Duahia Taudia Edia Henanadai

◼ Keristen ruma besena be dahaka do idia karaia bema ma dala ta be lasi to edia natuna ia lao sikulina dekenai taravatu be tomadiho hahediba klas dekenai ia lao?

Keristen tama sina idia ura lasi edia natudia be tomadiho koikoi dekenai diba idia abia. To reana nega haida natudia be dala lasi to tomadiho hahediba klas dekenai idia lao sibona, to idia be tomadiho koikoi karadia eiava hahelaga karadia haida idia karaia lasi.

Dirava ena turana Abraham be natudia hadibaia tomadiho dalana dekenai haheitalai namona ia karaia. Iena natudia be Kanana dekenai ia ubudia, unuseniai idia be tomadiho kereredia bona “hahelaga” karadia dikadia bogaraginai idia noho. (Esodo 34:​11-15 danu itaia; Levitiko 18:​21-30; Deuteronomi 7:​1-5, 25, 26; 18:​9-14.) To herevana, ia be iena ruma bese ia hadibaia tomadiho dalana dekenai. Dirava ia diba Abraham be “ena natudia bona ena tubudia dekenai do ia hadibaia namonamo . . . , idia ese [Iehova ena] taravatu do idia kamonai henia, kara maoromaoro bona kara namona dekenai.”​—Genese 18:19.

Ia be uhau neganai, Iesu danu be ruma bese bona kongregesen ena tomadiho momokanina hadibaia dalana amo namo ia davaria. Unai dainai, “ia tubu daekau noho mai aonega danu, Dirava bona taunimanima ese idia ura henia.”​—Luka 2:52.

Tanobada ena gabu momo dekenai, Keristen memero kekeni be pablik sikulidia dekenai tanobada ena diba idia abia. Idia hadibaia gaudia haida be Bible ena hereva momokani ida bona idia hamomokania herevadia ida idia hegeregere lasi. Haheitalai be Keristen memero kekeni edia uru momo be saiens eiava tauanina stadilaia klas dekenai idia lao. Idia momo be evolusen ena hahediba hereva idia kamonai bona unai bamona “idia sibona idia vara” lalohadai, tanobada dekenai mauri idia vara daladia lalohadai, idia kamonai.

To unai hereva idia kamonai dainai, anina lasi unai Keristen memero kekeni be Dirava dadaraia evolusen herevadia idia abia dae. Badina be dahaka? Badina ruma bese dekenai bona Keristen hebou dekenai, idia be guna Dirava ese ia havaraia Herevana amo diba maoromaorona idia abia, unai ese ia durudia “maoro bona kerere edia toana idia diba namonamo.” (Heberu 5:14) Tama sina momo be edia natudia ida, abidadama ia hagoadaia bukana Life​—How Did It Get Here? By Evolution or by Creation? idia stadilaia.a Unai diba idia abia dainai, unai sikuli natudia be sikuli klas dekenai idia hadibaia evolusen hereva idia abia dae lasi. To klas dekenai idia haere neganai bona henanadai idia abia neganai idia hahedinaraia diba idia kamonai namonamo bona idia hadibaia gaudia dekenai diba idia abia. Haida be mai edia dala Bible lalonai taunimanima ia Havaraia Tauna ese ia hadibaia hereva momokani idia gwauraia diba.​—1 Petero 3:15.

To edena bamona bema klas lalonai unai gabu dekenai ia bada dubu oreana ta eiava tomadiho idauidau edia hereva idia hadibaia neganai?

Sedira unai hereva idia hadibaia neganai do idia hadibaia lasi hegeregere ia be diba sibona bona ta ena lalohadai do idia doridia toho lasi. Reana hadibaia tauna be unai tomadiho tauna ta bona unai dainai do ia ura natudia edia lalona bona edia kudou do ia ania toho. Unai dainai Iehova ena Witness taudia idia ura edia natudia be maoro idia abia unai tomadiho hadibaia klas dekenai idia vareai lasi. Reana unai nega lalonai edia natudia be sikuli ena nega idia gaukaralaia namonamo ma klas haida edia gaukara karaia ore totona eiava sikuli laiberi dekenai idia stadi totona.

To, gabu haida dekenai, unai bamona idia noia neganai, maoro idia abia lasi; reana sikuli eiava siahu taudia idia gwau natudia iboudiai be tomadiho kosi ena klas ibounai dekenai idia lao bona idia karaia haorea idia be sikuli ena setifiket idia abia totona. Namona be ruma bese ta ta iboudiai ese do idia karaia karana idia abia hidi.

Gunaguna, Dirava ena hesiai taudia haida ena be idia ura lasi to gabu ta dekenai idia noho neganai tomadiho herevadia eiava tomadiho karadia idia haheaukalaia, to idia be Dirava momokanina dekenai idia do tabekau henia noho. Unai be momokani Mose dekenai. Idia ubua hegeregere ia be Aigupito ena Farao ena tubuna bamona, bona “Aigupito taudia edia aonega ibounai Mose dekenai idia hadibaia.” (Kara 7:​20-22) Reana unai aonega haida be Aigupito lalonai idia hadibaia gaudia bona edia tomadiho karadia haida. To iena ruma bese ena amo bona reana ma Heberu taudia edia amo diba maoromaorona ia abia dainai unai ese iena lalohadai ia naria.​—Esodo 2:​6-15; Heberu 11:​23-26.

Heberu memero toi, Daniel ena bamodia, Babulono dekenai diba bada idia abia bona gavamani gaukara taudia ai idia halaodia taudia, edia haheitalai oi laloa. (Daniel 1:​6, 7) Idia be dala lasi sibodia edia ura hegeregerena gau ta idia abia dae idia karaia totona eiava idia dadaraia. Nega ta King Nebukadnesara ia gwau Dura kourana dekenai, unuseniai bese abia isi karadia do idia karaia, bona ma gavamani taudia ida do idia hebou bona ia ese ia haginia golo kaivakukuna do idia tomadiho henia. Heberu taudia toi be dahaka idia karaia? Ita diba momokani idia ura lasi unuseniai idia noho, to idia be dala lasi.b To edia abidadama dekenai bona Siahu Ibounai Diravana dekenai idia gini goada noho. Edia lalona dekenai Dirava idia badinaia dainai idia hegeregere unai gabu dekenai idia noho, to idia gwau idia be tomadiho koikoi karana ta do idia karaia lasi bona unai kara lalonai do idia vareai lasi.​—Daniel 3:​1-18.

Bema sikuli ena taravatu be student iboudiai be tomadiho klas dekenai idia lao bona setifiket idia abia totona diba idia abia be namo, Keristen momokani ruma bese edia natudia idia noho diba, Nebukadnesara ena taravatu hegeregerena unai memero toi idia noho bamona. To Keristen natudia be Dirava do idia atoa guna. Namo lasi hereva kereredia iboudiai idia hepapahuahulaia eiava haida ese Bible ia hadibaia lasi karadia idia karaia neganai idia koua toho, Heberu taudia toi be ma haida be golo kaivakukuna idia tomadiho henia neganai idia ese idia koua lasi hegeregerena. To, Keristen memero kekeni be tomadiho karadia, guriguri, tomadiho anedia, bona unai bamona gaudia dekenai do idia vareai lasi.

Namona be unai memero kekeni idia gaukara goadagoada ma nega haida ai goada ia henia dibana idia abia totona, unai ‘diba be idia maragi neganai amo Buka Helaga dekenai idia manadalaia. Unai Buka Helaga ese idia dekenai aonega ia henia diba ela bona hahemauri do idia abia, Keriso Iesu idia abidadama henia dainai.’ (2 Timoteo 3:15) Edia natudia ida idia herevahereva neganai, namona be nega ibounai tama sina be klas dekenai idia kamonai gaudia idia tahua. Unai ese Keristen tama sina do ia durudia Bible ena amo dahaka herevadia do idia hamaoromaorodia eiava do idia hahedinaraia namonamo, edia natudia idia daradara eiava idia veridia oho garina.

[Footnotes]