Ogogami Dika Hereana amo Taga Bada Herea Davaria

MANUEL DE JESUS ALMEIDA ESE IA GWAURAIA

Lau be October 1916 ai lau vara, natudia 17 amo lau be dokona. Lauegu kakana memero bona kekeni badadia 9 be gorere bona aniani namonamo lasi karana dainai idia mase, unai dainai idia lau diba lasi. Ai do mauri noho natudia 8 be emai tama bona sina danu, Porto badinai ia noho hanua maragina ta dekenai ai noho, Portugal ai.

AIEMAI ruma maragina ena lalona be maragi bona mahuta daiutuna be tamona. Ai inua ranuna be ranu guri ta amo ai abia, ena daudau be kilomita kahana ta bamona, bona aiemai nanadu gabuna be guna taudia edia bamona.

Lauegu kakana memerodia edia tauanina ena goada ia hegeregere neganai koni umadia dekenai idia gaukara matamaia. Idia abia monina amo emai bese ena aniani idia hoia. Edia heduru dainai lau sibona be edukeisen sisina lau abia. Ena be emai mauri be auka, to ai ese Katolik Dubuna ai badinaia goadagoada, ai laloa dala ta ai unai ese emai mauri do ia durua.

May ena hua lalonai, dubu ese idia gwauraia novena idia karaia. Dina 9 lalodiai, daba momokani ai ia do dibura neganai, dubu dekenai ai raka lao. Unuseniai ai guriguri, ai abia dae unai kara ese Dirava amo hahenamo do ia mailaia. Danu, ai laloa pris tauna be tau helagana, Dirava ena gwaukau tauna. To, nega ia lao lalonai, aiemai lalohadai ai haidaua.

Gau Namona Lau Tahua

Ai ese dubu ena takisi monina ai henia lasi neganai, pris tauna ese aiemai hekwakwanai badana moni dekenai ia laloa lasi. Unai ese aiemai lalona ia hamanokaia. Lauegu lalohadai dubu dekenai ia haidaua momokani, unai dainai egu mauri lagani be 18 neganai, lau ese egu ruma bese lau rakatania mauri lalonai unai uma gaukara bona dubu ida hepapahuahu karana ia hanaia gauna namona ta lau tahua totona. Lagani 1936 lalonai, Lisbon, Portugal ena siti badana dekenai lau ginidae.

Unuseniai lau ese Edminia lau davaria. Ena be lau laloa dubu ese lau ia koia, to ai ese kastom ai badinaia bona Katolik Dubu dekenai ai headava. Bena lagani 1939 lalonai, Tanobada Ibounai Tuarina Iharuana ia vara. Unai tuari lalonai, lau ese kohu haboua ruma badadia 18 lau naridia, bona dina tamona lalonai ai ese taraka 125 be tuari kohudia amo ai hahonua bona ai siaidia.

Tuari lalonai idia vara gaudia bona Katolik Dubu be tuari lalonai ia vareai karana lau laloa momo. Lau laloa, ‘Momokani Dirava ese taunimanima ia laloa, eiava? Edena bamona ia do ita tomadiho henia?’ Lagani momo murinai lagani 1954 ai, ena kara be namo herea tau burukana ta, ia be Iehova ena Witness tauna, ese lauegu henanadai dainai lau ia hereva henia. Unai herevahereva karana ese lauegu mauri ibounai ia haidaua.

Baibel Ena Helaro ese Lau Ia Hamoalea

Unai tau namona, Joshua, ese lau ia hamaoroa Dirava ena Basileia sibona ese tanobada ena hekwakwanai ibounai do ia haorea diba bona unai Basileia ena lohia siahuna henunai sibona maino bona noho namo do idia vara. (Mataio 6:​9, 10; 24:14) Ia gwauraia gaudia ese lau idia hamoalea, to guna tomadiho lalonai idia vara gaudia dainai iena haere lau abia dae be auka. Ia ese lau dekenai Baibel stadi ia gwauraia neganai, lau hamaoroa bema moni ia noia lasi bona politikol gaudia ia herevalaia lasi, do lau abia dae. Unai ia abia dae, bona lau ia hamaoroa ia ura lau dekenai ia henia gauna be davana lasi.​—⁠Apokalupo 22:⁠17.

Lauegu abidadama Joshua dekenai ia tubu haraga. Unai dainai ia lau noia, lau ese lau matamata negana amo lau ura henia gauna lau abia totona. “Lau ese egu Baibel ena kopi ta lau abia diba eiava?” Lau abia murinai, lau moale bada herea, badina nega ginigunana iseda Havaraia Tauna ena hereva dekenai inai bamona gwauhamata herevadia lau duahia diba: “Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni”!​—⁠Apokalupo 21:​3, 4.

Baibel ena gwauhamata, ogogami bona gorere do idia ore idia gwauhamatalaia herevadia, ese lau idia hamoalea. Abidadama tauna Elihu ese Dirava ia gwauraia, ia gwau: “Aniani ia henia bada noho.” (Iobu 36:31) Bona Baibel ia gwau Dirava ena Basileia ena kara maoromaoro lohia henunai, “idia noho taudia ta ese do ia gwau lasi, ‘lau be gorere.’ ” (Isaia 33:24) Iehova ese momokani taunimanima be mai lalokau danu ia ura henidia! Lauegu ura iena gwauhamata dekenai ia bada momokani!

April 17, 1954 ai, lau be nega ginigunana Iehova ena Witness taudia edia hebou dekenai lau lao. Ia be mai anina bada hebouna​—⁠Keriso ena mase laloatao hebouna. Unai nega amo, hanaihanai hebou dekenai lau lao. Nega daudau lasi murinai lau dibaia gaudia be ma haida dekenai lau hadibaia. Unai nega lalonai, Portugal dekenai, ai be hua ta ta ai kone badinai pikiniki ai karaia, bona unai murinai bapatiso ai karaia. Joshua ese lau ia hereva henia bena hua 7 murinai, egu mauri be Iehova Dirava dekenai lau gwauhamatalaia, bona davara lalonai bapatiso lau abia karana amo unai lau hahedinaraia.

Lagani 1954 ena matamanai, Portugal dekenai Witness taudia be 100 sibona idia noho. Unai dainai, haroro gaukara gunalaia totona tatau momo idia ura. Lauma dalanai lau tubu haraga, bona nega sisina murinai kongregesen lalonai maduna haida lau abia. Lagani 1956 ai, Lisbon ena kongregesen iharuana ai, kongregesen naria tauna ai lau idia abia hidi, unai neganai kongregesen gunalaia tauna be unai bamona ai gwauraia. Hari, unai siti bona ia kahirakahira dekenai kongregesen 100 mai kahana idia noho.

Heabidae Karana Ena Hahenamo

Ena be lau bona Edminia emai moni ia bada lasi, to hanaihanai Keristani tadikaka ai abidia dae. Lagani 1955 ai, painia ta, unai be ful-taim haroro gaukara idia karaia Iehova ena Witness taudia edia ladana, be Portugal dekenai ia ginidae, ia be ena hanua Brazil amo ia lao Germany dekenai “Triumphant Kingdom” ena Intenesenel Hebouhebou totona. Iena lao dalana ia auka dainai, hua ta aiemai ruma dekenai ia noho, bona iena vadivadi amo lauma dalanai hahenamo momo ai davaria!

Unai negai, aiemai ruma dekenai ai abidia dae vadivadi taudia ma haida be Iehova ena Witness taudia edia hedikwota Brooklyn, New York ai idia gaukara taudia, hegeregere Hugo Riemer bona ia danu daiutu tamona idia noholaia tauna, Charles Eicher. Idia be ai danu idia aniani hebou bona Portugal gado ai idia hereva tadikakadia dekenai hereva idia henia. Manu maragidia ese aniani totona edia uduna idia kehoa bamona, ai ese unai bamona taudia amo lauma aniani namona ai naria.

Iehova ena Witness taudia edia loaloa naria taudia danu be edia vadivadi lalodiai aiemai ruma dekenai idia noho. Do ai laloaboio lasi vadivadi tauna ta lagani 1957 ai be Álvaro Berecochea, Morocco ena brens naria tauna, idia abia hidi Portugal dekenai ia mai tadikaka ia hagoadadia totona. Ia be aiemai ruma dekenai ai karaia buka stadi dekenai ia mai, bona ai ura dikadika ai danu do ia noho ela bona ena noho Portugal dekenai ia ore. Iena hua ta vadivadina amo hahenamo bada ai abia bona lauma dalanai ai tubu, bona egu lalokau, Edminia, ena nanadu namonamo dainai Álvaro be tauanina dalanai ia bada ia lao.

Ogogami dika hereana, lau maragi neganai lau mamia gauna bamona, ese ta ena lalohadai ia biagua diba. To, lau itaia bema Iehova bona ena abidadama hesiai taudia dekenai gau momo ita henia, ia ese hahenamo momo ia henia ita dekenai. Hanaihanai lau itaia unai be momokani ai abia dae diba taudia ai abidia dae neganai.

Lagani 1955 ai, Porto dekenai ai ese hebouhebou ai karaia neganai, hadibaia hereva ta idia halasia, lagani 1958 ai, New York City ena Yankee Stadium ai Iehova ena Witness taudia edia intenesenel hebouhebouna do idia karaia. Unai tano ai Kingdom Hall ta ta​—unai neganai Kingdom Hall be momo lasi​—dekenai kontribusen maua idia atoa Portuguese amo hebouhebou dekenai do idia lao taudia be moni dalanai idia durua totona. Emai moale mamina oi abia diba, a? Lau bona egu adavana ai kamonai ai idia abia hidi unai hebouhebou dekenai do idia lao taudia huanai neganai. United States dekenai unai hebouhebou totona ai noho neganai, Iehova ena Witness taudia edia hedikwota Brooklyn dekenai ai lao be moale bada gauna!

Dagedage Ai Haheaukalaia

Lagani 1962 ai, Portugal dekenai Iehova ena Witness taudia edia gaukara idia koua, bona misinari taudia​—Eric Britten, Domenick Piccone, Eric Beveridge, bona edia adavadia danu​—idia lulua. Unai murinai, Kingdom Hall dekenai emai hebou ai karaia diba lasi, unai dainai hehuni dalanai haida edia ruma dekenai ai karaia; bona Portugal dekenai hebou badadia ai karaia diba lasi. Unai dainai Keristani tadikaka bona taihu ese unai bamona hebouhebou be ma tano haida ai idia abia totona, lau ese maduna lau abia edia lao dalana lau hegaegaelaia totona.

Witness taudia momo be nega tamona do idia lao ma tano ta dekenai hegaegaelaia kara be ia auka. To, bema lauma dalanai Portugal tadikaka ese idia abia hahenamodia lau laloa lau diba unai hekwarahi be mai ena namo. Idia dekenai, Switzerland, England, Italy, bona France dekenai hebouhebou idia lao diba be hagoadaia ekspiriens ta! Danu, unai bamona hebouhebou ese dala ia kehoa Portugal dekenai buka bona magasin idia mailaia totona. Unai lagani lalodiai, ai ese aplikeisen momo ai henia, Portugal ena gavamani ese tomadiho orea ta bamona ai ia regista totona, to unai aplikeisen ibounai be idia abia dae lasi.

Lagani 1962 ena matamanai, misinari taudia idia lulua murinai, hunia dalanai idia gaukara pulisi taudia ese aiemai gaukara hadokoa totona idia gaukara goada. Tadikaka bona taihu momo herea idia abia bona idia laohaia kota totona. Unai ena sivarai momo be inai magasin bona ena bamona, Awake! magasin, lalonai idia halasia.a

Haroro gaukara dainai idia hadiburaia taudia ta be painia tauna ta, guna lau ese ia dekenai Dirava ena Basileia ena sivarai lau hadibaia. Pulisi taudia ese iena kohu lalonai lauegu adres idia davaria dainai, lau idia boiria bona nanadaia.

Gabeai, pulisi taudia rua ese egu ruma dekenai idia vadivadi. Idia ese lauegu Baibel stadi durua gaudia bona Baibel ibounai 13 idia abia. Idia ese edia dagedage karana idia karaia noho, nega idaudia 7 ai idia mai aiemai ruma idia sekea totona. Nega ibounai, ai dekenai henanadai momo idia henia.

Nega haida lau idia boiria kota dekenai egu Witness turadia totona lau hereva. Ena be edukeisen badana lau abia lasi, to Iehova ese ‘aonega lau dekenai ia henia, vadaeni lau idia badu henia taudia ibounai be idia hegeregere lasi egu hereva idia koua.’ (Luka 21:15) Nega ta ai, diadi ia hoa lauegu hereva dainai, bena lau ia nanadaia lau abia edukeisen ena bada be edena bamona. Unai kota rumana dekenai idia helai taudia ibounai idia kiri badina lau gwau greid 4 sibona lau karaia.

Dagedage ia bada ia lao neganai, Basileia ena sivarai idia kamonai taudia edia namba danu ia bada ia lao. Unai dainai, ena be lagani 1962 lalonai, Portugal dekenai Witness taudia be 1,300 bamona sibona to, edia namba ia tubu daekau ela bona lagani 1974 ai 13,000 ia hanaia! Unai nega lalonai, May 1967 ai, lau idia boiria loaloa naria gaukarana lau karaia totona. Unai gaukara lalonai lau ese Iehova ena Witness taudia edia kongregesen lau vadivadi henidia, idia lau hagoadaia totona.

Taga Bada Lau Moalelaia

December 1974 ai, hahenamo lau abia, gavamani ese Iehova ena Witness taudia edia gaukara Portugal dekenai idia rejista gaukarana lalonai lau vareai. Unai lagani murinai, egu adavana ida Estoril dekenai ia noho Iehova ena Witness taudia edia Betele famili taudia ai ai lao. Lau idia abia hidi danu Portugal ena Brens Komiti ena memba ta ai lau lao.

Portugal ai bona emai brens ese ia naria teritori ai haroro gaukara ia bada ia lao lau itaia dainai lau moale bada! Unai gabu haida be Angola, Azores, Cape Verde, Madeira, bona São Tomé bona Príncipe. Idia hanaia laganidia lalonai, Portugal amo misinari taudia idia siaia unai tano dekenai idia gaukara be moale gauna. Unuseniai momo ese Basileia ena sivarai idia ura henia bada. Emai moale bada herea mani oi laloa, badina unai gabudia dekenai Basileia harorolaia taudia be 88,000 ia hanaia, bona Portugal dekenai 47,000 idia hanaia! Lagani 1998 lalonai unai tanodia ai Memorial dekenai idia mai taudia be 245,000, lagani 1954 lalonai, lau be Witness tauna ai lau lao neganai, idia mai taudia kahirakahira 200 ia hanaia momokani.

Lau bona Edminia be mai kudouna ibounai danu Baibel lalonai salamo torea tauna ena hereva ai hamomokania, ia gwau ‘dina tamona sibona [Iehova ena] Dubu Helaga lalonai lau noho ese, dina 1000 idau gabu dekenai ia hereaia noho.’ (Salamo 84:10) Egu mauri gunana ai idia vara gaudia lau laloa lou bona lau moalelaia lauma hahenamodia ida lau hahegeregeredia neganai, lauegu hemami be peroveta tauna Isaia ena hegeregerena, ia gwau: “Lohiabada e, oi be egu Dirava. Oi do lau matauraia, bona oiemu ladana do lau hanamoa, badina be oi ese hoa kara badadia oi karaia vadaeni . . . Badina oi be ogogami taudia edia hunia gabuna.”​—Isaia 25:​1, 4.

[Footnote]

[Pictures on page 24]

Ataiai: Lisbon ai, tadikaka Almeida ese lagani 1958 ai tadikaka be New York ena hebouhebou dekenai do idia lao diba gauna ia herevalaia

Huanai: Paris ai, “Peace on Earth” Intenesenel Hebouhebouna dekenai elda bona hesiai taudia edia hebou karaia dalana ai haheitalaia

Henuai: France dekenai distrik hebouhebou totona ai rentaia basi idia hegaegae

[Picture on page 25]

Portugal ena brens ai daba ena sirina lau hakaua

[Picture on page 25]

Lagani 1988 ai, Portugal brens idia hahelagaia

[Picture on page 26]

Egu adavana ida

[Picture on page 26]

Tadikaka Hugo Riemer be Brooklyn Betele amo ai ia vadivadi henia neganai, ia henia herevadia ese ai idia hagoadaia