Duahia Taudia Edia Henanadai
Iesu ese ia murinai idia raka taudia ia hamaoroa, moni do ‘idia henia kava bona ena davana do idia tahua lasi’ neganai, anina be idia henia moni danu do idia noia lou lasi, a?
Iesu ena hereva Luka 6:35 dekenai ita lalo-pararalaia totona, Mose ena Taravatu ita laloa be namo. Unai Taravatu ai Dirava ese Israela taudia ia hamaoroa, bema ogogami bona heduru idia tahua Israela taudia dekenai abiatorehai monina idia henia, atoa kau monina idia atoa lasi. (Esodo 22:25; Levitiko 25:35-37; Mataio 5:42) Unai moni be bisinesi karaia totona idia henia lasi. To, unai moni be ogogami eiava dika ma haida idia davaria taudia durua totona idia henia. Badina emu ogogami dekena tauna amo atoa kau monina oi noia be lalokau karana lasi. To, heniatorehai tauna be ia henia moni ibounai ia abia be maoro, bona danu nega haida ia ese gau ta do ia abia bona do ia dogoatao ela bona abiatorehai tauna be moni ibounai ia haloua.—Deuteronomi 24:17.
Ena be Iesu ese Mose ena Taravatu ia abia dae, to ia ese unai hereva ena anina ma ia habadaia, ia gwau, heduru ia henia tauna be ‘davana do ia tahua’ lasi be namo. Israela taudia bamona, nega haida Keristani taudia be moni ena hekwakwanai eiava gau ma haida dainai tauanina dalanai idia ogogami diba. Bema Keristani tadikaka dekenai unai ia vara bona moni dalanai heduru ia tahua, hebogahisi karana be ia ita durua be namo, ani? Momokani, bema ia vara kava gauna ta dainai tadikaka ta be moni dalanai ia hekwarahi, lalokau korikorina ese Keristani tauna do ia hagoadaia ena tadikaka ia durua totona. (Aonega Herevadia 3:27) Reana dala ia noho unai bamona tadikaka dekenai harihari gauna ta ita henia totona, herevana unai harihari gauna be ta ese abiatorehai bamona ia henia monina ese do ia hereaia.—Salamo 37:21.
Aposetolo edia negai, aposetolo Paulo bona Banaba be Asia Minor ai idia noho Keristani taudia amo idia abia kontribusen monina, be doe idia davaria Iudea tadikaka totona idia abia lao. (Kara 11:28-30) Hari negai danu, dika ia vara neganai, nega momo Keristani taudia ese idia dabu tadikakadia dekenai harihari gaudia idia siaia. Unai bamona idia karaia neganai, ma haida dekenai haroro namona idia henia. (Mataio 5:16) Oibe, namona be heduru ia tahua tauna ena lalohadai bona noho dalana ita laloa. Dahaka dainai ia dabu? Paulo ena hereva ita laloa be gau badana: “Bema tau ta ese gaukara ia karaia lasi neganai, aniani ta umui henia lasi.”—2 Tesalonika 3:10.
Bema tadikaka ta be ia ogogami lasi to ia ura moni dalanai heduru ia abia, reana ia dekenai abiatorehai monina oi henia diba, to atoa kau monina oi noia lasi. Bema unai ia vara bona moni ia heniatorehai tadikaka ese abiatorehai moni ibounai ia haloua, Iesu ena hereva Luka 6:35 dekenai ia utua lasi. Namona be edia gwauhamata be pepa dekenai idia torea, bona abiatorehai ia abia tauna ia hekwarahi unai gwauhamata hegeregerena moni ia haloua totona. Oibe, Keristani lalokauna ese abiatorehai tauna ia hagoadaia moni ia haloua totona, heniatorehai tauna ena lalona ia hagoadaia bona ia henia hegeregerena.
Moni (eiava harihari gauna) ia ura heniatorehai tauna ese ena ruma bese ena noho dalana danu ia laloa be namo. Hegeregere, bema unai ia karaia, ena ruma bese taudia naria ena maduna—Baibel ese ia gwauraia maduna unai—do ia huaia lasi, a? (2 Korinto 8:12; 1 Timoteo 5:8) To, Keristani taudia ese dala idia tahua ta ta idia lalokau henia totona, bona Baibel ena hakaua herevana hegeregerena dala namodia ai unai lalokau idia hahedinaraia be namo.—Iamesi 1:27; 1 Ioane 3:18; 4:7-11.