Duahia Taudia Edia Henanadai

Nebukanesa ese Dura ena tano palakana dekenai ia haginia golo kaivakuku badana vairanai Heberu memerodia toi idia tohoa neganai, Daniela be edeseniai ia noho?

Baibel ese unai ia gwauraia lasi, unai dainai hari ta ia gwau diba lasi unai hahetoho ia vara neganai Daniela be edeseniai ia noho.

Haida idia gwau, Nebukanesa ese Daniela ia lalo-namo henia dainai eiava ena dagi ese Sataraka, Misaka, bona Abetenigo edia dagi ia hereaia dainai, Daniela be Dura ena tano palakana dekenai ia lao lasi be hegeregere. Daniela 2:49 ese ia hahedinaraia nega ta Daniela ena dagi ese ena bamodia toi edia dagi ia hereaia. To ita gwau diba lasi, unai badina dainai ma haida ida kaivakuku vairanai ia hebou lasi be hegeregere.

Daniela be unuseniai ia noho lasi ena badina be ma haida ese idia gwauraia toho neganai, idia gwau reana ena gaukara dainai gabu ta dekenai ia noho eiava ia gorere bona ia lao diba lasi. To, Baibel ese unai ia gwauraia lasi. To ita diba Daniela ena kara dekenai kerere idia davaria lasi, badina bema kerere ia noho, idia mama Babulonia ofesa taudia ese ia do idia samania. (Daniela 3:⁠8) Unai kara ia do vara lasi neganai bona murinai, Daniela ese ia hamomokania ia be kara maoromaoro badinaia tauna, bona herevana dahaka hahetoho ia davaria to Dirava ia badinaia noho. (Daniela 1:8; 5:17; 6:​4, 10, 11) Unai dainai, ena be Baibel ia gwau lasi dahaka dainai Daniela be Dura ena tano palakana dekenai ia noho lasi, to ita diba momokani ia ese Iehova Dirava ia kamonai henia hanaihanai.​—⁠Esekiela 14:14; Heberu 11:33.