Dirava Ena Orea Lau Badinaia Namonamo

ROY A. RYAN ESE INAI SIVARAI IA GWAURAIA

Sandhill hanua, Missouri dekenai, be ladana maorona ia abia badina ia be miri ena ororo sibona bona ia be ororo badadia bona taora huanai ia noho. Unai dala rua badinai ia noho hanuana be Rutledge ena hanua amo, west kahana kilomita 5 bamona ia noho, bona hanua lalonai be ruma 8 eiava 9 sibona, Methodist dubuna ta, bona auri gaukaralaia bisinesi ena ruma ta idia noho. October 25, 1900 ai, unai hanua lalonai lau vara.

LAUEGU tamana be hanua ena auri idauidau karaia tauna. Lauegu tamana bona sinana be dubu dekenai idia lao momo lasi, to lauegu sinana ese lau ia siaia lao Sunday sikuli, Methodist ena dubu dekenai. Unai lada Methodist lau ura henia lasi, badina lau laloa taunimanima be Keristen idia gwauraidia be namo, to lau ura momokani Bible ena hereva momokani lau diba bona mauri hanaihanai lau abia danu.

Lauegu lagani be 16 neganai, lau lao bona Santa Fe ena train naria bisinesi dekenai lau gaukara. International Bible Students oreana (hari idia be Iehova ena Witness taudia) tauna ta, ena ladana be Jim, ia mai aiemai gaukara grup taudia danu ia gaukara hebou totona; ia bona lau nega momo ai gaukara hebou. Jim be Bible ia herevalaia neganai, ena hereva lau kamonai. Unai hereva ena mamina be namo dainai lau noia ena buka ta do lau duahia totona.

Jim ese International Bible Students Association edia volume gingigunana buka ladana Studies in the Scriptures, C. T. Russell ese ia halasia gauna, lau ia henia do lau duahia totona. Lau henia lou neganai, lau noia volume haida ma do ia abia mai, do lau duahia totona. Nega sisina murinai, Jim be train naria gaukarana ia rakatania, bona gabeai lau itaia lou neganai ia be Rutledge ena dala dekenai ia gini bona ia be haheitalai buka ta ladana Scenario of the Photo-Drama of Creation ena oda ia karaia noho. Unai murinai lau ia boiria ena ruma dekenai hebou dekenai do lau lao totona. Sunday dinadia ibounai kilomita 5 bamona lau raka Rutledge hanua hebou totona.

Lagani 1919 lalonai Golden Age magasin (hari Awake!) idia halasia neganai, lau ura haroro gaukara lau karaia hamatamaia. Ma Bible student matamatana ta bona lau, ai ura dikadika ruma ta ruma ta dekenai unai magasin matamatadia ai hariharilaia. Aiemai hanua lalonai unai gaukara ai karaia hemarai dainai, train dekenai ai guia bona ai lao aiemai gabu kahirakahira hanuana ta dekenai, ai haroro totona. Daba dekenai ai ginidae neganai, ai sibona ta ta ai lao ruma ta ruma ta dekenai ai pidipidi ela bona adorahi dekenai, ena be ta ese unai gaukara be ai ia hadibaia lasi to ai karaia sibona. Lau ese sabskripsen oda rua lau abia, ta be guna train naria gaukarana dekenai ai gaukara hebou tauna ta ese ia abia.

Lagani 1920, October 10 ena dina ai, Rutledge hanua ena gohu maragina dekenai lau bapatiso. Lauegu tamana bona sinana idia ura lasi International Bible Students taudia danu lau gaukara hebou. Idia ura lasi ena badina be tuari laganidia 1914 ela bona 1918 dekenai dubu gunalaia taudia ese Bible Students taudia idia ura henidia lasi dainai. To, unai murinai lauegu tamana be Bible Student taudia edia hebou haida dekenai ia lao, bona ia ese The Golden Age magasin ia duahia danu. Lauegu sinana be ia do mase lasi neganai, ia ese iseda lalohadai, Bible ena hereva momokani dekenai, ia ura henia. To lauegu ruma bese taudia iboudiai ese hereva momokani idia abia dae lasi.

Hetoho Ena Nega

Unai guna negadiai, taunimanima toi sibona lau ida hanaihanai Bible stadi heboudia dekenai ai lao, Rutledge dekenai. Gabeai unai taudia toi ese orea idia rakatania. Idia ta be pablik tok ia henia namonamo tauna bona nega haida unai gabu dekenai ia be pablik tok ia karaia. To iena aonega dainai ia hekokoroku bena ia ura lasi ruma ta ruma ta dekenai haroro gaukara do ia karaia, guna Keristen taudia idia karaia bamona.​—Kara 5:42; 20:20.

Lau laloatao, unai taudia toi be International Bible Students taudia danu edia hebamo karana idia hadokoa neganai, lauegu mamina be aposetolo Petro ena mamina bamona, Iesu ese taunimanima ia hamaorodia ‘Iesu ena hidio do idia ania’ bona ‘ena rara do idia inua’ neganai. Momo be Iesu ena hereva dainai ia idia rakatania. Unai neganai, Iesu be aposetolo taudia ia nanadaia, ia gwau: “Umui danu do umui raka siri, a?” Petro ia haere, ia gwau: “Lohiabada e, ai be daika dekenai do ai lao? Mauri hanaihanai herevadia be oi dekenai idia noho.”​—Ioane 6:​67, 68.

Ena be Petro ese ‘Iesu ena hidio ania’ bona ‘ena rarana inua’ herevana ia lalo-pararalaia namonamo lasi, to ia diba mauri hanaihanai ena hereva be Iesu dekenai idia noho. Iehova ena orea dekenai unai bamona lau laloa danu. Ena be buka idauidau haida edia anina dekenai lau lalo-parara momokani lasi, to lau diba hereva momokani be unai orea dekenai ia noho. Bona nega haida hereva haida idia gwauraia bona lau lalo-parara momokani lasi, to lau heai lasi bona lau dadaraia lasi. Bona gabeai unai hereva ena anina korikori idia hahedinaraia namonamo, eiava nega haida hereva haida idia hamaoromaorodia. Nega ibounai lau moale badina lau naria noho, lau lalo-pararalaia lasi gaudia be nega korikori dekenai edia anina korikori ia hedinarai totona eiava gau haida idia hamaoromaorodia totona.​—Hereva Lada-isidia 4:18.

Gau Haida Lau Haidaua Pioneer Gaukara Karaia Totona

Lagani 1924, July huana dekenai, lau lao intenesenel hebouhebou badana Columbus, Ohio, dekenai. The Golden Age magasin ese ia hahedinaraia “unai be hebouhebou badana Bible Student taudia ese idia karaia, unai nega lalonai.” Unuseniai gwaubou hereva badana, ladana “Samania Herevana” idia hamomokania. Hebouhebou dekenai unai hereva iboudiai ese lau ia hagoadaia, nega ibounai hesiai gaukara, eiava pioneer gaukara, do lau karaia totona.

Hebouhebou murinai lau giroa lao bona train naria gaukara dekenai lauegu moni gaukara lau hadokoa, bena Bible Student ta bona lau ai pioneer hebou noho. To, lagani ta murinai, lauegu tamana bona sinana edia tauanina idia manoka momokani dainai lauegu heduru idia tahua. Pioneer gaukara lau hadokoa bona pipeline kampani ta dekenai lau gaukara, to unai gaukara taudia edia kara be dika dainai, unai gaukara lau rakatania bona lau sibona ese labolabo lau naria bona honey hoihoilaia bisinesi lau haheaua noho.

Lagani 1933 ena keru matamaia negana kahirakahira lalonai, lauegu tamana bona sinana idia mase, bona unai neganai lau be maduna ta lasi. Unai dainai lagani 1934 ena siahu matamaia negana dekenai, lauegu labolabo lau henia tau ta dekenai do ia naria totona, trailer maragina ta lau karaia lau noholaia totona, bona nega ibounai hesiai gaukara lau karaia, pioneer tauna ta bamona. Guna, lau be Witness burukana ta danu ai gaukara hebou Quincy, Illinois, kahirakahira dekenai. Unai murinai lau giroa lao Missouri dekenai, unuseniai pioneer ena grup ta danu ai gaukara hebou.

Lagani 1935 lalonai, medu ia diho momo lasi Midwest gabuna dekenai, bona ai be biru gabudia dekenai ai gaukara dainai, unuseniai gaukara be ia auka sisina. Unuseniai idia noho taudia be moni lasi dainai, bema buka bona magasin ai hariharilaia neganai, moale taudia haida ese aniani eiava gau haida ai dekenai idia henia.

South Kahana Dekenai Lau Pioneer

Paraka nega ia ginidae dainai, unai gabu ai rakatania bona ai lao gabu ta ladana Arkansas. Unuseniai be ia paraka momokani lasi. Unuseniai, buka bona magasin momo ai hariharilaia bona ai ese tini aniani momo ai davaridia emai aniani totona. Nega momo ai ese kohu haida ai abia bona unai amo ai ese moni ai davaria diba, hegeregere aluminium amo idia karaia kohudia, brass gunadia eiava copper gunadia, motuka gunadia edia radiator eiava bateri. Unai ese lauegu motuka ena bensini davana ia henia, haroro gaukara ai karaia noho totona.

Hesiai gaukara ai karaia Newton, Searcy, bona Carroll provinsi dekenai, Ozark Plateau ena ororo gabudia dekenai. Ororo dekenai idia noho taudia ai haroro henidia neganai, emai ekspiriens be momo herea. Unai nega lalodiai dala be dika eiava dala be lasi dainai, aiemai gaukara be aena dekenai ai karaia. Aiemai pioneer grup taudia haida be hosi amo idia lao ororo dekenai idia noho taudia haroro henidia totona.

Nega ta kamonai tauna ta ladana Sam ena noho gabuna ai idia hadibaia, ia be ororo atai momokani dekenai ia noho. Mai ena moale danu ai ia abia dae bona ai ia hamaoroa iena gabu dekenai hanuaboi tamona do ai noho. Ena be Sam ena adavana be aiemai sivarai dekenai ia ura lasi kamonai, to iena lagani 16 natuna mero, ena ladana be Rex, ia kamonai. Unai gabu ai rakatania neganai Sam ese ai ia hamaoroa ia dekenai do ai giroa lao. Unai dainai pura rua murinai, idia dekenai ai lao bona ai noho.

Nega iharuana unai gabu ai rakatania gwauraia neganai, Sam ena adavana ese ai ia boiria do ai vadivadi henidia lou totona. Ia gwau aiemai hebamo karana Rex dekenai be namo herea. Bona ia gwau: “Ia be mero dikana momokani, hereva dikadia momo ia gwauraia, bona umui mai negana amo ia mai hari, ia be hereva dikadia ia gwauraia momo lasi.” Lagani momo muridiai lau ese Rex lau davaria lou, ia be Gilead misinari sikuli dekenai ia vareai, South Lansing, New York dekenai. Lagani idia hanaia lalonai unai bamona ekspiriens ese lau idia hamoalea bada.

Betele Gaukara

Pioneer gaukara totona aplikesen lau siaia neganai, nega tamona lau be Betele gaukara totona lau siaia danu, Iehova ena Witness taudia edia hedikwota, New York dekenai. Lagani 1935 dekenai revareva amo lau idia hadibaia, lauegu aplikesen be idia abia dae bona lau idia hamaoroa do lau lao Watchtower Society ena Kingdom Farm, South Lansing, New York dekenai, do lau itadia totona, bona lauegu Betele gaukara do lau hamatamaia. Maoromaoro Witness tadikaka ta danu ai herevahereva bona ia ese lauegu pioneer trailer ia abia.

Lagani 1935, May 3 dekenai, lauegu motuka dekenai lau lao New York dekenai, bona dabai, 10:30 bamona lau ginidae. Bona adorahi 1 o’clock bamona au utua gaukara lau karaia. Unai dina murinai lau idia hamaoroa do lau lao miliki idia karaia gabuna dekenai, bona boromakau ena rata lau gigia, miliki abia totona. Lagani haida lau gaukara miliki karaia gabuna dekenai, nega haida daba kahana bona adorahi dekenai be boromakau ena rata lau gigia, miliki abia totona, bona dina tubua dekenai uma gaukara lau karaia. Lau ese labolabo naria gaukarana lau karaia danu, bona Betele ruma bese edia honey lau henia. Lagani 1953 lalonai, lauegu gaukara idia haidaua bona cheese idia karaia gabuna dekenai lau lao, gaukara totona.

Lauegu kudouna ia hamarerea tauna ta be Walter John “Pappy” Thorn. Iena haheitalai lau dekenai be bada badina ia ese manau bona kamonai karana Iehova dekenai ia hahedinaraia. Ia bona ma Bible Student taudia 20 be lagani 1894 dekenai idia abia hidi sekit gaukara (pilgrim gaukara) ia karaia totona—​kongregesen haida ia vadivadi henidia bona hagoadadia totona. Lagani momo lalonai ena sekit gaukara ia karaia murinai, Tadikaka Thorn be ia mai Kingdom Farm dekenai bona kokoroku edia ruma dekenai ia gaukara. Nega momo lau kamonai ia gwau: “Nega haida lau sibona lau laloa momo neganai, lau sibona gabu ta dekenai lau gini siri bona sibona lau hereva henia bona lau gwau: ‘Oi be kahu maragina ta sibona. Dahaka dainai oi hekokoroku?’ ”

Manau tauna ma ta be John Booth; lau dekenai haheitalai namona ta ai ia lao, bona hari ia be Iehova ena Witness taudia edia Hakaua Oreana tauna ta. Ia be lagani momo lalodiai inai hereva ia gwauraia, ia gwau: “Oiemu hesiai gaukara ena gabu oi laloa bada lasi, to oi laloa gau badana be daika ena hesiai gaukara oi karaia.” Unai be hereva kwadogina sibona, to ia be hereva momokanina! Iehova ena hesiai gaukara ita karaia neganai moale bada bona hahenamo momo do ita davaria!

Gau badana ta, lauegu Betele hesiai gaukara lalonai, be lagani 1943 ai, Kingdom Farm dekenai be Gilead misinari sikuli idia kehoa hamatamaia. Tano idauidau amo idia mai pioneer taudia danu ai hebamo be moale gauna momokanina. Unai nega lalodiai student 100 bamona be klas ta dekenai, unai dainai hua 6 ibounai dekenai pioneer taudia 100 bamona idia mai Kingdom Farm dekenai. Student edia diploma idia henia neganai, taunimanima tausen tausen momo idia mai unai New York sikuli dekenai, ena gunika gabuna dekenai.

Lauegu Gaukara Idia Haidaua

Gilead sikuli be idia abia lao Brooklyn dekenai, bona South Lansing dekenai student edia mahuta rumadia bona klasrum idia hoihoilaia neganai, miliki haboua gabuna be idia abia lao Watchtower Farms, Wallkill, New York dekenai. Unai dainai lagani 1969 dekenai lau lao Wallkill dekenai, bona unuseniai cheese karaia gaukarana lau karaia noho ela bona lagani 1983. Bona unai murinai lauegu gaukara idia haidaua, bona tano kakasia bona tano toana hanamoa gaukarana lau karaia.

Nega sisina daudau gunanai lau idia nanadaia, dahaka lau laloa badina lagani 30 lalonai lau karaia gaukarana, cheese karaia gaukarana, be ma idia haidaua. Hereva momokani ai lau haere, lau gwau: “Lau lalo-hisihisilaia lasi, badina cheese karaia gaukarana lau ura lasi dainai.” Lauegu haere amo lau hahedinaraia gauna be inai: Mai moale danu Iehova ena hesiai gaukara ita karaia diba herevana unai be dahaka gaukara, to gau badana be ita manau bona tiokratik dala sibona dekenai ita gaukara. Unai dainai ena be lau ura lasi cheese karaia gaukarana lau karaia, to lauegu gaukara lau moalelaia, badina Betele ena ruma bese lau durua dainai. Bema iseda Dirava badana Iehova ena hesiai gaukara ita karaia mai abidadama danu, bona ita maumau lasi, moale do ita davaria herevana dahaka gaukara ita abia.

Hari lau buruka bona lau laloa hari Betele hesiai gaukarana dekenai namo lau davaria, bona ma gabu ta dekenai unai bamona namo do lau davaria diba lasi. Lau idia naria namonamo bona ena be lauegu lagani hari be 90 to lauegu gaukara lau karaia noho. Lagani momo lalodiai hahenamo badana ta be nega haida Betele ruma besena edia daba hebou lau naria, Watchtower Farms dekenai. Dala ia noho neganai, Betele ai idia vareai matamata taudia lau hagoadaia, Betele dekenai idia henia gaukaradia idauidau idia karaia namonamo totona bona do idia moalelaia totona danu.

Lagani haida lalodiai, gabu idaudia haida dekenai lau lao​—India, Nepal, Far East, bona Europe dekenai danu. Reana, inai sisiba be tanobada hegegemadai dekenai idia noho Iehova ena orea taudia kongregesen iboudiai dekenai ia durudia diba: Hari oi noholaia maurina oi moalelaia, bona tubutubu gauna tano dekenai bamona, lauma dalanai oi tubu noho, oi noholaia gabuna dekenai.

Lau ura lau headava lasi, badina unai ese lau ia durua lauegu hesiai gaukara Dirava dekenai lau karaia noho, mai lalona veria gaudia lasi. Unai hesiai gaukara ena davana iseda Dirava badana amo be mauri hanaihanai. Umui momo be mauri hanaihanai paradaiso tanobadana dekenai do umui abia. Haida be mauri hanaihanai guba dekenai do ai abia, bona ai abia gaukarana do ai karaia noho, guba dekenai.

Reana haida do idia laloa lauegu lagani 90 lalodiai lauegu mauri be namo herea. Lauegu mauri be ia namo herea to ia daudau lasi. Dirava ena orea bona iena hereva momokani kahirakahira dekenai ita noho neganai, mauri hanaihanai do ita abia diba.a

[Footnotes]

[Picture of Roy A. Ryan on page 24]

[Picture on page 26]

Tadikaka Ryan, Model T Ford motuka badinai, ia be matamata tauna neganai