“Karoa Namba Ten Umui Mailaidia, Haboua Rumana ai Umui Atodia”
“Lau umui tohoa, guba ena iduara do lau kehodia emui, . . . eiava.”—MALAKI 3:10.
1. (a) Gunaguna Iehova ese ena bese taudia edena bamona ia gwauhamata henidia? (b) Iesu be tanobada ai ia noho neganai, Iehova be hahemaoro totona dubu ai ia mai dainai, dahaka ia vara?
GUNAGUNA Israel taudia ese Iehova idia kamonai henia lasi. Gau karoadia idia henia lasi bona animal dikadia idia mailaidia, boubou gaudia ai halaodia totona. To Iehova ia gwauhamata, bema gau karoadia iboudiai be haboua rumana ai do idia vareailaidia, hahenamo be idia latadiai do ia bubua ela bona do idia dabu lasi. (Malaki 3:8-10) Bena lagani 500 murinai, Iehova ese kontraka ena gwaukau tauna Iesu ena amo dubu ai ia mai Ierusalem ai, hahemaoro totona. (Malaki 3:1) Ia davaria Israel besena ia hegeregere lasi, to Iehova idia lou henia taudia be ia ese ia hanamodia bada. (Malaki 3:7) Ia horodia, ena lauma natuna ai ia halaodia, vara matamata taudia, “Dirava ena Israela” unai.—Galatia 6:16; Roma 3:25, 26.
2. Malaki 3:1-10 be edena negai ia momokani lou, bona unai hegeregerena Iehova ese ita edena bamona ia noia?
2 Bena lagani 1,900 bamona murinai, lagani 1914 ai, Dirava ese Iesu na Iena guba Basileiana ena terona latanai ia hahelaia, bona Malaki 3:1-10 ena hereva do idia momokani lou negana ia ginidae. Unai hegeregerena, hari inai negai Keristen taudia ia noidia, edia gau karoadia iboudiai be haboua rumana ai do idia vareailaidia. Bema unai bamona ita karaia, ita danu do ia hanamoa ela bona do ita dabu lasi.
3. Iehova ena vairana dalana ia lailaia tauna be daika (a) Iesu ena negai? (b) tanobada ibounai tuarina ginigunana ia do vara lasi neganai?
3 Iehova ese dubu ai do ia mai negana ia gwauraia, ia gwau: “Itaia! Lau ese egu gwaukau tauna lau siaia, lauegu vairana dalana do ia lailaia totona.” (Malaki 3:1) Unai hegeregerena, Ioane Bapatiso be Israel ai ia mai, helalo-kerehai ia harorolaia. (Mareko 1:2, 3) Iehova be nega iharuana ena dubu ai ia mai dalana be idia lailaia a? Oibe. Lagani 1870 murinai, Bible Student taudia idia hedinarai, Baibel ena hereva momokanidia idia harorolaidia bona Toi Tamona herevana, hel ena lahi herevana bona unai bamona herevadia koikoidia ma haida edia kerere idia hahedinaraia. Ma idia gwau Idau Besedia edia nega be lagani 1914 ai do ia doko. Taunimanima momo ese edia hereva idia abia dae.—Salamo 43:3; Mataio 5:14, 16.
4. Dahaka henanadai be Lohiabada ena dina lalonai ia haerelaia be namo?
4 “Lohiabada ena dina” be lagani 1914 ai ia matamaia. (Apokalupo 1:10) Ia ese “hesiai tauna mai ena kamonai bona mai ena kara maoromaoro” do ia gwauraia hidi, bona “[Biaguna] ena kohu ibounai naria tauna” ai do ia halaoa dinana be unai. (Mataio 24:45-47) Lagani 1914 ai, dubu oreadia tausen tausen idia gwau idia be Keristen oreadia. Edena orea be Biaguna, Iesu Keriso, ese iena hesiai tauna mai ena kamonai bona mai ena kara maoromaoro do ia gwauraia? Iehova be ena dubu ai do ia mai neganai, unai do ia hahedinaraia.
Lauma Dubuna Ia Mai Henia
5, 6. (a) Iehova ese edena dubu ai ia mai hahemaoro totona? (b) Iena hahemaoro herevana Kerisendom latanai be dahaka?
5 To, edena dubu ia mai henia? Ierusalem ai ia noho dubuna ta lasi. Unai dubu ginigabena be lagani 70 C.E. ai idia hadikaia ore. To Iehova be mai ena dubu badana, unai dubu gunana ese ia laulaulaia gauna. Paulo ese ena bada ia herevalaia, ia gwau ia be mai ena gabu helagana guba ai bona mai ena magu tanobada ai. (Heberu 9:11, 12, 24; 10:19, 20) Iehova be hari lauma dubuna badana ai ia mai, do ia hahemaoro totona.—Apokalupo 11:1; 15:8 itaia.
6 Gau momo ese idia hahedinaraia Iehova be lagani 1918 lalonai ia mai. Ia davaria Kerisendom ena tomadiho oreana ese rara momo ia hahebubua vadaeni bona ariara hahinena ta bamona tanobada ia hetura henia, taga taudia ida ia gaukara hebou bona ogogami taudia ia hahisidia; tomadiho goevana ia badinaia lasi, to hahediba herevadia koikoidia ia hahedibalaidia. (Iakobo 1:27; 4:4) Guna Iehova ese Malaki ena amo ia gwau: “Lau ese babalau taudia, heudahanai taudia, gwauhamata koikoi taudia, gaukara taudia edia davana henidia karana ai idia koidia bona vabu bona tamana lasi merona idia hahisidia taudia . . . do lau samanidia haraga.” (Malaki 3:5) Kerisendom ese unai ibounai ia karaia, bona unai idia hereadia karadia danu. Lagani 1919 ai ia hedinarai goevagoeva Iehova ese ia bona Babulono Badana ena tomadiho koikoi oreadia oredia hadikadia ore herevana ia gwauraia vadaeni. Unai nega amo gado ta ese lalo-maoro taudia ia boiridia, ia gwau: “Lauegu orea taudia e, ia dekena amo do umui raka siri.”—Apokalupo 18:1, 4.
7. Iesu ese daidia na iena hesiai tauna mai ena kamonai bona mai ena kara maoromaoro ia gwauraidia?
7 Vadaeni, hesiai tauna mai ena kamonai bona mai ena kara maoromaoro be daika? Gunaguna ia be Ioane Bapatiso bona kontraka ena gwaukau tauna, Iesu, edia haroro herevadia idia abia dae taudia edia orea maragina ai ia matamaia. Bena lagani 1914 be do lasi neganai, ia be Bible Student taudia ese dala idia lailaia dainai idia kamonai taudia edia orea maragina. Tanobada ibounai tuarina ginigunana ena negai hedibagani aukadia idia haheaukalaidia, unai amo idia hahedinaraia Iehova idia lalokau henia.
Hagoevaia Gaukarana
8, 9. Lagani 1918 ai, unai orea be edena bamona ia hagoevaia be namo, bona Iehova ese unai edena bamona ia gwauhamatalaia vadaeni?
8 To unai orea danu ia hagoevaia be namo. Orea taudia haida ese orea idia inai henia dainai orea amo idia atodia siri. (Filipi 3:18) Ma haida idia hure oho, badina be idia ura lasi Iehova ena hesiai lao henia karana ai edia maduna do idia huadia. (Heberu 2:1) Namona be Babulono karadia haida do idia haoredia, orea haheaua dalana do idia hagoevaia, bona tanobada amo gini siri karana do idia dibalaia bona do idia badinaia be namo. Bona namona be kongregesen do idia gimadia goadagoada, haida ese tanobada ena miro do idia vareailaia bena do idia hakereredia o lauma dalanai do idia hamirodia garina.—Iuda 3, 4 itaia.
9 Oibe, ia hagoevadia be namo, to Iehova ese King Iesu Keriso ia gwauhamatalaia vadaeni, ia gwau: “Ia be siliva hamanadaia bona hagoevaia tauna bamona; ia ese Levi iduhuna taudia do ia hagoevadia; bona do ia hamanadadia, golo bona siliva bamona, ela bona idia ese boubou gaudia na Iehova do idia henia mai edia maoromaoro ida.” (Malaki 3:3) Lagani 1918 ai, Iehova ese kontraka ena gwaukau tauna ena amo ena gwauhamata ia hamomokania matamaia; ena orea taudia ia hagoevadia.
10. Iehova ena orea taudia ese edena bamona boubou gaudia idia mailaidia, bona Iehova ese ia boiridia edena bamona do idia kara totona?
10 Iehova be siliva hamanadaia bona hagoevaia tauna bamona ia kara dainai, Keriso ena tadina taudia, horoa taudia, bona gabeai idia ida Iehova ena hesiai idia lao henia taudia hutuma bada herea danu, iboudiai ese namo idia davaria. (Apokalupo 7:9, 14, 15) Edia orea ai idia mai, boubou gaudia na Iehova idia henia mai edia maoromaoro ida. Bona ia ese unai gau ‘ia moalelaidia, dina gunadia ai bona lagani gunadia ai hegeregeredia.’ (Malaki 3:4) Iehova ese ia boiridia, ia gwau: “Gau iboudiai karoadia namba ten umui mailaidia, haboua rumana ai umui atodia, aniani be egu ruma ai do ia noho totona; unai amo lau umui tohoa, guba ena iduara do lau kehodia emui, bona hahenamo be umui latanai do lau bubua diho ela bona do umui dabu lasi, eiava.”—Malaki 3:10.
Boubou Gaudia bona Karoa Namba Ten
11. Dahaka dainai Mose ena Taravatu hegeregerena boubou karadia be idia doko?
11 Malaki ena negai bona Iesu ena negai danu Israel taudia ese boubou gaudia bona gau karoadia namba ten be idia mailaidia dubu ai; uiti, au huahuadia, bona animal unai. To Taravatu, mai boubou gaudia bona karoa namba ten henidia karana haheganina, be Iesu ena mase ese ia haorea. (Efeso 2:15) Boubou karadia Taravatu hegeregerena idia karadia edia anina be Iesu ese ia hagugurua. (Efeso 5:2; Heberu 10:1, 2, 10) Vadaeni, edena dalai Keristen taudia ese boubou gaudia bona karoa namba ten idia mailaidia diba?
12. Keristen taudia ese dahaka lauma boubou gaudia idia bouboulaidia?
12 Edia boubou gaudia momo be lauma gaudia. (Filipi 2:17; 2 Timoteo 4:6 itaia.) Paulo ese haroro gaukarana na boubou gauna ta ia gwauraia, ia gwau: “Inai hanamoa Dirava do ita henia nega ibounai, boubou gauna bamona.” Bena lauma boubou gaudia idaudia ia gwauraidia, ia gwau: “Kara namodia do umui laloaboio lasi, bona kohu lasi taudia danu umui emui kohu do umui abia hebou. Inai bamona karadia be boubou gaudia bamona, Dirava ese ia moalelaia gaudia.” (Heberu 13:15, 16) Tama sina ese edia natudia idia hagoadadia pioneer gaukarana do idia karaia totona neganai, Iehova idia henia unai, Iefeta ese ena natuna ia henia hegeregerena; “gole-oho boubouna” ai ia halaoa, ia hakwalimua Diravana, Iehova ena.—Hahemaoro Taudia 11:30, 31, 39.
13. Dahaka dainai Keristen taudia ia haganidia lasi edia moni karoadia namba ten do idia henia?
13 To gau karoadia namba ten be edena bamona? Iehova ese Keristen taudia ia haganidia Kerisendom ena dubu oreadia haida edia kara hegeregerena edia moni do idia karoaia, karoa ten, bena karoa ta be iena orea do idia henia a? Lasi, Baibel lalonai unai bamona haheganina be lasi. Ogogami taudia Iudea ai idia noho durulaidia monina be Paulo ese ia gogoa neganai, Korinto taudia ia oda henidia lasi moni hida do idia henia. To ia gwau: “Ta ta edia laloa, edia laloa hegeregerena do idia henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.” (2 Korinto 9:7) Paulo be ma ia gwau, ena be Dirava ena hesiai taudia haida be unai dala amo do idia durudia, to iena lalona ia hegeregere ia sibona ena imana gaukaradia amo ena aniani do ia abia. (Kara 18:3, 4; 1 Korinto 9:13-15) Ia oda henidia lasi edia moni karoadia namba ten do idia henia.
14. (a) Dahaka dainai karoa namba ten ese iseda gau iboudiai Iehova ita henia karana ia laulaulaia lasi? (b) Dahaka ia laulaulaia?
14 Ia hedinarai goevagoeva Keristen taudia ediai karoa namba ten ese gau ta ia laulaulaia. Nega momo Baibel lalonai namba ten ese tanobada gauna hagugurua gauna ia laulaulaia; unai dainai karoa namba ten ese eda gau iboudiai Iehova ita henia karana ia laulaulaia a? Lasi. Ita be siboda na Iehova ita gwauhamatalai henia bona bapatiso ita abia neganai, iseda gau iboudiai ita henia unai. Unai nega amo idia be Iena. To Iehova ese ita ta ta gwaumaoro ia henia eda gau do ita gaukaralaidia. Unai dainai, karoa namba ten ese iseda gau edia kahana ia laulaulaia, Iehova dekenai ita mailaia, o iena hesiai lao henia karana ai ita iusilaia; unai be iseda lalokau ia enai ena toana, bona unai amo ita hahedinaraia ita diba ita be iena. Hari inai negai eda gau karoadia be reana karoa namba ten ataiai eiava henunai. Ta ta ese ena lalohadai ena lalohadai ai ia mailaia, ia dekenai ia noho gauna hegeregerena.
15, 16. Eda lauma karoadia edia anina be dahaka?
15 Hari lauma karoadia edia anina ta be, eda nega bona eda goada edia kahana be Iehova ita henia. Hebou ai, sekit bona distrik hebouheboudia ai, bona haroro gaukarana ai ita haorea negana ibounai be Iehova ita henia gauna—iseda gau karoadia edia kahana. Gorere taudia vadivadi henidia karana bona ma haida durudia karadia ai ita haorea negana bona goadana danu be iseda gau karoadia edia kahana. Kingdom Hall haginia gaukarana durua karana bona naria bona hagoevaia gaukaradia durudia karadia danu be unai bamona.
16 Iseda gau karoadia edia anina ma ta be ita henia monidia. Iehova ena orea be ia bada ia lao haraga dainai, ena moni madunadia idia momo daekau. Kingdom Hall matamatadia, branch rumadia matamatadia bona Assembly Hall matamatadia idia haginidia, bona idia haginidia vadaeni gaudia idia naridia. Bona lagani 1991 lalonai, misinari taudia, sekit naria taudia bona distrik naria taudia bona special pioneer taudia naridia karana ai dola 40 milion mai kahana idia haorea; unai ibounai be tadikaka ese sibodia edia ura hegeregerena idia henia.
17. Dahaka be iseda lauma karoadia bamona do ita henia be namo?
17 Iehova ia gwau lasi ita ese hida iseda lauma gaudia karoadia bamona do ita henia be namo. To, ita diba ita be siboda ita henia vadaeni, bona ia bona eda tadikaka ita lalokau henidia, bona ita diba taunimanima do ita hamauridia haraga be namo, unai dainai eda gau karoadia iboudiai ita mailaidia be namo. Ita diba namona be Iehova ena hesiai do ita lao henia mai eda goada ibounai ida. Bema iseda gau edia kahana maragina mo ita henia eiava ita henia mai eda maumau ida, unai be Dirava ena gau ita henaodia bamona.—Luka 21:1-4 itaia.
Ia Hanamodia ela bona Idia Dabu Lasi
18, 19. Iehova ena orea taudia ese edia gau karoadia iboudiai idia mailaidia dainai, ia ese edena bamona ia hanamodia?
18 Lagani 1919 amo ema, Iehova ena orea taudia ese edia nega, goada, bona moni idia henia badabada haroro gaukarana durua totona. Idia be momokani gau karoadia iboudiai idia mailaidia, haboua rumana ai idia atodia. Unai dainai Iehova ese ena gwauhamata ia hamomokania; hahenamo be idia latadiai ia bubua diho ela bona idia dabu lasi. Ia hanamodia dalana ta be, ia hahutumadia. Lagani 1918 ai Iehova be ena dubu ai ia mai neganai, horoa taudia tausen momo lasi ese ena hesiai idia lao henia, to orea be ia bada ia lao, ela bona hari inai negai horoa taudia mai edia bamodia, mamoe idaudia, be milion hani mai kahana, tano 211 lalodiai. (Isaia 60:22) Iehova ese ia hanamodia dalana ma ta be, edia lalo-parara hereva momokani enai ia habadaia hanaihanai. Peroveta herevana ia hamomokania vaitani idia ediai. Edia abidadama iena palani hagugurua dalana enai ia haginia auka vadaeni. (2 Petero 1:19) Momokani, ‘Iehova ese ia hadibadia.’—Isaia 54:13.
19 Malaki ena amo, Iehova ese hahenamo ma ta ia gwauhamatalaia: “Unai neganai Iehova garina idia gari taudia be idia hereva heheni, ta ta ena bamona ena bamona ida idia hereva, bona Iehova ese ia hakala henidia bona edia hereva ia kamonai. Bena Iehova garina idia gari taudia bona ena ladana idia laloa taudia lalodiatao bukana idia torea matamaia ia vairanai.” (Malaki 3:16) Ena be orea momo idia gwau idia be Keristen oreadia, to Iehova ena Witness taudia mo sibodia ese iena ladana idia laloa bona bese idauidau bogaragidiai idia heatolaia. (Salamo 34:3) Idia moale bada badina be Iehova ia gwau edia kamonai ia laloatao!
20, 21. (a) Keristen taudia momokanidia ese dahaka hebamo namona idia moalelaia? (b) Daidia edia idau ia hedinarai goevagoeva?
20 Horoa taudia oredia be Iehova ena taunimanima korikoridia, bona idia ida idia hebou taudia hutuma bada herea danu ese tomadiho goevana ena hahenamo idia abidia. (Sekaria 8:23) Malaki ena amo, Iehova ia gwauhamata: “Idia be lauegu taunimanima korikoridia ai do idia lao, kohu namo herea do lau havaraia dinana ai. Do lau bogadia hisi, tau ta ese ena natuna, iena hesiai ia lao henia merona, ia bogaia hisi bamona.” (Malaki 3:17) Iehova ese unai bamona ia bogadia hisi be hahenamo bada hereana!
21 Momokani, Keristen taudia momokanidia bona koikoidia edia idau be ia hedinarai goevagoeva. Iehova ena orea taudia ese ena taravatu idia badinaia toho noho, to Kerisendom be tanobada ena miro kopukopuna lalonai ia hepuni diho noho. Momokani, Iehova ena hereva be momokani: “Kara maoromaoro tauna bona kara dika tauna edia idau do umui itaia, Dirava ena hesiai ia lao henia tauna bona ena hesiai ia lao henia lasi tauna edia danu.”—Malaki 3:18.
22. Bema gau karoadia iboudiai ita mailaidia noho, dahaka hahenamo do ita abidia?
22 Keristen taudia koikoidia edia davadia henidia dinana be kahirakahira. “Guba oreadia edia Iehova ia gwau: ‘Itaia! dina be ia mai noho, ia siahu amu siahuna bamona, bona hekokoroku taudia iboudiai bona kara dika taudia iboudiai be rei kakoro hegeregerena ai do idia lao.’ ” (Malaki 4:1) Iehova ena orea taudia idia diba unai neganai do ia naridia, guna iena lauma besena be lagani 70 C.E. ai ia naridia hegeregerena. (Malaki 4:2) Unai iena gwauhamata idia moalelaia bada! Vadaeni, namona be eda gau karoadia iboudiai be haboua rumana lalonai do ita vareailaidia ela bona unai nega; unai amo do ita hahedinaraia Iehova ita laloa bada bona ita lalokau henia. Bena do ita diba ia ese ita do ia hanamoa noho ela bona do ita dabu lasi.
Oi Gwauraia Diba A?
◻ Inai nega lalonai, Iehova be edena lagani ai dubu ai ia mai, mai kontraka ena gwaukau tauna ida?
◻ Hesiai tauna mai ena kamonai be daidia, bona lagani 1918 murinai edena bamona ia hagoevadia be namo?
◻ Keristen taudia ese edena bamona lauma boubou gaudia idia mailaidia?
◻ Gau karoadia, haboua rumana lalonai idia vareailaidia, be dahaka dahaka?
◻ Unai gau idia henia dainai, dahaka hahenamo idia abidia?
[Picture on page 15]
Iseda lauma karoadia anina ta be, eda goada bona eda moni ita henia Kingdom Hall haginidia totona
[Picture on page 16]
Iehova ese ena orea taudia ia hanamodia dainai, Kingdom Hall bona Assembly Hall matamatadia idia haginidia