Hebogahisi Ia Hahedinaraia Roma Tuari Kapitan Ta
ROMA tuari kapitanidia be taunimanima dekenai hebogahisi idia hahedinaraia lasi. Oibe, idia be tuari taudia sinahu-sinahu idia gunalaia taudia dainai, idia ese lalo-auka bona goada toana idia hahedinaraia bona idia be mai edia siahu taunimanima ta ena mase ahuna idia henia diba. To Buka Helaga lalonai Augusto ena orea kapitan ta ese kara namo bona hebogahisi toana ia hahedinaraia aposetolo Paulo dekenai. Ena ladana? Iulio.
Buka Helaga lalonai unai tau ena sivarai be Kara karoa 27 lalonai ia noho. Aposetolo Paulo ia ura ena kota hereva be Kaisara sibona ese Roma dekenai do ia kamonai henia. Unai dainai, Paulo bona ma dibura taudia haida be “tuari kapitan ta dekenai idia henia, ia ena ladana be Iulio, ia be Augusto ena orea tauna ta.” Ierusalem ena mirigini kahanai ia noho gabu ta, ladana Kaisarea, amo lagatoi ta dekenai idia guia. Unai gabu Kaisarea be Roma ena tuari orea haboua gabuna ta. Sivarai torea tauna Luka be inai bamona ia torea: “Kerukeru dinai Sidono dekenai ai kamokau. Unuseni Iulio ia bogahisihisi Paulo dekenai. Ia ruhaia, bona iena dala ia karaia, ena turadia dekenai do ia lao, bena ena ura gaudia ia abia.”—Kara 27:1-3.
Buka Helaga lalonai Iulio ena hebogahisi ena badina korikori be idia gwauraia hedinarai lasi. Sedira Gavana Festo ese ia hamaoroa dibura taudia huanai Paulo be do ia kara namo henia bada. Eiava reana Paulo idia guia anina ia lalo-pararalaia neganai, ia ese Paulo ena goada bona abidadama ia hoalaia. To Iulio ia diba maoromaoro Paulo be ma dibura taudia haida bamona lasi.
Paulo ese ia hamaoroa Ao Namodia do idia rakatania lasi, to Iulio ese unai hereva ia abia dae lasi. Lagatoi be davara ai ia heau noho lalonai guba bada herea ia toa bona kahirakahira vanagi ia hure kau Africa ena mirigini kahana boe dekenai. (Kara 27:8-17) Inai hekwakwanai ia vara neganai, idia guia taudia ibounai be idia gari dikadika bena Paulo be ia gini tore bona inai bamona ia hagoadadia, ia gwau: “Umui ta ena mauri do ia boio lasi. Lagatoi sibona do ia boio.” To herevana, lagatoi ai idia gaukara taudia idia ura vanagi idia rakatania. Paulo ese Iulio inai bamona ia hamaoroa: “Bema idia be lagatoi dekenai idia noho lasi, umui mauri diba lasi.”—Kara 27:21, 22, 30, 31.
Unai neganai, Iulio ese Paulo ena hereva ia abia dae, bona ia badinaia bena lagatoi taudia edia heau dalana be ia koua. Paulo ese ia gwauraia hedinarai hegeregerena, lagatoi be boe dekenai ia kamokau bona hurehure ese ia hamakohia rohoroho. Tuari taudia be idia gari dibura taudia do idia heau boio garina, unai dainai idia ura ibounai do idia aladia mase to Iulio ese ena tatau ia koudia, bena unai dala amo ia ese Paulo ma ia hamauria.—Kara 27:32, 41-44.
Buka Helaga ese inai hebogahisi kapitan tauna dekenai ma dahaka ia vara be ia gwauraia hedinarai lasi. Reana ia ese Keristen dalana ia abia hidi eiava lasi, ita diba lasi. Ia hahedinaraia hebogahisi karana ese ena lalonai ia noho Dirava ena laloa maoromaoro karana ia badinaia momokani. (Roma 2:14, 15) To Keristen taudia ese unai bamona taunimanima edia hebogahisi karana idia hanaia momokani, badina idia be Dirava ena lauma helaga ese ia henia hebogahisi toana idia hahedinaraia goevagoeva. (Galatia 5:22) Oibe, bema Dirava ia diba lasi tomadiho koikoi kapitanina ta ese unai bamona hebogahisi ia hahedinaraia diba, vadaeni, Dirava ena taunimanima edia hebogahisi karana ese unai tau ena do ia hanaia vaitani be namo!