Dahaka Dainai Henao Kara Ia Bada Noho?

RIO DE JANEIRO​—Sunday, October 18, 1992. Taunimanima ese idia herevalaia momo Copacabana bona Ipanema konedia dekenai be hutuma bada idia noho. Haraga herea, matamata taudia be kone gabudia idia vareai, idia heai heheni bona kone dekenai idia noho taudia amo davana bada gaudia idia henaodia. Henao taudia momo dainai polisi idia gini sibona​—gau ta idia karaia diba lasi. Carioca taudia bona unai gabu dekenai idia mai vadivadi taudia dekenai, unai be dina dekenai ia vara gari bada gauna.

Momokani, kohu dainai taravatu utua karadia be momo. Siti badadia dekenai, idia gwau henao taudia be matamata taudia amo edia tamaka idia henaodia totona nega haida idia aladia mase. Herevana taunimanima be ruma dekenai idia noho eiava lasi to henao taudia idia vareai. Ruma lalonai hesiai hahinedia be ruma ena lalonai idia noho kohudia edia gabu idia davaria murinai, tauanina hahairaia gaudia bona moni idia henaoa, bena idia lao boio. Taunimanima idia hutuma neganai idia ese sitoa amo gau momo idia henaodia kava. Idia gaukara hebou namonamo orea taudia be taunimanima danu idia henaodia, bona Brazil dekenai unai ia vara momo hari. Bona sedira emu sivarai ta eiava emu gabu dekenai unai bamona ia vara gauna ta oi gwauraia diba. To dahaka dainai henao karadia be momo?

Dahaka Dainai Taunimanima Idia Henao?

Ena be idia gwau ogogami bona drag dikadia ania kava karana ia bada ia lao dainai henao karadia idia vara, to unai henanadai ena haere ita davaria haraga lasi. The New Encyclopædia Britannica ia gwau: “Taravatu utua karana ena badina tamona tahua karana idia rakatania ena badina tamona be lasi.” To, unai buka be ia gwau henao bamona hekwakwanaidia sedira idia vara badina “matamata taudia idia laloa edia mauri be anina lasi bona idia badu badina taunimanima momo edia mauri lalonai idia davaria kohu bona gau namodia idia abia lasi.” Oibe, hoihoi taudia ese idia veridia momo kohu idia abia totona dainai, idia laloa idia ura gaudia abia dalana be henao karana amo sibona.

To, laloa gauna ta be The World Book Encyclopedia ese ia gwauraia, ia gwau: “Bema taunimanima idia laloa edia mauri dalana be vaia idia karaia bamona do idia karaia noho, unai gabudia dekenai taravatu utua karadia be momo lasi. To taunimanima edia noho gabudia bona edia moni gaukara idia haidaua momo gabudia dekenai​—bona gabeai mauri namona abia totona idia laloa momo neganai​—taravatu utua karadia idia bada noho. Unai tanobada aonega bukana be ma ia gwau: “Matamata taudia edia moni gaukara daladia idia momo idia lao lasi. Idia laloa idia noho moni gaukaradia be namo lasi bona unai gaukara ese edia lalona idia veria momo lasi, to henao karana dekenai idia ura gaudia idia abia haraga diba bona unai ese edia lalona ia veria. Danu, matamata taudia idia gari lasi polisi ese idia do idia dogoatao garina, badina edia mauri dekenai gau momo idia haboioa diba lasi.”

To, moni gaukara lasi eiava moni bada lasi gaukarana idia karaia taudia momo idia henao lasi, to opesi dekenai bona imana gaukara idia karaia taudia momo be gaukara gabuna dekenai idia henao, unai gaudia be hegeregere edia moni davana bamona idia henaoa. Momokani, henao karadia haida karaia totona, unai taudia be dagi bada idia abia guna. Sivarai haida umui kamonai vadaeni, ani? Moni bada idia henaoa taudia haida be politik taudia, gavamani gaukara taudia, bona bisinesi taudia. Ita daradara lasi, ita diba henao taudia be ogogami taudia sibodia lasi.

Namona be oi laloa danu, muvini piksa bona televisen dekenai, nega momo henao karana idia hahedinaraia ia be kirilaia gauna bamona sibona (reana unai piksa ese henao tauna ia gwauraia bada), bona nega momo taunimanima idia laloa henao karana be ia dika momokani lasi. Momokani, unai bamona gaudia itaia be moale karana ta sibona, to henao karadia dekenai itaia taudia ia hadibadia. Sedira idia hadibadia metairametaira taravatu utua karana idia karaia amo gau momo idia davaria, ani? Ita diba momokani, mata-ganigani, lahedo, bona taunimanima iboudiai ese idia karaia bona panisi idia abia lasi lalohadaina dainai, henao karana ia bada ia lao. Inai hereva ita koua diba lasi: hari ita be “nega dikadia” lalonai ita noho, taunimanima be sibodia edia ura idia tahua bona moni idia ura henia bada.​—2 Timoteo 3:​1-5.

Oi Henao Lasi

Ena be tanobada ena lalohadai idia gageva, to gau badana be inai taravatu ita badinaia: “Henaoa tauna be do ia henaoa lou lasi.” (Efeso 4:28) Bema tau ta ia laloa kohu eiava moale be anina bada gaudia, sedira sibona ia koia diba bena ia laloa henao karana be namo. To Dirava ena matana dekenai henao kara be gau dikana, bona henao tauna ese ma taunimanima haida ia lalokau henidia lasi. Unai sibona lasi, to henao karadia maragidia dainai henao tauna be sibona ena kudou mamina ia ha-aukaia diba. Bona taunimanima edia lalohadai iena kara koikoi dekenai be edena bamona? Daika ese henao tauna ia abidadama henia diba? Dirava ena hereva be aonega dalana ai ia hereva, ia gwau: “To ia namo lasi bema umui ta ia hisihisi, sibona ena kerere dainai. Tau ta sedira ia ala-ala, o ia henaoa, o ia kara dika, . . . bona unai kara dainai ia hisihisi. Unai bamona hisihisi be mai ena hahenamo ta lasi.”​—1 Petero 4:15.

Henao kara ia bada ia lao dainai oi moale lasi, to taravatu utua karadia momo gabudia ai idia noho taudia be edena bamona idia karaia? Guna idia henao taudia haida be edena dala ai edia mauri dalana idia haidaua? Tanobada ibounai dekenai henao karana be do ia ore, a? Namona be murina sivarai, “Henao Taudia Lasi Tanobadana Ta,” oi duahia.