Manau Oi Atoa Dabua Bamona!

“Umui be Dirava ena taudia, ia ese umui ia lalokau henia, bona umui ia abia hidi, iena. Unai dainai inai bamona karadia, dabua bamona do umui atoa: bogahisihisi, durua, manau, manada bona haheauka.”​—KOLOSE 3:12.

1-3. Kolose 3:​12-14 lalonai, aposetolo Paulo be manau karana bona Dirava ia ura henia karadia ma haida edena bamona ia herevalaia?

IEHOVA ese iena taunimanima dekenai dabua bamona gaudia namo hereadia haida ia henia. Oibe, Dirava ena lalo-namo idia ura abia taudia iboudiai be idia manau momokani, dabua goadana idia atoa bamona, be gau badana. Unai bamona kara be namo badina hekwakwanai ia vara neganai, lalo-hekwarahi ena bada ia hamaragia. Danu ita ia naria, badina hepapahuahu bona heai ia koua.

² Aposetolo Paulo ese ia bamoa horoa Keristen taudia ia hagoadaia, ia gwau: “Umui be Dirava ena taudia, ia ese umui ia lalokau henia, bona umui ia abia hidi, iena. Unai dainai inai bamona karadia, dabua bamona do umui atoa: bogahisihisi, durua, manau, manada bona haheauka.” (Kolose 3:12) Inai hereva “dabua bamona do umui atoa” be Greek gado amo idia hahanaia bona ena anina be unai kara idia karaia haraga be gau badana. Horoa taudia, idia be abia hidi taudia, mai edia helaga, bona Dirava ia lalokau henidia taudia unai, be kara haraga manau bamona karadia idia atoa be gau badana.

³ Paulo ma ia gwau: “Bema tau ta ese ena bamona tauna ia maumauraia, ia kara dika henia dainai, namona be unai dika do ia gwauatao. Lohiabada ese umui emui dika ia gwauatao, vadaeni unai bamona do umui karaia danu. To unai kara ibounai ia hanaia kara be lalokau. Umui lalokau henia, vadaeni do umui noho hebou namo herea, mai laloa tamona danu.” (Kolose 3:​13, 14) Lalokau, manau, bona Dirava ia ura henia karadia ma haida idia badinaia dainai, Iehova ena Witness taudia be “lalo-tamona dekenai idia noho” diba.​—Salamo 133:​1-3.

Namona be Mamoe Naria Manau Taudia Idia Noho

4. Keristen momokani taudia ese dabua bamona idia atoa gaudia be dahaka?

⁴ Keristen momokani taudia idia goada karaia edia ‘tauanina ena ura kara idia hamasea totona. Gaudia be inai: heudahanai, lebulebu, matadika, matabodaga, bona kohu ura dikadika kara,’ bona idia goada karaia badu, dagedage, laloa dika, hereva dika, bona hereva mirodia dabua bamona idia kokia oho totona. (Kolose 3:​5-11) Idia be “mauri gunana” dabua bamona idia kokia bona “mauri matamata” idia atoa; unai be dabua namona ta bamona. (Efeso 4:​22-24) Edia dabua matamata be hebogahisi, kara namo, lalo-manau, dagedage lasi, bona haheauka karadia, bona unai kara ese ia durudia hekwakwanai idia hanaia totona bona edia mauri lalonai Dirava ena taravatu idia badinaia totona.​—Mataio 5:9; 18:33; Luka 6:36; Filipi 4:2, 3.

5. Dahaka dainai ita moale Keristen kongregesen lalonai ita noho dainai?

⁵ Nega momo inai tanobada dekenai idia gwauraia kwalimu taudia be hebogahisi lasi taudia bona taunimanima hahisia taudia. (Hereva Lada-isidia 29:22) To Iehova ena Witness taudia edia kara ia idau bona unai be moale gauna ta! Keristen kongregesen ena heau dalana be taunimanima haida ese bisinesi idia haheaua dalana bamona lasi​—bisinesi ia heau namonamo totona reana idia hebogahisi lasi bona taunimanima edia lalona idia hahisia. To, kongregesen lalonai ita noho be moale gauna. Badina unai Keristen taudia momo be aonega dalanai manau karana idia hahedinaraia bona gwaumaoro idia abia bona tadikaka dekenai hahediba gaukara idia karaia tataudia ese manau bada idia hahedinaraia. Oibe, elda dagina idia abia taudia edia hakaua bona sisiba herevadia dainai ita moale badina hahediba gaukarana idia karaia neganai edia “hekokoroku lasi bona [edia] diba namona ese [edia] aonega do ia hedinaraia.”​—Iakobo 3:13.

6. Dahaka dainai Keristen elda taudia be manau taudia be gau badana?

⁶ Dirava ena taunimanima edia kara ena toana dainai, gau badana be kongregesen naria taudia idia manau, idia laloa manada, bona mai lalo-parara danu idia hebogahisi. (1 Timoteo 3:​1-3) Iehova ena hesiai taudia be dagedage lasi mamoe bamona; idia be gwau-edeede nanigosi bamona lasi, idia be lalo-auka mule bamona lasi, bona idia be mai edia hitolo dagedage uda sisiadia bamona lasi. (Salamo 32:9; Luka 10:3) Idia be mamoe bamona dainai, namona be elda taudia ese manau bona hebogahisi karadia amo idia naridia. (Kara 20:​28, 29) Oibe, Dirava ena ura be elda taudia ese iena mamoe taudia dekenai manau, lalo-namo, lalokau, bona haheauka idia hahedinaraia.​—Esekiel 34:​17-24.

7. Elda taudia be taunimanima edena bamona idia hadibaia eiava lauma dalanai idia gorere taudia edena bamona idia durudia be namo?

⁷ Elda be “Lohiabada ena hesiai tauna” dainai, namona be “taunimanima ibounai dekenai do ia bogahisihisi henia. Ia be hadibaia tauna namona, mai ena haheauka. Ia ese, iena hereva idia utua taudia do ia sisiba henidia mai ena manau danu. Badina be bema ia manau neganai sedira Dirava ese idia do ia durua, vadaeni edia laloa do idia giroa, bona hereva momokani do idia davaria.” (2 Timoteo 2:​24, 25) Mamoe idia naria Keristen taudia be lauma dalanai idia gorere taudia idia durudia toho neganai, namona be mai hebogahisi danu idia karaia, badina idia be Dirava ena mamoe bamona taudia. Namo lasi elda taudia idia kara henidia biaguna ta bamona, to dagedage lasi Mamoe Naria Tauna Namona, Iesu Keriso, bamona do idia kara henidia.​—Ioane 10:​11-13.

8. Dahaka ia vara manau tauna Mose dekenai, bona badina be dahaka?

⁸ Elda tauna be reana nega haida ena lalona ia biagua ia badu lasi totona be ia auka. “Mose be tanobada taudia iboudiai bogaragidiai ia mo sibona be manau herea.” (Numera 12:3) To, Kade dekenai Israel taudia edia ranu ia ore neganai, idia badu Mose dekenai, idia gwau unai be iena kerere badina Aigupito amo idia ia hakaudia tano gagaena dekenai. Ena be Mose ese edia hereva momo be mai ena manau danu ia haheaukalaia vadaeni, to ia laloa namonamo lasi bona idia ia hereva auka henidia. Ia bona Aaron be Israel taudia vairanai idia gini bona unai taunimanima edia lalona idia veria do idia lalodia bada totona. Mose ia gwau: “Gwau-edeede taudia e, umui hakala; emui ranu be inai nadi badana amo do ai abia, a?” Bena Mose be ena itotohina amo nega rua unai nadi badana ia botaia, bona Dirava ena siahu dainai “ranu be ia aru mai badabada,” taunimanima bona animal idia inua totona. Iehova ia moale lasi badina Mose bona Aaron ese Ia idia hahelagaia lasi, unai dainai Mose ese Israel taudia be Gwauhamata Tanona dekenai ia hakaudia vareai diba lasi.​—Numera 20:​1-13; Deuteronomi 32:​50-52; Salamo 106:​32, 33.

9. Elda tauna ena manau karana idia tohoa gaudia be dahaka?

⁹ Keristen elda tauna ena manau karana idia tohoa gaudia be idauidau. Hegeregere, Paulo ese Timoteo ia hamaoroa namona be ia naria namonamo badina reana taunimanima ta be do ia “hekokoroku” bona “hepapahuahu bona heai sibona ia ura henia kava.” Paulo ma ia gwau: “Unai dekena amo idia vara gaudia be inai: mama, heai, hereva dika, laloa dikadia. Unai bamona idia karaia taudia be nega ibounai idia hepapahuahu kava, bona edia laloa be anina lasi. Idia ese hereva momokani idia rakatania vadaeni.” Kongregesen naria tauna Timoteo ese sisiba ia abia ia kara auka lasi, to unai bamona “kerere dekena amo do [ia] raka siri” totona, bona “kara maoromaoro, Dirava badinaia kara, abidadama, lalokau, haheauka, laloa manau” karadia do ia tahua be namo.​—1 Timoteo 6:​4, 5, 11.

10. Kongregesen dekenai Tito be dahaka sisiba ia henidia be namo?

¹⁰ Ena be elda taudia be manau karana idia hahedinaraia be namo, to kara maoromaoro gaudia totona do idia gini auka be gau badana. Tito be unai bamona ia karaia; ia be Krete ena kongregesen taudia ia sisiba henidia, ia gwau: “Tau ta idia ese do idia gwauraia dika lasi, do idia heai lasi, to do idia manau. Nega ibounai taunimanima ibounai do idia kara manada henidia.” (Tito 3:​1, 2) Keristen taudia be taunimanima ibounai dekenai manau karadia idia hahedinaraia ena badina idia diba totona, namona be Tito ese ia hahedinaraia Iehova ese hebogahisi bona lalokau ia hahedinaraia vadaeni. Ita gwau lasi Dirava ese abidadama taudia ia hamauridia edia kara maoromaoro karadia dainai, to ia hamauridia badina ia be mai ena hebogahisi karana Iesu Keriso dekena amo. Iehova ena manau karana bona ena haheauka dainai hahemauri ita abia diba danu. Unai dainai, Tito bamona, namona be hari inai negai elda taudia be kongregesen taudia idia sisiba henidia Dirava ena hereva idia badinaia totona, bona Ia idia tohotohoa totona ma haida dekenai idia kara manau henidia.​—Tito 3:​3-7; 2 Petero 3:​9, 15.

Aonega Tauna be Manau Karana amo Sisiba Ia Henia

11. Galatia 6:​1, 2 ena hereva hegeregerena, sisiba be edena dala amo idia henia be namo?

¹¹ Mamoe bamona tauna ta ia kerere neganai tadikaka ese dahaka do idia karaia? Paulo ia gwau: “Lauegu varavara taudia e, bema tau ta ia kerere neganai, umui Lauma kamonai henia taudia ese unai tau do umui hakaua lou, mai manau danu. To oi naria namonamo, hedibagani ese oi danu do ia koia garina. Umui ta ta umui durua henia, emui metau do umui huaia totona. Inai dala dekenai Keriso ena taravatu do umui badinaia.” (Galatia 6:​1, 2) Sisiba be manau karana amo idia henia neganai, ena namo be ia bada. Bema elda taudia be badu tauna idia sisiba henia, namona be edia lalona idia biagua, badina idia diba “mala manada ese turia ia hamakohia diba.” (Hereva Lada-isidia 25:15) Bema tau ta ena lalohadai bona kara toana be ia auka turia bamona, reana manada herevana ta be iena kara auka toana ia hamanadalaia diba.

12. Manau karana be edena bamona sisiba henia tauna ia durua?

¹² Iehova be manau Hadibaia Tauna, bona kongregesen dekenai iena manau hadibaia dalana ese anina namona ia havaraia. Unai be momokani elda taudia ese lauma dalanai idia manoka taudia idia sisiba henidia neganai. Hahediba tauna Iakobo ia torea, ia gwau: “Sedira umui ta be mai ena aonega bona mai ena diba. Bema tau ta be inai bamona neganai, namona be iena aonega do ia hamomokania iena mauri namona bona iena kara namodia dekena amo.” Manau karana do ita hahedinaraia diba bema mai hemataurai bona mai tanikiu danu “Dirava dekena amo [ia mai] aonega” ita abia, bona ita hekokoroku lasi to ita diba ita hegeregere gau haida sibona do ita karaia totona. Sisiba henia tauna ese manau karadia ia hahedinaraia neganai, unai ese ia durua bona ia hereva kava lasi eiava ia hereva kerere lasi, bona unai neganai ena sisiba do idia abia dae be ia auka lasi.​—Iakobo 3:​13, 17.

13. Bema “iena aonega do ia hamomokania iena mauri namona bona iena kara dekena amo,” elda tauna be edena dala amo sisiba do ia henia?

¹³ “Iena aonega do ia hamomokania iena mauri namona bona iena kara namodia dekena amo” dainai, sisiba henia tauna be ia hereva auka lasi eiava ia badu lasi. To, elda tauna be ena turana ia sisiba henia dainai eiava ia ura tau ta ese ia do ia lalo-namo henia dainai, hamoalea herevadia sibona ia henia be namo lasi, to Dirava ena Hereva dekena amo sisiba maorona do ia henia be gau badana. (Hereva Lada-isidia 24:​24-26; 28:23) Amnon ese ena varavara amo ia abia sisibana ia moalelaia, to unai sisiba dainai ia mase. (2 Samuel 13:​1-19, 28, 29) Unai dainai, hari inai negai, kerere tauna ena lalona ena mamina do ia namo totona, elda taudia be Bible ena taravatu edia anina idia hamaragia be namo lasi, badina unai bamona idia karaia neganai unai tau ena mauri do idia haboioa diba. Paulo bamona, namona be elda taudia be taunimanima dekenai “Dirava ena ura ibounai” idia hadibaia. (Kara 20:​26, 27; 2 Timoteo 4:​1-4) Sisiba ia henia lo Keristen tauna be Dirava garina ia gari bona aonega ena manau karana amo kara maoromaoro sisiba ia henia.

14. Bema idia sibodia ese edia dala idia abia hidi be namo, dahaka dainai elda tauna ia naria namonamo edia dala ia abia hidi garina be namo?

¹⁴ Manau karana bona guba dekena amo ia mai aonegana ia abia neganai, elda tauna ese taravatu aukadia do ia gwauraia lasi. Danu, namona be ia lalo-parara bema ma tau ta totona dala do ia abia hidi, unai tau sibona ese unai dala ia abia hidi be maoro neganai, unai be aonega lasi bona maoro dalana lasi. Bema elda ta be haida totona dala ia abia hidi, bena gabeai dika ta ia vara, unai kerere ena badina be ia dekenai do ia mai danu. Elda tauna ese Bible ena hereva ia hahedinaraia diba sibona, to bema Bible dekenai idia kikilaia gauna dekenai taravatu ta ia noho lasi, namona be unai tau sibona ia laloa namonamo bona ena lalona ena mamina hegeregerena dala do ia abia hidi dahaka do ia karaia eiava dahaka do ia karaia lasi totona. Paulo ia gwau: “Ibounai ta ta sibona ena metau, ena metau do idia huaia.” (Galatia 6:5; Roma 14:12) To, bema tau ta ese heduru ia tahua, elda ta ese henanadai dekena amo reana unai tau ia durua Bible ena hereva unai gau dekenai ia diba bona ia laloa namonamo totona, bena dala maorona do ia abia hidi diba.

15. Bema elda tauna be henanadai ta ena haere ia diba lasi, dahaka ia karaia be namo?

¹⁵ Bema elda tauna be henanadai ta ena haere ia diba lasi, namo lasi ia hemarai garina ia haere kava. Aonega ena manau karana ia abia dainai, do ia haere kava lasi badina bema ia haere kerere lalohisihisi do ia havaraia diba. “Herevahereva lasi be mai ena nega bona herevahereva be mai ena nega.” (Kohelete 3:7; Hereva Lada-isidia 21:23 itaia danu.) Namona be elda tauna be henanadai ena haere ia diba neganai sibona eiava diba maorona unai hereva dekenai ia tahua namonamo guna neganai sibona, do ia ‘hereva.’ Elda taudia be haere diba lasi henanadaidia idia haerelaia toho lasi be aonega karana.​—Hereva Lada-isidia 12:​8; 17:27; 1 Timoteo 1:​3-7; 2 Timoteo 2:14.

Sisiba Henia Taudia Momo Idia Noho Ena Namo

16, 17. Dahaka dainai elda taudia be idia herevahereva hebou be namo?

¹⁶ Guriguri bona stadi ese elda taudia ia durudia henanadai idia haerelaia totona bona hekwakwanai badadia idia vara neganai hanaia dalana idia diba totona; to laloaboio lasi, “sisiba henia taudia momo idia noho neganai gaukara ia heau namonamo.” (Hereva Lada-isidia 15:22) Elda taudia be ma elda taudia haida ida idia herevahereva neganai, aonega hereva momo idia kamonai diba. (Hereva Lada-isidia 13:20) Elda taudia ta ta edia ekspiriens eiava edia diba ena bada Bible dekenai be idauidau. Unai dainai, kerere badana ta ia vara neganai, namona be aonega ena manau karana dainai, ena gaukara ia do manadalaia momokani lasi elda tauna ta be ia lao bona diba bada bona idia manada vadaeni elda taudia haida ia nanadaia heduru ia abia totona.

¹⁷ Kerere badana ta idia tahua totona elda taudia idia abia hidi neganai, idia be hehuni dalana maorona ai heduru idia tahua diba. Israel taudia kota henidia gaukarana dekenai heduru ia abia totona, Mose ese “tau haida mai edia aonega danu [ia] abia hidi, Dirava dekenai idia gari taudia, bona moni abia hunia dala karana do idia ura lasi taudia.” Ena be idia be elda taudia, to edia diba ena bada bona edia manada karana unai gaukara dekenai be Mose ena diba bona manada karana ia hanaia lasi. Unai dainai unai diadi taudia be, ‘hereva badadia be Mose dekenai idia mailaia, to hereva maragidia be idia sibodia idia tahua.’ (Esodo 18:​13-27) Vadaeni, hari inai nega lalonai, bema hekwakwanai badana ta ia vara bona unai hekwakwanai idia tahua elda taudia ese idia hamaoromaoroa dalana be ia auka, heduru idia abia totona manada elda taudia haida dekenai idia lao diba, to dahaka do idia karaia unai hekwakwanai hamaoromaoroa totona idia sibodia do idia abia hidi.

18. Hahemaoro gaukara idia karaia neganai, dahaka ese elda taudia ia durudia dala maorodia idia abia hidi totona?

¹⁸ Iuda taudia edia buka ta ladana Mishnah ia gwau, Israel lalonai hanua ena kota idia naria taudia edia namba be idauidau, kerere ena bada hegeregerena. Sisiba henia taudia idia momo neganai be namo, to ita gwau diba lasi idia momo dainai hahemaoro maoromaoro do idia karaia, badina ena be idia be momo to do idia kerere diba. (Esodo 23:2) Hahemaoro maoromaoro gaukarana idia karaia neganai, Bible bona Dirava ena lauma helaga be gau badadia dala maorona idia abia hidi totona. Aonega bona manau karana be Keristen taudia idia ha-uraia Bible bona lauma helaga idia badinaia totona.

Manau Karana amo Oi Haroro

19. Dahaka ese Iehova ena taunimanima ia durudia manau karana amo ma haida idia haroro henidia totona?

¹⁹ Manau karana ese Iehova ena hesiai taudia ia durudia lalohadai idauidau taudia iboudiai idia haroro henidia totona. (1 Korinto 9:​22, 23) Iesu ese hahediba gaukara be manau karana amo ia karaia, unai dainai manau taudia be ia garina idia gari lasi, to tomadiho gunalaia hereva auka taudia idia gari henidia. (Mataio 9:36) Momokani, ia be manau tauna dainai “mamoe” bamona taudia be ia dekenai idia mai, “nanigosi” bamona kara dika taudia idia mai lasi. (Mataio 25:​31-46; Ioane 3:​16-21) Ena be Iesu ese nanigosi bamona koikoi taudia ia hereva auka henidia, to Iehova ena Witness taudia ese Dirava ena hahemaoro sivaraidia idia harorolaia neganai, mai manau danu idia hereva be gau badana, badina edia lalo-parara bona siahu be Iesu ena lalo-parara bona siahu hegeregerena lasi. (Mataio 23:​13-36) Manau karana amo Basileia ena sivarai idia harorolaia neganai, ‘idia ura kamonai taudia be mauri hanaihanai do idia abia totona abidadama taudia ai idia lao,’ Iesu ena hereva idia kamonai mamoe bamona taudia hegeregerena.​—Kara 13:48.

20. Manau karana amo Bible stadi tauna idia hadibaia neganai, dahaka namo do ia abia?

²⁰ Haroro bona hahediba gaukaradia ita karaia neganai, bema manau karana amo ita karaia bona taunimanima ita durudia iseda hereva ena anina idia laloa bona Bible ena taravatu bona ena hereva momokanidia idia laloa totona, namo momo do idia vara. Petro ia torea: “Emui kudouna dekenai Keriso do umui abia dae, . . . haida ese emui abidadama bona lalona namo totona umui idia nanadaia neganai, nega ibounai do umui naria hegaegae idia do umui haere henia totona. To mai hemataurai bona manau danu do umui haere.” (1 Petero 3:15) Manau karana amo Bible stadi tauna idia hadibaia neganai, unai ese ena lalona ia durua ia kamonai herevadia ia laloa namonamo totona, to hereva auka bona hepapahuahu bamona hereva amo idia hadibaia neganai, ia laloa namonamo diba lasi bona reana idia hahekwakwanaia. Paulo bamona, haroro taudia be manau karana amo taunimanima idia hadibaia neganai, idia gwau: “Kara ta ai karaia lasi, tau ta ena mauri hadikaia totona. Oibe, tau ta ai hadikaia lasi, do idia gwau aiemai gaukara be dika garina.” (2 Korinto 6:3) Haroro taudia be manau karana amo idia haroro neganai, dagedage taudia be nega haida idia kamonai.

Ita Ibounai be Manau Karana Ita Hahedinaraia be Gau Badana

21, 22. Manau karana be edena bamona Iehova ena taunimanima iboudiai ia durudia?

²¹ Namo lasi Keristen ena manau karana ita hahedinaraia Iehova ena orea lalonai idia noho lasi taudia vairanai ita heagi totona. Unai manau karana be Dirava ena taunimanima edia turana heheni karana dekenai idia hahedinaraia be gau badana danu. (Kolose 3:​12-14; 1 Petero 4:8) Elda taudia bona hesiai taudia be manau karana bona lalo-tamona karana dekenai idia gaukara hebou neganai, kongregesen taudia be lauma dalanai idia goada. Iehova ena taunimanima iboudiai be manau karana bona Dirava ia ura henia karadia ma haida idia hahedinaraia be gau badana, badina “taravatu be tamona” iboudiai dekenai.​—Esodo 12:49; Levitiko 24:22.

²² Manau karana ese Dirava ena taunimanima edia maino bona edia moale ia habadaia. Unai dainai, Keristen ena kara iboudiai be ruma dekenai, kongregesen dekenai, bona gabu ma haida dekenai be dabua bamona idia atoa be gau badana. Oibe, Iehova ena hesiai taudia iboudiai be manau karana dabua bamona idia atoa be gau badana.

Edena Bamona Do Oi Haere?

◻ Dahaka dainai Keristen elda taudia idia manau be gau badana?

◻ Manau karana ese sisiba henia aonega tauna edena bamona ia hakaua?

◻ Sisiba henia taudia momo idia noho neganai ena namo be dahaka?

◻ Manau karana amo ita haroro ena namo be dahaka?

[Picture on page 17]

Iehova ena taunimanima be mamoe bamona, unai dainai manau karana amo idia naridia be gau badana

[Credit Line]

Garo Nalbandian

[Picture on page 19]

Manau karana ese Iehova ena taunimanima ia durudia lalohadai idauidau taudia idia haroro henidia totona