobada amo do ia abia oho. Unai neganai, salamo torea tauna ena hereva edia anina do idia vara momokani, ia gwau: “Kara dika taudia be do idia ore . . . Nega sisina murinai, kara dika tauna do ia noho lasi; ena gabu do oi tahua, to do oi davaria lasi.” (Salamo 37:​9, 10) Oi ese kara dika ta lasi tanobadana oi laloa diba, a? Unai negai, daika ese taunimanima edia gaukara do ia naria? Bible ia gwau: “Pavapava ta be kara maoromaoro dekenai do ia lohia, bona lohia taudia do idia lohia kara maoromaoro dalana dekenai. Bona kara maoromaoro ese maino do ia havaraia, bona kara maoromaoro amo laga-ani bona noho namo do idia vara ela bona hanaihanai. Bona lauegu bese taudia be maino gabuna dekenai do idia noho, bona gari lasi rumadia ai, bona regerege lasi laga-ani gabudia dekenai.”​—Isaia 32:​1, 17, 18.

Unai dala amo, Dirava ena guba gavamani be taunimanima edia kara dika ese ia havaraia gau dikadia iboudiai do ia kokia bona Ia idia naria taudia be noho hebou namonamo taunimanima besena ta ai do ia halaodia. Bible ese edia noho hebou namonamo karana inai bamona ia herevalaia: “Dohore uda sisia be mamoe natuna danu do idia noho, bona lepadi be nanigosi natuna danu do idia hekure, boromakau natuna bona leona bona idia ubua namonamo gauna do idia noho hebou; bona mero maragina ta ese do ia hakaudia. Idia ese tau ta do idia hahisia lasi bona gau ta do idia hadikaia lasi egu ororo helagana lalonai; badina be tanobada ibounai be Iehova diba maorona amo dohore ia honudae, davara ia honudae hegeregerena.”​—Isaia 11:​6-9.

Dirava ese haheauka ia hahedinaraia dainai, unai gau namo hereadia do idia vara! Unai dainai, namo lasi ita maumau bona ita gwau Dirava be nega daudau herea ia naria dainai dika ia vara. To idau, namona be Dirava ena haheauka negana lalonai oi sibona be iena Basileia ena siahu henunai oi atoa, ani? Bible amo iena dala maorodia oi tahua bona unai dala oi badinaia. Dirava henunai idia noho hebou namonamo taudia oi bamodia. Bena, Dirava ena haheauka dainai hahenamo do oi davaria ela bona hanaihanai.