‘Iehova Idia Naria Taudia Iboudiai Idia Moale’

DOMENICK PICCONE ENA SIVARAI

Lagani 1920 murinai, egu tamana bona sinana ese Italy idia rakatania bona United States dekenai idia lao. Gabeai, South Philadelphia dekenai idia lao idia noho totona; unai negai, unai gabu ena ladana be Little Italy. Lagani 1927 ia do mai lasi neganai, Bible Student taudia danu idia hebou matamaia; gabeai, unai orea taudia edia ladana be Iehova ena Witness taudia.

LAU be lagani 1929 ai lau vara, unai dainai lau be beibi negana amo Bible ena hereva momokani lau kamonai. Lau laloatao Witness taudia be aiemai ruma dekenai idia hebou bena idia lao haroro. Idia haroro gabudia be Pennsylvania ena hanua haida; unai hanua lalonai, taunimanima momo ese Katolik tomadihona idia goadalaia, bona unai gabu dekenai tano idia geia coal idia abia totona. Unuseniai nega momo polisi ese tadikaka idia dogoatao. Lagani 1941 ai, St. Louis, Missouri dekenai, Iehova ena Witness taudia edia hebouhebou ta dekenai lau bapatiso. Unai nega murinai, hekwakwanai haida idia vara.

Lauegu gabu dekenai idia noho memero dikadia lau bamoa matamaia; dala dekenai kuku lau ania bona laki gadara lau karaia. Egu tamana bona sinana idia itaia lau idia biagua namonamo diba lasi, unai dainai idia ura ai be hanua ena gabu idauna ta dekenai ai lao, unuseniai do ai noho totona. Lau moale lasi, badina dala dekenai lau bamoa turadia be lau itaia diba lasi. To, hari, egu mauri dalana gunana lau laloa lou neganai, lau ura egu tamana lau tanikiu henia bada. Unai hebamo dikana amo lau ia kokia totona, moni ia negea. Guna, gaukara gabunai ia lao totona, aena amo ia raka diba, to gabeai, train amo ia lao gaukara bona ia lao gabuna ia daudau. To aiemai ruma bese be ma gabu ta dekenai idia noho dainai, lau ese tadikaka bona taihu lau bamoa lou.

Egu Ura Misinari Gaukara DekenaiIa Matamaia

Lagani kahirakahira iboudiai, ai be South Lansing, New York dekenai ai lao, Watchtower Bible School of Gilead ena kosi idia haorea taudia edia graduation [edia setifiket idia henia karana] do ai itaia totona. Lau itaia unai misinari taudia idia siaia tanobada ena gabu idauidau dekenai; unai dainai, egu kudouna lalonai lau ura misinari gaukara do lau karaia. Unai dainai, haisikuli lau haorea murinai, regular pioneer gaukara be May 1947 ai lau hamatamaia.

Aiemai kongregesen lalonai pioneer taihuna ta ladana Elsa Schwarz ia noho, bona haroro gaukara ia goadalaia. Nega ibounai, iena tamana bona sinana ese unai kekeni idia hagoadaia misinari gaukara do ia karaia totona. Vadaeni, reana oi diba dahaka ia vara. Lagani 1951 lalonai, ai headava. Pennsylvania dekenai ai be pioneer gaukara ai karaia hebou, bona unai nega lalonai aplikesen pepana ai siaia, Gilead misinari sikuli dekenai do ai lao totona. Lagani 1953 ai, ai idia boiria Gilead ena kalasi namba 23 dekenai. Hua 5 lalonai Bible ai stadilaia goadagoada bona misinari gaukara totona ai hegaegae namonamo. Bena Toronto, Canada ena hebouhebou ta dekenai aiemai setifiket idia henia kosi ai haorea dainai; bona aiemai misinari gaukara gabuna idia gwauraia​—Spain!

Hekwakwanai Spain Dekenai

Lagani 1955 ai, ai hegaegae emai misinari gaukara gabuna dekenai do ai lao totona. Unai negai Elsa bona lau be mai emai henanadai momo. Spain! Unai tano be edena bamona? Katolik siahu bada lohiana Generalissimo Francisco Franco ese unai bese ia lohiaia mai dagedage danu, bona Iehova ena Witness taudia edia haroro gaukara idia taravatua. Unai negai, ai be edena bamona do ai noho?

Society ena hedikwota Brooklyn dekenai ese ai idia hadibaia, polisi ese Watch Tower Society ena vice presiden, Frederick Franz, bona Argentina amo ia mai misinari tauna ta, Alvaro Berecochea, bona ma tadikaka haida danu be idia dogoatao. Barcelona murimurinai ia noho uda gabuna dekenai tadikaka ese hebouhebou ta idia karaia hehuni. To, polisi idia kamonai hehuni dalanai idia hebouhebou bona hebouhebou dekenai idia mai taudia kahirakahira iboudiai idia dogoatao.a

Ai idia hadibaia, Barcelona dekenai do ai ginidae neganai, reana tadikaka be dala lasi peleini gabunai do idia mai ai do idia hedavari henia totona. Inai oda be ai dekenai idia henia: “Hotel ta oi tahua, bona daiutu oi rentalaia. Bena iena address be Society ena New York opesi dekenai oi siaia.” Ai ese Isaia ena hereva ai laloatao, ia gwau: “[Iehova] idia naria taudia iboudiai idia moale. Bona oiemu taiana ese oi murinai hereva ta do idia kamonai, ia gwau: ‘Dala be inai. Ia lalonai umui raka, umui taunimanima.’ ” (Isaia 30:​18, 21) Ai diba namona be Iehova ai naria bona iena orea taudia edia hahegani ai badinaia.

Aiemai tamana bona sinana bona aiemai turadia idia mai New York dekenai ai idia bamahuta henia totona. Idia ai bamahuta henia, bena nega sisina murinai, sisima Saturnia ai guia, bona ai be Hudson sinavaina dekenai ai heau lao Atlantic gadobada dekenai. Unai be egu tamana lau itaia negana ginigabena. Lagani rua murinai, lau be idau tanona ai lau noho lalonai, egu tamana be nega daudau lalonai ia gorere murinai ia mase.

Gabeai, Barcelona hanuana dekenai ai ginidae emai misinari gaukara ai karaia totona. Unai hanua dekenai sisima vareai gabuna ia noho. Ai ginidae neganai, ori ese dina ia koua bona medu ia diho. To ai be customs gabuna dekenai ai gini neganai, ia be hegeregere “dina ia tara” bamona, badina taunimanima haida edia vairana ai itaia idia kiri bada. Alvaro Berecochea bona Spain tadikaka ma haida idia mai, ai idia hedavari henia totona. Ai moale bada herea, badina ai davaria aiemai tadikaka be dibura rumana amo idia ruhaia vadaeni.

Vadaeni, nega ia ginidae Spain gadona ai manadalaia totona. Unai negai, misinari taudia ese gado matamata idia manadalaia dalana be auka herea​—gado hadibaia bukadia bona gado hadibaia taudia idia gaukaralaia lasi. Unai negai, Society ese gado hadibaia kosi ia hegaegaelaia lasi. Ai ese aiemai haroro horadia ai hagugurua bona ai haroro neganai gado matamatana ai herevalaia toho.

Katolik Dagedage Lohia Siahuna Henunai Haroro Gaukara Ai Karaia

Unai negai Iehova ena orea taudia be momo lasi Spain dekenai. Lagani 1955 ai, Spain dekenai pablisa edia namba ia daekau ia lao 366, to unuseniai idia noho taudia iboudiai be 28 milion bamona. Spain tanona ibounai lalonai, kongregesen iboudiai be 10 sibona. Nega daudau lalonai ia be unai bamona do ia noho, a? Lau bona egu hahine ese ruma ta ruma ta gaukara ai hamatamaia murinai, ai davaria sivarai namona harorolaia taudia dekenai Spain be paradaiso gabuna ta bamona. Oibe, taunimanima idia ura dikadika hereva momokani do idia diba.

To, gavamani ese haroro gaukara ia taravatulaia; vadaeni, ai ese unai gaukara be edena dala amo ai karaia diba? Nega momo, dala ena ruma iboudiai dekenai ai lao lasi bona flat iboudiai dekenai ai lao lasi. Barcelona dekenai flat rumadia badadia momo, mai edia story 5 o 6 idia haginia, bona ai idia hadibaia namona be guna atai kahanai taunimanima ai vadivadi henidia, bena gabeai henuna kahanai idia noho taudia ai vadivadi henidia. Reana kahana ta ta dekenai ai be flat tamona sibona dekenai do ai lao o reana kahana haida do ai reaia. Unai dala amo, bema ruma tauna ta ia badu, bona polisi taudia ia hadibaia ena gabu dekenai ai haroro, polisi ese ai do idia davaria haraga diba lasi.

Tadikaka edia ruma dekenai kongregesen edia hebou idia karaia, bona kongregesen ta ta iboudiai dekenai reana buka stadi grup toi o hani idia noho. Unai dala amo hua ta ta iboudiai lalonai kongregesen ia naria tauna ese buka stadi grup iboudiai ia vadivadi henia diba. Buka stadi naria tauna ena maduna be kongregesen ena hebou iboudiai ia naria, bona unai be wiki ena adorahi rua dekenai idia karaia, bona idia karaia neganai taunimanima 10 o 20 sibona idia noho.

Emai mauri dala idauna ai manadalaia be gau badana. Unai negai, Spain dekenai Society ena misinari rumadia be lasi. Bema mai dalana, ai be tadikaka danu ai noho hebou edia ruma lalodiai. Elsa be charcoal nanadu gauna ia manadalaia be auka herea! Gabeai, kerosin nanadu gauna ta ai hoia, pani tamona atoa gauna; unai be heduru gauna badana!

Tadikaka Idia Dagedage Henia bona Idia Lulua

Gabeai, ai kamonai Andalusia gabuna dekenai tadikaka idia dagedage henia matamaia, bona unuseniai polisi ese special pioneer tauna ta idia dogoatao. Madi, ia dekenai nout-buk ta ia noho bona unuseniai tadikaka momo edia ladana bona address ia torea; idia be Spain ena gabu iboudiai lalonai idia noho. Sivarai ai kamonai hanua momo lalonai polisi ese aiemai tadikaka idia dogoatao. Barcelona kahirakahira dekenai idia noho gabudia ai polisi be tadikaka edia ruma lalonai idia vareai bona tadikaka idia dagedage henidia. Unai murinai, Barcelona lalonai tadikaka idia dagedage henia.

Hua haida gunanai, polisi ese lau idia abia lao edia hedikwota dekenai bona lau idia henanadai henia. Hora haida murinai lau idia ruhaia, bona lau laloa ma gau ta do idia karaia lasi lau dekenai. To unai murinai, America Embassy taudia ese lau idia hamaoroa, Spain gavamani ese lau idia lulua hemaraina lau davaria lasi totona, namona be Spain lau rakatania bona namona be lauegu ura dainai lau karaia. Unai nega sisina murinai, polisi taudia ese ai idia hamaoroa, ma dina 10 idia do ore lasi neganai, Spain ai rakatania be namo. Nega be lasi dainai Watch Tower Society dekenai leta ai siaia diba lasi; unai dainai dahaka do ai karaia be namo? Ai laloa reana Spain kahirakahira dekenai ia noho misinari gabuna ta dekenai ai lao be namo; vadaeni, west kahana dekenai Portugal tanona dekenai ai lao.

Misinari Gaukara Idauna Ta bona Gado Idauna Ta

July 1957 ai, ai be Lisbon, Portugal dekenai ai ginidae, bena ai idia siaia Porto hanuana dekenai misinari gaukara do ai karaia totona. Unai hanua be Lisbon ena mirigini kahana sisina daudau dekenai ia noho. Taunimanima idia laloa unai hanua be Portugal ena hanua badana iharuana, bona taunimanima momo be unai gabu idia diba badina unuseniai port vine ranudia namodia idia karaia. Unai hanua dekenai kongregesen ia goada, bona iena hebou be ruma badana ena henuna kahana dekenai idia karaia. Portugal dekenai danu gavamani ese haroro gaukara ia taravatulaia, bona siahu bada dagedage tauna Salazar ese Portugal ia lohiaia. To, unuseniai tadikaka edia noho be Spain tadikaka edia noho amo ia idau vaitani. Kongregesen edia hebou be tadikaka edia ruma dekenai idia karaia, bona tadikaka 40 ia lao 60 unai hebou dekenai idia mai. Idia hahedinaraia lasi unai ruma dekenai Iehova ena Witness taudia idia hebou. Ena be Portugal gado lau diba lasi, to kongregesen naria tauna ena dagi be lau idia henia. Unai neganai danu, gado matamata ai diba totona ai hekwarahi bada.

Lagani tamona bamona murinai, ai idia siaia Lisbon dekenai misinari gaukara do ai karaia totona. Unuseniai, ai be sibona emai ruma dekenai ai noho; ia be flat ta bona Lisbon hanuana ena ororo gabunai ia noho. Unai be nega ginigunana ai be sibona emai ruma dekenai ai noho diba. Sekit naria gaukara be ai idia henia​—unai sekit be Republic of Portugal ena kahana ibounai. Ai be Portugal dekenai ai ginidae neganai, pablisa taudia iboudiai be 305 sibona bona kongregesen iboudiai be 5 sibona.

Hekwakwanai Negana Ia Hamatamaia

Mapu haida dekenai Portugal bona ia biagua tanodia idia hahedinaraia neganai, inai toretore ia noho: “Portugal ena tanodia dekenai dina ia diho lasi.” Unai hereva be momokani, badina tanobada ibounai lalonai Portugal ese tano haida ia biagua. Unai tano badadia rua be Mozambique bona Angola Africa dekenai. Lagani 1961 ai, ia hedinarai unai tano rua lalonai hekwakwanai haida idia vara, bona Portugal gavamani ia laloa iena tuari taudia edia namba ia habadaia be gau badana.

Tuari gaukara do idia karaia totona, tadikaka idia boiria neganai, dahaka do idia karaia? Idia haida be idia gorere dainai gwaumaoro idia henia tuari gaukara do idia karaia lasi. To tadikaka momo idia gwauraia hedinarai edia Keristen tomadihona dainai tuari orea lalonai do idia vareai lasi. Nega sisina murinai, tadikaka idia dagedage henidia bada. Branch opesi ia kamonai polisi oreana idauna ta, ladana P.I.D.E. (Polícia Internacional e Defesa do Estado), ese pioneer taudia idia dogoatao bona idia dadabaia dikadika. Misinari taudia haida be polisi edia hedikwota dekenai idia boiria mai idia henanadai henidia totona. Bena kota ese tadikaka toi mai edia adavana idia hamaoroa, dina 30 idia do ore lasi neganai Portugal idia rakatania. Ai ibounai ai apil.

Unai misinari taudia mai edia adavana be polisi edia hedikwota dekenai idia boiria mai, P.I.D.E. ena dairekta ese henanadai ia henidia totona. Guna, branch opesi ia naria tauna, Eric Britten, bona iena hahine, Christina, idia henanadai henia. Bena gabeai, Eric Beveridge bona iena hahine, Hazel, idia henanadai henia, bena ma gabeai lau bona Elsa idia henanadai henia. Polisi biaguna ese ai ia samania koikoi, ia gwau Komiunis taudia ese ai idia gaukaralaia West tanodia edia mauri idia hadikaia toho totona, badina ai gwau taunimanima be tuari lalonai idia vareai be dika. Aiemai apil herevadia idia kamonai lasi.

Ai lalohisihisi bada badina dagedage lohia ta dainai tadikaka bona taihu 1,200 idia hekwarahi bada neganai, idia ai rakatania! Tadikaka Beveridge bona iena hahine be Spain dekenai idia lao bona Tadikaka Britten bona iena hahine be England dekenai idia giroa lao, to idia ese ai edeseniai do idia siaia? Muslim tanona Morocco!

Islam Tanona Morocco Dekenai Ai Haroro

Iehova ai naria lou, guna ai karaia hegeregerena. Tano idauna ta, taunimanima karadia idaudia bona gado idaudia do ai manadalaia! Morocco Basileiana lalonai gavamani ese Arab gadona, France gadona bona Spain gadona ia gaukaralaia. Unuseniai Witness taudia 234 be kongregesen 8 lalonai idia noho. Unai tano ena tomadiho badana be Islam bona Muslim taudia haroro henidia be idia taravatua. Unai dainai Muslim lasi taudia sibona ai haroro henidia diba; idia momo be Europe taudia.

Lagani 1955 bamona murinai, misinari taudia be Morocco dekenai idia mai bona unai negai pablisa taudia edia namba ia bada daekau. To Morocco gavamani ese kara haida ia karaia matamaia bona unai kara dainai Europe taudia idia hekwarahi. Unai negai idau bese taudia momo ese Morocco idia rakatania, tadikaka momo danu.

Muslim lasi taudia edia namba ia diho ia lao dainai, dala ai tahua Muslim taudia ai haroro henidia to ai habadudia lasi totona, bona unai amo haida be polisi dekenai ai idia samania. Tangier bona ma hanua haida dekenai taunimanima momo ese ai idia samania, bona unai murinai ai idia hamaoroa dina 30 idia do ore lasi neganai, Morocco ai rakatania. May 1969 ai, lau bona Elsa be unai tano amo danu idia lulua.

Nega Kwadogi Gaukarana Ta, A?

Ai idia hamaoroa Brooklyn dekenai do ai giroa lao. Unai lagani ena siahu negana ai branch opesi naria taudia do idia hebou bona lau idia hamaoroa unai hebou dekenai do lau mai. Unai hebou lalonai lau idia hadibaia ai do idia siaia El Salvador, Central America dekenai, bona branch opesi naria gaukarana do lau karaia. Idia gwau reana unai gaukara do lau karaia lagani 5 bamona lalonai, badina unuseniai gavamani ena taravatu ese Witness taudia edia gaukara ia abia dae lasi, bona unai dainai, misinari taudia be lagani 5 sibona unuseniai idia noho diba, bona unai nega murinai idia luludia.

El Salvador​—unai gabu dekenai ai gaukara be namo herea! Pablisa taudia iboudiai be 1,290 bona hua ta ta iboudiai lalonai pioneer taudia edia namba ena averes be 114. Unuseniai, taunimanima ese Dirava idia gari henia, Bible idia ura henia bona taunimanima idia abia dae. Ruma kahirakahira iboudiai dekenai, taunimanima idia ura ai vareai ai haroro henidia totona. Nega sisina murinai, Bible stadi momo ai hamatamaia.

Ai itaia hereva momokani idia kamonai henia taudia edia namba ia bada daekau, bona tadikaka idia durua be gau badana. Unai dainai ai lalohisihisi badina ai ura lasi lagani 5 murinai El Salvador ai rakatania. Unai dainai tadikaka idia gwau namona be dala idia tahua gavamani ese taravatu ia karaia Iehova ena Witness taudia edia gaukara ia abia dae totona. December 1971 ai, pepa idauidau be gavamani ai henia, bona April 26, 1972 ai, ai moale bada herea badina gavamani ena niuspepa, Diario Oficial, lalonai sivarai ai duahia gwaumaoro idia henia ai dekenai. Misinari taudia be lagani 5 murinai do idia lulua taravatuna idia kokia, bona idia ese visa idia abia diba, nega ibounai El Salvador lalonai do idia noho diba totona.

Hetoho bona Hahenamo

Lagani momo lalonai, tano idauidau dekenai, turadia namo hereadia ai davaria bona aiemai hesiai gaukara ese anina namona ia havaraia. Elsa ese ekspiriens namona ia abia San Salvador lalonai. Ia ese tisa hahinena ta bona iena adavana, ami tauna ta, ia davaria. Unai tisa ena turana ta danu be hereva momokani dekenai ia kamonai. Guna, tau ia ura lasi Bible ena hereva ia kamonai, to ia be hospital dekenai ia noho neganai ai vadivadi henia bona ai ia abia dae. Gabeai, Bible ia stadilaia, bona iena ami gaukarana ia rakatania, bona ai ia bamoa haroro gaukara lalonai.

Unai nega lalonai, hahine ta be Kingdom Hall dekenai ia mai bona Elsa ia nanadaia ia stadi henia tauna be guna ami gaukara ia karaia tauna eiava. Guna, unai hahine be unai tau ena turana bona nega momo idia mahuta hebou! Iehova ena Witness taudia be ia danu Bible stadi idia karaia. Distrik hebouhebou dekenai, guna ami gaukara ia karaia tauna, iena hahine, iena hahine ena turana, bona unai tau be guna ia sihari henia hahinena, iboudiai idia bapatiso!

El Salvador Dekenai Pablisa Edia Namba Ia Bada Daekau

Pablisa edia namba ia bada daekau momokani dainai, Kingdom Hall momo idia haginia, bona hari unai tano lalonai idia haroro Witness taudia edia namba ese 18,000 ia hanaia. To unai ia vara lalonai, hetoho bona hekwakwanai idia vara danu. Lagani 10 lalonai, tadikaka ese Iehova ena ura idia karaia negana lalonai El Salvador taudia idia tuari heheni. To tadikaka be unai tuari lalonai idia vareai lasi bona Iehova ena Basileia idia badinaia noho.

Lau bona Elsa be nega ibounai hesiai gaukara ai karaia laganidia ai haboua neganai, ai davaria lagani 85 lalonai ai karaia vadaeni. Ai davaria Iehova ai naria noho neganai bona bema ‘ai murinai hereva ta do ai kamonai, ia gwau: “Dala be inai. Ia lalonai umui raka, umui taunimanima,” ’ bena unai hereva ai badinaia, vadaeni, emai helaro gauna do ai reaia lasi. Iehova ena hesiai gaukara be nega ibounai ai karaia dainai, mauri namona bona mauri mai anina ai moalelaia vadaeni.

[Footnotes]

[Picture of Domenick and Elsa Piccone on page 23]

[Picture on page 24]

Hebouhebou ta idia karaia Spain ena uda gabuna ta dekenai, lagani 1956

[Picture on page 25]

Morocco dekenai Muslim lasi taudia ai haroro henidia

[Picture on page 26]

El Salvador ena branch opesi, hari ai be unuseniai ai gaukara