Edena Dala amo Iehova Ena Namo Ita Haloua Diba?

IEHOVA DIRAVA ese harihari bada karana be ita ibounai dekenai ia hahedinaraia goevagoeva. Ia ese tanobada taudia ibounai dekenai “mauri bona laga bona gau ibounai” ia henidia. (Kara 17:25) Dirava ese ena dina be kara dika bona kara namo taudia latanai ia hadiaria hebou. (Mataio 5:45) Momokani, ‘Iehova be kara namodia ia karaia, medu ia siaia guba amo, bona aniani haboua nega namodia ia henia umui dekenai. Boga kunu ia henia umui dekenai, bona emui kudouna dekenai moale ia havaraia.’ (Kara 14:15-17) Oibe, “gau namodia ibounai, bona harihari gaudia namodia momokani ibounai be Dirava dekena amo idia diho mai. Dirava ese diari ibounai ia karaia”!​—Iakobo 1:17.

Tauanina ena hahenamo sibona ia siaia lasi, to lauma ena diari bona hereva momokani danu ia siaia diho. (Salamo 43:3) Iehova idia badinaia hanaihanai hesiai taudia ese lauma ena aniani momo be nega korikori ai iena “hesiai tauna mai ena kamonai bona mai ena kara maoromaoro” orea amo idia davaria. (Mataio 24:45-47) Dirava ena amo ia mai heduru dainai lauma dalanai hahenamo idauidau ita abia diba, badina ia ese maino dalana ia kehoa, ita, kara dika amo ita mase noho taudia, bona ia, padanai. Edena dala amo? Ena Natuna, Iesu Keriso, amo badina Iesu ese ena mauri be taunimanima momo totona ia bouboulaia. (Mataio 20:28; Roma 5:8-12) Oibe, unai be harihari gauna hereadaena lalokau bada Diravana, Iehova, ena amo!​—Ioane 3:16.

Davana Haloua Dala Ia Noho, A?

Unai Iesu ena boubou karana ia do vara lasi laganidia sinahu sinahu lalonai, lauma helaga ese ia rohea tauna ta, salamo torea tauna ta unai, ese Dirava ena hebogahisi toana, hahemauri, bona heduru ia ura henia bona hanamoa bada dainai, inai bamona ia hereva, ia gwau: “Iehova be lau ia henia gaudia iboudiai edia davana karaia totona, dahaka do lau henia diba? Hahemauri namona ena kapusi do lau abia, bona Iehova ena ladana dekenai do lau boiboi. Lauegu gwauhamata ibounai Iehova dekenai do lau hamomokania, io, taunimanima iboudiai vairadiai do lau karaia.”​—Salamo 116:12-14.

Bema iseda kudouna ibounai ida Iehova ita lalokau henia neganai, vadaeni, mai eda abidadama momokani danu iena ladana ai do ita boiboi diba bona ia dekenai iseda gwauhamata do ita hamomokania diba. Ita be Iehova ena Witness taudia dainai, namona be nega ibounai iseda uduna amo ia ita imodaia bona ena Basileia sivaraina ita harorolaia danu, bena unai amo ita hahedinaraia ita ese ia ita hanamoa bada. (Salamo 145:1, 2, 10-13; Mataio 24:14) To ita ese Iehova, gau ibounai ia biagua tauna, be eda taga amo gau ta do ita henia diba lasi, bona ita ese ena hahenamo ibounai ena davana ita haloua diba lasi.​—1 Sisiga 29:14-17.

Basileia gaukara durua totona moni eiava kohu ita hariharilaia neganai, ita gwau lasi unai be Iehova ena namo davana ita haloua eiava ia ita hoia. Lasi. To, unai bamona ita henia neganai ita ese iseda lalokau Dirava dekenai ita hahedinaraia. Namona be iseda harihari karana ai ita hekokoroku lasi eiava sibona ena namo eiava ladana bada ita tahua lasi, to namona be mai iseda ura ibounai ida ita henia badina ita ura tomadiho momokani ia bada daekau, bona unai henia karana amo moale bona Iehova ena hahenamo do ita davaria. (Mataio 6:1-4; Kara 20:35) Bema ta ese nega ta ta ai ena moni kahana ta eiava kohu ta ia henia tomadiho momokani ena gaukara eiava ma haida durua totona, ia ese unai bamona moale bona hahenamo ia davaria diba. (1 Korinto 16:1, 2) Unai dainai ita ese karoa 10 amo karoa tamona hariharilaia karana do ita badinaia, a?

Karoa Ten amo Ta Oi Henia be Maoro, A?

Iehova be ena peroveta tauna Malaki ena uduna amo inai bamona ia hereva: “Karoa 10 10 amo karoa ta ta umui kokia bena aniani haboua rumana ai umui vareailaia; lauegu ruma ai aniani do ia noho totona; bona lau umui tohoa, . . . lau ese guba iduaradia do lau kehodia bona hahenamo be ranu bamona do lau seia diho umui latanai ela bona emui ura iboudiai do idia hegeregere.” (Malaki 3:10) Bible idauna ta lalonai be inai bamona idia torea: “Harihari gaudia ibounai umui vareailaia aniani haboua rumana lalonai.”​—An American Translation.

Harihari gaudia be karoa ibounai 10 amo karoa tamona sibona. Io, unai karoa tamona be idia henia hariharilaia totona. Unai bamona harihari karana be tomadiho ena dala ta. Anina be ta ese ia davaria gaudia ia haria ela bona karoa ibounai 10 ia karaia, bena unai karoa 10 amo karoa tamona ia henia ena tomadiho gaukara durua totona.

Rahobada, Abraham (Abram) be Kedoralaomere bona ena durua hanuadia ia halusidia neganai, ia ese ia abia kohudia karoa 10 amo karoa ta be Salem ena pavapava, Dirava ena helaga tauna Melkisedek, ia henia. (Genese 14:18-20; Heberu 7:4-10) Gabeai, Iakobo danu ia gwauhamata ena kohu ena karoa 10 amo karoa ta be Dirava do ia henia. (Genese 28:20-22) Inai haheitalai rua dekenai, unai karoa ta hariharilaia karana be sibodia edia ura dainai idia henia, badina unai nega ai Heberu taudia latanai unai bamona harihari karana ena taravatu be ia noho lasi.

Taravatu Henunai Karoa Ten amo Ta Henia Karana

Israel besena be Iehova ena taunimanima dainai, ia ese unai karoa ta henia karana ena taravatu ia henidia. Toana be, unai taravatu lalonai idia ese lagani ta lalonai karoa 10 amo karoa rua idia hariharilaia, to tanobada ena aonega taudia haida idia gwau kahana tamona sibona idia hariharilaia. Sabati laganina lalonai unai harihari karana idia karaia lasi, badina unai lagani lalonai idia gaukara lasi. (Levitiko 25:1-12) Unai harihari gaudia be uma ena anina roboana ida idia henia hebou Dirava dekenai.​—Esodo 23:19.

Unai gaudia henia totona uma aniani, au huahua bona idia ubua animal amo karoa ta ta bona orea ta ta idia abia bona unai gaudia ibounai idia laohaia helaga gabunai, bena Levi iduhuna ai, tano ai ahuna idia abia lasi besedia dekenai, idia henia. Bena, unai bese taudia ese idia davaria gaudia amo harihari karoana ta be Arona hahelaga taudia dekenai idia henia. Ia hedinarai, uiti idia hagoevaia, vine auna ena huahua amo vine ranuna idia karaia bona olive au huahuana amo oila idia karaia bena unai murinai, karoa 10 amo karoa ta idia henia. Bema Israel tauna ta ia ura lasi aniani eiava animal ia henia to moni sibona ia hariharilaia, unai be hegeregere to ia ese unai aniani ibounai ia haria kahana 5 bena kaha tamona ena davana monina do ia henia diba.​—Levitiko 27:30-33; Numera 18:21-30.

Henia dalana ma ta ia noho danu. Bema taunimanima idia hebou aria ta totona, vadaeni bese ta ta lalonai inai harihari karana idia karaia heheni. To bema Ierusalem be ia daudau momokani bona kohu be momo dainai abia lao dalana be ia auka, vadaeni, idia ura henia uit, vine ranuna, oila bona animal be idia hoihoilaia bena idia davaria monina ibounai do idia abia lao. (Deuteronomi 12:4-18; 14:22-27) Sabati laganidia 7 lalonai lagani namba 3 bona 6 edia dokonai, unai bamona harihari karana be idia karaia Levi iduhuna, nohokau taudia, vabu bona ogogami memerodia dekenai.​—Deuteronomi 14:28, 29; 26:12.

Taravatu henunai, bema ta ese gau ta ia henia lasi neganai, unai kara dainai ahuna dikana be idia henia lasi. To Iehova ese ena taunimanima ia haduadia unai henia karana idia hadokoa lasi. Nega momo idia ese idia henia karoana ibounai be ia vairanai idia gwauraia hedinarai. (Deuteronomi 26:13-15) Bema ta ese ena kohu eiava animal ta ia dogoatao kava neganai, anina be unai tau be Iehova ena amo ia henaohenao.—Malaki 3:7-9.

Unai karoa ta henia karana be metau bada ia havaraia lasi. Ita diba, Israel besena ese unai taravatu idia badinaia neganai, kohu momo idia davaria. Unai henia karana ese tomadiho maoromaoro ia durua to durua gaudia bona kohu henia dalana ia gwauraia momo lasi. Oibe, unai karoa ta hariharilaia karana ese namo bada ia havaraia Israel besena lalonai. To unai bamona henia karana be Keristen taudia ese danu do idia karaia, a?

Keristen Taudia ese Karoa Ten amo Ta Do Idia Henia, A?

Keristendom ai, nega sisina daudau unai karoa 10 amo tamona henia karana idia karaia. The Encyclopedia Americana ia gwau: “Lagani 500 C.E. ia abia murinai, unai karoa ta henia karana be momo ese idia karaia. Lagani 567 C.E. ai Tours Kaunsolo bona lagani 585 C.E. ai Macon Kaunsolo iharuana ese idia hahedinaraia idia ese unai henia karana idia abia dae. . . . Kerere momo idia vara, bona bema gwaumaoro idia henia dubu dagina lasi taudia ese unai harihari gaudia idia gogoa, kerere momo herea idia vara. Pope Gregory Namba 7 ese unai henia karana ia taravatua. Unai negai, dubu dagina lasi taudia momo be edia henia karana ena gwaumaoro herevana be idia henia fada edia orea bona dubu edia orea dekenai. Katolik dubu amo momo idia raka lasi bona ma edia dubu idia haginia negana lalonai, dubu momo ese karoa ta henia karana ia koua lasi bona Katolik dubu bona Protestant dubudia tano idauidau ai ese unai karoa hariharilaia karana idia karaia.” Unai karoa ta henia karana be idia hadokoa to ma tano haida ai be idia haidaua sisina bona hari inai nega ai tomadiho haida sibona ese idia karaia.

Unai dainai, Keristen taudia ese unai karoa ta hariharilaia karana do idia karaia be maoro, a? Buka Helaga ena concordance ta ia torea tauna ta, Alexander Cruden, ia gwau: “Ita ia Hamauria Tauna bona ena aposetolo taudia ese karoa ta hariharilaia karana idia herevalaia lasi.” Oibe, Keristen taudia be karoa ta henia taravatuna henunai idia noho lasi. Dirava sibona ese Mose ia henia Taravatuna, mai ena karoa ta henia taravatuna, be Iesu danu nega tamona ena mase aunai ia kokoa kau. (Roma 6:14; Kolose 2:13, 14) Unai dainai Keristen taudia ese kongregesen gaukara durua totona do idia henia moni ena bada be kongregesen ese ia gwauraia lasi, to sibona edia kudouna ena ura hegeregerenai do idia henia.

Emui Kohu amo Iehova Umui Hanamoa

Momokani, bema Keristen taunimanimana ta be sibona ena ura dainai ena moni karoa 10 amo karoa ta be tomadiho momokani ena gaukara durua totona ia henia neganai unai kara ese Buka Helaga ena taravatu ia utua lasi. Papua New Guinea ai, lagani 15 mero matamata ta ena heduru moni ida ia siaia hebou letana be inai bamona ia gwau: “Lau mero maragi neganai, egu tamana ese nega ibounai lau ia hamaoroa, ia gwau, ‘Moni gaukara oi hamatamaia neganai, emu davana ginigunana be Iehova dekenai oi henia.’ Lau ese Hereva Lada-isidia 3:​1, 9 ena hereva lau laloatao badina unai siri ia gwau iseda uma ena anina roboana be Iehova dekenai ita henia ia ita hanamoa totona. Lau gwauhamata unai bamona do lau karaia, unai dainai lau ese egu gwauhamata lau hagugurua inai. Lau be mai egu moale bada ida Basileia ena gaukara durua totona inai moni lau siaia.” Buka Helaga be taunimanima ia doria lasi unai bamona gwauhamata idia karaia. Lasi. To, kudouna ena ura dainai iseda henia karana ese tomadiho momokanina haginia dalana ia durua bada.

Keristen taunimanimana ta ese sibona ena ura hegeregerena do ia henia Iehova Dirava tomadiho henia karana durua totona. Hegeregere: Iehova ena Witness hebouhebou ta dekenai taihu burukadia rua be Basileia gaukara durua totona dahaka do idia henia kiki idia karaia. Unai taihu ta, ena lagani be 87, be ia ura diba hebouhebou gabunai aniani ena davana be hida bena unai hegeregerena moni do ia henia. Taihu iharuana, ena lagani be 90, ese ia hamaoroa, ia gwau: ‘Oi sibona emu ura hegeregerena​—bona ma sisina danu oi atoa kau be namo.’ Unai taihu badana ena haheitalai be namo herea!

Iehova ena taunimanima ese edia tauanina bona kohu ibounai Iehova dekenai idia gwauhamatalaia vadaeni dainai, idia be mai edia ura bada danu moni, kohu o edia heduru idia henia tomadiho momokani karana durua totona. (Korinto Iharuana 8:12 hahegeregerea.) Io, Keristen heniabada karana ese dala momo ia kehoa taunimanima ese Iehova tomadiho henia karana do idia moalelaia totona. Unai bamona henia karana be gunaguna taravatu gauna bamona lasi eiava karoa ten amo karoa ta henia karana bamona lasi, to nega haida ta be ena kudouna ena mamina dainai sedira henia gauna badana ia henia Basileia gaukara ia heau namonamo totona.​—Mataio 6:33.

Aposetolo Paulo ia gwau: “Ta ta edia laloa, edia laloa hegeregerena do idia henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.” (2 Korinto 9:7) Bema oi be mai emu moale bona lalokau ibounai danu gau haida oi henia, tomadiho momokani durua totona, hahenamo momo do oi davaria, badina hereva lada-isina ta ia gwau: “Oiemu gau namodia amo bona oiemu uma ena huahua ginigunana amo Iehova oi hanamoa. Bena oiemu aniani haboua rumadia be aniani momo amo do idia honu; bona emu vine ranu be edia uro idia hahonua momokani dainai tano dekenai idia moru diho.”​—Hereva Lada-isidia 3:9, 10.

Ita eda moni bona kohu amo Iehova do ita hatagaia diba lasi. Golo, siliva, ororo daha daha latanai idia raka animal ibounai bona ita duahia diba lasi dava bada bona anina bada gaudia ibounai edia biaguna be ia sibona. (Salamo 50:10-12) Ita taunimanima be ita hegeregere lasi Dirava ena amo ita abia hahenamo idauidau edia davana ita haloua. To ita ese iseda heabidae toana ia dekenai ita hahedinaraia diba badina ita moale ena gaukara helagana lalonai ita vareai dainai bona ena ladana badana ita abia isi diba dainai. Bona ita diba maoromaoro, ta ese hahenamo momo herea ia davaria diba bema ena lalona bona kudouna ibounai ida gau haida ia henia tomadiho goevagoeva karana durua dainai bona lalokau bona heniabada Diravana, Iehova hanamoa totona.​—2 Korinto 9:11.

[Box on page 29]

HAIDA EDIA HEDURU BASILEIA GAUKARANA TOTONA

◻ TANOBADA HEGEGEMADAI GAUKARANA IDIA DURUA: Momo ese edia moni idia atoa hegaegae moni maua ta ladana: “Kontribusen Tanobada Hegegemadai Society Ena Gaukara Durua Totona​—Mataio 24:14” dekenai idia udaia totona. Hua ta ta, kongregesen idauidau ese unai moni be tanobada ena hedikwota Brooklyn, New York, dekenai idia siaia lao eiava branch opesi dekenai idia siaia.

◻ HARIHARI GAUDIA: Emu henia moni be oi siaia diba Watch Tower Bible and Tract Society of Pennsylvania, 25 Columbia Heights, Brooklyn, New York 11201, eiava Society ena branch opesi idauidau dekenai. Davana bada nadidia eiava davana bada kohudia be oi henia diba danu. Namona be unai kohu danu oiemu gwaumaoro leta ta oi siaia. Unai leta lalonai oi hahedinaraia oi ese emu dava bada kohudia oi henia gaudia totona.

◻ HARIHARI MONIDIA DO AI NARIA: Bema ta ia ura neganai ena moni be Watch Tower Society ese do idia naria trust account ai, ela bona biaguna ia mase. To gwauhamata ta idia karaia, hegeregere, bema iena moni ia ore neganai, unai moni ia abia lou diba.

◻ INSURANS: Bema oi ura neganai oiemu life insurance policy eiava retire o pension moni oi gwauhamatalaia bona Watch Tower Society edia ladana oi torea bena idia ese oiemu moni idia naria diba. Namona be Society oi hadibaia guna.

◻ BANK AI MONI: Bank accounts, moni bankaia certificate ibounai, eiava ta ena retire moni be bank ai trust account ta ai, eiava account ta payable on death to the Watch Tower Society [anina be banka oi hadibadia bema oi mase neganai oiemu moni be Society dekenai do idia henia], lalonai oi atoa banka ena taravatu hegeregerena. Namona be Society oi hadibaia namonamo.

◻ STOCKS BONA BONDS: Stocks bona bonds be Watch Tower Society dekenai idia henidia momokani diba eiava idia henidia bena unai stocks bona bonds amo idia mai monina be do ia lou biaguna dekenai.

◻ REAL ESTATE: Bema oi ura emu tano oi hoihoilaia bona unai moni taina Watch Tower Society dekenai oi henia unai danu be namo. Bema ruma biaguna ia ura unai ruma dekenai ia noho ela bona ia mase to ruma ia henia Society dekenai, unai danu be mai ena dala. Namona be Society oi hadibaia guna bena gabeai pepa sainia.

◻ WILLS BONA TRUSTS: Tano, kohu, ruma eiava moni be Society dekenai oi henidia emu will (mase murinai emu kohu hariharilaia gwaumaoro pepana) amo. Unai will dekenai International Bible Students Association of Papua New Guinea Inc. dekenai oi henia herevana oi torea. Danu, moni o kohu be trust agreement ai oi henidia diba. Tomadiho oreana dekenai moni o kohu be trust agreement amo oi henidia neganai, nega haida takisi ia hamaragidia diba. Will eiava trust agreement pepana ena kopi ta be Society dekenai oi siaia.

Bema oi daradara, namona be Branch dekenai emu leta ta oi siaia bona emu ura oi gwauraia. Address be: International Bible Students Association of Papua New Guinea Inc., P.O. Box 636, Boroko, N.C.D., Papua New Guinea.