Iseda Keristen Tadikaka Dekenai Abitorehai Moni Henia Dalana

PEDRO bona Carlos be idia hetura namo herea.a Idia ruaosi be Keristen tadikakadia, edia ruma bese idia hebamo namo herea danu. Unai dainai ena bisinesi dainai Carlos be moni ia ura neganai, Pedro ese ia henia haraga, abitorehai bamona. Pedro ia gwau, “Aiemai hetura be namo herea dainai, lau moale unai bamona lau karaia neganai.”

Hua rua murinai, Carlos ena bisinesi ia moru bona ena abitorehai davana henia lou danu be ia doko. Gabeai Pedro be ia davaria Carlos ese ena moni bada, ia abitorehai gauna, be ia haorea haida dekenai ena abitorehai henia lou totona bona taga taudia bamona ia noho totona. Ena be lagani tamona lalonai Pedro ese ia vadivadi henia bona revareva amo ia hadibaia, to unai hekwakwanai be idia hamaoromaoroa lasi. Pedro ia badu dikadika dainai, taravatu taudia dekenai ia lao bona Carlos​—ena turana bona ena Keristen tadikaka danu​—be dibura ruma dekenai idia atoa.b Unai be dala maorona ai ia karaia, eiava? Do ita itaia.

Tanobada ibounai dekenai abitorehai moni dainai idia heai o idia lalohadai kerere karana ese taunimanima edia hebamo karana ia hadikaia momo. Nega haida Keristen tadikaka edia hebamo kara ia hadikaia diba danu. Tano momo dekenai banika amo moni abitorehai karana be ia auka, unai dainai nega momo taunimanima be moni ai idia dabu neganai edia turadia bona varavara dekenai idia abitorehai. To, madi Pedro bona Carlos dekenai ia vara karana amo ita diba bema abitorehai ia abia tauna bona abitorehai henia tauna be Bible ena taravatu idia badinaia lasi, hekwakwanai badadia do idia vara diba. Unai dainai, edena dala ita gaukaralaia be maoro bema iseda Keristen tadikaka ia ura iseda moni ia abia torehai neganai?

Abitorehai Ena Davana Ita Tahua Guna

Bible ia gwau ita abitorehai kava be maoro lasi. Aposetolo Paulo ia gwau: “Tau ta dekena amo umui abitorehai lasi. To inai gau tamona umui laloa noho be namo: ta ta dekenai do umui lalokau henia noho.” (Roma 13:8) Unai dainai abitorehai do oi karaia lasi neganai, namona be ena davana oi tahua guna. (Luka 14:28 itaia danu.) Mai ena badina momokani ta dainai oi ura moni oi abia torehai, a? Moni oi abia torehai badina oi ura oiemu mauri bona emu ruma bese edia mauri durua gaudia do oi abia totona, a? (1 Timoteo 5:8) Eiava oi mataganigani​—reana oi ura taga tauna bamona oi noho, a?​—1 Timoteo 6:​9, 10.

Ena badina ta be reana unai abitorehai karana dainai nega bada oi negea moni gaukara dekenai bona reana hebouhebou bona haroro gaukara do oi reaia danu. Bema hekwakwanai ta ia vara neganai, ia amo moni oi abia torehai tauna ena moni davana do oi henia lou diba, eiava? Bema oiemu bisinesi eiava ma oi karaia gauna ta ia moru, dahaka do oi karaia? Oi laloaboio lasi, “kara dika tauna be ia abitorehai, to davana ia henia lou lasi.”​—Salamo 37:21.

‘Hereva Momokani’ Gwauraia Abitorehai Henia Taudia Dekenai

Unai gaudia ibounai oi lalohadailaia murinai, reana do oi laloa bisinesi totona oi abitorehai be namo. Bema banika amo abitorehai oi abia diba lasi, emu tadikaka dekenai oi lao abitorehai karaia totona be kerere lasi, badina Luka 11:5 dekenai Iesu ia gwau, bema gau ta dekenai ita dabu neganai vaia iseda kara be iseda turadia dekenai ita lao heduru abia totona. To ta be “hereva momokani” ia gwauraia toho be gau badana. (Efeso 4:25) Dahaka dahaka do oi karaia unai abitorehai moni amo oi gwauraia hedinarai namonamo​—ia boio diba daladia danu oi gwauraidia namonamo, ena be oi laloa do ia boio diba lasi. Bema abitorehai ia henia tauna ese henanadai idauidau momo oi ia henia, namo lasi oi badu badina ia ena moni dainai ia ura ia diba namonamo.c

Moni ita abia torehai bona ita gwau gau ta do ita karaia bona moni ita abia murinai, ita giroa bona ma gau ta totona ita gaukaralaia be maoro, a? Unai neganai hereva momokani ita gwauraia, eiava? Lasi momokani. Latin-America banika tauna ta be ia gwau: “Banika taudia ese oi abitorehai gwauraia monina ena orena do idia henia lasi, bona bema oi abia vadaeni abitorehai davana oi karaia haraga lasi, idia ese kota taudia dekenai oda do idia abia bona oiemu kohu ibounai do idia abia.” Bema moni idia henia tau ta ena bisinesi ena profit ia habadaia totona, unai bamona ia gaukaralaia be namo, bema unai totona ia gaukaralaia lasi, moni henia tauna ena lalohadai ia hadikaia diba, badina do ia daradara unai moni do ia abia lou diba eiava lasi. Momokani, reana Keristen tadikaka dekenai oi abitorehai neganai, kota ena oda dekenai oiemu kohu ibounai idia abia karana garina oi gari lasi. To, “moni ia abia torehai tauna be abitorehai moni ia henia tauna ena hesiai tauna ai ia lao,” bona oiemu maduna be hereva momokani bona kara maoromaoro oi hahedinaraia ia dekenai.​—Hereva Lada-isidia 22:7.

Bisinesi Lalonai Taravatu Hereadaena Oi Badinaia

Iesu ia gwau: “Unai dainai, gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.” (Mataio 7:12) Unai taravatu be mai anina bada bema ita be iseda Keristen tadikaka danu bisinesi ita karaia neganai! Haheitalai ta be inai: bema tadikaka ta dekenai oi noinoi abitorehai totona bona ia ura lasi moni oi ia henia, dahaka do oi laloa ia dekenai? Do oi laloa emui hetura dalana ia hadikaia, a? Eiava ena hereva do oi matauraia, badina oi diba reana ia danu be unai moni ia ura, eiava ia ese ena moni oi gaukaralaia lalonai hekwakwanai haida do idia vara diba gaudia ia laloa bada, o unai hekwakwanai gaudia oi laloa bada lasi dainai, ani? Reana mai ena momokani ida ia laloa oi ese unai moni do oi gaukaralaia namonamo diba lasi. Bema ia ura lasi abitorehai moni do ia henia, reana unai ena badina be namo bona oi ia lalokau henia dainai.​—Hereva Lada-isidia 27:6.

Bema oiemu turana be ia hegeregere moni ia henia oi abia torehai totona, namona be unai abitorehai dalana be pepa dekenai umui torea, bona unai hereva ibounai be pepa dekenai oi torea danu: moni hida oi abia torehai, bona unai moni abia torehai ena badina be dahaka, bona bema abitorehai davana oi karaia diba lasi neganai dahaka kohu do oi henia unai abitorehai davana do oi hahegeregerea totona, bona edena bamona bona edena negai unai moni davana do oi henia lou. Aonega dalana be nega haida unai bamona kontraka pepa be loia tauna ta ese ia torea bona taravatu naria taudia dekenai oi henidia idia naria totona. Bona unai pepa oi sainia murinai, “oiemu hereva do oi gwauraia, ‘Oibe’ sibona, eiava ‘Lasi’ sibona.” (Mataio 5:37) Namo lasi oiemu turana ena ura namona oi abia dae kava to namona be oiemu maduna ia dekenai do oi huaia namonamo, hegeregere banika dekenai oi abitorehai negana bamona.

Abitorehai Idia Henia Taudia Idia Laloa Namonamo

Bema oi dekenai idia mai abitorehai totona, dahaka do oi karaia? Unai tadikaka ena kara bona ena noho oi laloa namonamo guna. Hegeregere, reana Keristen tadikaka ta be iena kerere lasi neganai, moni dekenai hekwakwanai bada ia davaria. Bema dala ia noho oi ese ia oi durua totona, vadaeni, Keristen lalokau karana ese oi do ia doria bena ‘tauanina dalanai do oi durua.’​—Iakobo 2:​15, 16.

Bema tadikaka ta dekenai unai bamona hekwakwanai dikana ia vara bona ia ita durua, unai ita henia moni latanai interest ita atoa be lalokau karana lasi! Iesu ia gwau: “To umui dekenai idia badu taudia do umui lalokau henia, bona idia dekenai durua do umui henia, bona do umui henia kava, ena davana do umui tahua lasi.”​—Luka 6:35; Levitiko 25:​35-38 itaia danu.

To, dahaka do oi karaia, bema ta ese oi ia noia moni oi henia ena bisinesi matamatana ia haginia totona, eiava emu gwaumaoro oi henia banika o gabu ta amo abitorehai ia abia neganai, oiemu moni o kohu amo iena abitorehai henia lou karana oi hamomokania totona. Unai neganai, abitorehai karana be umui huanai bisinesi ta bamona umui karaia be namo. Bible ese ita ia hamaoroa ita naria namonamo, ia gwau: “Tau ta totona ia gwauhamata tauna ai oi lao lasi, bona ta ena abitorehai toana oi henia lasi.”​—Hereva Lada-isidia 22:26.

Unai dainai, namona be guna emu moni ena bada oi sikelia namonamo, oi hegeregere unai moni oi henia eiava lasi. Oi laloa, bema abitorehai abia tauna ena bisinesi ia moru, eiava moni ia abia torehai tauna be nega korikori dekenai abitorehai davana ia henia diba lasi, oiemu moni be do ia hegeregere oi sibona emu mauri naria totona, a? Bema oi be hegeregere abitorehai moni oi henia bona unai moni amo profit ia abia diba, oi be mai emu maoro interest iena amo oi abia. (Luka 19:​22, 23 itaia danu.) Hereva Lada-isidia 14:15 ena sisiba be inai: “Lalo-duhu tauna ese hereva ibounai ia abia dae, to lalo-parara tauna ese ena raka dalana ia naria namonamo.” Nega haida bisinesi idia diba namonamo tadikakadia haida be idia naria namonamo lasi, Keristen tadikaka taudia danu moni idia gaukaralaia hebou neganai. Nega haida, interest davana bada idia abia gwauraia dainai, haida be edia moni bada idia haboioa bisinesi dikana ia moru neganai, bona edia hetura karana edia Keristen tadikaka dekenai idia haboioa danu.

Banika taudia be gau toi idia laloa guna, gabeai tau ta ena abitorehai monina idia henia diba: (1) abitorehai ia noinoilaia tauna ena kara, (2) davana do ia henia lou diba eiava lasi, bona (3) unai nega lalonai ena bisinesi be do ia heau namonamo diba eiava lasi. Gau badana be “aonega korikori” oi hahedinaraia, gau ibounai oi sikelia namonamo guna, bena gabeai oiemu gaukara goada amo oi abia monina be ta dekenai oi henia abitorehai bamona, ani?​—Hereva Lada-isidia 3:21.

Hegeregere, oi dekena amo ia ura abitorehai tadikakana ena kara be edena bamona? Ia be momokani ai ia kara bona gaukara ia karaia namonamo tauna bona ena kara be maoromaoro, eiava? (1 Timoteo 3:7 itaia danu.) Bema ia ura ena bisinesi ia habadaia, ena bisinesi ia naria namonamo ema bona hari, eiava? (Luka 16:10) Bema lasi, namona be ena moni ia naria namonamo dalana dekenai ia oi durua, to namo lasi moni oi henia, ia abia torehai totona bona murinai ia gaukaralaia kerere.

Gau badana ta be oi diba edena bamona unai tadikaka ese unai abitorehai davana do ia henia lou. Wiki ta ta iboudiai moni hida eiava gaukara ena pei hida ia abia? Ia be mai ena abitorehai ma haida danu? Dala maorona be ia ese hereva momokani oi dekenai ia gwauraia hedinarai. To, gau badana be Keristen lalokau oi hahedinaraia. Reana oi ura abitorehai oi henia gauna oi naria dainai gwauhamata pepa ta oi henia do ia sainia, bona bema ena abitorehai davana ia karaia lasi neganai, ena kohu amo davana do ia karaia diba. Mose ena Taravatu lalonai ia gwau tau ta ena gaukara kohudia eiava ena mauri ena badina gaudia bema taunimanima ese idia abia abitorehai davana abia lou totona, unai be maoro lasi. (Deuteronomi 24:​6, 10-12) South America dekenai tadikaka ta be bisinesi tauna bona ia gwau, iena tadikaka dekenai loan bamona abitorehai moni do ia henia tadikaka ena kohu kahana sibona ena davana hegeregerena. Bona ia gwau: “Ena bisinesi dekenai ia gaukaralaidia kohu bona ena ruma lau gwauraidia lasi.” Ma ia gwau: “Lau ura lasi momokani egu tadikaka be ena ruma amo do lau lulua bona ruma be haida dekenai do lau hoihoilaia bena moni do lau abia, ena abitorehai karaia totona.”

Hereva dokona be inai, namona be oi noho gabuna dekenai bisinesi edia heau daladia oi sikelidia namonamo. Ita be “nega dokonai” ita noho, bona unai nega dekenai taunimanima be “moni do idia mataganigani henia . . . Edia turana do idia samania henia.” (2 Timoteo 3:​1-4) Reana oiemu turana bona tadikaka be idia kara maoromaoro, to reana iena gaukara taudia bona ia dekenai idia hoihoi taudia be idia koikoi. Badina ia be Keristen dainai, ia be taunimanima koia bona koikoi herevadia ia gaukaralaidia diba lasi​—Witness lasi bisinesi taudia haida idia karaia bamona, bona unai taudia ese tadikaka ena bisinesi idia hamorua diba. Danu, “iboudiai dekenai nega bona kara idia vara kava” dainai, namona be idia vara gau dikadia oi laloa. (Kohelete 9:11) Oiemu bisinesi do ia moru haraga diba. Moni ena goada ia maragi neganai (inflation), unai ese bisinesi ia hadikaia diba eiava emu henia monina ena goada ia hamaragia diba. Henaohenao karana, aksiden, kohu hadikaia karana, bona bero davaria karadia be namo lasi bisinesi dekenai. Unai gaudia ibounai oi laloa namonamo guna, gabeai oiemu lalonai oi hadaia.

Dika Ia Vara

Nega haida, ena be unai kara ibounai ia badinaia, to Keristen tadikaka be ia hegeregere lasi unai abitorehai davana ia henia lou. Unai negai, Taravatu Hereadaena ese ia do ia doria bona nega ibounai abitorehai ia henia tauna ida do ia herevahereva namonamo. Reana nega haida davana sisina sibona do ia henia diba. To, namo lasi Keristen tadikaka ese unai kara ia gaukaralaia ekskius bamona iena abitorehai davana ia henia haraga lasi totona, to namona be ia hekwarahi ena abitorehai davana henia lou totona. (Salamo 15:4) Abitorehai moni ia henia tauna be Keristen tadikaka ta neganai, namona be ia danu ese lalokau ia hahedinaraia. Bema ia laloa tadikaka ese koikoi dalana amo ia kara henia, namona be Mataio 18:​15-17 ena sisiba ia badinaia.

Nega momo, bema ita ese taravatu naria taudia dekenai unai hekwakwanai ita laohaia, guna ai gwauraia tauna Pedro ia karaia bamona, unai be aonega karana lasi. Aposetolo Paulo ia gwau: “Bema umui emui ekalesia orea lalonai umui ta ese turana ta ia ura samania neganai, dahaka dainai Dirava diba lasi taudia edia kota vairanai do ia kota henia? . . . Umui huanai be aonega tauna ta lasi, a? Ia ese ekalesia taudia huanai idia vara hepapahuahu gaudia ia hamaoromaorodia diba lasi, a? Inai bamona tauna lasi dainai ekalesia tauna ese iena ekalesia turana ta ia kota henia Dirava diba lasi taudia edia vairana, a? Oibe, umui emui ekalesia turana umui kota henia ena anina korikori be inai: emui ekalesia mauri ia moru momokani. Haida ese umui idia hadikaia neganai, o emui gau idia henaoa neganai, umui haheauka diba lasi, a? Hisihisi umui ania diba lasi, a?”​—1 Korinto 6:​1-7.

Nega haida unai kara lalonai be abidadama lasi taudia danu ita gaukara taudia, tanobada bisinesi ese kohu idia henia taudia, eiava insurens gaudia haida, bona namona be tanobada ena kota eiava gavamani dekenai ita laohaidia hereva ita hamaoromaoroa totona. To nega momo dekenai, Keristen tadikaka ta be ena moni do ia halusia to ena tadikaka be kota dekenai ia abia lao lasi badina ena abitorehai davana ia henia lasi dainai, bona kongregesen dekenai hemarai karana do ia havaraia lasi.

Dala momo dekenai unai hekwakwanai ita koua diba. Edena bamona? Tadikaka ta dekenai moni do ita abitorehai henia negana vairanai, eiava tadikaka ta amo moni do ita abitorehai negana vairanai, namona be do idia vara diba gau dikadia oi lalodia namonamo. Namona be laloa namonamo karana bona aonega karana oi karaia. Bona gau badana be, “umui emui gaukara ibounai lalonai,” emui bisinesi gaukara dekenai danu, “lalokau dekenai do umui karaia.”​—1 Korinto 16:14.

[Footnotes]