Dirava Ena Hahediba Bamona Do Ita Raka
“Iehova ena ororo ai . . . do ita daekau lao; ena dala ita do ia hadibalaia, bona iena dala ai do ita raka.”—MIKA 4:2.
1. Mika ia gwau dina gabedia ai Dirava ese ena orea taudia edena bamona do ia durudia?
DIRAVA ena peroveta tauna Mika ia gwau, “dina gabedia ai,” iseda nega lalonai, taunimanima momo ese Dirava do idia tahua, do idia tomadiho henia totona. Do idia hahegoada heheni, do idia gwau: “Iehova ena ororo ai . . . do ita daekau lao; ena dala ita do ia hadibalaia, bona iena dala ai do ita raka.”—Mika 4:1, 2.
2, 3. “Moni do idia mataganigani henia” herevana be edena bamona ia momokani noho?
2 Timoteo Iharuana 3:1-5 bema ita stadilaia neganai, unai ese ita ia durua, “dina gabedia” ai Dirava ese ita ia hadibaia dainai idia vara gaudia ita lalo-pararalaidia totona. Paulo ena sisiba herevana, ‘sibodia edia ura do idia tahua’ lasi herevana, idia abia dae taudia ese idia abidia hahenamodia be ita stadilaidia vadaeni. Paulo be ma ia gwau, iseda negai taunimanima be “moni do idia mataganigani henia.”
3 Ita diba Paulo ese iseda nega ia gwauraia unai. Moni momo idia gaukaralaia taudia bona bisinesi gunalaidia taudia sivaraidia oi duahidia vadaeni ani; ena be lagani ta ta iboudiai moni momo herea idia gogoa, to edia lalodia idia hegeregere lasi, bona moni ma haida idia tahua, dala kereredia amo danu. Ma haida, ena be idia be mai edia moni momo lasi, to moni idia mataganigani henia.
4 Unai be taunimanima edia kara korikori ta, idia hadokoa diba lasi karana, a? Lasi. Dirava ese gunaguna inai hereva momokanina ia halasia: “Moni ura henia kara ese dika idauidau ibounai ia havaraia noho. Bona moni idia ura bada taudia haida ese Iesu abidadama [henia] kara idia rakatania vadaeni, bona mai lalohisihisi momo, edia mauri idia hadikaia ore vadaeni.” Dirava ia gwau lasi, ‘Moni ese dika idauidau ibounai ia havaraia noho.’ Ia gwau, “Moni ura henia kara” ese.—1 Timoteo 6:10.
4-6. Baibel ese Keristen taudia edena bamona ia durudia, moni do idia ura henia lasi totona?
5 Unai karoa ena siri gabena ta ese ia hahedinaraia aposetolo edia nega lalonai Keristen taudia namodia haida be kohu momo taudia; reana edia tamadia sinadia edia amo idia abia, eiava gaukara maorona amo idia gogoa. (1 Timoteo 6:17) Vadaeni, herevana ita taga eiava lasi, Baibel ese ita ia hadibaia, moni do ita ura henia garina. Inai kerere badana, taunimanima momo ese idia karaia kererena, amo raka siri dalana be Baibel ese ma ia sisibalaia a? Momokani ia ese. Iesu ena aonega bada herevadia Mataio 6:26-33 ai mani oi duahidia.
6 Luka 12:15-21 ai, Iesu ese kohu momo tauna ta ia herevalaia, ena kohu ia habadaia toho noho, to ia mase haraga. Bena Iesu ia gwau: “Do umui naria namonamo, kohu dekenai do umui ura henia dikadika garina. Badina taunimanima edia mauri badina be kohu momo dekenai lasi.” Baibel ese danu lahedo ia gwauraia dika bona ia hahedinaraia goevagoeva gaukara maoromaoro be mai anina bada. (1 Tesalonika 4:11, 12) Ena be reana haida idia gwau unai bamona hahediba herevadia be hegeregere lasi iseda nega lalonai, to idia badinadia taudia be idia kwalimulaidia noho.
Ia Hadibadia Bona Ia Hanamodia
7 Bese momo lalodiai, tatau bona hahine, taga taudia bona ogogami taudia danu, ese inai moni herevadia Dirava ena amo be idia badinadia. Unai dainai idia ese namo idia davaria, bona edia famili danu ese, bona murimuri taudia ese unai idia itaia diba. Princeton University ena buka ta ladana Religious Movements in Contemporary America be ia gwau: “[Witness] edia buka bona magasin lalodiai, bona kongregesen ai idia harorolai henidia herevadia lalodiai, idia hadibadia loulou, motuka matamatadia, dava bada dabuadia, eiava moni momo dekediai do idia tabekau lasi be namo, do idia noho namonamo totona. Bona namona be Witness tauna be ena bosi ena gaukara do ia karaia maoromaoro, [bona] hereva momokani sibona do ia gwauraia. . . . Unai bamona ia karaia tauna, ena be ena diba be bada lasi, to ia be gaukara tauna namona ai ia lao, bona Witness taudia haida North Philadelphia [U.S.A.] ai ese dagi badadia idia abidia edia gaukara gabudia ai.” Momokani, Dirava ena hahediba be Baibel amo idia abia dae taudia ese lalohadai kereredia, hekwarahi habadaia gaudia, be idia negedia, bona sibodia edia namo bona edia moale idia habadaia.
8. “Hekokoroku,” “heagi,” bona “hereva dika” edia badina tamona be dahaka, bona inai hereva toiosi edia anina be dahaka dahaka?
8 Unai murinai Paulo ese ma kara toi ia herevalaidia, ia gwau nega dokonai taunimanima do idia “hekokoroku bona heagi. Do idia hereva dika.” Unai kara toiosi be idauidau, to edia badina tamona be lalo-heagi. Ginigunana be “hekokoroku.” Diksenari ta ia gwau Greek herevana iniseniai ena anina be: “ ‘Mai ena koikoi ida sibona ia abia isi tauna’ o ‘ia karaia diba lasi karana ia gwauhamatalaia tauna.’ ” Unai murinai be “heagi,” bona dokonai be “hereva dika,” anina be Dirava eiava taunimanima hadikadia herevadia.
9. Baibel ese taunimanima ia sisiba henidia, dahaka kara idaudia do idia goadalaidia be namo?
9 Unai bamona taudia bogaragidiai oi noho neganai, herevana idia be oi ida idia gaukara hebou taudia, eiava oi ida idia sikuli hebou taudia, eiava emu varavaradia, to emu lalona ena mamina be edena bamona? Emu lalo-hekwarahi idia hamaragia a, eiava idia habadaia, bena unai dainai oi haheauka be auka, a? Dirava ena Hereva ese ita ia hadibaia unai kara do ita dadaraidia be namo.—1 Korinto 4:7; Kolose 3:12, 13; Efeso 4:29.
10. Dahaka ese ia hahedinaraia Iehova ena orea taudia ese namo idia davaria, Baibel ena hahediba herevadia idia abidia dae dainai?
10 Ena be Keristen taudia idia goevadae lasi, to inai hahediba herevadia namodia badinadia karana ese ia durudia bada, hari inai nega dikana lalonai. Italy ena magasin ta ladana La Civiltà Cattolica be ia gwau, Iehova ena Witness taudia idia momo daekau noho, badina ta be “edia orea ese edia lalodia ia hagoadadia.” Anina be ‘idia hekokoroku bona idia heagi bona idia hereva dika,’ a? Lasi, hari Jesuit magasin be ia gwau, edia orea ese “edia lalodia ia hagoadadia, bona ia lalonai edia orea taudia ese idia abidia dae mai edia lalokau bona mai edia lalo-tamona ida, tadikaka edia kara hegeregerena.” Ia hedinarai goevagoeva Witness taudia idia hadibalaidia herevadia ese idia durudia noho, ani?
Hahediba ese Famili Taudia Ia Hanamodia
11 Paulo be ma ia gwau, nega dokonai momo ese “edia tamana bona sinana do idia kamonai henia lasi, tanikiu henia kara do idia diba lasi, helaga karadia do idia negea. Idia be lalokau do idia diba lasi.” Oi diba unai kerere rua—tanikiu henia lasi karadia bona helaga karadia negea karadia—ese ita idia gegea ahu. To Paulo ese unai kerere haniosi herevadia ia haboudia ena badina be ita lalo-pararalaia haraga diba. Unai kara haniosi be idia vara hebou.
11, 12. Paulo be edena bamona ia hahedinaraia famili momo do idia dika?
12 Ia hedinarai goevagoeva tama sina gwau-edeede henidia karadia idia momo daekau noho. Idia momo ese edia natudia idia maumauraidia, idia gwau idia durulaidia karadia dainai idia tanikiu henidia lasi. Memero kekeni momo idia gwau edia tamadia bona sinadia ese idia (o edia famili) idia badinadia momokani lasi to edia moni gaukaradia, o edia moale karadia, o idia sibodia be idia lalodia bada. Unai kara ena anina dikana mani ita laloa. Taunimanima badadia bona memero kekeni be idia hedadarai heheni dainai, memero kekeni momo be sibodia edia lalohadai idia badinadia. Unai dainai kekeni momo idia rogorogo, momo ese edia beibi idia hamasedia, bona memero kekeni momo be pokese goreredia idia abidia. Ruma lalodiai lalokau be lasi dainai, nega momo dagedage karadia idia vara. Unai ibounai ese ia hamomokania lalokau be ia maragi ia lao.
13, 14. (a) Famili momo be idia dika idia lao noho lalonai, dahaka dainai Baibel ita tahua be namo? (b) Dirava ese famili edia noho edena bamona ia sisibalaia mai ena aonega ida?
13 Reana unai dainai taunimanima momo ese sibodia edia bese o edia iduhu taudia idia inai henidia. To mani inai oi laloa, inai gau ai gwauraidia, hari inai nega ena dika hahedinaraia totona lasi. Ita tahudia gaudia badadia ruaosi be: Paulo ese ia gwauraidia kereredia do ita hisihisilaidia lasi totona, Baibel ena hahediba herevadia ese ita idia durua diba a, bona bema Baibel ena hahediba herevadia ita badinadia, unai amo namo do ita davaria a? Inai henanadai ruaosi edia haere be oibe.
14 Baibel ena hahediba herevadia ese famili edia noho idia hanamoa dainai, idia moale bona idia kwalimu; hahediba herevadia idaudia ta ese unai hereva ia hereadia lasi. Baibel ena sisiba, famili taudia be hekwakwanai gabudia amo do idia raka siri bona do idia kwalimu totona idia durudia herevadia, ta be Kolose 3:18-21. Unai bamona herevadia namodia momo amo tatau, hahine, bona memero kekeni ia hadibadia bona ia hakwalimudia, hari inai nega lalonai. Momokani, Keristen momokani taudia edia famili lalodiai danu, hekwarahi bona hetoho idia vara. To Baibel ena hahediba herevadia ese idia havaradia gaudia ese idia hamomokania idia durudia bada.
15, 16. Iunivesiti hahinena ta ese Iehova ena Witness taudia Zambia ai edia kara ia tahua neganai, dahaka ia davaria?
15 Iunivesiti hahinena ta Canada amo ese Zambia taudia edia noho hebou daladia ia tahudia namonamo murinai, ia gwau: “Edia headava naridia namonamo karana ai, Iehova ena Witness taudia ese tomadiho oreadia idaudia taudia idia hereadia. . . . Idia kwalimu, badina be tau be ena adavana ida idia kara heheni dalana matamatana idia badinaia. Idia hahehisi heheni toho lasi, to idia gaukara hebou, badina be idia laloa idia kara heheni karadia be kwara tauna matamatana, Dirava, vairanai do idia gwauraidia hedinarai. . . . Iehova ena Witness tauna idia hadibaia, ena lalona ai do ia goada ia lao ela bona ena adavana bona ena natuna naridia namonamo karadia do ia manadalaidia. . . . Tau bona hahine idia hagoadadia, kara maoromaoro taudia ai do idia lao . . . Hari kara maoromaoro tahua goadagoada karana ese headava ia hahekamoa.”
16 Hari hahine ese unai ripoti ia torea, taunimanima momo edia kara ia tahudia murinai. Hegeregere, ia gwau ena be tatau momo edia kara be idau, to “nega momo Iehova ena Witness tataudia ese edia adavadia be uma ai idia durudia, hegaegaelaidia negadia ai mo lasi, to hadohado bona geigei negadia ai danu.” Tanobada hegegemadai, ia hedinarai Baibel ena hahediba ese taunimanima edia noho ia hanamoa.
17, 18. Haida edia tomadiho bona edia sihari kava karadia idia tahudia neganai, dahaka idia hoalaia?
17 Tano ibounai lalonai uhau bona ulato edia kara idia tahua namonamo murinai, lagani 1991 lalonai, ripoti ta be Journal for the Scientific Study of Religion lalonai idia halasia, edia tomadiho bona edia sihari kava karadia idia gwauraidia. Oi diba idia momo idia sihari kava bona matabodaga karadia idia karaia. Vadaeni, Baibel ena hahediba herevadia ese unai edia kara ia haidaua diba a?
18 Profesa toi be unai idia tahua matamaia neganai, idia laloa do idia davaria ‘uhau bona ulato, Keristen tomadiho daladia gunadia ai idia tubu daekau taudia, momo lasi be idia do headava lasi neganai headava karadia idia karaia.’ Vadaeni, dahaka idia davaria? Uhau bona ulato 10 10 lalodia amo 7 eiava 8 be idia karaia vadaeni. Haida be “Baibel ena hereva iboudiai idia abidia dae oreadia lalodiai idia bada dainai edia tomadiho ese ia durudia do idia sihari kava lasi totona, to ‘lagani 20 idia do abia lasi taudia be unai bamona lasi.’ ”
19, 20. Dirava ena hahediba herevadia ese Iehova ena Witness uhaudia bona ulatodia edena bamona idia durudia bona idia naridia?
19 Unai profesa ese idia davaria Iehova ena Witness uhaudia bona ulatodia be “idau vaitani, uhau bona ulato oredia hegeregeredia lasi.” Badina be dahaka? “Idia dekediai idia vara gaudia, bona edia helaro, bona edia tomadiho karadia dainai, edia gwauhamata hamomokanidia karadia idia goadalaidia bona idia hebamo heheni momo. Unai ese . . . edia tomadiho herevadia badinadia namonamo karadia ia havaradia.” Ma idia gwau: “Witness uhaudia bona ulatodia edia maduna be haroro gaukarana do idia karaia.”
20 Unai hegeregerena, Baibel ena hahediba herevadia ese Iehova ena Witness uhaudia bona ulatodia idia durudia, sihari kava karadia amo do idia raka siri totona. Idia naridia dainai, pokese goreredia dika rohorohodia idia abidia lasi. Ena be ulato haida be edia bogadia ai idia noho natudia idia hamasedia, to Witness ulatodia be unai hedibagani idia davaria lasi. Uhau bona ulato idia headava mai edia lalo-goeva ida dainai, edia headava be badi aukadia latadiai idia haginidia. Unai bamona hahediba herevadia ese ita idia durua, ita haheauka, gorere haida amo ita siri, bona eda moale ita habadaia totona.
Hahegani Namona
21 Paulo be 2 Timoteo 3:3, 4 ai ia perovetalaidia karadia ma haida, idia dainai momo be iseda nega lalonai do idia haheauka be auka karadia, be mani oi lalodia: “[Taunimanima] do idia bogahisihisi lasi, haida edia ladana do idia hadikaia kava, do idia lebulebu, do idia dagedage, . . . lebulebu karadia idauidau do idia ura henia bada, to Dirava do idia ura henia maragi.” Unai hereva be maoro momokani! To, Baibel ena hahediba herevadia ese ita idia naria diba, bona ita idia hagoadaia diba, do ita haheauka bona do ita kwalimu totona.
22, 23. Ena lisi ena dokona ai, Paulo ese dahaka hahegani herevana ia gwauraia, bona ena anina be dahaka?
22 Ena lisi ena dokona ai Paulo ese hahegani herevana namona ia torea, ita danu ia hanamoa bada diba herevana unai. Ia gwau haida be “Dirava badinaia kara be toana sibona do idia hedinaraia, to iena anina momokani do idia negea. Inai bamona taudia ibounai dekena amo do oi raka siri.” Mani inai oi laloa lou: Uhau bona ulato tomadiho oreadia haida lalodiai edia sihari kava karadia be momo; unai ese ia hahedinaraia edia tomadiho be anina lasi, ani? Inai danu, taunimanima edia kara, bisinesi lalonai idia karaia karadia bona idia henudiai idia gaukara taudia eiava edia varavara dekediai idia karaia karadia, be tomadiho hahediba herevadia ese idia haidaudia, eiava?
23 Paulo ena hereva ese idia hahedinaraia, Baibel amo ita dibadia gaudia do ita badinadia be namo. Namona be eda tomadiho dalana ese Keristen tomadihona ena siahu korikorina ia hahedinaraia. Edia tomadiho dalana be siahu lasi taudia be Paulo ese ita ia sisibalai henia, ia gwau: “Inai bamona taudia ibounai dekena amo do [umui] raka siri.” Unai hahegani ese ita do ia hanamoa momokani.
24. Edena dala ai hahegani Apokalupo karoa 18 ai be Paulo ena sisiba hegeregerena?
24 Edena dala amo? Baibel ena buka ginigabena ese ariara hahinena ta ladana Babulono Badana ia gwauraia. Iena anina be tomadiho koikoi basileiana tanobada ibounai lalonai; Iehova Dirava ese ia itaia namonamo vadaeni bona ia dadaraia vadaeni. To reana ita do ia abia dae. Apokalupo 18:4 ese ita ia hagania, ia gwau: “Lauegu orea taudia e, ia dekena amo do umui raka siri, ia danu do umui kara dika hebou garina, bona ia danu panisi do umui abia hebou garina!” Unai be Paulo ena hahegani hegeregerena ani, ia gwau idia edia amo do ita “raka siri.” Momokani, Dirava ena hahediba amo namo do ita davaria dalana ma ta be, unai hahegani do ita badinaia.
25, 26. Iehova ena hahediba herevadia be hari inai negai idia abidia dae bona idia badinadia taudia be dahaka davana namona do idia abia?
25 Nega daudau lasi Dirava ese tomadiho koikoi ibounai do ia haorea, bona inai tanobada oromana dikana orena danu. Unai dainai moale do ia vara, Apokalupo 19:1, 2 ena hereva hegeregerena. Dirava ena hahediba herevadia idia badinadia taudia be ia ese dala do ia kehoa idia edia, inai nega dikana ena metau iboudiai do idia ore murinai iena hahediba herevadia do idia badinadia noho totona.—Apokalupo 21:3, 4.
26 Momokani, unai tanobada Paradaisona do ita noholaia be mai moalena bada. Dirava ia gwauhamata do ita noholaia diba, bona ita diba ia ita abidadama henia vaitani diba. Iena hahediba namona do ita abia dae bona do ita badinaia ena badina korikorina be ia ese ita ia henia. Namona be hari inai nega dikana lalonai do ita badinaia, bona Paradaiso lalonai danu.—Mika 4:3, 4.
Inai Oi Laloa Namonamo
◻ Iehova ese ena orea taudia be taga ia sisibalai henidia dainai, dahaka namo idia davaria?
◻ Jesuit magasin ta ese dahaka hahenamo ia gwauraidia, Iehova ena hesiai taudia ese ena Hereva idia badinaia dainai idia abidia?
◻ Hetahu gaukarana ta Zambia ai ese ia hahedinaraia Dirava ena hahediba herevadia idia badinadia familidia ese dahaka namo idia davaria?
◻ Dirava ena hahediba herevadia ese uhau bona ulato edena bamona idia naridia?
7. Dahaka dainai ita diba Baibel ena hereva, taga sisibalaia herevadia, be ita badinadia diba mai eda kwalimu ida?
21. Paulo ese dahaka dahaka ia perovetalaidia maoromaoro, iseda negai do idia vara?
[Box on page 15]
EDIA KERERE ENA DAVANA BE DIKA ROHOROHO!
“Memero kekeni, lagani 20 idia do abidia lasi taudia, be AIDS do idia abia be haraga herea, badina be idia ura do idia sihari kava bona drag do idia ania, bona harihari sibona do idia abia moalena idia tahua, bona badina be idia laloa do idia mase diba lasi, bona siahu taudia idia gwau-edeede henidia dainai.”—New York Daily News, Sunday, March 7, 1993.
“Europe, Africa bona Southeast Asia ai, United Nations oreana ta ese ia davaria idia sihari kava kekenidia momo herea ese AIDS gorerena do idia abia.”—The New York Times, Friday, July 30, 1993.
[Picture on page 23]
Baibel ena hahediba herevadia ese Iehova ena Witness taudia idia hanamodia, kongregesen lalonai bona ruma ai danu