Naria Namonamo Peroveta Koikoi Taudia Dainai!

BRAZIL dekenai, tau ta bona iena adavana idia lao mahuta bena idia kamonai henao taudia be edia ruma lalonai idia vareai toho. Unai tau bona hahine idia gari bada herea bona mahuta daiutuna ena uindo amo ruma idia rakatania bona polisi taudia idia boiridia. To gabeai, hahine ia gari bada dainai, ruma lalonai ia mahuta diba lasi bona iena sinana ena ruma dekenai ia lao.

Unai bamona ia vara neganai gari ia havaraia diba, bona, madi, hari inai negai taunimanima momo be unai dala dekenai hisihisi idia ania. To, henao dalana ma ta ia noho bona ia havaraia gaudia be dika herea.

Unai henao dala dikana be dahaka, bona unai henao taudia be daidia? Iesu Keriso be iseda nega ia herevalaia neganai unai henao karana dekenai ita ia hadibaia, ia gwau: “Peroveta koikoi taudia momo danu do idia toreisi, taunimanima momo do idia hakaua kerere.” (Mataio 24:11) Peroveta koikoi taudia be henao taudia. Edena dala ai? Dahaka idia henaoa? Edia henao karana be edia peroveta koikoi dekenai idia karaia. Unai dainai, unai hereva ena anina ita diba namonamo totona, namona be gau ta ita diba guna. Unai be Bible ese ia gwauraia peroveta karana be dahaka.

Peroveta Karana Ena Anina

Peroveta kara oi laloa neganai, reana oi laloa gauna ginigunana be peroveta herevana ese gabeai do idia vara gaudia ia gwauraia hedinarai. Momokani, idau negai unai be Dirava ena peroveta taudia edia gaukara kahana ta, to unai be edia gaukara badana lasi. Haheitalai be, matahanai lalonai Dirava ese peroveta tauna Esekiel ia hamaoroa “lai dekenai ia peroveta”, anina be Dirava ena amo ia mai taravatuna ta do ia gwauraia. (Esekiel 37:​9, 10) Iesu be hahelaga taudia vairanai kota ia abia neganai, ia dekenai idia kanudi bona iena vairana idia pataia, bona idia dagedage henia taudia idia hevasehalaia, idia gwau: “Keriso e, bema oi be peroveta tauna, oi hamaoroa ai dekenai, daika ese ia botaia oi?” Idia henanadai lasi Iesu be gabeai neganai do idia vara gaudia ia gwauraia totona. Idia ura Dirava ena siahu amo ia gwau daidia ese ia idia botaia.​—Mataio 26:​67, 68.

Bible gunana lalonai unai hereva “peroveta karaia” eiava “peroveta herevana” idia hahanaia ena anina be Dirava ena lalohadai gau ta dekenai idia gwauraia, eiava, Kara bukana ese ia gwauraia hegeregerena, “Dirava ena hoa gaudia idia herevalaia.” (Kara 2:11) Unai dala dekenai peroveta koikoi taudia be taunimanima momo amo idia henao.

To, peroveta koikoi taudia be daidia, bona dahaka idia henaoa? Unai henanadai haerelaia totona, namona be Ieremia ena nega lalonai Israel bese edia sivarai ita laloa.